تكلمنا فى السابق عن إدارة الوقت وعرفنا إن أول نقطة هى إدراك أننا بشر ويجب أن نتوقف عن محاولة عمل كل شئ فى كل شئ
خطوتنا الثانية هى : تحديد الأولويات فى حياتنا
تحديد أولوياتنا فى الحياة خطوة مهمة جدا …فنحن فى حياتنا اليومية عندنا ٢٤ ساعة فقط .. طلعنا واللا نزلنا هم ٢٤ ساعة لذلك يجب تحديد أولوياتنا بدقة حتى لا يضيع جزء من الـ ٢٤ ساعة فى شئ ليس له أهمية بالنسبة لنا وكان بالأولى تمضية هذا الوقت فى شئ من أولويات حياتنا
ولمساعدتكم فى تحديد أولوياتكم هأشارك معاكم وأسرد لكم أولوياتى كمحاولة منى لمساعدتكم .. ولكن هذا لا يعني بالطبع إن أولوياتي تمثل أولوياتكم ولايعنى أن أولوياتى هى المثالية مثلا … ولا يعني أن أولوياتى لن تتغير بل على العكس الأولويات تتغير على حسب المرحلة العمرية والظروف المحيطة .. خلينا نقول إن دى أولوياتى دلوقتى وفى هذه المرحلة من عمرى وعمر أولادى وظروفى
أولوياتى الحاليـــــــة
أولا : تحسين العلاقة بربي
… أعتقد إن علاقة المرء بربه من أسمى وأكثر العلاقات التى يجب علينا المحافظة عليهـا… فمن منا يستطيع الإستغناء عن ربه؟ وتحسين العلاقة دى بيكون عن طريق عدم قطع الصلة بكتابنا والصلاة على أوقاتها ومحاولة الحفاظ على ورد يومى وهكذا من الأعمال التى ينشرح لها القلب فعلا وتيسر علينا يومنا وحياتنا .. فعلى الأقل بأحاول تخصيص نصف ساعة يوميا لتحسين هذ الصلة
ثانيا : تحسين علاقتى مع زوجى
التناغم فى الأفكار والمبادئ وطريقة المعيشة وطريقة تربية الأولاد والتخطيط للمستقبل كل دى حاجات لازم تكون متوافرة بين الزوجين لحياة أفضل لكل منهما ولزواج صحى وغير مليئ بالمشاكل وده ما يحصلش إلا بالكلام والتفاهم والحوار فى كل كبيرة وصغيرة .. أما الإنغلاق حتى لو كان فيه خلاف فدة بيزيد الفجوة ويزيد الإختلاف فى الأفكار .. وعلى هذا أعتقد إنه لازم أقعد مع زوجى فترة كل يوم لوحدنا بدون إنقطاع فى الأفكار ودى مشكلة بتواجهنا فعلا .. مش بأعرف أتكلم معاه لأن الأولاد على طول بيقاطعونا وعلى طول ليهم طلبات علشان كده أحسن وقت للكلام والرغى يكون بعد ما يناموا بس للأسف بنكون إحنا كمان البنزين بتاعنا شطب وعايزين ننام
ثالثا : علاقتى بأولادى
أولادى هم أكبر همى فى الغربة … تربيتهم التربية السليمة .. الحفاظ على دينهم … الحفاظ على تقاليدنا وعاداتنا … تعليمهم العربى وتحفيظ القرآن ده طبعا غير تعليمهم الأكاديمي هنا … محاولة التقرب منهم علشان أعرف كل حاجة وهكذا .. وعلى هذا بأحاول أدردش مع كل واحد فيهم شوية كل يوم على إنفراد وأعطى له إهتمام خاص بأحاول لما أروح أعمل شوبينج آخد حد معايا واحد ونتكلم فى السكة ونتحاور ونفتح مواضيع .. يعني ممكن نقول كل طفل منهم لازم له ساعة تقريبا يوميا ما بين مذاكرة وحفظ قرآن ورغى وكده
رابعــا : أسرتى وعائلتى فى مصر
الإطمئنان عليهم وعلى صحتهم والإستماع لمشاكلهم وبالذات فى الآونة الأخيرة ومحاولاتنا اليائسة لفهم ما يجري على الساحة فى مصر وفى العالم كله .. الإطمئنان منهم على جميع أفراد الأسرة الكبيرة .. يعني محاولة الوقوف على كل ما يدور هناك وبرضه هم لازم يعيشوا معانا ويعرفوا أخبارنا وأخبار الأولاد علشان ما يحصلش بعد بيننا
خامســا : نظافة البيت وترتيبه
وده شئ طبيعي يعني بأحاول على قد ما أقدر يكون البيت مرتب ونظيف .. الغسيل يتغسل بشكل منتظم .. يعني بدون إجهاد زيادة على وفى نفس الوقت بدون تفريط فى حق البيت .. يعني بأحاول ترتيب وتنضيف البيت ما يآخدش أكتر من ٣٠ – ٤٥ دقيقة يوميا .. مش ضرورى يبقى بيرفكت بس على الاقل مقبول
سادســــا : المطبخ والإهتمام بتغذية أفراد أسرتي
الحقيقة أنا بأحب المطبخ وأحب تجربة الجديد وعمل حلويات جديدة أو وصفات جديدة لكن أولادى تقليديين جدا جدا يا إما رز وملوخية يا إما مكرونة يعني بأحاول أخليهم يجربوا أكلات جديدة وخصوصا إن فيه واحد فيهم عايز يبقى شيف لما يكبر .. بس أنا زوجى والحمد لله بيتقبل التجارب الجديدة ومستعد للتضحية فى سبيل إشباع رغبتى فى القنابل المطبخية
سابعا :: الكتابة فى مغتربـــة
الحقيقة البلوج ده ساعدنى كتير على تكوين صداقات وأشبع إحساسى فعلا إنى ممكن أكون بأعمل حاجة تفيد غيري والحمد لله الإيميلات اللى بتوصلنى وكلامكم الجميل بيشجعنى على الكتابة أكثر وأتمنى أكون بأكتب كل ما هو مفيد وأتمنى أن يكون فى ميزان حسناتى يا رب
ثامنـا :: الإهتمام بصحتى الجسدية والعقلية
وللأسف من اولوياتى لكن فى آخر الأولويات ويجب الإهتمام بالجزء ده أكتر من كده .. وهيكون عن طريق تخصيص وقت لممارسة التمارين الرياضية بشكل يومي أو شبة يومي ولو ربع ساعة وبعدين تزيد بعد كده لنصف ساعة ..الإهتمام أكثر بشرب المية … أما الإهتمام بالصحة العقلية فدة والحمد لله أنا مواظبة عليه وبيكون عن طريق القراءة والإطلاع .. لازم أقرأ فى أى كتاب فى أى موضوع ولو ربع ساعة يوميا .. المشكلة إنى لما بأقرأ كتاب بأكون مش عايزة أسيبه
[…] بدأت معكم سلسلة عملية لخطوات بسيطة لإدارة الوقت والمرة اللى فاتت إتكلمنا عن تحديد الأولويات فى يومنا […]