وصفات الفطور والعشا والسناكس

السلام عليكم

اليوم معايا وصفة لذييييذة ويموت عليها الصغار الحلوين

مين فينا مش بيحب البان كيك؟ أنا شخصيا مش بأميل ليه أوي مع إني بأموت في القطايف والإتنين ولاد عم أساسا بس أهه القلب وما يريد أو خلينا نقول البطن وما تريد هههه

أنا أولادي ممكن يآكلوا طول النهار بان كيك وما يعترضوش بس المشكلة بالنسبة لي في الوقفة بتاعته في المطبخ بصراحة متعبه

الوصفة بقا النهاردة بان كيك لذيذ واللي بيخليه أحلى وأحلى إنه مش محتاج وقفة في المطبخ هنعمله ونحطه في صينية الكب كيك وعلى الفرن عشر دقائق ويكون جاهز

أنا هنا عملته بالشيكولاتة لكن ممكن تعملوه بأي حاجة أو سادة يعني اللي بيفضله أولادكم أو اللي بتفضلوه إنتم على البانكيك العادي إعملوه هنا

الوصفة دي ممكن تتعمل وتتشال بالفريزر ونسخنها وقت ما نحتاجها تصلح للفطار أو كتحلية أو في أي وقت جميييييلة مع إني مش من هواة وعشاق البان كيك لكن أحب آكله بالطريقة دي جدا

رغينا كتير مش كدة .. طيب أسيبكم بقا مع الوصفة والفيديو يا رب يعجبكم

ميني بان كيك بالشيكولاتة في الفرن

2015-11-12 12:47:34

وصفة سهلة وسريعة لعمل البان كيك بالفرن محببة للأطفال وتصلح للفطار أو أي وقت

Write a review

Save Recipe

Print

Ingredients

1. ١ وربع كوب دقيق أبيض
2. كوب لبن مضاف إليه ١ م صغيرة خل أبيض
3. بيضة
4. ذرة ملح
5. ربع كوب سكر
6. ١ م صغيرة بيكنج بودر
7. ١\٢ م صغيرة بيكنج صودا
8. ٢ م كبيرة زبدة سايحة
9. رشة فانيليا
10. إختياري: حبيبات شيكولاتة أو فواكة مجففة أو طازجة

Instructions

1. نضيف معلقة الخل لكوب اللبن ونتركه ٥ دقائق حتى يتخثر
2. نخلط المكونات الجافة مع بعض الدقيق والسكر والملح والبيكنج صودا والبيكنج بودر
3. نضيف الفانيليا والزبدة والبيضة إلى خليط اللبن ونقلب جيدا
4. نضيف المكونات السائلة إلى خليط الدقيق ونقلب حتى يختفي الدقيق
5. نرش صينية الكب كيك بالزيت أو نمسح الاكواب بزبدة
6. نملأ الأكواب بالخليط حتى ثلثي الكوب
7. يوضع بها شيكولاتة النوع المفضل لديكم أو فواكة مجففة أو طازجة
8. توضع بفرن مسخن مسبقا على ٤٠٠ فهرنهايت لمدة بين ١٠-١٢ دقيقة حتى تصبح ذهبية
9. تقدم مع العسل أو الميبل سيراب
10. وبالهنا والشفا

Notes

1. تزين الأكواب بالنوع المفضل لديكم من الشيكولاتة أو الفاكهة سواء كانت مجففة أو طازجة كما يمكن تركها كما هي بدون إضافات

مغتربة http://moghtareba.com/

السلام عليكم

وصفة اليوم سهلة جدا جدا وحلوة وبتعمل كمية كبيرة يعني ممكن لو عندنا ضيوف تسد معانا تمام هي مشكلتها حاجة واحدة بس .. إنها مش للناس بتوع الرجيم فطائر مقلية بالتفاح ومرشوشة بالسكر

تقدروا ترشوها بالسكر العادي أو البودرة أو تقدروا تغمسوها بالعسل أو السيراب – أولادي عملوا كده بالنسبة ليهم كانت محتاجة سكر إنما بالنسبة لي أنا كانت كفاية جدا علي .. لو إنتو بتحبو السكر زيادة ممكن تزودوا السكر في العجينة أو تبقوا تحطوها في عسل أو حتى شربات بارد وهي ساخنة

مقاديرها ومكوناتها سهلة ومش محتاجة إفتكاسات في عملها أتمنى تعجبكم

السلام عليكم ورحمة الله وبركاته

اليوم جاية لكم ومعايا قنبلة فعلا .. أنا بأمووووت في البطاطس المحمرة بالذات بتاعت ماكدونالدز بس طبعا بألم نفسي على الآخر وبأغمض عيني عنها بشتى الطرق وأقعد أقول اللهم إخزيك يا شوشو هههه

بأستعيض عنها بالبطاطس اللي مخبوزة بالفرن لكن مهما عملت فيها بتبقى حلوة بس مش البطاطس المحمرة اللي نعرفها المقلية بالزيت الغزير

