الحلويات
مطبخ مغتربة :: الملبن من وصفات حلويات المولد
الملبن من أجمل حلويات المولد .. عندنا فى مصر نوع إسمه الملبن الحبل وده بيكون ملبن أبيض وفيه عين جمل – جوز- ونوع تانى بيكون ملبن أحمر وفيه بندق أو سادة خالص
الملبن الحبل ده علشان يتعمل محتاج عين الجمل يتلضم فى حبل ويتغطس الحبل عدة مرات فى خليط الملبن لغاية لما يتكون على الحبل ملبن سميك وفي نصه عين الجمل … طبعا دي حاجة صعب نعملها فى البيت … علشان كده عملته مربعات وخلاص يعني ملبن بعين الجمل بس مقطع مربعات.. طعمه جميل برضه ومش هتفرق معانا الأشكال الهندسية قوي يعني
ويوجد أيضا الملبن الملون بنكهات مختلفة .. لكن أشهر واحد هو الملبن الأحمر بنكهة فراولةعلى ما أتذكر وكان بيكون فيه ساعات بندق
تعالوا نشوف بيتعمل إزاي
::المقــــاديـــر
٣ كوب سكر
٢ونصف كوب ماء
٥ ملاعق جيلاتين بودرة
٥ ملاعق نشــــا
قطرات من ماء الورد
فانيليا + مكسرات إختيارية
للملبن الألوان :: ألوان صناعية للطعام ومكسبات طعم
::الطــريقـــــــة
يذاب الجيلاتين في نصف كوب ماء والنشا فى كوب ماء ثم نضيفهم معا إلى باقى المقادير- عدا الفانيليا وماء الورد أو أى نكهات وألوان أخرى- على نار متوسطة حتى الغليان
عند الغليان نضيف ماء الورد والفانيليا ونطفئ النار ونترك الخليط يبرد حوالى ١٠ دقائق
نحضر قالب بايركس ٩*٩ تقريبا ونخلط معلقة كبيرة نشا + معلقة كبيرة سكر بودرة ونرش بيهم القالب ثم يصب الخليط فوقهم ونضيف المكسرات المرغوب فيها
يترك حوالى ساعة حتى يهدأ تماما ثم يدخل الثلاجة على الأقل ٤ ساعات أو خلال الليل
بإستخدام سكين حاد – يمكن غمس طرفه فى نشا وسكر بودرة- نقطع الملبن مربعات صغيرة أو حسب الرغبة
يقدم سادة أو يغطى من كل الجوانب بالسكر البودرة
لعمل الملبن الألوان نضيف الألوان والنكهة – نبدأ بثمن معلقة من النكهة- ونتركه يبرد ثم نتذوق الخليط وإذا أردنا زيادة النكهة .. نزيدها أقل من ثمن معلقة فى المرة على حسب شدة النكهة حتى لا تزيد مننا النكهة عن اللزوم زيصبح الطعم لاذع
يدخل الثلاجة أيضا لمدة لا تقل عن ٤ ساعات – أنا تركته يوم كامل تقريبا
نخرج القوالب ونغمسها من كل جانب بالسكر العادي- ودي خطوة إختيارية .. فقط حبيت أعملها لأولادي لإعطاء شكل أجمل
يقطع مكعبات ويغطى بالسكر من كل الجوانب ويترك لينشف يوم أو إتنين حتى يتماسك جيدا
يحفظ بعلبة محكمة الغلق ويقدم بالهنا والشفا
::ملحوظات عامة
أولادي عجبهم من غير السكر .. يعني هو طبعا اللى بالسكر عجبهم برضه بس بيقولوا من غير السكر أحلى
الحلويات دي ممكن نعملها بطريقة صحية أكثر بإستخدام العصير الطبيعي لإضفاء اللون والنكهة
مطبخ مغتربة :: السمسمية من حلاوة المولد
كل عام وأنتم بخير … المولد النبوي الشريف على الأبواب أعاده الله علينا جميعا وعلى أوطاننا بخير
الحقيقة في بلدي الحبيبة مصر … وعند حلول شهر ربيع الأول تزدان مآذن المساجد بالأنوار والدروس والخطب التي تحث على تتبع خطاه عليه الصلاة والسلام والتأسي بأخلاقه الكريمة … علاوة على الأمسيات الدينية فى إذاعة القرآن الكريم
ومن بين مظاهر الإحتفال بالمولد النبوي الشريف شراء حلوى المولد … مش عارفة الحلويات دي موجودة بمصر فقط واللا فى العالم العربي كله .. من أشهرها الملبن الحبل .. والملبن السادة والسمسمية والفولية والحمصية وخلافه من أصناف الحلويات اللذيذة
