الصحة و الجمال

السلام عليكم

الإعتناء بالبشرة مش شرط يبدأ عند سن كبيرة بالعكس كل أما بدأنا نعتني ببشرتنا في وقت بدري كل ما كان أحسن وكل ما تأخرت علامات الشيخوخة وترهل الجلد في السن الكبيرة

مش قادرة أقول لكم أد إيه المنتجات اللي بنستخدمها على بشرتنا مهم جدا إنها تكون طبيعية وآمنة مش بس علشان البشرة لأ وعلشان الصحة عموما لأن المواد دي بتمتصها البشرة وبتكون من أحد أسباب السرطانات المنتشرة في العالم بسس ردائة المكونات المستخدمة في منتجات التجميل

كنت من قبل عملت معاكم غسول طبيعي للبشرة والنهارد جايبة لكمغسول طبيعي للبشرة مضاد للتجاعيد يستخدم من مرة لمرتين فقط في الأسبوع مش أكتر وباقي الأيام نستخدم الغسول التاني .. الغسول ده عبارة عن الغسول التاني مضاف إليه مجموعة من الزيوت العطرية … تعالوا نشوف هي إيه

 

زيت اللافندر :: زيت اللافندر من أكثر الزيوت إنتشار وتنوع في الإستعمال.. إستعمالاته متعددة وفوائده كتيرة ومن فوائده مضاد البكتيريا .. التهدئة ورفع الروح المعنوية .. ومضاد للأكسدة .. ولهذا يستعمل في علاج آثار حب الشباب والجروح وحروق الشمس والصدفية وغيرها من متاعب البشرة

 

 :: Frankincense زيت اللبان الدكر 

أنا طوول عمري كنت أشوف جدتي الله يرحمها بتآكل اللبان ده في مصر!! وكنت بأكرهه لأنه مر جدا . لكن برضو بأسمع دايما والدتي – الله يحفظها – بتتكلم عن فوائد اللبان الدكر بالذات للكحة والبرد ز إنما الغريب فعلا إنه ليه فوائد للبشرة وتأخير علامات الشيخوخة بشكل كبير والمساعدة في شد الجلد المترهل

 

:: Geranium زيت زهرة الراعي أو الـ

ده بقا ريحته عاملة زي رائحة ماء الورد جدا ومن أهم فوائده هو تأخير الشيخوخة

 

للمزيد من منتجات البيوتي شوب إضغط هنــــا

 

أسيبكم مع الفيديو والوصفة

 

 

اليوم إن شاء الله هنعمل غسول للوجه طبيعي بالعسل

مكوناته بسيطة جدا وموجودة عندنا في المطبخ

العسل: طبعا إحنا إتكلمنا عن العسل قبل كده وفوايده الكتيرة للبشرة مش بس في الأكل

البيكنج صودا : بس علشان يدينا  ميزة  التقشير أو السكراب لكن ممكن ما تستخدموهوش لو مش عندكم

 

السكراب ده قلوي علشان كده يستحسن بعده نمسح الوجه بماء الورد ونقوم بالترطيب بعدها بأي كريم مرطب تحبوه

 

 

قررت إني أفتح بيوتي شوب هنا في مغتربة هههه بس بيوتي شوب من المطبخ كل حاجاته تلاقوها في دواليب المطبخ علشان تبقا سهلة علينا كلنا

 

النهاردة جايبة لكم معايا سكراب سهل ولذيذ يتآكل كده لوحده من قبل ما نحطه على بشرتنا وهو سكراب الشوفان بالعسل وزيت جوز الهند

 

تعالوا نشوف كل مكون فيه وأهميته وفايدته لبشرتنا

 

الشوفان : ممتاز مش بس للأكل لأ وللبشرة أيضا

الشوفان مفيد جدا للبشرة بالذات في حالات الإكزيما والجفاف وأيضا مفيد للبشرة الحساسة وملطف ومنعش حتى للبشرة الدهنية مضاد أكسدة هايل ومضاد للإلتهابات وفوائد كتير عديدة إقرأوا عنها هنا

 

العسل : إتكلمنا عنه قبل كدة برضو لما عملنا سكراب الليمون والعسل

 

زيت جوز الهند : اليومين دول زيت جوز الهند متربع على عرش المنتجات الطبيعية المفيدة للبشرة والشعر تقدروا تقرأوا عنه هنـــا

 

الخليط ده مش بنشيله في التلاجة هو يا دوب نعمل منه كمية صغيرة على قد السكراب وخلاص مش محتاج تعالوا بقى أوريكم بيتعمل إزاي وإن شاء الله تجربوه ويعجبكم