المرة دي جايبة لكم طريقة وأسرار لقرمشة البطاطس بالفرن .. طبعا لسه برضه مش زي المقلية ١٠٠٪ بس لحد كبيييير جدا مقرمشة وجميلة والأحلى إنها أصح بكتير من المقلية

إتفرجوا على الفيديو فيه أسرار قرمشة البطاطس وبالهنا والشفا … جربوها وإن شاء الله تعجبكم

البطاطس المحمرة بالفرن

2015-08-24 10:09:45

بطاطس لذيذة محمرة ومقرمشة لكن بالفرن بدون قلي صحية ولذيذة

Write a review

Save Recipe

Print

Ingredients

1. بطاطس الكمية اللي تحبوها
2. توابل (ملح وفلفل ممكن زعتر أو روزماري أو كمون أو أو التوابل اللي بتحبوها
3. ماء
4. خل
5. زيت

Instructions

1. نبدأ بتقطيع البطاطس مكعبات أو ويدجز حسب الرغبة
2. نسلق البطاطس في ماء مضاف له خل معلقة لكل لتر ماء
3. نضع البطاطس في الماء وهو بارد
4. نترك البطاطس تغلي حوالي ٥ دقائق
5. المطلوب إن البطاطس تكون بدأت في السوا لكن مش مهرية
6. نطلع البطاطس ونصفيها ونرش عليها زيت - يفضل زيت الزيتون مع التوابل المرغوب فيها
7. تدخل فرن حامي ٤٠٠ فهرنهايت ونسيبها لمدة ٤٥ دقيقة ونقلبها في النص
8. تترك حتى تكون كرسبي وذهبية
9. بالهنا والشفا

مغتربة http://moghtareba.com/

مربى الرقي أو مربى البطيخ رووعة فعلا ومعمولة من قشور البطيخ اللي بيكون مصيرها في الغالب الزبالة .. الرقي أو الرجي باللهجة الخليجية معناها البطيخ وأعتقد ده مسمى متداول في العراق وأيضا الكويت

المربى دي مش محتاجة فن واللا تعب بس لما يكون عندكم بطيخ وتآكلوه بالهنا والشفا إبقوا جربوها كل اللي هتحتاجوه قشر البطيخ مع سكر والنكهة المفضلة ليكم فانيليا أو قرفة أو قرنفل يعني اللي موجود

 وده فيديو قصير يوضح لكم طريقة عمل مربى البطيخ أتمنى يعجبكم وتجربوها إن شاء الله

مربى الرقي/ البطيخ من العراق

2015-05-28 10:33:20

Write a review

Save Recipe

Print

Ingredients

1. ٤ أكواب قشور بطيخ متنضفة
2. من ١- ٢ كوب سكر - حسب الذوق أنا إستخدمت ١ وربع كوب

للنكهة

1. عصير نصف ليمونة مع بشر القشرة أو
2. رشة فانيليا أو
3. ٤ حبات قرنفل مسمار أو
4. عود قرفة

Instructions

1. نقوم بتنضيف قشر البطيخ من الطبقة الخضراء
2. ممكن نترك جزء من القلب الأحمر للبطيخ
3. ونقطعها قطع صغير
4. تغطى بالماء وتترك على نار هادية حتى يستوي القشر
5. نلاحظ أن القشر أصبح شفافا لحد كبير
6. نضيف النكهات المفضلة لدينا
7. ثم نضيف قكرات من الليمون مع السكر
8. تترك على نار هادئة حتى يثقل القوام
9. تعبأ في برطمانات نظيفة
10. وبالهنا والشفا

مغتربة http://moghtareba.com/

قبل كده كنت وريتكم الفلافل المصري اللي بتتعمل من الفول .. النهاردة إن شاء الله هأوريكم الفلافل الشامي أو فلافل الحمص زي ما بنسميها في مصر لذيذة جدا وأخف من المصرية وظريفة ولطيفة زي أهل الشام بالظبط جربوها وبإذن الله تعجبكم

شوفوا لونها قد إيه جميل وطعمها فعلا راائع وممطن نعملها بالحمص الجاهز بس بالحمص الناشف بيكون طعمها أحلى لكن لا مانع لو مستعجلين تشتروا علبتين حمص جاهز وتعملوا بيهم الفلافل

الفلافل طبعا ممكن تحتفظوا بيها في الفريزر في أكياس وعلشان تفضل محافظة على لونها الأخضر الجميل بنحط لها بيكربونات أو البيكنج صودا

هنـــا  فيديو صغير بيوضح طريقة عمل الفلافل الشامي أتمنى تعجبكم وبالهنا والشفا

الفلافل الشامي أو فلافل الحمص

2015-02-19 15:11:04

Write a review

Save Recipe

Print

Ingredients

1. ٢ كوب حمص ناشف
2. ١ بصلة كبيرة
3. ٨ فصوص ثوم
4. حزمة بقدونس مقطعة
5. حزمة كزبرة خضرا مقطعة
6. ٢ معلقة صغيرة بيكنج صودا

