كلام من القلب للقلب
فضفضة :: وماذا بعد٣ ……؟
السلام عليكم
إمبارح كانت الكتابة والفضفضة مؤلمة شوية بالنسبة لي نتيجة لإحساس الندم اللي كنت بأحكي لكم عليه .. بس الواحد أخد درس فعلا إن الحاجات دي ما تدخلش بيننا وبين بعض للدرجة دي أو ما تأثرش على قراراتنا بالشكل ده .. بس الدرس كان صعب الصراحة
رحلة الذهاب
زوجي الله يكرمه حجز لي طيران في يومها الساعة ٥ العصر … ولأول مرة أروح مصر بشنطة سفر صغيرة جدا جدا وهي الكاري أون اللي بنشيلها معانا في الطيارة ومفيش معايا شنط تاني ومش عارفة حطيت فيها إيه أي حاجة وخلاص المهم إني أسافر
كانت رحلة سيئة إلى أقصى حد … مش عارفة أقول لكم إيه ربنا ما يكتبها على حد فيكم يا رب … ولا يكتبها علينا تاني
نتيجة السرعة في الحجز ما إخترتش الكرسي طبعا وروحت الطيارة وإذا بي بين رجالة عن يميني وعن شمالي واحد فيهم صغير في السن وكان رفيه وملموم في الكرسي بتاعه … التاني بقى أعوذ بالله منه .. أولا قاعد واخد راحته وأنا مش في مود الخناق وقعدت أتنحنح وأتحرك وأبين ضيقي وطبعا كل أما أعمل كده يفتكر ويحاول يتلم في كرسيه بس يرجع تاني يرحرح في القعدة كأنه قاعد على كنبة بيته!!! غير كده كان فاتح خمارة قدامه والعياذ بالله والريحة تقرف
طبعا أنا غلطانة كان المفروض أسأل المضيفة عن كرسي تاني أو أتلكك وأقول لهم عندي حساسية من الخمور وريحتها ودي كانت حتخليهم ينقلوني كرسي تاني بسرعة .. بس يللا معلش مكنتش مركزة وكانت حالتي سيئة جدا جدا وطول الرحلة بأدعي وأقرأ قرآن علشان أهدى شوية
آخر ساعتين في الطيارة كنت تعبانة جدا جدا وزي ما يكون مش قادرة أقعد على بعضي فعلا خلاص هأقوم أفتح بابا الطيارة وأنزل مش قادرة أنتظر أكتر من كده
…
فضفضة:: ماذا بعد٢…..؟
قبر والدي رحمه الله
السلام عليكم
إستكمالا لما بدأته أمس من فضفضة عما بداخلي لعل ةعسى يهديني الله وأسمع منكم دعوات تثبتني وتريح قلبي يا رب
ليلة الوفاة
والدي رحمه الله كان هيدخل العمليات الساعة ١١ ص بتوقيت القاهرة .. ويوم الجمعة الساعة ١١ ونصف بالليل عندنا هنا كانت الساعة ٩ ونصف صباحا بتوقيت القاهرة .. حسيت بإحساس قوي إني عايزة أكلمه قبل العملية لكن قلت في نفسي خلاص بقى بدل ما يكون مش قادر يكلمني خليها إن شاء الله الصبح يكون عمل العملية وفاق بإذن الله وبقى كويس أكلمه أحسن … وما تتصوروش ندمي على إني ما كلمتهوش وقعدت أقول يا ريتني كلمته وخلاص .. الحمد لله
…
فضفضة :: ماذا بعد …..؟
حبيبي … ترقرقت عينيك بالدموع لما رأيتني بثوبي الأبيض
وترقرقت عيني بالدموع ولم تتح لي حتى فرصة رؤيتك بثوبك الأبيض
ولكنها دموع غير الدموع …. وثوب غير الثوب … وحشتني يا حبيبي
جزاك الله عنا خيرا ورزقك الفردوس الأعلى وجمعني الله بك قريبا يا رب
السلام عليكم جميعا
اليوم هو ذكرى مرور شهر على رحيل والدي عن هذه الدنيا التي لا تساوي عند الله جناح بعوضة وهي فعلا كذلك