 

 

السلام عليكم

الشتا داخل علينا والدنيا بررررد .. ولازم نبدأ نعتني بالبشرة والشعر لأن فصل الشتا بيحصل جفاف وتشقق للجلد من البرودة ودة بيأثر علينا وقد يسبب إكزيما وخلافه

 

مؤخرا بدأت أهتم بإستخدام دولاب المطبخ مش بس في الأكل لا كمان في عمل المنتجات الطبيعية للإعتناء بالبشرة والجسم والشعر .. واللي بيفلح معايا من وصفات بأحاول أصوره وأحطه هنا يمكن يكون فيكم حد مهتم

 

من آخر إكتشافاتي هو سكراب الليمون والعسل للوجه وإستخدمته أيضا للجسم كل اللي هنحتاجه الآتي

 

الليمون : معروف عن الليمون إنه مبيض طبيعي للبشرة وبيخفف من آثار العلامات اللي في الوجه

 

زيت الزيتون : مرطب طبيعي للبشرة وفيه مضادات أكسدة

 

عسل النحل : أيضا مرطب ومضاد للأكسدة كما إن له خصائص ضد علامات كبر السن

 

السكر : نستخدمه كمادة خشنة تساعد على الصنفرة

 

بنخلط المكونات السابقة حتى نحصل على قوام خشن نوعا ما مش سائل هتشوفوه بالفيديو .. هأعطيكم مكونات أساسية لكن ممكن تزيدوا أو تنقصوا منها حتى تحصلوا على القوام المناسب لإستخدامه كصنفرة يعني المقادير تقريبية

 

يحفظ في علبة معلقة .. يفضل إستخدامه قبل مرور ٣ أسابيع لشهر ولو الجو حار عندكم ورطب يفضل وضعه بالثلاجة وهيبقى ممتاز في الحر وهو ساقع لتلطيف البشرة

 

إحتمال الزيت يفصل عن باقي المكونات ويكون طبقة على الوجه مفيش أي مشكلة قلبوه تاني وإستخدموه عادي جدا

 

لو دخل العلبة قطرات ماء إستخدموه بسرعة لأنه ممكن يفسد يستحسن تخلوا بالكم

ممكن إستخدامه على الوجة والجسم رائع رائع بحق يترك البشرة ناعمة جدا أنصحكم تجربوه

لو عندكم بشرة حساسة يفضل تجربوه بكمية صغيرة في الرقبة مثلا وتشوفوا تفاعل بشرتكم الأول مع المكونات

أترككم مع الوصفة والفيديو .. أتمنى يعجبكم .. جربوه وإن شاء الله تدعوا لي مش علي هههه

 

 

 

 

:جفاف الأعين

جفاف الأعين بيحصل لما  العينين مش بتطلع دموع كفاية علشان تفضل مترطبة .. جفاف الأعين ليه مسببات كتيرة ومنها الجو الجاف .. لو إنتم عايشين فى مكان جاف زي هنا فى كلورادو المشكلة دى هتتعبكم

الجو هنا جاف جدا بالذات فى فصل الشتاء ومن كتر الجفاف تلاقى الواحد كأن وشه هيقع .. فعلا حاجة رهيبة .. مؤخرا بدأت عيني تصاب بالجفاف وده بيسبب حرقان فى العين وإحساس بالهرش فيها

طبعا فيه قطرات مرطبة للعين مش محتاجة روشتة دكتور – أوفر ذا كاونتر يعني- ومش غالية والحمد لله .. لكن ماذا لو….حصل لكم زيي

من فترة حصل لى الموضوع ده وما عنديش القطرة وما قدرتش أروح أجيب .. طيب إيه الحل السريع؟؟؟ فيه مجموعة من الحلول بالبحث على الإنترنت وجدتها وهأعرضها عليكم بعضها جربتها وبعضها لأ

 

أولا:: كمادات الشاى

بدل  ما ترموا الباكيت بتاع الشاى إنتظروا قليلا حتى يبرد وهو لسه مبلول حطوه فوق العين شوية يعني ٥- ١٠ دقائق كده الشاى فيه حامض بيريح العين ويخفف الإحتقان وأيضا تورم العينين .. شاى أخضر أو العادى بتاعنا .. فعلا مريحة أنا جربتها .. تقدروا تستخدموها كذا مرة فى اليوم مفيش ما يمنع

 

