Skip links

Main navigation

أهداف هذا الأسبوع – ولمحات من إسبوعنا الماضي

السلام عليكم وأهلا بيكم في أسبوع جديد وأهداف جديدة وإسبوع إن شاء الله نقوم بتحقيق كل ما نتمنى فيه

تعالوا نشوف عملنا إيه هذا الأسبوع

إحنا ما نقدرش نستغنى عن المكتبة العامة .. الإسبوع ده بعد النقل روحنا جيبنا كتب من المكتبة

 

 

حاولت أبدأ بموضوع تبسيط حياتنا اللي كلمتكم عنه المرة اللي فاتت .. الموضوع مش سهل الحقيقة بس بدأت بدواليت وتحديدا هدوم الأولاد .. وتقريبا كده خلصت ترتين نصف الصناديق وعقبال الباقي

 

دلوقتي تعالوا  نتابع أهداف الإسبوع الماضي بإذن الله

 

شخصية

إستكمال قراءة الكتاب  -تم والحمد لله وسأكتب لكم تقرير مبسط عنه لمن يريد قراءته

حلقات الوعد الحق ٤٠-٤١

صلاة القيام ٣ مرات هذا الإسبوع إن شاء الله – للأسف لم تتم لتغيير مواعيد النوم

الصلاة على وقتها مع المحافظة على السنن

قراءة يوميا بالمصحف الشريف – لم يتم بالشكل المطلوب :( مش لاقيه المصحف بتاعي

تمارين رياضية – مرتين على الأقل – يااااااي عايزة تسقيفة بقى وتشجيع

 

العائلة والزوج

الخروج مع زوجي بمفردنا – إذا سمح لنا الجو

صلة الرحم – مكالمة فرد من أفراد الأسرة الكبيرة بمصر – لم يتم

الوصول لقرار نهائي بشأن السفر لمصر في الصيف – تم والحمد لله

معاودة وإستكمال قصص السيرة النبوية مع أولادي – لم يتم

قراءة في المصحف الشريف مع الأولاد – مرتين على الأقل هذا الأسبوع – لم يتم

 

البيت

توضيب البيت وفك الكراتين والصناديق – تم بشكل جزئي وإن شاء الله نستكمل

محاولة تحقيق مبدأ البسلطة أو المينيماليزم مبدئيا في هدوم الأولاد

 

المدونة

الكتابة بشكل يومي – تم بنسبة ٧٠ بالمية

إستكمال مرحلة أخرى من الأوراق التعليمية – تم بشكل جزئي

 

أهداف هذا الأسبوع إن شاء الله

شخصية

الإستمرار في قراءة الكتاب

الإستماع إلى حلقات المقدمة و الأولى من سلسلة باسمك نحيا

صلاة القيام مرتين على الأقل هذا الأسبوع

المحافظة على الصلاة على وقتها مع السنن

قراءة يوميا في المصحف الشريف

المحافظة على الصلاة على النبي عليه الصلاة والسلام يوميا – عسى أن أرزق شفاعته

تمارين رياضية مرتين 

إسنكمال القصص النبوي مع أطفالي

 

مع العائلة والزوج

الخروج مع زوجي مرة بمفردنا إذا سمح الجو

الخروج مع الأصدقاء لخلق جو إجتماعي عربي مسلم لينا وللأولاد

القراءة مع الأولاد في المصحف الشريف ولو مرتين لكل منهم

صلة الرحم : مكالمة فرد من أفراد الأسرة الكبيرة في مصر

المدونة

محاولة قدر المستطاع التدوين يوميا ووضع مقالات مفيدة

إستكمال الأوراق التعليمية لقصة تامر والثعبان

 

شقتنا الصغيرة :: ليه حبيت النقل المرة دي؟

الإنتقال لمنزل جديد أصغر مش دايما تجربة كويسة لكن في حالتنا كان فعلا تجربة إن شاء الله أتوقع إننا نتعلم منها كتير

