وسيلة هامـة من وسائل التوفير هى محاولة صنع الأشياء بنفسنــا
مش هأقول لكم إنى خبيرة بهذا النوع من التوفير لكن أنا بأحاول .. فيه حاجات تستاهل
التعب والمجهود لأن التوفير فيها بيكون كبير وفيه حاجات ما تستاهلش لأنها بالكوبونات
هتكون تقريبا نفس السعر وهتوفر لنا وقت .. وهنكتشف ده مع بعض بإذن الله
من أول الحاجات اللى عملتها ووفرت فلوس لكن أخدت منى مجهود هى الدايبر كيك
إيه هى الدايبر كيك: هى هدية لصديقة على وشك الولادة فى البيبي شاور أو هدية مولود جديد
هدية جميلة ظريفة مفيدة بكل الطرق وكمان بتكون أحلى لما إحنا اللى بنعملها
ولو عندكم أطفال صغيرين يشاركوكم فى عملها بتكون فن والكل بيكون مبسوط
الهدية دى كانت لواحدة عزيزة على قلبى وإتبسطت بيها جدا جدا جدا مش لمحتوياتها
على قد ما هى إتبسطت من المجهود اللى شافته فيها وإننا عملناها مع بعض أنا وأولادى
أولا المطلوب : حوالى ٧٠ حفاظة – يتراوح العدد حسب عدد الأدوار وقطر الكيكة
شرائط ملونة للتغطية – ديكورات إشتروها من الدولار ستور
لو عايزين هدايا وجيفت كارد… بيبرونات – لهاية .. لعب أى هدايا تفضلوها
طبق كرتون مدور يمثل القاعدة للكيك
أساتك – رابر باند يعنى وبرضه من الدولار ستور
زجاجة بتكون المحور ويلف عليها الحفاظات – ملحوظة أنا لم أستخدم الزجاجة لأن عندها أطفال صغار
خطوات العمل : سهلة جدا
أولا تلف كل حفاظة على شكل إسطوانة ونربط عليها الأستيك
هكذا إلى أن تكتمل المجموعة كلها – وهنا ييجي دور الأولاد
نآخد ٤ قطع لعمل المحور- فى حالة إستخدام الزجاجة بتكون هى المحور ونلف
حواليها القطع – ونلفهم بأستيك مع بعض كده
ثم نقوم بلف باقى القطع دائريا حتى نصل للقطر المناسب لنا
وهكذا
أنا وضعت عود خشبى فى المنتصف من بتاع الشيش طاووق – لقليل من الدعم
ثم نبدأ بالدور التانى ولا ننسى أن نلف كل طبقة بأستيك حتى تتماسك الطبقات
ونكرر خطوات عمل الدور الأول
لكن طبعا القطر بيكون أقل المرة دى
بالشكل ده
شكلها من الجنب
ثم الدور التالت لو حبيتوا ٣ أدوار – ممكن تكتفوا بدورين فقط
نييجي بقى للهدايا والتزويق – وبرضه الأولاد بينبسطوا قوى فى المرحلة دى
نلف شرائط ملونة أو قماشية حول الأدولار لتغطية الأستيك
ونربطها جيدا عشان ما تفكش من بعضها بسهولة
وهنا شكل يوضح إزاى أنا حطيت ملابس وسط الدايبر كهدايا
ونعلق باقى اللعب والهدايا بالشرائط
وهنا إنتهينا من التزويق ووضع الهدايا
نلفها بقماش تل أو سوليفان أو أى شئ حتى يسهل حملها
وده شكلها النهائى مش عارفة ليه فى الصورة شكلها مائل لكن هى واقعيا ما كانتش مائلة!!!! شئ غريب
المهم إنها عجبت صديقتى ولسه إلى الآن فاكراها
أجمل شئ إنها رسمت بسمة على وجهها الجميل
أرجو أن تكونوا إستفدتم من الموضوع وعجبكم