بدأت معكم سلسلة عملية لخطوات بسيطة لإدارة الوقت والمرة اللى فاتت إتكلمنا عن تحديد الأولويات فى يومنا
اليوم ميعادنا مع الخطوة الثالثة على الطريق وهى تقسيم الوقت المتاح لنـــا وده هيتم عن طريق
أولا:: تحديد إجمالى عدد الساعات – إذا كنا هنعمل مخطط يومي أو أسبوعي يعنى إما ٢٤ ساعة أو ١٦٨ ساعة
ثانـيا ::تحديد الأولويات والأنشطة اللى عايزين نعملها فى اليوم /الأسبوع
ثالثا :: تحديد المدة اللازمة لكل نشاط نحتاجه
رابعا:: توزيع الأنشطة الأسبوعية / اليومية على االأسبوع/ اليوم
خامسـا :: هل عدد ساعات اليوم/ الأسبوع = عدد ساعات الأنشطة المطلوب؟
سادسا :: فى الغالب الإجابة لأ وعدد الساعات المطلوبة لإتمام المهام والأنشطة هيكون أكبر وبالتالى هيكون لازم نعمل حاجة من الآتى :: إعادة ترتيب الأولويات / تقليص وقت بعض الأنشطة /عمل كذا نشاط فى وقت واحد /محاولة إيجاد طريقة لعمل النشاط فيآخد وقت أقل / نشوف حد يساعدنا أو فى الآخر نتخلى عن المهمة دى من أساسه
تعالوا أشرح لكم كل حل من الحلول بطريقة عملية
الحل الأول :: إعادة ترتيب الأولويات والمهام
مثلا كان من أهم أولوياتى الفترة السابقة هى الوقوف على الأخبار المهمة نظرا للى بيحصل فى الدنيا وفى بلادنا العربية من أحداث متلاحقة وكان الفيسبوك هو من أهم المصادر لى فى الأخبار – على الرغم من إن أغلبها طلعت إشاعات ـ المهم الفيسبوك بيآكل الوقت بطريقة غير طبيعية لما نشوف ده بيقول إيه ونتحمق ونرد على ده واللا نعمل شير لده ونكلم فلان وعلان ساعتين ممكن يعدوا بدون فائدة حقيقية وعدم معرفة أخبار صادقة وبجد .. بقيت أخلى الفيسبوك من آآآخر أولوياتى لو فيه وقت أدخل عليه ولو مفيش مش هيضر
الحل الثانى :: تقليص بعض وقت المهام
مثال على ذلك من حياتى هو متابعة ما يفوق عن ٢٠ بلوج عربى وأجنبى وقراءة ما فيهم بإهتمام شديد .. ده بيديني أفكار للبلوج بتاعى وفعلا بأستفيد .. لكن بالتأكيد مش كلهم لهم نفس الأهمية وبالتالى الحل كان إنى أحصرهم فى ٢ أو ٣ بلوجات مهمة جدا لازم متابعتهم بشكل يومي والباقى يبقى بعدين لما يكون عندى وقت
الحل الثالث :: عمل كذا نشاط فى وقت واحد
كتير من الناس بتختلف معايا فى النقطة دى بالذات وحجتهم إن صاحب بالين كداب المثل المصرى المعروف .. أنا بأقول عملين مش محتاجين تركيز قوى أو واحد محتاج تركيز والتانى مش محتاج تركيز … مثال على ذلك .. الرغى فى التليفون مثلا .. مع إنى مش بأحب أقعد ساعات أتكلم فى التليفون لكن أحيانا كثيرة تيجي لى تليفونات من ناس معرفين بالغى الشديد أو مثلا وأنا بأتكلم كل يوم أسأل على أهلى وأحوالهم فى مصر .. ممكن قوى إننا نقوم بأعمالنا المنزلية من تلميع وتوضيف وكى ملابس مثلا أو تطبيق الملابس .. وضع ملابس فى الغسالة والمجفف وخلافه من الأعمال اللى مش محتاجة تركيز جامد
مثال آخر أحب أديهولكم لما بأطبخ أو بأعمل أعمال منزلية أخرى أحب أسمع درس مثلا أو أسمع محاضرة نفسى أسمعها من زمان أو برنامج عايزة أشوفه أو كتاب مقروء ودول بأجيبهم من المكتبة العامة
الحل الرابع :: إيجاد طريقة لعمل النشاط فى وقت أقل