ولإضفاء بعض مظاهر الإحتفال على بيتنا .. والتي منها قص الحكايات والقصص عن سيرته العطرة عليه الصلاة والسلام … بدأنا نعمل حلويات المولد وأولها وأحبها لقلبي وقلب الكثيرين هي السمسمية أو حلاة والسمسم
الحلاوة دي بتتعمل بالسمسم والفول السوداني .. ودلوقتى بتتعمل بكافة أنواع المكسرات .. يعني بقى فيه لوزية وبندقية .. وكاجويه برضه ههههه .. الأساس واحد وبنحطه على أى نوع مكسرات نحبها .. تعالوا نعمل الأساس
:: هنحتـــاج الآتي
١ وربع كوب سكر أبيض
ربع كوب ماء عادي من الحنفية
٢ معلقة كبيرة كورن سيرب
١ معلقة صغيرة ليمون
ماء ورد حسب الرغبة ورشة فانيليا
نرفع أول ٣ مقاديرا على النار وعند الذوبان نضيف الليمون وماء الورد والفانيليا
نتركها على النار ٥ دقائق أو أكثر حتى يتكون عندنا سائل كثيف زى الصورة اللى فوق كده
لكل نصف كوب سمسم محمص أضفت معلقتين كبار من خليط السكر المعقود .. يعني نضيف الخليط حتى يلتصق السمسم مع بعضه زى الصورة
بمساعدة ورق الخبز أو ورق الزبدة نشكل السمسم على هيئة قالب مستطيل ونتركه حوالي ربع ساعة لغاية لما ينشف
يقطع بسكين حاد إلى مستطيلات أو قطع صغيرة
يحفظ في علبة محكمة الغلق .. ويقدم بالهنا والشفا
أيضا بنفس الطريقة عملتها بالكاجو الغير محمص … بس الطعم كان هيبقى أحلى لو كنت حمصته قليلا
ملحوظة :: لو تركنا خليط السكر هيتجمد وينشف .. علشان كده يستحسن نحطه فى حمام ماء ساخن فترة العمل على المكسرات علشان يحتفظ بالسيولة بتاعته
مطبخ مغتربة :: بسكويت اليانسون
بسكويت اليانسون من أشهر البسكوتات فى مصر وأعتقد بالعالم العربي كله … موجود بكل مخبز فى مصر ورائحته تفوق الخيال بالذات لو مخبوز بالبيت .. يا سلاااااام بيدي للبيت رائحة اليانسون المريحة للأعصاب فعلا .. جميل ولذيذ فى ليالي ونهار الشتاااء البااااااردة مع كوب من الشاي واللا الشاي بلبن … رائع والله وسهل جدا جدا … تعالوا نعمله سوا
هنحتاج الآتي
٤ كوب دقيق متعدد الإستعمالات
٤ بيضات حجم كبير + رشة فانيليا
١ كوب زيت – إستخدمت دوار الشمس أو الكانولا
١ كوب سكر أبيض عادي
١ معلقة كبيرة بيكنج بودر
٢ معلقة كبيرة يانسون محمص – أنا إستخدمت أكتر
الطريقـــــة
نسخن الفرن على درجة حرارة ٣٥٠ فهرنهايت ونجهز صينيتين نفرش فيهم فويل أو ورق زبدة
في وعاء عميق نضرب البيض مع الفانيليا والسكر جيدا بالمضرب الكهربائي ثم نضيف الزيت ونخلطهم كويس
نضيف اليانسون للخليط السابق ثم الدقيق والبيكنج بودر حتى يخلطوا معا جيدا
نفردها فى صينية الفرن وتخبز لمدة ٢٠-٢٥ دقيقة حتى تحمر الحواف
نطلع الصينية ونتركها تبرد ١٠ دقائق فقط ثم تقطع بسكن حاد بالورب أو مستطيلات
توضع فى صينية الفرن ونشغل الفرن أو الشواية حتى تتحمر من جميع الجوانب إنتبهوا حتى لا تحترق
ويقدم بالهنا والشفا….. ويحفظ الباقى فى علبة محكمة الغلق
مطبخ مغتربة :: بسبس كيك
اليوم أقدم لكم كيكة سهلة جدا جدا ولذيذة .. تعلمتها من صديقتي هند بمنتدى لك … ولها كل الشكر والتقدير
جربوها وإن شاء الله تعجبكم
:: المقــــاديــــر
١ كوب سميد – إستخدمت الناعم *
٢/١ كوب زيت أى نوع – إستخدمت زيت الكانولا دوار الشمس *
٤/٣ كوب سكر أبيض *
١ كوب لبن حليب *
١ كوب جوز هند *
١ كوب دقيق متعدد الإستعمالات *
١ معلقة كبيرة بيكنج بودر *
٢ بيضة + رشة فانيليا + رشة هيل مطحون – أنا مش بأحط هيل *
