إصنــع(ـى) بنفسـك

السلام عليكم

أجهزة  المنزل الستانلس ستيل موضة جدا اليومين دول في المطابخ وبصراحة بتدي شياكة ومنظر حلو للمكان ومن عوامل زيادة إرتفاع تمن البيت يعني لو البيت مطبخه حلو ومودرة وأجهزته ستانليس بيكون تمنه أعلى

مشكلة الأجهزة دي ويمكن ما يكونش كبها لكن الغالبية منها هي إنها بتتوسخ بسرعة من الأصابع والأيدي الصغيرة العابثة فيها وطبعا إنتم عارفين وفاهمين .. عادي جدا عند الأولاد إن إيديهم تكون ملزقة ومتوسخة بأي حاجة ويمسكوا التلاجة ويفتحوها يجيبوا منها حاجات والحاجات دي بتمون عاملة زي المرايات أول ما بيحطوا إيديهم عليها بتتوسخ وتصبع بصوابعهم ومش سهل إنها تطلع بالطرق العادية

الطريقة اللي كانت بتنضف التلاجة عندي هو إني أنضفها ببليدج متعدد الإستعمالات الأزرق ده وفيه صديقة لي قالت لي على وايبس بتتباع في دولار تري بس هي واحدة بس بدولار .. طبعا بالمقارنة بالطريقة دي تعتبر غالية جدا جدا تخيلوا لو عايزين ننضف التلاجة ٣ مرات بالاسبوع يبقا ٣ دولار بس للتنضيف!!! كتير طبعا في رأيي يعني

طريقتنا بقا سهلة خالص و بتعتمد على مكونات كلها موجودة بالبيت ومش مشكلفة خل ومية للتنضيف – وما تخافوش مش بتعمل ريحة في التلاجة – وبعدها بنلمع التلاجة بزيت زيتون … وبس خلاص

أول حاجة هنعملها نجيب بخاخ فاضي ونحط فيه

نصف كوب خل + نصف كوب ماء عادي من الحنفية

ونرش الأجهزة كويس بالمحلول ده .. للتنضيف والتعقيم ونمسح بفوطة نضيفة وناشفة .. والمسح يكون بإتجاه حبيبات الستانبيس ستيل .. وده نعرفه منين؟ لو بصيتوا كويس على الأجهزة هتلاقوا فيه خطوط ماشية بالعرض أو بالطول فعلى حسب الجهاز عندكم نمسح بإتجاة الحبيبات

نبلل فوطة أخرى نضيفة بقطرات من زيت الزيتون ونمسح برضو بإتجاة الحبيبات وهي دي الخطوة اللي هتشيل التصبيع والعلامات من على الأجهزة

وبس خلاص ترجع الأجهزة نضيف وبتلمع من جديد

أتمنى تكون عجبكم وتستفيدوا من فكرة اليوم .. أسيبكم بقا مع الفيديو … سلام

السلام عليكم

الإعتناء بالبشرة مش شرط يبدأ عند سن كبيرة بالعكس كل أما بدأنا نعتني ببشرتنا في وقت بدري كل ما كان أحسن وكل ما تأخرت علامات الشيخوخة وترهل الجلد في السن الكبيرة

مش قادرة أقول لكم أد إيه المنتجات اللي بنستخدمها على بشرتنا مهم جدا إنها تكون طبيعية وآمنة مش بس علشان البشرة لأ وعلشان الصحة عموما لأن المواد دي بتمتصها البشرة وبتكون من أحد أسباب السرطانات المنتشرة في العالم بسس ردائة المكونات المستخدمة في منتجات التجميل

كنت من قبل عملت معاكم غسول طبيعي للبشرة والنهارد جايبة لكمغسول طبيعي للبشرة مضاد للتجاعيد يستخدم من مرة لمرتين فقط في الأسبوع مش أكتر وباقي الأيام نستخدم الغسول التاني .. الغسول ده عبارة عن الغسول التاني مضاف إليه مجموعة من الزيوت العطرية … تعالوا نشوف هي إيه

