زي ما نضفنا غسالة الملابس المرة اللي فاتت .. المرة دي بقا هننضف غسالة الأطباق
على الرغم من إن أي حد هيسمع كدة هيستغرب ليه ننضف غسالة الأطباق لكن زيها زي غسالة الملابس بالظبط .. تنضيفها وتعقيمها مهم كل فترة .. خلينا نقول كل ٦ شهور لأن ده بيحافظ عليها وبيمنع تراسب الميكروبات والعفن فيها
كمان الواحد لما بيأجر مكان أو بيشتري بيت بيكون فيه غسالة أطباق ساعات بنقرف إننا نحط أطباقنا .. قبل كدة أنا كنت بأشغل دورة سخنة جدا على الفاضي قبل ما أحط أطباقي لكن دلوقتي إتعلمت إزاي أنضفها وأكون مرتاحة البال
كل اللي هنحتاجه خل وبيكنج صودا وأحيانا كلوركس لو الغسالة بتاعتكم من جوة مش ستانليس ستيل
إتفرجوا على الفيديو هنــأ يوضح لكم إزاي ننضفها
بعض الملاحظات للإبقاء على الغسالة نظيفة وللمحافظة عليها
١- الغسالة بتصرف في نفس ماسورة مفرمة الحوض
لهذا يستحسن نشغل المفرمة قبل ما نشغل الغسالة علشان نضمن إن الماسورة سالكة ومفيس أي إنسداد
٢- إحرصوا على فتح حنفية حوض المطبخ على الساخن
قبل تشغيل الغسالة نزلوا مية من الحنفية سخنة علشان الغسالة لما تبدأ العمل المية اللي تدخل لها تكون سخنة بالفعل مش لسه هتسخن وده بيزود من نضافة الأطباق
٣- نضفوا الغسالة كل ٦ شهور أو أقل
إحرصوا على إتباع الخطوات السابقة كل ٦ شهور بالكتير ويستحسن أقل ودايما إتأكدوا إن مفيش مياة راكدة في قاع الغسالة لأنها بتعمل ريحة وحشة وبتعمل ميكروبات وجراثيم
٤- نضفوا الأكل من الأطباق قبل وضعهافي الغسالة
بواقي الأكل بتسد فتحة الصرف اللي في الغسالة علشان كده نزلوا الأكل اللي في الأطباق والحلل كويس قبل ما تتحط في الغسالة لكن مش معنى كدة إنكم تغسلوا الأطباق غسيل بس شطف سريع وخلاص
يا ريت لو عندكم نصيحة تنصحونا بيها تضيفوها في التعليقات .. مع تمنياتي بغسالة نضيفة داااائما