هنحتاج شربات/ شيرة للتسقية -١كوب سكر لنصف كوب ماء
:: الطــريقــــــة
فى الخلاط نضرب البيض مع الفانيليا ثم السكر وبعدين نضيف الزيت ثم اللبن ويخلط جيدا
نضيف الخليط السابق على السميد ثم الدقيق وأخيرا البيكنج بودر
ثم توضع فى بايركس وتخبز فى فرن ٣٥٠ فهرنهايت حتى تحمر من فوق
تسقى بالشربات البارد وهى ساخنة وتقدم بالهنا والشفا
يمكن تزيينها بالمكسرات أو جوز الهند المبشور
::ملحوظة
أشارت الأخت هند إنه لازم نضيف البيكنج بودر بعد خفق كل المقادير وأنها تضع الكيكة وتتركها قليلا قبل وضعها بالفرن .. الحقيقة أنا جربت الطريقتين والكيكة طلعت لذيذة بكل الأحوال .. يعني حطيت البيكنج بودر مع الدقيق مرة ومرة أخرى عملت زى ما قالت والنتيجة رائعة بالحالتين ولذيذة .. جربوها وقولوا لى النتيجة .. أتمنى تعجبكم
مطبخ مغتربـة :: البسيــمة
البسيمة من الحلويات الشرقية التى تتميز بها مصر ولها طرق عديدة .. لكن دى أول مرة أجربها بدقيق السميد عادة بنعملها بالدقيق الأبيض فقط لكن وجدت طريقة يدخل فيها السميد – دقيق البسبوسة – وكانت حلوة والنتيجة أكثر من مرضية وعجبتنى الحقيقة .. تعالوا نشوف طريقة البسيمة الجديدة
المقاديــر
٢ كوب جوز هند ـ ايوة ٢ كوب هى البسيمة كلها جوز هند أساسا
٤/٣ كوب دقيق سميد
٢ معلقة كبيرة سمن/زبدة غير مملحة
كوب وربع لبن أو ماء أو خليط – إستخدمت خليط
معلقة صغيرة بيكنج بودر
مكسرات للزينة – فستدق/ لوز/سودانى أى شئ
مقادير الشربات – الشربات خفيف
١ كوب سكر
١ كوب ماء
رشة فانيلا
١ معلقة صغيرة ليمون
الطريقــة
سهلة جدا جدا نخلط كل المكونات مع بعض ثم نفردها فى صينية
نزينها بالمكسرات أو الزبيب أو نخليها سادة زى ما تحبوا
نقطعها بالشكل ده مربعات وتدخل فرن مسخن مسبقا على ٣٥٠ فرنهايت
نتركها فى الفرن حوالى ٤٥ دقيقة أو إلى أن تحمر وتستوى
أثناء وجود الصينية بالفرن نعمل الشربات
نصيف السكر على الماء ويرفع على النار .. نتركه يغلى ٥ دقائق ثم نضيف الليمون والفانيليا ونتركهم على النار معا حوالى ١٥ دقيقة
نصب الشربات السخن على البسيمة الساخنة فور خروجها من الفرن وتترك لتبرد قليلا وتقدم بالهنا والشفا
مطبخ مغتربة :: أصابع البقلاوة
البقلاوة … البقلاوة … من أجمل الحلويات .. أنا على طول كنت بأعملها فى الصينية وبأقطعها مربعات .. ودى أول مرة أعملها أصابع والحمد لله طلعت جميلة جدا
هنحتاج
باكيت جلاش
زبدة سايحة أو سمن حوالى كوب
خليط من المكسرات اللى تحبوها مع رشة قرفة لو بتحبوها
مقادير الشربات
٢ كوب سكر أبيض
١ كوب ماء
رشة فانيليا
قطرات من ماء الزهر إذا بتحبوه
فستق مجروش للتزيين
وهنحتاج عصا خشبية مدورة أنا إستخدمت عصا معلقة خشبية طويلة
نخرج الباكيت من الفريزر بفترة حوالى ساعتين قبل ما نبدأ فى لف الجلاش .. نآخد ورقة من ورق الجلاش ونغطى المتبقى بفوطة أو كيس علشان ما تنشف
ندهن الورقة بالزبدة السايحة ونرش عليها الحشوة
ثم تلف على العصا الخشبية ونأتى بورقة أخرى من الجلاش وندهنها بالزبدة ونلفها على الورقة الأولى
ثم نكشكشها من الطرفين ونسحبها برفق من العصا .. ونرصهم فى الصينية وندهن الوجه مرة أخرى بالزبدة
تدخل فرن مسخن مسبقا على ٣٥٠ فهرنهايت حتى تصبح ذهبية اللون ثم تسقى بالشربات البارد
وممكن نسقيها بالعسل لو مش بتحبوا الشربات ويزين وجهها بالفستق المجروش