زيت اللافندر :: زيت اللافندر من أكثر الزيوت إنتشار وتنوع في الإستعمال.. إستعمالاته متعددة وفوائده كتيرة ومن فوائده مضاد البكتيريا .. التهدئة ورفع الروح المعنوية .. ومضاد للأكسدة .. ولهذا يستعمل في علاج آثار حب الشباب والجروح وحروق الشمس والصدفية وغيرها من متاعب البشرة

 :: Frankincense زيت اللبان الدكر 

أنا طوول عمري كنت أشوف جدتي الله يرحمها بتآكل اللبان ده في مصر!! وكنت بأكرهه لأنه مر جدا . لكن برضو بأسمع دايما والدتي – الله يحفظها – بتتكلم عن فوائد اللبان الدكر بالذات للكحة والبرد ز إنما الغريب فعلا إنه ليه فوائد للبشرة وتأخير علامات الشيخوخة بشكل كبير والمساعدة في شد الجلد المترهل

:: Geranium زيت زهرة الراعي أو الـ

ده بقا ريحته عاملة زي رائحة ماء الورد جدا ومن أهم فوائده هو تأخير الشيخوخة

للمزيد من منتجات البيوتي شوب إضغط هنــــا

أسيبكم مع الفيديو والوصفة

غسول للوجه مضاد للتجاعيد

2015-12-17 17:28:27

Write a review

Save Recipe

Print

Ingredients

1. ١ م ك عسل أبيض
2. ١ م ص بيكنج بودر

نقطة واحدة من كل من

1. زيت اللافندر
2. زيت لبان الدكر
3. زيت الجرانيوم أو إبرة الراعي

Instructions

1. تخلط مكونات العسول مع بعضها جيدا حتى نحصل على قوام كريمي
2. نقوم بعمل حمام بخار للوجه أو نبلل فوطة بماء دافئ وتوضع على الوجه لمدة دقيقة تقريبا
3. بأطراف الأصابع ندلك البشرة بالمزيج في حركة دائرية
4. يترك المزيج على الوجه حوالي ٤-٥ دقائق ثم يشطف بماء فاتر

Notes

1. يفضل مسح الوجه بماء الورد بعد هذا الغسول ثم نقوم بعدها بترطيب البشرة بالمرطب المفضل لديكم
2. ينصح بإستخدام الغسول مرة إلى مرتين فقط أسبوعيا

مغتربة http://moghtareba.com/

اليوم إن شاء الله هنعمل غسول للوجه طبيعي بالعسل

مكوناته بسيطة جدا وموجودة عندنا في المطبخ

العسل: طبعا إحنا إتكلمنا عن العسل قبل كده وفوايده الكتيرة للبشرة مش بس في الأكل

البيكنج صودا : بس علشان يدينا  ميزة  التقشير أو السكراب لكن ممكن ما تستخدموهوش لو مش عندكم

السكراب ده قلوي علشان كده يستحسن بعده نمسح الوجه بماء الورد ونقوم بالترطيب بعدها بأي كريم مرطب تحبوه

غسول للوجه بالعسل

2015-12-01 21:07:19

Write a review

Save Recipe

Print

Ingredients

1. ١ م كبيرة عسل أبيض - يفضل أورجانيك
2. ١ م ص بيكنج صودا

Instructions

1. نخلط عسل النحل مع البيكنج صودا جيدا حتى نحصل على مزيج متجانس كريمي
2. نبلل فوطة بماء دافئ وتوضع على الوجه لمدة دقيقة تقريبا
3. بأطراف الأصابع ندلك البشرة بالمزيج في حركة دائرية
4. يترك المزيج على الوجه حوالي ٣ دقائق ثم يشطف بماء فاتر

Notes

1. يفضل مسح الوجه بماء الورد بعد هذا الغسول ثم نقوم بعدها بترطيب البشرة بالمرطب المفضل لديكم

