كلام من القلب للقلب

 

 

السلام عليكم

من فترة وأنا عندي مبدأ في الغربة وهو إن أولادي ما يروحوش بيت حد من أصدقاءهم الأجانب إلا لما أتعرف الأول كويس على العائلة بتاعته .. ولو كان فيه عيد ميلاد في البيت بأحاول أتواجد معاهم قدر المستطاع

 

من فترة لما كنت مشغولة بالنقل ولما كنا هننقل ولاية تانية خالص ولد صديق إبني طلب إنه يلعب معاه في بيته وطبعا كان مستحيل أقول للولد تعالى إنت عندنل لأني كنت بأنقل .. والحقيقة كان المفروض أرفض لأني ما أعرفهمش لكن قلت دول جيراننا وكانوا ساكنين في آخر الشارع اللي إحنا فيه فقلت خلاص مش مشكلة يروح يلعب مع الولد في بيته ساعتين ويرجع

 

وراح إبني وإتبسط ولعب ورجع وكان عايز يروح الأسبوع اللي بعده كمان لكن أنا رفضت .. وبعدها بشهر واللا إتنين إبني إتخانق مع الولد ده في المدرسة وكان بيحكي لي في العربية وقال لي على العموم هو مش كويس وأنا شفت حاجة عندهم وما رضيتش أقول لك!!! طبعا قلبي وقع في رجلي .. شفت إيه يا حبيبي .. نزلت عندهم البيزمنت وكان باباه بيلعب مش عارف إيه كده وكان فيه صور على الحيطة لبنات ….. وإنتو كملوا بقا

 

وإنت عملت إيه يا إبني قال لي أنا وديت وشي بعيد وقلت أستغفر الله العظيم … طبعا مسكت نفسي بالعافية وقلت له كان المفروض إنك أول ما تشوف حاجة زي كدة تمشي على طول وتستأذن وتقول لهم عايز أروح وكان المفروض برضو إنك تقول لي علشان ما ينفعش تروح عنده تاني .. ودي حاجات عيب وربنا بيزعل مننا لما بنشوف الحاجات دي … إلخ من المواعظ والدروس بس الحقيقة أنا اللي أخدت الموعظة والدرس وهو إني لا يمكن أبدا أبدا أبدا أكرر التجربة دي ولا يمكن أسمح لهم يروحوا يلعبوا في بيت حد تاني من غير ما أكون عارفاهم ١٠٠٪ لأ مليون في المية كمان

 

حبيت أعرض عليكم تجربتي علشان تستفيدوا وتآخدوا بالكم وكمان هأقول لكم على وسائل نقدر نتعرف بيها على أصدقاء الأولاد في المدرسة من قبل ما ندخلهم بيتنا أونروح بيتهم وربنا الحافظ

 

وسائل التعرف على أصدقاء أولادنا بالمدرسة

: التطوع في المدرسة

التطوع في المدرسة مهم جدا لأنه بيورينا الجو العام في المدرسة .. التطوع في الفصل بيورينا تعامل المدرسة مع الأولاد وبيآخدوا إيه وطريقة التعليم .. وبيدينا برضه فكرة عن الأولاد في الصف مين بيتكلم مين مركز ومين لأ مين بيلعب مين بيقل أدبه وهكذا … كمان ممكن نتطوع في الكافيتيريا بتاعة المدرسة بنلاحظ مستوى النضافة وبيعملوا إيه في الأكل

 

التواجد المستمر في المدرسة بشكل أسبوعي بيخلي كمان المدرسين يعرفوا الأولاد ويبقوا مهتمين بيهم وعارفين إنكم في المدرسة ودة مهم جدا بالذات لو عندكم أولاد عندهم حالة خاصة أو مشكلة معينة .. كمان المدرسين والإدارة بتاعة المدرسة بيحبوا أولياء الأمور اللي بيتطوعوا في المدرسة لأن دة بيبين مدى إهتمامكم بتعليم أولادكم ومساعدة المدرسة

 

: الذهاب للأكل معاهم في المدرسة

بيعطي الأولاد ثقة كبيرة في نفسهم وبتشوفوا أصحابهم بعيد عن جو الفصل بيتصرفوا إزاي بيتكلموا إزاي بيتعاملوا معاكم إزاي بتقدروا تشوفوا شخصيات أصحابهم ونقدر نسأل أسئلة عنهم ونستفسر أكتر ولما ييجوا البيت بعد كدة يحكوا لنا أي حكاية عن أولادهم نقدر نبقى عارفين هم بيتكلموا عن مين ونقدر نحكم مثلا ونعلق مثلا نقول لأ ده شكله ولد كويس ومش ممكن يكون يقصد كدة وهكذا