إن شاء الله هأرجع من اليوم وهأحاول أكون زي الأول لسبب هأوضحه لكم في آخر كلامي بعد ما كنت تقريبا قررت إعتزال البلوج والمنتديات والإنترنت بل والحياة كلها … هتقولوا لي كل ده علشان والدك مات؟!!! إنتي مش أول ولا آخر واحدة … وده صحيح ١٠٠٪ فعلا .. بس الإحساس بالتعب .. الزهق … الندم القرف من الدنيا والناس عندي أحاسيس ومشاعر متلخبطة كتير قوي
أنا عندي إحساس إني عاملة زي إبرة البوصلة اللي أخدت قلم على وشها وعمالة تلف تلف وتتهز مش لاقية الشمال من الجنوب .. بس أكيد شوية وهتدأ وهتلاقي الطريق .. ومن البوست ده إن شاء الله بداية الطريق
…
والــــــدي
وداعا يا نبع المحبه وداع يا بئر الحنان
عليك رحمة من الله فهو الرحيم الرحمن
توفي والدي فجأة يوم ٢٠ سبتمبر … إسترد الله وديعته في لحظات … فلله ما أعطى ولله ما أخذ وكل شيئ عنده بمقدار
ولنا في رسولنا الكريم أسوة حسنة .. إن العين لتدمع وإن القلب ليحزن ولا نملك إلا أن نقول إنا لله وإنا إليه راجعون
أسألكم الدعاء لنا بالصبر والثبات وله بالرحمة والمغفرة ولأموات المسلمين جميعا
أستأذنكم في التوقف عن الكتابة مؤقتا …حتى ألملم شتات نفسي وجزاكم الله خيرا
طرق لشحن الطاقة النفسية والجسدية-١
السلام عليكم
في عالم مجنون مجنون .. مليئ بالأطماع والأحقاد .. مليئ بالمؤامرات السياسية … مليئ بالموتى والدم من كل شكل ولون وكأن دم الإنسان بقى لا يساوي شيئا .. صفر … بقى يساورنا الشك في كل شيئ .. والحقيقة أنا وأعتقد غيري تاهت خطانا .. الحقيقة أوقات كتير مش بأبقى عارفة إيه الصح من الغلط .. وعلى رأي المثل المصري اللى تفتكره موسى يطلع فرعون !!! ناس كتير وثقت فيهم وفي كلامهم وأكتشف إنه ستار .. ستار لمؤامرات وأطماع سياسية وشخصية وأغراض زائلة .. من أول بعض الأصدقاء – ومش كلهم والحمد لله … لسه فيه خير – إلى الساسة وقادة الدول وصولا إلى بعض رجال الدين … وخلافه
وكان الطبيعي إني وغيري نحس بالضياع والإكتئاب وإهتزاز كل القيم والمبادئ .. والقرف والزهق من الدنيا ومن اللي فيها والعيشة واللي عايشينها وإستحواذ النظرة السوداوية على حياتنا .. مبقاش الواحد طايق كلمة ولا نظرة ولا حوار مع حد نهائي .. لا والدين ولا إخوات ولا زوج ولا أولاد
ده غير ضغوط الحياة المستمرة – ولو إننا هنا في نعمة والله- والمشاكل المادية ومشاكل الأولاد الله يهديهم .. وده كله سبب لي مشاكل جسدية بدون ما أشعر.. والإحساس الدائم بالتعب وعدم القدرة على شيئ ولا حتى على مواصلة الحياة
وكان من الطبيعي إني أبدأ رحلة مع نفسي للبحث عن الهدوووء والسكينة الداخلية … أجيبها منين ؟ حد يدلني عليها .. لازم وقفة مع النفس .. لازم نعرف الغلط فين .. بعض الناس بتصل -ولولا الإيمان بالله والخوف منه – إلى الإنتحار .. الله يبعد عني وعنكم كل سوء لكن فعلا الموضوع زاد عن حده وكل ما أكلم حد في مصر ألاقيه غضبان وشايط وتعبان ويلعن في كل شيئ حواليه
ما ينفعش نستمر كده … حقيقي … غلط ومش صح وممكن نصاب بأمراض عضال فعلا من حالتنا النفسية .. حاولت كتير أقرأ قرآن وأستعيذ بالله من الشيطان الرجيم واسمع قرآن و و … بأرتاح شوية لكن بأرجع تاني!!! لسه المشكلة مش هتتحل فقط بسماع القرآن .. الغلط في أنا جوايا أنا .. فيه عدم توكل على الله .. أنا بأقولها بلساني لكن قلبي مش حاسس بيها صح
