من أساسيات إدراة الوقت بطريقة سليمة واللى إتكلمنا عليها قبل كده هو وجود خطة ومحاولة عمل روتين ليومنا لأن زى ما قلنا إننا لو مشينا بغير هدى أو خطة واضحة للحاجات اللى عايزين نعملها فى يومنا بيضيع اليوم من ده لده وبنكتشف فى آخر اليوم إن مفيش حاجة عاوزينها إتعملت
عايزة أوضح لكم إن الموضوع بيآخد وقت على ما نلاقى الخطة والروتين المناسب لأغلب أيام الأسبوع أو الشهر ومفيش مانع لو فيه ظروف إننا نغير من الروتين ده أو نختار منه أنسب وأهم الحاجات ونعملها وخلاص مش ضرورى كل حاجة … مثلا فى يوم حد من الأولاد لا قدر الله تعب بالليل أو صحى بالليل وما عرفناش ننام كويش مفيش مانع نتأخر فى النوم الدنيا مش هتتهد … أو سهرنا عند أصدقاء لينا وتانى يوم ما عرفناش نصحى بدرى ونعمل اللى كنا مخططين له … يوم صحينا تعبانين أو ما لناش نفس نعمل شئ معين برضه خلينا عندنا مرونة فى الروتين
تنظيم شغل البيت *
من الأسئلة الشائعة جدا بالذات للسيدات هو روتين لشغل البيت … ساعات فيه سيدات مش بيعرفوا يبدأوا منين وينتهوا فين من كتر اللى مطلوب مننا وفى الآخر نقعد على الإنترنت أو الفيسبوك أو نرغى فى التليفون وخلاص من كتر ما إحنا شايلين الهم نعمل إيه فى البيت
أولا:: لازم نعترف إننا مش ماكينات شغالة ٢٤ * ٧ بدون توقف
إحنا بشر ومش هينفع زى ما قلت لكم نعمل كل حاجة فى كل حلجة فى كل وقت … لازم التوزيع وإلا هيحصل لنا إنهيار عصبي وجسدى ونفسي من المسئولية
ثانيا :: ما نزعلش لو يوم ما عرفناش نعمل كل المطلوب
أو عملناه بس مش على أكمل وجه .. خلينا نقدر نفسنا ونحييها على اللى عملته ونقول بكرة هيكون أحسن …ونأمل فى غد أفضل
ثالثا :: خلى الأمور بسيطة وبلاش تعقيد
أنا أعرف ناس ما تعتبرش البيت نضيف إلا لما تقلبه رأسا على عقب وتفضل نايمة فى السرير آه يا ضهري لغاية ما ييجي ميعاد التنضيف اللى بعده!!! طيب ليه كده نهلك صحتنا ونفسنا ونكسر عضمنا بدون لازمة .. إحنا هنا لوحدنا ومفيش حد زي بلادنا بييجي يساعدنا فى تنضيف البيت ولو فيه بيكون غالى جدا جدا .. خلى الأمور بسيطة وتأكدى مفيش حد حيمشى ورانا بقطنة بيضا فى البيت يمسح ويطلع لنا التراب ويقول لنا القطنة ما بتكدبش واللا إيه
رابعا :: لازم نعمل خطة واضحة وصريحة
التخطيط مهم جدا جدا والمرة اللى جاية بإذن الله هأقول لكم تبدأوا إزاى التخطيط وإنتم بقى تمسكوا طرف الخيط وكل واحد يخطط حسب إحتياجات بيته وأسرته ونصيحة منى ليكم لما تيجوا تعملوا الخطة إشركوا أفراد اسرتكم معاكم بالذات الزوج خليه يقعد معاكى لأنه ممكن يقول لك مثلا لأ خلى يوم السبت لشغل البيت والأحد خلينا نخرج نتفسح أو يكون عايز الويك إند كله نبقى فري فيه .. يعني شوفوا إحتياجات أفراد أسرتكم أولا قبل الجلوس والتخطيط بالورقة والقلم
Leave a Reply