 

: نآخدهم ونوديهم المدرسة مشيا على الأقدام

 

ودي مش معناها مشي فعلي لكن ممكن نركن العربية وننزل نآخدهم على رجلينا أو نوصلهم .. جه بيدينا فرصة أكبر نتعرف على أولياء الأموز ونآخد وندي معاهم في الكلام ونعرف طبيعتهم بيشتغلوا إيه بيشتغلوا فين .. هم منين أصلا لو مش من أمريكا .. ثقافتهم وهكذا

 

 : وأخيرا .. الحدائق العامة

 

آخر حيلة بقا في جعبتي اليوم … لو لقيتم حد من ولادكم بيتكلم كتير عن ولد معين أو بنت معينة … هاتوا نمرة تليفون مامتها وكلموها أو إبعتوا رسالة قولوا فيها إنك مامة فلانة وعايزة بنتك تخرج مع بنتها في البارك بيسموه هنا

play date

وإختاروا بارك يكون بينكم وبينها أو قريب من المدرسة مثلا علشان تتقابلوا ساعة واللا حاجة تتعرفوا فيها على أولياء الأمور وتشوفوا إيه نظامهم وتتعرفوا على الولد أو البنت

 

 : مرفوض مرفوض مرفوض

مرفوض تماما .. وأعتقد كتير منكم هيوافقوني .. موضوع النوم برة البيت يعني السليب أوفر

Sleep over

 بمعنى إن بنتك تبات عند صاحبتها أو العكس .. بالنسبة لنا الموضوع ده مرفوض بتاتا نهائيا مؤكدا كمان مهما كنا نعرف العائلة لا يمكن أخلي ولادي يباتوا عند حد نهائي ولا حد ييجي هنا … خلينا في السليم أحسن

 

أتمنى يكون موضوع اليوم عجبكم وإستفدتوا منه … لو عندكم أي أفكار تانية يا ريت تشاركونا بيها في التعليقات … مع تحياتي

Image courtesy of stockimages at FreeDigitalPhotos.net

طبعا زي ما كلكم عارفين أنا نقلت شقق وبيوت من ساعة ما حطينا رجلنا في أمريكا سنة ٢٠٠٧ لغاية دلوقتي بالظبط ٧ مرات يعني لو أخدنا متوسط يبقى حوالي كل سنة وسهرين كدة واللا حاجة بننقل .. رقم قياسي مش كدة

 

وعلى الرغم إن النقل ما بقاش يستهويني خلاص وزهقت من مغامرات النقل .. بصراحة الأولاد لما بننقل بيتعبوا جدا مش بس التأقلم على المكان لأ ده إحنا كمان كنا بننقل مدارس وفي نص الدراسة مفيش عندنا أي مشاكل

 

العزال أو النقل هنا في أمريكا ممكن من أول إنكم تعملوا كا حلجة بنفسكم لغاااااية إنكم تمشوا من البيت وتسيبوه لشركة تلم لكم كل حاجة في صناديق حتى الملابس وتلف العفش وكل شيئ وتروح المكان التاني وكمان تفرد لكم الهدوم في الدواليب وترتب لكم البيت وكله بتمنه بالتأكيد

 

طبعا للي بيتابعوني عارفين إني لا يمكن أعمل الأوبشن الأخير ده حتى لو معايا فلوس بصراحى قلبي  يآكلني على الفلوس الكتير دي ههههه يعني يمكن أعملها بس لو مضطرة بقا مثلا لكن أدفع المبالغ الوهمية دي في النقل .. نو نو يبقى خلينا في مكاننا أحسن

المهم طبعا كل واحد أدرى بظروفه .. وممكن يكون فيه ناس ما عندهاش وقت ووقتها بفلوس يبقا في الحالة دي على رأي المثل شرا العبد ولا تربيته على رأي جدتي الله يرحمها

هأقول لكم على خلاصة تجربتي وإيه اللي لقيته بينفعني شوفوا يمكن يساعدكم

أولا: نبدأ بدري قدر المستطاع

في الغالب بنعرف إننا هنمشي على الأقل قبلها بشهر إن ما كانش إتنين لأ فيه أماكن للإيجار بتشترط تبلغوهم قبلها بشهرين.. يعني بيكون عندنا وقت كافي فنبتدي بدري .. طيب نبدأ بإيه.. حاجات كتير

