إصنعـ(ـي) بنفسك :: خلطة للعشب الضار

الأعشاب الضارة هي أعشاب تنمو في البيت عندنا في حديقة البيت أو حتى أحيانا في وحدات الزرع  الكبيرة أحيانا كتيرة بتكون كبية وصعب التخلص منها

أحيانا برضه بتنمو بين شقوق الحجر أو بجوار سور البيت ودي بعض منها

فيه أنواع كيماويات كتيرة في السوق نستخدمها للتخلص من العشب الضار لكن عليها تحذيرات كتير ومخيفة

لكن بإستخدام حاجات موجودة في البيت بسيطة ورخيصة وآمنة ممكن نتخلص من العشب الضار بسهولة ويسر

وده كل اللي هنحتاجه

خل وصابون مواعين عادي وبخاخة علشان نرش بيها الزرع .. بس خلاص

نملى البخاخة بالخل ونضيف معلقة صابون الأطباق ونقفل ونرج كويس

في يوم مشمس مفيش مطر ولا غيوم كتير .. مفيش هواء نرش من البخاخ على الزرع

ننتظر شوية أو تاني يوم هنلاقي الزرع ده إنتهى وبقى سهل جدا إننا نشده

ودي بعض صور المذبحة اللي قمت بيها .. الظريف كمان إننا ممكن نخلي أولادنا يساعدونا

بعض الملاحظات: نآخد بالنا

الخلطة دي بتشتغل كويس أوي في يوم مشمس حار مفيش مطر ولا هوا

نرش بالبخاخة ونخلي بالنا لو عندنا زرع تاني عايزين نحتفظ بيه بلاش الخلطة دي تييجي عليه لأن الخلطة دي مش بتفرق بين الزرع اللي عايزينه والزرع اللي مش عايزينه

فيه أعشاب بتكون عنيدة حبتين ومش بتروح من أول مرة فمن الممكن إنكم تحاولوا تاني معاها مرة أو إتنين وإن شاء الله تموت

 

أما ليه الخل بيشتغل فهو ببساطة لأنه بيغير من حموضة التربة  مؤقتل وبتخلي من الصعب على العشب إنه ينمو مرة تانية وكمان الخل بمجر ملامسته للنبات بيحرقه وبيموت وبنحط عليه صابون علشان نسهل على الخل إنه يلزق في الزرع

 

حل آخر لم أستطع تجربته أسهل وموفر أكتر وهو الماء المغلي.. ببساطة نغلي مية في براد الشاي ونصب على الزرع اللي مش عايزينه هيموت على طول وفيها كمان فايدة إنها بتكوت أي حشرات في الزرع ويمكن ده السبب اللي مخليني مش قادرة لسه أستخدمه وهو إحساسي إني بأغرق شيئ حي في مية مغلية مش عارفة مع إني بأستخدم مبيدات حسرية عادي ما عنديش مشاكل!!! يمكن أتخلص من العقدة دي قريب ؟؟؟ إدعوا لي

 

هنا فيديو للمجزرة اللي عملتها لايف