اليوم الرابع كان يوم شاق لأنه تنضيف الفريزر والثلاجة وفعلا كان مرهق
الفريزر عندي كان فيه حاجات يمكن بقالها سنتين ولازم تترمي ما ينفعش تستخدم ومركونة وحاجة صعبة
والبقع طبعا في كل مكان لكن حالته كانت أخف من التلاجة على أساس إنه مش بيستخدم كتير والأيادي الناعمة الصغيرة مش بتدعبس فيه زي التلاجة
التلاجة بقى كانت حالتها أصعب بكتير
فيها بقع كتير وحاجات بتقع ومش بتتسمح وأنا مش شايفاها ومش واخدة بالي منها
حضرت محلول الغسي ماء فاتر وبيكنج صودا فقط
وإبتدينا الشغل
هنا الفريزر بعد المعركة والحمد لله
وهنا التلاجة
فرشت الأدراج بالأكياس الورق البني كنت قريت إن ده بيخلي الفاكهة والخضار في التلاجة ما يبوظوش …. هنشوف
وشيلت الطماطم من التلاجة لأني مع البحث لقيت ناس كتير كاتبين إن الطماطم مش المفروض إنها تتحط في التلاجة نهائيا!!! لأنها بتبوظ وطعمها بيكون مش حلو … شيئ غريب أنا بقالي مليون سنة بأحطها في التلاجة وكذلك والدتي
وحطيت فيهم علبة بيكنج صودا علشان الروائح في الفريزر وفي التلاجة جربت حطيب علبة فيها قهوة علشان تمتص الروائح
أتمنى تكونوا لسه متابعين معايا وأشوفكم في اليوم اللي جاي إن شاء الله