مثلا … الملابس مش معقول هنلبس كل هدومنا في الشهرين واللا الشهر المتبقي يبقى الأحسن نلم الهدوم ويا ريت أغلبها .. طبعا نبدأ بالهدوم اللي مش في السيزون يعني لو إحنا في الشتا نلم الصيفي والعكس صحيح .. لو حالكم زي عندنا هنا في كلورادو الأيام ملخبطة والصيف والشتا ساعات كتيرة بيدخلوا في بعض يبقى نسيب أقل القليل يعني جاكيت من هنا على بنطلونين و٣ أو ٤ تي شيرت نصهم بكم والباقي نص كم وبيجامتين وكام غيار داخلي وخلاص والباقي يتلم كله في الكراتين وطبعا على حسب عمر كل فرد وإحتياجاته يعني مثلا لو طفل صغير ده أكيد بيوسخ كتير ومحتاج هدوم أكتر وبرضه في الفترة دي نعمل حسابنا نغسل على طول علسان ما يحصلناش عجز في الهدوم

 

المطبخ .. مش ضروري المحمر والمشمر في الفترة دي يا ريت يبقى أكلنا سهل وخفيف  نسيب صنيتين وحلتين وخلاص ولو نقدر نستغنى عن الأطباق والكبايات ونشتغل بالأطباق الورق والكبايات البلاستيك وخلاص فترة معلش وتعدي هي هتبقى طبعا مكلفة أكتر لكن ده وضع مؤقت مش دائم

وهكذا في كل شيئ … زي لعب الأطفال .. الكتب والمجلات ..لو معلقين تابلوهات وساعات على الحائط .. يعني كله

 

ثانيا ::كراكيب البيت

مفيش بيت مفيهوش كراكيب وزي ما قلنا قبل كدة كراكيب عندكم بس عند غيركم أساسيات .. وإحنا بنلم الحاجات بتاعتنا نشوف إيه اللي خلاص عفى عليه الزمن بالنسبة لينا ونقدر نستغنى عنه سواء إحنا مش محتاجينه تاني أو مفيش مكان مثلا في الشقة الجديدة ليه من هدوم وحاجات مطبخ ولعب وأدوات في البيت وهكذا وكل ده يتلم ونبيعه واحدة واحدة إما على كريجز ليست أو نعمل جراج سيل .. إقرأوا عن الموضوع ده هنا لمزيد من الأفكار

 

ثالثا :: ما تشتروش أكل .. خلصوا اللي في التلاجة الأول

حاولوا بقدر الإمكان كل الأكل اللي في التلاجة والفريزر ودولاب المطبخ يخلص الأول .. وخلينا نبقا كريتيف يعني مفيش مانع لو عندنا مثلا عدس كتير نعمل شوربة عدس أو رز بالعدس .. مكرونة بالعدس .. عدس بجبة .. عدس بالعدس هههه يعني ألفوا أطباق المهم يبقا الشرا في حدوود جدا جدا

 

رابعا :: قسموا البيت لغرف وقسموا الغرف لمناطق

يعني إيه الكلام ده يعني خلونا نعمل واحدة واحدة لو فضلنا نقول لنفسنا عايزين نعزل وعايزين نلم البيت كله هنحس إن الموضوع كبير ومش راضي يخلص .. خلونا نقسم البيت مثلا لغرف .. أوضة الأولاد وأوضتنا .. المطبخ .. الصالة وهكذا وكل أوضة نقسمها مناطق مثلا الأسبوع ده هنآخد غرفة الأولاد أول يوم دولاب الملابس .. تاني يوم دولاب اللعب .. تالت يوم الأحذية .. رابع يوم الكتب والقصص وهكذا ودي ميزة خطيرة في إننا نبدأ بدري إننا نقدر نمشي حبة حبة من غير ما نحس إننا مش عارفين نبدأ منين والوقت ضيق

 

خامسا:: إسالوا المساعدة

لو تعرفوا أصحاب أو جيران يساعدوكم يلموا معاكم الحاجات أو مثلا يأخدوا الأولاد عندهم علشان البيت يبقا فاضي ورايق وتقدروا تلموا الحاجات بسهولة يبقا كتر خيرهم ومفيش مانع أبدا إننا نسأل أصدقاءنا في الغربة إحنا هنا أهل لبعض ومالناش غير بعض في السراء والضراء وربنا ما يجيب ضراء. والحمد لله أنا هنا ربنا رزقني بمجموعة من الأصدقاء كأنهم أهلي ولما بأحتاج شيئ أو بأقع في أي أزمة دايما بيكونوا معانا ربنا يكرمهم ويصلح حالهم جميعا