بالتأكيد هي مش تجربة مريحة على الأقل في الأول .. يعني زي ما إنتم شايفين الصناديق  تقريبا ماليه البيت ومفيش مكان نفكها أساسا :) .. المساحات الفاضية قليلة جدا

null

من أقل من سنتين نقلنا في بيت كبير وواسع وحلو وجميل .. لكن مع الوقت حسيت إنه مش مناسب لينا أو على الأقل مش في الفترة دي من حياتنا … ليه؟ هأقول لكم

البيت الكبير … متعب جدا في التنضيف والتوضيب بالذات لما يكون عندكم صغار وبالذات لما يكونوا أولاد .. التنضيف وراهم صعب وبهدلتهم كتير

البيت الكبير … بيساعد على الكراكيب والشراء الكتير .. اللي ليه لازمة واللي مالهوش طالما فيه مكان يبقى نشتري ونخزن ونكوم ونكركب .. كبار وصغيرين

البيت الكبير … مصاريفه كبيرة على قده .. من تدفئة لتبريد وميه وعناية بالباك يارد وخلافه من مصاريف صيانة

البيت الكبير … مش بيشعرني بالأمان بالذات مع الأطفال الصغيرة .. يعني أنا بأقضي أغلب وقتي في المطبخ أو على اللابتوب ولما حد بيختفي شوية مش بأبقى عارفة هو فين .. فوق واللا تحت بيعمل مصيبة إيه :) واللا بيلعبوا في إيه

 

دي كانت إعتراضاتي على البيت الكبير . طبعا دي إعتراضات شخصية تتوافق مع حجم أسرتي وأعمار ونوعية الأطفال فيها يعني مش ضروري كل الناس تتوافق معايا في الرأي .. لكن الأكيد اعتقد لأغلبنا هو موضوع الكراكيب ده .. كلما بنكركب بمجرد ما نلاقي المساحة اللي تسمح بكده

 

من فترة صديقة لي وريتني  حلقةمن برنامج خواطر .. رائعة فعلا فعلا أنصحكم تتفرجوا عليها

 

هزتني كثيرا جدا وأشعرتني بضرورة وجود وقفة مع النفس والزوج والأولاد .. فكرة الإستهلاك والشراء التي سيطرت على حياتنا مؤخرا – أو من وجهة نظري أنا  مع إننا قليلين جدا في الشراء والإستهلاك مقارنة بالكثيرين – لكن أنا مش عايزة أعود أولادي على كده

 

كيف أعود نفسي وأولادي على قلة الإستهلاك

في البداية فكرت أن أحذو حذو السيدة الي بالفيديو .. لكن طبعا هيكون صعب علينا ولو إن طالما هي قدرت يبقى إحنا كمان نقدر وليه لأ ؟!! إحنا أولى بإتباع نهج الصحابة والتأسي بهم وأخذ ليس فقط في الدنيا ولكن ثواب في الآخرة إن شاء الله

 

إن شاء الله هأبدأ واحدة واحدة في تبسيط حياتنا ورفض الكراكيب تأسيا بسيدنا محمد عليه الصلاة والسلام وصحابته الكرام

وهأوريكم عملت إيه يمكن أقدر أساعدكم ويبقى لي جزء من الثواب برضه

 

وعلى الرغم من إن بيتي الجديد مساحته أقل من نصف مساحة البيت اللي فات إلا إنه بالنسبة لي مريح والحقيقة مساحته أكبر من أي شقة تانية عشت فيها وعلى الرغم إنه مفيهوش أماكن للتخزين كتيرة إلا إن لسه فيه حاجات حلوة أحلى من بيتي الكبير ومنها المطبخ

null

معلش المطبخ طبعا مكركب لكن فعلا شكله أحلى بكتير وإن شاء الله واحدة واحدة نتخلص من كل اللي مالهوش لازمة بالمطبخ وبحياتنا كلها

 

إن شاء الله حتى لو حبينا بعد فترة ننتقل لبيت آخر شراء أو إيجار لن أختار بيت كبير في المساحة ولن أكركب بعد اليوم :) بإذن الله

 

أخيرا .. أحب أعتقد إن البيت الكبير كان درس عملي لي في حياتي والحمد لله فهمنا الدرس وأتمنى نسير على هدي الحبيب ويكون لنا الأجر إن شاء الله

تابعوني وشاركوني رحلتي لتقليل الكراكيب وتقليل الإستهلاك