ثانيا :: الملاعق المعدنية

حطوا ٤ ملاعق معدنية فى كوب ماء ساقع من التلاجة ولما يسقعوا خدوا إتنين منهم ونحط واحدة على كل عين بحيث إنها تغطى العين .. ونتركهم دقائق ولما يبدأوا يسخنوا نبدلهم ونحطهم تانى فى المية الساقعة ونآخد الإتنين التانيين .. كأننا بنعمل كمادات ساقعة على عينينا بالظبط

 

ثالثا :: شرائح الخيار المثلجة

شرائح الخيار معروفة بالترطيب وإزالة الإنتفاخات من الجلد حوالين العين … ضعوا شرائح من الخيار فى كوب ماء مثلج وبعدين ١٠ دقائق على العين

 

رابعـا :: غسول وكمادات شراب البابونج

البابونج أو الكاموميل المجفف نعمله شراب – ١ معلقة صغيرة على كوب ماء مغلي- ويترك ليبرد ويصفى ويستخدم كغسول للعينين أو كمادات فوق الجفون

 

خامسـا :: شرب الماء

شرب الماء وبكميات كبيرة مهم جدا جدا لصحة كل شئ فى جسمنا .. إشربوا مية كتير الميزة إنها فري و مش غالية

 

سادسـا :: مـاء الورد

عمل كمادات من ماء الورد بإستخدام القطن .. ماء الورد بيبرد العينين وبيشيل التورم وهتلاقوه بيريح حرقان العيدين بعد حوالى ٥ دقائق

 

أرجو إن تكون معلومة اليوم مفيدة ليكم ولو حد عنده طريقة مجربة يا ريت يشاركنا بيها

Photo Credit :: here, here  and here

مع إنى مش من الناس اللى بييجي ليهم حساسية بسهولة .. إنما السنة دى فيه هجمة شرسة من حبوب اللقاح التى تسبب حساسية الربيع الرهيبة وبدأت أعانى من الحساسية تقريبا لأول مرة فى حياتى وأعراضها الرشح والكحة وحرقان العينين وحرقان فى الزور وخلافه من الأعراض اللى كل اللى بيعانوا من الحساسية حافظينها

 

وبالبحث على الإنترنت وجدت إن فيه مجموعة من  الحاجات البسيطة اللى ممكن تخفف الأعراض .. طبعا دى مش أدوية ومش روشتة طبية والناس بتختلف فى طبيعتها وفى ردة فعلها للحاجات دى لكن لأنها طبيعية فميش ضرر إن شاء الله من تجربتها .. تعالوا نشوف إيه اللى ممكن يساعدنا فى السيطرة على الحساسية الموسمية

 

 

 

فينامين سي *

فيتامين سي فيه أنتى هيستامين – المادة المسببة للحساسية – أنتى أوكسيدانت – مضاد للأكسدة – وكمان آنت توكسين يعني مضاد للسمية فى الجسم . سبحان الله عليه فعلا  ناس كتير من اللى إستخدموا فيتامين سي نجحوا فى السيطرة وبطريقة طبيعية على الحساسية .. هنــــا فى دكتوريور سيلف ويب سايت..  تقدروا تقروا مجموعة كبيرة من تجارب الناس فى الموضوع ده

لقيت على الإنترنت إن في الحالات الشديدة يمكن أخذ ١٠٠٠ ملجرام ٥ مرات يوميا  من ٤ لـ ٥ أيام ثم نقللها لـ ١٠٠٠ ملليجرام ٣ مرات لمدة ٣ أسابيع ثم نقللها لـ ١٠٠٠ مرة واحدة يوميا لمدة شهرين

 

 

 

 

شاى الكاموميـل *

Hay allergy الكاموميل له خصائص فى تثبيط الحساسية بالذات حساسية القش أو الـ

بعض المتخصصين فى العلاج بالأعشاب بينصحوا حتى إنكم تخلطوا الكاموميل مع قطرات زيت الليمون على منديل والإستنشاق أعراض حساسية القش من الظهور

 

 

 

 

العسل العسل :: بس مش اى عسل

العسـل الخـام الأورجانيك  غالى شوية لكن مش أغلى من أدوية الحساسية .. العسل الخام بالذات الأورجانيك ناس كتير جدا بتشكر فيه وفى فوائده بالذات فى موضوع الحساسية ده والجرعة تراوحت بين معلقة صغيرة يوميا لمعلقة كبيرة .. كمان ملحوظة العسل لازم يكون لوكال يعني محلى وفيه ناس بتقول كمان مش أبعد من ٢٠ ميل ليه بقا علشان النحل بيآخد معاه حبوب اللفاح فى العسل بتاعه وحبوب اللقاح دى بنآخدها إحنا مع العسل ويبدأ جسمنا فى تكوين مضادات ليها وبالتالى لازم تكون لوكال يعني من منطقتكم علشان تقدروا تكونوا مناعة لحبوب اللقاح المنتشرة فى منطقتكم