مش بقى تقليص وقت النشاط لأ عمل نفس النشاط لكن فى وقت أقل .. مثال على كده مثلا عايزين نروح السوبر ماركت أو المكتبة بدل ما نمشى من الطريق ده فيه طريق تانى أسرع منه يبقى نمشى فيه علشان نوصل أسرع .. بس خللوا بالك أوقات كتير لما بأعمل كده بينتهى بي الحال إنى أتوه للأسف وأضيع وقت أكبر
مثال آخر رايحين نعمل شوبينج عارفين هنشترى إيه ومنين فى الستور .. كل واحد بيكون حافظ الستور اللى بيعمل فيه الشوبينج يبقى نعمل خطة بوليسية محكمة .. يعني إيه ورقة وقلم كده عايزين نشترى كذا وكذا وكذا يبقى ألم كل مجموعة حاجات جنب بعضها تبقى ورا بعضها فى الليست بتاعتى مش أشترى لبن والبيض جنب اللبن وبعدبن أروح على قسم الأقلام والأدوات المكتبية علشان إبنى عايز أقلام وألاقى البيض مكتوب بعدها بكام سطر أقوم راجعة تانى للبيض .. لأ أنا عارفة الستور ماشى إزاى يبقى أجمع طلباتى ورا بعضها وأحط الكوبونات بنفس الترتيب مع بعضها هأدخل من هنا وهألاقى قسم كذا فى وشى أشترى منه وأشيل الكوبون وبعدين قسم كذا أشترى طلباتى بالكوبونات وهكذا ما نفضلش رايحين جايين فى الستور .. أتمنى تكونوا فهمتونى
الحل الخامس :: نشوف حد يساعدنا أو نطلب المساعدة
لما كنت فى مصر كانت والدتى هى إيدي اليمين الحقيقة ربنا يخليها ويبارك فى عمرها ويرزقها الصحة هى وكل الأمهات يا رب … لكن بعد الغربة مفيش ماما خلاص بح … مالناش غير الأصدقاء الصدوقين ربنا يكرمهم يساعدونا لو محتاجين شئ
بس أكيد مش هنطلب منهم يحطوا الحاجات فى غسالة الأطباق مثلا واللا يعملوا البيت بالمكنسة وخلافه .. وبالتالى ييجي دور اللى معانا فى البيت .. زوج .. أولاد وهكذا نطلب المساعدة منهم وبالذات الأولاد لتعويدهم على الإعتماد على النفس وعلى المشاركة فى الأعباء المنزلية
الحل السادس :: إنسوا الموضوع على بعضه
بعد كل ده ولسه الجدول اليومي مزنوق .. يبقى خلاص لازم نعترف إنا شخص واحد وما عنديش غير ٢٤ ساعة مش هأقدر أخليهم ٤٨ بأى حال من الأحوال .. وعلى الرغم من إن ده صعب والتخلى عن شئ فى حياتنا وكمان من أولوياتنا شئ يعتبر مستحيل لكن لازم نعمله
إعتــراف :: فى محاولة منى لتقليد صاحباتى اللى قاتلين نفسهم علشان ولادهم ولإحساسى بالنقص الشديد واللوم والتقريع من نفسى لنفسي لأنى مش أم كويسة حاولت أعمل زيهم وأروح كل يوم يبقى هندنا نشاط رياضي أو علمي وخلافة … هم أسبوعين وجالى إنهيار عصبي .. حقيقي ما قدرتش وعلى الرغم من حزنى الشديد لأنى إنكشفت قدام نفسي إنى مش قد كده لكن الرجوع للحق فضيلة وأنا مش قد المسئولية دي ولا المجهود ده كله وبالتالى إقتصر نشاطنا الرياضي على نشاط واحد فقط بالأسبوع ودمتم
وأولا وقبل كل شئ إستعينوا بالله … فعلا الإستعانة بالله والتوكل عليه شئ مهم جدا .. إدعوا ربنا فى كل صلاة يبارك لكم فى وقتكم ويضاعف لكم فيه وفعلا مع الدعاء الصادق إن شاء الله هتلاقوا الـ ٢٤ ساعة إتحولوا لـ ٤٨ طبعا مش حقيقة يعني لكن هتلاقوا الأمور إتسهلت كده والحاجة اللى بتآخد ساعة أخدت نص وهكذا
أتمنى أسمع رأيكم .. يا ترى يومكم مش بيكفي .. طيب هل فيه طريقة تانية إتبعتوها ونفعت معاكم تشاركونا بيها ويبقى جزاكم الله خيرا
Leave a Reply