قبر والدي رحمه الله
السلام عليكم
إستكمالا لما بدأته أمس من فضفضة عما بداخلي لعل ةعسى يهديني الله وأسمع منكم دعوات تثبتني وتريح قلبي يا رب
ليلة الوفاة
والدي رحمه الله كان هيدخل العمليات الساعة ١١ ص بتوقيت القاهرة .. ويوم الجمعة الساعة ١١ ونصف بالليل عندنا هنا كانت الساعة ٩ ونصف صباحا بتوقيت القاهرة .. حسيت بإحساس قوي إني عايزة أكلمه قبل العملية لكن قلت في نفسي خلاص بقى بدل ما يكون مش قادر يكلمني خليها إن شاء الله الصبح يكون عمل العملية وفاق بإذن الله وبقى كويس أكلمه أحسن … وما تتصوروش ندمي على إني ما كلمتهوش وقعدت أقول يا ريتني كلمته وخلاص .. الحمد لله
ولما صحيت من نومي قولت أكلمهم أطمئن عليه وكان عندي هاجس غريب إنه ما فاقش من البنج وإنه في غيبوبة وقعدت أقول أعوذ بالله من الشيطان الرجيم طيب أنا هأتكلم دلوقتي حالا علشان أطير من دماغي وساوس هذا اللعين
وفعلا كلمت والدتي وإذا بي يأتيني صوتها مخنوق وأنا بأقول لها السلام عليكم وهي بترد وأنا سامعة صوتها وبأكدب نفسي لا لا هي كويسة يمكن بس تعبانة شوية … وبأقول لها عاملين إيه ترد على وهي بتبكي وتقول الحمد لله على كل شيئ وتبكي بكاء مرير!!! لا لا مش قادرة أصدق فعلا .. لا مش صح مش بتعيط
وأجهشت أمي بالبكاء وأنا أصرخ وأقول لها فيه إيه؟ قولي فيه إيه؟
وترد على أمي من وسط دموعها بابا يا أميرة!! بابا مات!!!مات
إيه؟؟؟ كان عندي أمل تقول لي تعبان في غيبوبة مثلا عنده نزيف في العناية المركزة أي حاجة إنما مات!!! كده خبط لزق … مرة واحدة؟؟؟؟ إزاي
طبعا رديت عليها وقولت لها إيه؟؟؟ متأكدين؟؟؟ ليه ليه كده؟ إيه اللي حصل
وترد علي أمي في ١٠ دقايق يا أميرة كان راح مننا جات له أزمة قلبية فجأة قبل ما يدخل العمليات
الله ده بجد فعلا … مش قادرة أصدق ولغاية دلوقتي مش مصدقة فعلا
وإنهرت في البكاء بصوت عالي ولم أستطع التوقف .. وقعدت أقول إنا لله وإنا إليه راجعون وأمي ترد وتقول لي أيوة كده قولي كده والحمد لله على كل شيئ … وبكيت بكاء بصوت وأولادي وزوجي جم على صوتي فيه إيه يا ماما؟ وأنا مش قادرة حتى أرد
فقط كنت أقول إنا لله وإنا إليه راجعون .. اللهم أجرنا في مصيبتنا وأخلفنا خيرا منها
وقفلت السماعة مع والدتي وإنهرت في البكاء أنا وكل من حولي وزوجي قعد يسألني بدهشة ليه؟ في العملية واللا إيه اللي حصل؟ وأنامش مصدقة فعلا ومش عارفة أتكلم وأقول أي حاجة مشلولة
قمت من مكاني أتوضيت وصليت لعل الله يربط على قلبي ويلهمني الراحة والسكينة .. وطبعا إنهالت على المكالمات من مصر إخواتي وأقاربي وصديقات عمري .. كلهم كانوا منتظرين إني أعرف علشان يكلموني
ندم …. وحسرة
زوجي قعد يحاول يدور لي عل تذكرة سفر علشان أنزل مصر بأسرع وقت ممكن … وأنا قعدت أقرأ قرآن وأفكر وأندم وأتحسر
أندم على إيه وأتحسر على إيه… على إني قبلها بشهرين كنت في مصر زيارة سريعة ٣ أسابيع فقط!!! وأتذكر والدي وهو بيقول لي الزيارة دي مش محسوبة!!! ٣ أسابيع بس ما لحقتش أشوفكم وأشوف الولاد
طبعا حضرتي اللي صممت إني أنزل وأرجع من زوجي والسبب؟ الظروف السياسية اللي في مصر وإختلاف وجهة نظري مع تقريبا ناس كتير من اللي حوالي في مصر ومنهم والدي رحمه الله … لا لا أنا زهقت وتعبت من إنهم شايفين الظلم وساكتين وإنهم بيسمعوا من ناحية واحدة بس .. لا لا كل طرف غلطان وكلهم مش بيهمهم غير المصالح السياسية والسياسة قذارة وكلهم كدابين من ده لده كلهم كدابين … مش عارفة أفسح أولادي ولا أتبسط معاهم في مصر وما كنتش عايزة أنزل أساسا والحمد لله إني نزلت وإلا كان إحساسي بالندم هيتضاعف
بصيت بس لمصلحتي وراحتي وراحة أولادي … وأنا مسافرة من مصر والدي الله يرحمه قال لي السنة الجاية إن شاء الله تيجي الصيف كله علشان أتمتع بيكم .. وأنا أقول إن شاء الله وما عملتش في حسابي إن أمر الله بالموت قد يحكم عليهم في أي وقت وممكن ما ألحقش السنة اللي جاية .. خليت السياسة القذرة وإختلاف وجهات النظر تقف بيني وبين من أحب وتصورت إن السنة اللي جاية أبقى أقعد معاهم وقت أطول!!! كأني ضامنة اننا هنكون موجودين للسنة اللي جاية .. وتحسرت وندمت ولعنت السياسة ولعنت أطرافها المتناحرة … لعنهم الله جميعا
لي عودة إن شاء الله لأني مش قادرة أكمل فعلا دلوقتي إدعوا لنا بالصبر ولأبي وموتانا بالرحمة
سيرين says
السلام عليكم ورحمة الله
فرغي كل الي جواك عشان ترتاحي يا اميره
اقدر الله وما شاء فعل كلمة لو من عمل الشيطان
والحمد لله انك كنت نزله مصر وشيفاه قبل ما يتوفى الله يرحمه
صدقيني انا كمان نزلت السنه دي ونفس الحكايه حرب غزه
اندمت على اليوم الي نزلت فيه حكم على اولادي 3 شهور رعب وخوف وقلق
وغير الحشره نعمل اي لا حول ولا قوة الا بالله
ربنا يصبرك ويجيرك في مصابك
Dina says
يا بنتي أقول لك إيه بس؟ لا حول ولا قوة إلا بالله العلي العظيم
ما تقوليش بس كده بلاش حكاية لو دي فعلا
الله أعلم الخير فين