مغتربة http://moghtareba.com/

السلام عليكم

كنت عملت قبل كدة موضوع عن تنضيف المخدات الصفرا وبصراحة لقيت غقبال عليه علشان كده قلت أعمله مرة تانية بالفيديو أحسن أتمنى تستفيدوا أكتر ويعجبكم وده البوست الأصلي

أنا إنكسفت وتراجعت كتير إنى أحط البوست ده .. لكن لأنى عارفة إنها مشكلة فى كل البيوت تقريبا .. ولأنى مبسوطة من النتيجة اللى وصلت لها قلت لازم أتشارك معاكم النجاح المذهل والمبهر فى تنضيف المخدات … طبعا إحنا فى بلدنا المخدات بتكون تقريبا قطن وبنعملها مخصوص عند المنجد لكن المخدات اللى أنا بأتكلم عنها مش المخدات القطن .. المخدات الجاهزة اللى بنشتريها ومكتوب عليها إنها ممكن تتغسل فى الغسالة .. لأن هنا كل المخدات كده

المخدات دى بعد فترة ونتيجة للعرق طبعا وإحنا نايمين ومن دهون الرأس والبشرة بتعمل بقع صفرا فيها ومع مرور الوقت بتكون شكلها مقرف طبعا كتير حاولت إنى أغسلها لكن مش بتطلع منها البقع دى طبعا لأنى بأغسلها مرة فى السنة وساعات أساسا أنساها والمدة تطول .. وبيكون الحل طبعا إنى أرميها وأشترى غيرها

ولأنى بأكره رمى الحاجات بالذات لما يكون لسه فيها عمر .. كان لازم يكون فيه حل تانى غير إنى أستسهل وأرمى .. وبعد مباحثات وتجارب وصلنا لنتيجة مذهلة والحمد لله .. ولكل المعذبين فى الأرض من المخدات أحب أقدم لكم الطريقة دى فى تبييض المخدات ونخليها ترجع أنضف من الأول كمان

أنا صورت المخدات فى البانيو علشان نقارن اللون صح .. لأن لون البانيو أبيض ناصع .. تعالوا نشوف الصورة  قبل . طبعا منظرها يعني ….. مش ولا بد

السبب الرئيسي ورا إصفرار المخدات هو العرق .. جسمنا بيعرق بالليل علشان يظبط حرارته ونبقى مرتاحين .. يعني مش ضرورى الدنيا تبقى حر لأ دماغنا بتعرق لتظبيط حرارة الجسم وطبعا مع الدهون اللى بتفرزها بشرتنا .. العرق ده بيتخلل القماش بتاع المخدات حتى لو حاطين عليها غطاء ولما بينشف بيصفر وبيبقع المخدات ومن هنا بتبدأ المشكلة

مع الإستخدام اليومي للمخدات طبعا ومع إنى بأحاول أغسلها وطبعا زى ما قلت لكم ممكن تعدى السنة والمخدات مش بأغسلها لكن أنا بأحاول دايما أحطها فى الشمس ودى عادة مصرية وأعتقد عربية أصيلة وهى تشميس الفرش لعلمكم بقا العادة دى صحية جدا جدا بس أنا بأشمس الفرش داخليا مش بأطلعه بره فى البلكونة وإلا إدارة الكوميونيتي ممكن تطردنا برة .. المهم لما بيزيد الإصفرار والبقع عن حدها بأرمى المخدات وأشترى غيرها زي ما قلت لكم .. تعالوا بقا نشوف ممكن ننضفها إزاى

هننقع المخدات فى الآتى

١ كوب مسحوق غسيل .. إستخدمت مسحوقى المتميز

١ كوب مسحوق غسالة الأطباق .. برضه إستخدمت مسحوقى المنزلى

١ كوب كلوروكس .. ومش محتاجين أقول لكم إنى إستخدمت كلوركس منزلى

١/٢ كوب  مسحوق بوراكس .. ده بقا اللى ما كانش منزلى

ميه سخنة مولعة مولعة مولعة .. على قد ما تقدروا

نحاول نخلى المحلول اللى هننقع فيه المخدات ما يكونش مخفف يعني نقلل كمية المية المستخدمة .. أنا نقعتهم فى الغسالة نفسها الحقيقة