عند قلي ربع العجينة السابقة هنحتاج

1. بيضة + ١ م صغيرة كزبرة ناشفة + ملح - تقريبا نص معلقة صغيرة
2. زيت غزير للقلي

Instructions

1. ننقع الحمص طوال الليل ثم نصفيه ونغسله جيدا
2. في الفود بروسيسور نضع المكونات مع بعض ونفرمها جيدا
3. نفرم مرتين أو تلالتة حتى نحصل على عجينة ناعمة للفلافل
4. نضيف البيكنج صودا للعجينة السابقة ونخلط جيدا
5. نقسمها في أكياس بالفريزر ونحتفظ بها حتى ٥ أشهر

للقلي

1. نخرج الكيس من الفريزر ونترك العجينة تفك
2. نخلط البيضة مع الكزبرة والملح ثم نضيف لها عجينة الفلافل
3. في زيت غزير على نار متوسطة نشكل الفلافل ثم نقليها
4. وبالهنا والشفا

مغتربة http://moghtareba.com/

الفول المدمس … يا جماله هههههه وجبة فطار/ غدا / عشا … رائعة وغير مكلفة

طبعا الفول المدمس غني عن التعريف بالتأكيد … متربيين عليه كلنا ومع الطعمية والباذنجان المقلي بالتوم والخل تبقى وجبة غدا نآكلها وننام على طول مفيش تفاهم

مين فيكم بيفكره الفول المدمس برمضان وأيام رمضان الجميلة؟ أتذكر جدتي الله يرحمها لما كنت أوقات بأبات عندها في رمضان وأنا صغيرة كانت لاااااااازم طبق الفول في السحور .. ده غير الخيار والزبادي دي كلها من التراث الرمضاني في العائلة عندنا .. الله يرحمهم جميعا وكل أمواتنا وينور قبورهم ويملأها برائحة الجنة وعطر الجنة يا رب

الفكرة الرئيسية في تدميس الفول هي طبخه على الهادي جدا .. طبعا في بلادنا بنلاقي الدماسة أو قدرة الفول اللي بالكهربا اللي بنعمله فيها .. لكن هنا أحيانا بتكون غير متوفرة والحل الآتي

يا إما تعملوها على البوتجاز عادي في أي حلة لكن عينكم عليها وخللوا بالكم المية على الفول ما تنشفش وإلا هيتحرق

أو لو عندكم حلة الضغط اللي بنسميها البريستو أو الأسهل واللي متوافر على الأقل بأمريكا هي حلة السلو كوكر أشكالها كتير وأسعارها تبدأ من ١٠ دولار وطالع على حسب الحجم والماركة

على العموم لو ما عندكمش لا دي ولا دي مش مشكلة إعملوها في حلة عادية بس زي ما قلت لكم لازم عينكم عليها

بعد ما الفول بيستوي فيه بقى كذا طريقة للتحضير أنا بأحب أعمله بالتوم والطماطم والصلصلة وأوقات بنعمله بالسجق لو متوفر أو الهوت دوج الصغير أو الكبير ونقطعه قطع صغيرة … وطبعا ما ننساش خبز البيتا اللذيذ .. وبألف هنا

الفول المدمس

2015-01-22 11:27:10

Write a review

Save Recipe

Print

Ingredients

1. ١ باوند فول ناشف
2. ٣ ملاعق كبيرة أرز غير مطهي
3. ٣ ملاعق عدس غير مطهي
4. ١ حبة طماطم
5. ٣ فصوص ثوم
6. 

Instructions

1. ننقع الفول في ماء كفاية ليغطيه لمدة ٤ ساعات على الأقل
2. نغسل الفول كويس بعد النقع ونصفيه من ماء النقع
3. في السلو كوكر
4. نغسل الأرز والعدس
5. ثم نضيف كل المكونات معا
6. ثم نضيف ماء حتى يغطي الفول
7. نظبطه على أقل حرارة ونتركه ٨ ساعات
8. ممكن أكتر على حسب نوع الفول .. نبدأ نتأكد من السوا بعد ٦ ساعات تقريبا
9. وده شكله بعد ما إستوى
10. بعض إقتراحات التقديم: نشوح بصلة شرائح مع طماطم في زيت زيتون
11. نضيف قطع هوت دوج أو سجق لو متوفر
12. ثم نضيف الفول والملح
13. 
14. ويقدم بالهنا مع خبز البيتا
15. طريقة أخرى: نشوح ثوم مع طماطم في زيت زيتون
16. ونضيف عليه الفول ثم الملح والكمون ومعاه عصرة ليمون

مغتربة http://moghtareba.com/

الأومو رايس هو ببساطة أرز بأي نوع من البروتين ملفوف في بيض مقلي … على الرغم من غرابة الطبق لينا إلا إن طعمه جميل جدا وجديد جدا جدا وأنصحكم تجربوه إذا كنتم بتحبوا تجربوا أكل جديد ومن مطابخ مختلفة حول العالم

المقادير والوصفة في الفيديو