وفيه ناس كتير بتشكر فى المشروب ده

raw organic apple cider vinegar ١ معلقة كبيرة خل عصير التفاح الخام الأورجانيك

١ معلقة كبيرة عسل محلى

ماء دافئ

نضع المكونات مع بعضها ونقلب ويمكنكم إضافة عصير الليمون لمزيد من الفائدة .. ينصح بتناوله مرتين يوميا

 

 

 

Neti Pot غسول الجيوب الأنفية

الدكاترة فى الشرق والغرب بينصحوا بغسول المحلول الملحى .. وده عبارة عن  ميه ويستحسن معقمة مع ملح بدون اليود أو ممكن نشترى له الملح المخصوص بتاعه من أى صيدلية ونقف على الحوض مع إمالة الرأس وننزل المية دى فى فتحة من فتحتى الأنف ونسمح لها إنها تخرج من الفتحة الأخرى حاملة معاها كل الأوساخ اللى بتسد الجيوب الأنفية

 

 

 

 

التوابـــل

أنا كنت فاكرة إن التوابل تزيد من الحساسية وإلتهابات الجيوب وخلافه لكن اللى قريته عكس كده تماما …الكركم مفيد جدا جدا جدا من أهم أنواع التوابل .. يبقى ده الوقت من السنة اللى لازم نقلب فيه للمطبخ الهندى .. أيضا البصل, الثم , الجنزبيل, القرفة, الهورس راديش , الهوت ماسترد, الفلفل الحار وخلافه نكثر منه فى الأطعمه بتاعتنا

 

, بودرة المسطردة , الجنزبيل البودرة Cayan pepper فيه تجربة لسيدة  عملت ميكس من بودرة الثوم , بودرة البصل, الكركم , القرفة, الكايان ببر

وحطيتهم على بعض وبقيت تآخد معلقة كبيرة على كوب ماء وتشربهم وقالت إنه جاب معاها نتيجة من أول مرة

 

 

 

 

النعنـــــاع

النعناع يساعد على تفتيح المسالك الهوائية لأنه بيعمل على إرتخائها .. ومفيش أحلى من شرب الشاى أبو نعناع ويا ريت وإحنا بنشربه نشم البخار اللى طالع من الكباية أو الأحسن إننا نعمل حمام بخار بالنعناع ونستنشق بخار النعناع ونضع فوطة على الرأس لتركيز البخار

 

 

 

بعض النصائح للمساعدة فى التقليل من الإحساس بالحساسية الموسمية

 

غسيل الشعر والوجه بإستمرا وبالذات بعد الخروج خارج المنزل والعودة لأن حبوب اللقاح تلتصق بالشعر والزيون من بشرتنا

 

السيراميك أو الخشب فى البيت أفضل بكتير من السجاجيد فلو بالإمكان نشيل السجاجيد أو تنضيفها بشكل مستمر

 

شرب الكثير من السوائل لأنه بساعد على تخفيف الإفرازات وتحسنها بشكل ملحوظ

 

تجفيف الملابس فى المجفف وبلاش ننشر الغسيل اليومين دول

 

لو عندكم قطة أو كلب أو حيوان أليف إحرصوا على نضافته اليومية والإستحمام

 

 

 

 

 

بعض الأطعمة المساعدة

البروبايوتيك .. فى الزبادى ويباع حتى على شكل أقراص لأنه يحسن جهاز المناعة بالجسم

الإكثار من تناول الخضروات الطازجة والفواكة لأنها مليئة بالفيتامينات والفايبرز وأيضا مضادات الأكسدة

 

الإكثار من تناول الأطعمة التى تحتوى على أوميجا ٣ مثل سمك السالمون

 

تقليل السكر والبيض ومنتجات الألبان – ما عدا الزبادة علشان البروبايوتيك- ولبن الماعز

 

التقليل من إستخدام الحبوب بالذات الحبوب الغنية بالجلوتين

 

التقليل من البطاطس وما يشابهها

 

التقليل من الأطعمة الجاهزة أو البروسيسد فود والأطعمة المقلية فى زيت غزير

 

 

 

وأتمنى لكم جميعا الصحة والعافية … دمتم سالمين

 

 مصادر الصور : هنـــا, هنـــا,هنـــــا