شغلت الغسالة على أقصر برنامج وأعلى درجة حرارة ومليت جزء صغير ما سيبتهاش تملى مية للآخر وكمان سخنت ميه فى براد الشاى ودلقتها جوة الغسالة

وبعدين بدأت بوضع المكونات الباقية كلها وقلبتهم على بعض بمعلقة خشبية لغاية لما تأكدت إن المساحيق ذابت وبعدين حطيت المخدات وغطستها كويس فى المية وفتحت تانى زرار الغسالة علشان تكمل ملى مية سخنة .. وقبت المخدات كويس علشان المحلول يوصل لكل حتة فيها وتركتها منقوعة فى الغسالة لمدة ساعتين

وبعدين نشغل الغسالة عادى ونتركها تكمل الدورة بتاعة الغسيل والشطف والذى منه … وبعد كده نحطها فى المجفف ونتركها لدورة التجفيف المعتادة

طبعا النتيجة فاقت الخيال الحقيقة ما صدقتش إن البقع طلعت ومنظر المخدات جميل وأبيض وفريش كأنها فعلا جديدة … حلو قوى قوى

أتمنى تكون تجربتنا النهاردة عجبتكم وممكن تساعدكم فى حل مشكلة المخدات الصفرا

ملحوظة : طبعا لازم تتأكدوا إن المخدات بتاعتكم يمكن غسلها فى الغسالة .. وإلا …. عليكم العوض

على العموم ما تخافوش أغلب المخدات هنا ممكن تتحط فى الغسالة مفيش مشكلة لكن برضوا إقرأو الليبل بتاعها كويس

قررت إني أفتح بيوتي شوب هنا في مغتربة هههه بس بيوتي شوب من المطبخ كل حاجاته تلاقوها في دواليب المطبخ علشان تبقا سهلة علينا كلنا

النهاردة جايبة لكم معايا سكراب سهل ولذيذ يتآكل كده لوحده من قبل ما نحطه على بشرتنا وهو سكراب الشوفان بالعسل وزيت جوز الهند

تعالوا نشوف كل مكون فيه وأهميته وفايدته لبشرتنا

الشوفان : ممتاز مش بس للأكل لأ وللبشرة أيضا

الشوفان مفيد جدا للبشرة بالذات في حالات الإكزيما والجفاف وأيضا مفيد للبشرة الحساسة وملطف ومنعش حتى للبشرة الدهنية مضاد أكسدة هايل ومضاد للإلتهابات وفوائد كتير عديدة إقرأوا عنها هنا

العسل : إتكلمنا عنه قبل كدة برضو لما عملنا سكراب الليمون والعسل

زيت جوز الهند : اليومين دول زيت جوز الهند متربع على عرش المنتجات الطبيعية المفيدة للبشرة والشعر تقدروا تقرأوا عنه هنـــا

الخليط ده مش بنشيله في التلاجة هو يا دوب نعمل منه كمية صغيرة على قد السكراب وخلاص مش محتاج تعالوا بقى أوريكم بيتعمل إزاي وإن شاء الله تجربوه ويعجبكم

سكراب الشوفان بالعسل وجوز الهند

2015-11-04 12:04:23

Write a review

Save Recipe

Print

Ingredients

1. ٢ معلقة كبيرة شوفان - بإمكانكم طحن الشوفان او إستخدامه زي ما هو
2. ١ م كبيرة عسل أبيض
3. ١ م كبيرة زيت جوز الهند

Instructions

1. نخلط المكونات معا حتى يصبح الخليط كريمي
2. ننتظر ٥ دقائق قبل إستخدامه حتى يطرى الشوفان قليلا
3. ثم نقوم بتوزيعه على البشرة وتحريكه دائريا
4. يترك على البشرة من ٤ ل ٥ دقائق
5. ثم يشطف بماء فاتر