تعالوا معايا ومع علماءنا الأجلاء وقراءات لبعض المقالات في تحسين الحالة المزاجية والجسدية نحط مع بعض إستراتيجيات إنشراح الصدر وجلاء الهم والحزن بإذن الله وتحسين الحالة الجسدية وإستعادة النشاط والإبتسامة
أولا :: معرفة أسباب ضيق الصدر
لازم نعرف أسباب ضيق الصدر اللي عندنا …إيه أنواع المصائب والإبتلاءات اللي عندنا…. مشاكل مع الأولاد/ الزوج/ الزوجة/ المدير في العمل .. طيب يمكن مشاكل مادية ..مشاكل صحية؟ خلونا نكتب كل اللي مضايقنا في ورقة .. ويمكن ورقتين على حسب بقى كل شخص
ثانيا :: إبتغاء الأجر
الإبتلاء خلاص واقع علينا وليس لنا حيلة فيه ما نخليش المصيبة إتنين كفاية إنها واحدة يبقى عند وجود البلاء أو المشكلة نصبر ونحتسب ونبتغي الأجر .. يعني علشان ما نطلعش بإيدينا فاضية منها نآخد لنا كده كام ثواب على الماشي
تعرفوا عندي ولد من أولادي بالمصري كده مطلع عيني .. عليه عفريت والعياذ بالله .. حقيقي خايفة عليه وعلى مستقبله وتقريبا كل أسبوع لازم أتقهر منه وأبكي عليه وعلى حاله .. ومن كتر إكتئابي منه دخل الشيطان ودخلت معاه كلمة إشمعنى وليه يا رب؟!!! والكلام اللى ما ينفعش ده .. دلوقتي بقيت لما يعمل مصيبة من مصايبه أستغفر الله ١٠ مرات قبل ما أنفعل عليه وأدعي له وأحاول قدر المستطاع أصبر .. وأقول لنفسي الأجر يا رب .. الاجر
ثالثا:: اللي يشوف بلوة غيره تهون عليه بلونه
مثل مصري صميم وأكيد تعرفوه وصحيح ١٠٠٪ .. بصوا لبلاوي الناس اللي حواليكم
واحدة زوجها ماشي مش ولا بد … وواحدة زوجها بيضربها مثلا .. أبناء عاقين .. ناس مريضة بمرض لا شفاء منه ولا أمل.. ناس فقدوا عائلهم الوحيد وهكذا
تعرفوا مؤخرا بعد ما سمعت النقطة دي تذكرت قريبة لي .. تقريبا من ١٠ سنين كده فقدت إبنها ثم إبنتها ثم زوجها في مدة تقريبا سنتين وخمس شهور .. أتذكر أمي في عزاء زوجها بتقول لها مش عارفة أقول لك إيه .. الناس مش عارفة تقول لها إصبري .. يعني كل شوية نروح نعزيها … صدمة ما بعدها صدمة فعلا … لما بأفتكرها ولما إبني بيعذبني ويتعبني بأقول في نفسي لا يا رب .. أستحمل ولا أشوف يوم زي ده فيه .. ربنا يخليه ويصلح حاله وأشوفه أحسن الناس يا رب وأولادكم جميعا
الشيخ عمر عبد الكافي له حكاية شهيرة جدا راائعة .. بيقول فيها رجل باع كل اللي حيلته حتى يطعم أولاده وتدهور به الحال حتى إنه باع الحذاء بتاعه وكان جزين على نفسه وبيقول في نفسه وصل بي الحال للدرجة دي .. ودخل مسجد ليصلي فوجد رجل فاقد قدميه.. قال الحمد لله يا رب إن لسه عندي أقدام أمشي بيها وأتحرك
رابعا:: إحرصوا على النوم فترات كافية
قلة النوم تسبب الإكتئاب .. حاولوا تناموا كويس في أوقات طبيعية .. النوم بدري قدر المستطاع والإستيقاظ مبكرا من أهم عوامل الراحة النفسية .. لو مش قادرين تناموا بدري يبقى لازم تحاولوا تناموا في نص النهار ولو نصف ساعة .. ولمن يعاني الأرق وعدم القدرة على النوم بسبب التفكير في مشاكل أو مشاغل .. حاولوا قبل النوم بنصف ساعة تهيئة البيت للنوم .. يعني إيه
