كنت كتبت لكم من كام يوم دعوة للتفاؤل وتجربتي البسيطة معاها وإن بإذن الله بكرة هيكون أجمل ولازم نعتقد في كده
الحقيقة الوضع اللي بتمر بيه بلاد المسلمين كلها يدعو للإكتئاب أو على الأقل دي وجهة نظري … كل أما أفتح التلفزيون نلاقي حرب هنا وقتل هناك وخراب في كل مكان بالعالم مش بس بلاد المسلمين ولو إن بلاد المسلمين لها نصيب الأسد من الخراب والدمار والقمع والقتل وخلافه
ده غير الأمور والمشاكل الشخصية اللي بتصيبنا بالزهق من العيشة واللي عايشينها على رأي المصريين … مشاكل الأولاد الشغل البيت الشارع وغيرها من ضغوط الحياة اللي بتسبب الأرق والأمراض العصبية والنفسية والجسدية أيضا
من يومين قابلت صديقة عزيزة علي وأول ما شافت وشي قالت لي مالك؟ الحقيقة كانت عفاريت الدنيا بتتنطط في وشي وقولت لها حاسة إن حياتي ملخبطة ومتبهدلة ومش منظمة وكل حاجة مقلوبة وما عنديش طاقة أعمل حاجة وحاسة بالتعب على طول!!! بشكل غريب… ردت علي وقالت لي وأنا كمان
مين فيكم بيشعر بالشعور ده إنه على طول مش قادر طاقته محدودة ومش قادرين حتى نقوم من مكاننا نعمل حاجة … ويا ترى ليه الشعور ده؟ اللي عرفته إن ده شعور ناتج من نقص الطاقة الجسدية والروحانية يعني نفسي وجسدي مش بس جسدي
ولأننا مؤمنين بالله وإنه المطلع على خفايا الأمور وهو الكريم الرحيم وفعال لما يريد فالمشيئة بيد الله سبحانه وتعالى يصرف الأمور كيف يشاء وإن شاء الله كله خير … ولمساعدتكم – إذا كان عندكم نفس الإحساس بتاعي – ولمساعدة نفسي معاكم بدأت أقرأ وأسمع لمحاضرات وكتب لكل من الدكتور مصطفى محمود والدكتور إبراهيم الفقي رحمهما الله رحمة واسعة
الحقيقة هم بحر من العلوم والإيمان والدراسة وكلامهم مريح ويدخل القلب والعقل معا … وأقرأ أيضا في بعض المقالات عن النفس وشحن العاطفة والجسد معا شحن إيجابي .. وإن شاء الله هأتشارك معكم بعض مما قرأت وأشعر إنه يناسبنا دينيا ويناسب أسلوب حياتنا ونجرب سوا عسى أن أنفعكم وأنفع نفسي معاكم وأتمنى لو عندكم أي إقتراحات تضيفوها في التعليقات
تــــــابعوني وشاركونــــي لحياة أفضل بإذن اللـــــــه
saida ibrahim says
متابعة معاكي و بشدة، الموضوع يهمني لشكل كبير لاني بقيت حاسه بنفسي تعبانة نفسيا و جسديا و دا ماثر على علاقتي باولادي و زوجي، خايفة الموضوع يكبر و مقدرش القاله حل. مرات بفكر اروح لدكتور يمكن يكون عندي اكتئاب بس خايفةمن الادوية
Amira says
ومين سمعك … العملية بايظة خالص بس ما تقلقيش مش إنتي لوحدك وده اللي مطمني … مفيش حد بأكلمه إلا لما ألاقيه زهقان وتعبان نفسيا والتعب النفسي فعلا بيعمل إرهاق جسدي رهيب !!! أول مرة أعرف كده