كتير مننا بيكون عايز يشوف النجاح على طول وبسرعة وده مش بيحصل فى الغالب لأن النجاح السريع فى أغلب الأوقات بيعقبه فشل سريع .. نتيجة لأن الإنسان ما أخدش وقته صح .. كل خبراء التنمية البشرية والناس اللى قريت لهم بينصحوا بالبيبي ستيبس أو خطوات الطفل .. بمعنى تقسيم الهدف لأهداف صغيرة وبسيطة كلها تؤدى للهدف الأكبر وبالتالى التوجه لتحقيق الأهداف الصغيرة الأول ودى ممكن تحصل بسرعة ولما بننجح فيها بتشجعنا على المواصلة والإلتزام
النصيحة دى هنطبقها فى كل شئ حتى فى شغل البيت !!! أيوة حتى شغل البيت … هنبدأ بتقسيم البيت لمراحل
أعمال يومية
أعمال أسبوعية
أعمال شهرية
اعمال موسمية/ سنويـة
طبعا هتقولوا ياااه كل ده .. ده أنا يا دووب بيتي أوضتين وصالة مثلا أو غرفة واحدة ما عنديش قصر .. لكن صدقونى حتى فى الشقق الصغيرة لو دققتوا كويس هتلاقوا فيه حاجات بنعملها تقع تحت التصنيف والتقسيم اللى فات .. الفرق الوحيد إننا بنعملها من غير تنظيم وفى أى وقت يعني نبص مثلا على دواليب المطبخ ونقول يااة عايزين ننضفها كويس بكرة إن شاء الله هأعملها بينما الموضوع ده ممكن نحدد له مهمة شهرية أو موسمية وهكذا وما نتعبش نفسنا بالتفكير ونكون منظمين أكثر
نصائح تساعدنا فى تنظيم شغل البيت
أولا :: مش لازم البيت يكون بيبرق وبيلمع من النضافة
وده رأيي الشخصى طبعا يعني المهم إن البيت يكون عامة نضيف وإلى حد كبير مرتب
ثانيا :: مراعاة الترتيب يوميا
كل يوم نعمل ١٠ دقائق فقط مقسمة على مرتين مثلا فترة الظهيرة وقبل النوم أو الصبح بدرى وعلى العصر نلم فيها البيت .. لعب على الأرض تروح مكانها … أطباق فى كل مكان .. ورق وكتب يرجع للمكتبة … مناديل على الترابيزة تترمى فى الزبالة وهكذا .. على فكرة أنا وجدت الموضوع ده بيفرق جدا جدا فى شكل البيت ويا سلام لو عندكم أطفال يساعدوكم ويلموا معاكم نحاول نعودهم على المسئولية شوية
ثالثا::طلب المساعدة من الآخرين
وده طبعا بالذات مع الأولاد أما الزوج على حسب شخصيته مش عايزاكم تتخانفوا معاه وتقولوا أنا اللى قولت .. لازم الأولاد يشتركوا معانا زى ما وضحنا فى السابق كل على حسب عمره وقدرته بس لازم المساعدة
رابعـا ::الكوارث الطبيعية
طبعا كل بيت وبالذات اللى فيه أطفال بتحصل فيه كوارث طبيعية … عصير على أرض المطبخ … علبة الجبنة تقع من التلاجة … مكرونة على الأرض .. صوص يقع على الموكيت وغيره قهوة .. شاى كل ده وارد جدا .. يا ريت نقوم على طول وننضف مكان الكارثة لأنها لما بتستنى بتنتشر فى البيت وممكن جدا تؤدى لكارثة أكبر