مغتربة http://moghtareba.com/

السلام عليكم

الشتا داخل علينا والدنيا بررررد .. ولازم نبدأ نعتني بالبشرة والشعر لأن فصل الشتا بيحصل جفاف وتشقق للجلد من البرودة ودة بيأثر علينا وقد يسبب إكزيما وخلافه

مؤخرا بدأت أهتم بإستخدام دولاب المطبخ مش بس في الأكل لا كمان في عمل المنتجات الطبيعية للإعتناء بالبشرة والجسم والشعر .. واللي بيفلح معايا من وصفات بأحاول أصوره وأحطه هنا يمكن يكون فيكم حد مهتم

من آخر إكتشافاتي هو سكراب الليمون والعسل للوجه وإستخدمته أيضا للجسم كل اللي هنحتاجه الآتي

الليمون : معروف عن الليمون إنه مبيض طبيعي للبشرة وبيخفف من آثار العلامات اللي في الوجه

زيت الزيتون : مرطب طبيعي للبشرة وفيه مضادات أكسدة

عسل النحل : أيضا مرطب ومضاد للأكسدة كما إن له خصائص ضد علامات كبر السن

السكر : نستخدمه كمادة خشنة تساعد على الصنفرة

بنخلط المكونات السابقة حتى نحصل على قوام خشن نوعا ما مش سائل هتشوفوه بالفيديو .. هأعطيكم مكونات أساسية لكن ممكن تزيدوا أو تنقصوا منها حتى تحصلوا على القوام المناسب لإستخدامه كصنفرة يعني المقادير تقريبية

يحفظ في علبة معلقة .. يفضل إستخدامه قبل مرور ٣ أسابيع لشهر ولو الجو حار عندكم ورطب يفضل وضعه بالثلاجة وهيبقى ممتاز في الحر وهو ساقع لتلطيف البشرة

إحتمال الزيت يفصل عن باقي المكونات ويكون طبقة على الوجه مفيش أي مشكلة قلبوه تاني وإستخدموه عادي جدا

لو دخل العلبة قطرات ماء إستخدموه بسرعة لأنه ممكن يفسد يستحسن تخلوا بالكم

ممكن إستخدامه على الوجة والجسم رائع رائع بحق يترك البشرة ناعمة جدا أنصحكم تجربوه

لو عندكم بشرة حساسة يفضل تجربوه بكمية صغيرة في الرقبة مثلا وتشوفوا تفاعل بشرتكم الأول مع المكونات

أترككم مع الوصفة والفيديو .. أتمنى يعجبكم .. جربوه وإن شاء الله تدعوا لي مش علي هههه

سكراب العسل والليمون

2015-10-16 09:23:13

لبشرة ناااعمة فورية سكراب سهل وسريع ومكوناته متوفرة في كل بيت

Write a review

Save Recipe

Print

Ingredients

1. ٦ ملاعق كبيرة سكر *
2. ١ ملعقة كبيرة عصير ليمون
3. ١ معلقة كبيرة زيت زيتون
4. ١ معلقة صغيرة عسل أبيض

Instructions

1. نبدأ بإضافة العسل على الليمون والزيت
2. نبدأ بـ ٣ ملاعق سكر نضيفها على الخليط ونقلب
3. نستمر في إضافة السكر مع التقليب حتى نحصل على خليط رملي
4. للإستعمال: نبلل البشرة بالماء ونستخدم السكراب مثل أي سكراب عادي ثم نشطفه بماء دافئ

Notes

1. قد نحتاج إلى المزيد من السكر لعمل خليط رملي *
2. المقادير تقريبية التوضيح في الفيديو
3. يمكن إستخدام السكراب على الجسم كله قبل الشاور.. يترك الجسم ناااعم
4. إذا كانت بشرتكم حساسة من الأفضل تجربته على مكان صغير جانبي أولا

مغتربة http://moghtareba.com/