 

سادسا :: إكتبوا كل حاجة على الكراتين

ودي بقا نصيحة مش عارفة أأكد عليها كام مرة مليون واللا إتنين .. كل كرتونة تكتبوا عليها بالإنجليزي تروح فين علشان لو معاكم عمال يعني مثلا أوضة النوم الرئيسية – الصالة – المخزن – غرفة الأولاد وهكذا

وتحتها بقا وبخط خفيف كده ليكم بالعربي تكتبوا فيها إيه بالظبط لو تقدروا تكتبوا كل فتفوتة بقا كويس أنا بأقول بالعربي لأن فيه حاجات خاصة ما نحبش حد يعرفها وعلشان كدة بأقول لكم إكتبوها بالعربي بس تبقا واقعة بقا لو العمال اللي معاكم عرب ههههه يعني إبقوا إكتبو بالكود بقا وإنتو تفهموا وتفكوا الشفرة

 

سابعا : كراتين الإحتياجات الرئيسية

آخر حاجات بقا قبل ما نعزل خالص نعمل لكل واحد كرتونة ويبقا فيها حاجاته الرئيسية اللي عاش بيها مدة الشهر ده من هدوم لأحذية – فرشة الشعر – فرشة الأسنان وهكذا وبرضو نعمل واحدة للمطبخ فيها المعالق والشوك البلاستيك المتبقة أو لو معانا معالق عادية وأطباق وبراد الشاي والقهوة لو إنتم زينا .. أدوات تنضيف وصابون يعني الحاجات اللي أول ما هنوصل البيت لازم نستخدمها نعملها في ٤ كراتين مثلا أو أكتر وتتحط آخر حاجة في عربية الشحن بحيث إنها تنزل أول حاجة وتبقوا عارفين مكانها فين

 

دي مجموعة من النصائح اللي في بالي دلوقتي .. إنتظروني في الجزء القادم إن شاء الله إزاي ننقل بأقل تكاليف ممكنة وأتمنى أكون ساعدتكم أو إديتكم بعض الأفكار

 

يا ريت لو عندكم أفكار تانية تشاركونا بيها في التعليقات .. وشكرا لكم

 

الأسبوع الماضي كان عندي ضيوف أعزاء من السعودية وعلشان كده غبت شوية عن المدونة .. إستمتعنا بالصحبة والحمد لله

دلوقتي بقى مع متابعة للي حصل الأسبوع اللي فات وما تم تحقيقه وما لم يتم

 

 

وزي ما إنتم شايفين فيه تحسن شوية

والآن مع أهداف هذا الأسبوع إن شاء الله

 

أولا: أهداف شخصية

قراءة في كتاب :  هارون الرشيد الخليفة المفترى عليه

 

صلاة القيام : مرتين على الأقل هذا الأسبوع

الإستماع إلى حلقة المقدمة و ١ و ٢ من الجنة في بيوتنا

المواظبة على شرب ٢ كوب ماء قبل الوجبات وعلى الفيتامينات

تمارين رياضية ٣ مرات على الأقل بواقع نصف ساعة كل يوم

محاولة النزول في الوزن باوند هذا الأسبوع

المحافظة على الورد اليومي والصلاة على وقتها مع السنن

 

مع الزوج والأولاد

الخروج مع زوجي مرة للتمشية مثلا

محاولة إيجاد روتين يومي قبل النوم وعند الإستيقاظ للأولاد

قراءة مع الأولاد بالمصحف الشريف

 

البيت

 

تعبئة الهدوم الشتوي إستعدادا للنقل

 

المدونة

التدوين يوميا قدر المستطاع

وضع خطة لمزيد من المقالات والتجارب في إصنع بنفسك ووصفات الطعام

وصفات للجمال والرجيم

فيديو مؤثر في رأيي فعلا وتذكرت معه مدرسين لي بالمدرسة فعلا كانوا مؤثرين .. جزاهم الله خيرا وجزى كل من علمني حرفا خير الجزاء … رحم الله من توفى منهم ومن تبقى على قيد الحياة ….أتمنى أن أرى أمثال هذه المدرسة في مدارسنا