نقفل الموبايلات .. نقفل اللابتوب والتلفزيون وكل الإلكترونيات .. آخذ حمام دافئ للإسترخاء … نطفي أنوار البيت ما عدا أنوار بسيطة
لو مش قادرين وجدولكم مشغول دايما …يبقى على الأقل ٣ أيام في الأسبوع تحاولوا تناموا ٧ ساعات متواصلة وباقي الأيام إبقوا قللوا ساعات النوم .. صدقوني الموضوع ده بيفرق جدا جدا .. وإسألوا كده الأمهات اللي لسه مخلفين بيبي جديد ليه على طول زهقانين وبيعيطوا وتعبانين .. من قلة الراحة والتعب والمسئولية ولسه التقيل ورا هههههه
كفاية بقى عليكم كده النهاردة … يا ريت تسيبوا لي تعليقاتكم
إسمعوا كده المقطع ده للشيخ الشعراوي رحمه الله
طرق لشحن الطاقة النفسية والجسدية
كنت كتبت لكم من كام يوم دعوة للتفاؤل وتجربتي البسيطة معاها وإن بإذن الله بكرة هيكون أجمل ولازم نعتقد في كده
الحقيقة الوضع اللي بتمر بيه بلاد المسلمين كلها يدعو للإكتئاب أو على الأقل دي وجهة نظري … كل أما أفتح التلفزيون نلاقي حرب هنا وقتل هناك وخراب في كل مكان بالعالم مش بس بلاد المسلمين ولو إن بلاد المسلمين لها نصيب الأسد من الخراب والدمار والقمع والقتل وخلافه
ده غير الأمور والمشاكل الشخصية اللي بتصيبنا بالزهق من العيشة واللي عايشينها على رأي المصريين … مشاكل الأولاد الشغل البيت الشارع وغيرها من ضغوط الحياة اللي بتسبب الأرق والأمراض العصبية والنفسية والجسدية أيضا
من يومين قابلت صديقة عزيزة علي وأول ما شافت وشي قالت لي مالك؟ الحقيقة كانت عفاريت الدنيا بتتنطط في وشي وقولت لها حاسة إن حياتي ملخبطة ومتبهدلة ومش منظمة وكل حاجة مقلوبة وما عنديش طاقة أعمل حاجة وحاسة بالتعب على طول!!! بشكل غريب… ردت علي وقالت لي وأنا كمان
مين فيكم بيشعر بالشعور ده إنه على طول مش قادر طاقته محدودة ومش قادرين حتى نقوم من مكاننا نعمل حاجة … ويا ترى ليه الشعور ده؟ اللي عرفته إن ده شعور ناتج من نقص الطاقة الجسدية والروحانية يعني نفسي وجسدي مش بس جسدي
ولأننا مؤمنين بالله وإنه المطلع على خفايا الأمور وهو الكريم الرحيم وفعال لما يريد فالمشيئة بيد الله سبحانه وتعالى يصرف الأمور كيف يشاء وإن شاء الله كله خير … ولمساعدتكم – إذا كان عندكم نفس الإحساس بتاعي – ولمساعدة نفسي معاكم بدأت أقرأ وأسمع لمحاضرات وكتب لكل من الدكتور مصطفى محمود والدكتور إبراهيم الفقي رحمهما الله رحمة واسعة
الحقيقة هم بحر من العلوم والإيمان والدراسة وكلامهم مريح ويدخل القلب والعقل معا … وأقرأ أيضا في بعض المقالات عن النفس وشحن العاطفة والجسد معا شحن إيجابي .. وإن شاء الله هأتشارك معكم بعض مما قرأت وأشعر إنه يناسبنا دينيا ويناسب أسلوب حياتنا ونجرب سوا عسى أن أنفعكم وأنفع نفسي معاكم وأتمنى لو عندكم أي إقتراحات تضيفوها في التعليقات
تــــــابعوني وشاركونــــي لحياة أفضل بإذن اللـــــــه