وصفات الفطور والعشا والسناكس
مطبخ مغتربة :: تعالوا نعمل البسطرمة
البوست ده للناس اللى بتحب البسطرمة ومغرمة بيها زيي كده 
الحقيقة كل أفراد أسرتى الصغيرة والكبيرة – ما عدى والدى – بيموتوا فى البسطرمة على الرغم من رائحة الحلبة بها لكن طعمها لا يقاوم .. البسطرمة فى مصر راائعة لأن اللحمة هناك جميلة وناعمة طبعا أنا بأتكلم عن الأنواع الحلوة الغالية .. وهنا برضه بألاقى بسطرمة لكن الحقيقة ساعات بأحس إنها بلاستيك شوية مش عارفة ليه يمكن ده بيرجع لنوعية اللحم المستخدم .. وأكيد غالية وبعدين فيها مشكلة بأحس إن فيها صبغة وأعتقد إن فيها صبغة لإعطاء اللحم لون أحمر زاهى وموضوعالصبغة ده بيقلقنى .. أنا عارفة إن كل شئ فيه صبغة لكن بأحس إنها زيادة شوية .. المهم يعني قررت خوض التجربة .. وجربت قبل كده كذا مرة بوصفات متعددة وفشلت فشل ذريع معايا .. المرة دى توكلت على الله وأخدت الوصفة من خالتى بمصر ومع بعض التعديلات البسيطة اللى تلائم البيئة هنا طلعت جميلة .. وفيه صديقة لى جربت وصفتى لكن بولاية أخرى وقالت لى طلعت رائعة والحمد لله .. ندخل فى المفيــد
المقــــادير
٢ باوند – تقريبا ١ كيلو – نوع لحم يكون ناعم وأحمر يعني نشيل الدهن من عليه وننضفه كويس *
وطلعت نص نص مش وحشة Chuck roast أنا إستخدمت قطعيه هنا إسمها
أعتقد هتكون أحسن Eye Round المرة اللى جاية هأستخدم قطعية الـ
٢/١ كوب ملح كوشر – ملح خشن يعني *
١ ثمرة فلفل رومى أحمر – لإضفاء لون طبيعي وطراوة فى التغليفة بتاعت اللحمة *
٢ معلقة صغيرة ملح عادى *
من ٣ – ٤ راس ثوم تقريبا حوالى ٢٥ فص ثوم *
٢/١ كوب بابريكـا بودرة *
٢/١ كوب حلبة مطحونة *
فى محاولاتى السابقة كنت بأشترى الحلبة من المحل العربى وأطحنها والمرة دى إشتريت حلبة من العطار فى مصر إسمها حلبة للبسطرمة هى مش مخصوص ولا حاجة هى أعتقد محمصة ومطحونة يعنى مش إفتكاسة يعني
الطريقـــة
فى الأول نغسل قطعة اللحم جيدا وننشفها بورق المطيخ كويس ونعمل فيها شقوق غير نافذة مجرد شقوق سطحية مختلفة
ونرش عليها الملح الخشن كويس ونغطيها بالملح نحشى الشقوق اللى عملناها كويس بالملح الخشن ثم نضع عليها شئ تقيل .. ممكن حلة فيها مية مثلا أى وزن تقيل يضغط عليها كويس ونتركها لمدة ٢٤ ساعة علشان تنزل ميتها ونحاول نعمل تصريف المية كل شوية يعني ما نخليش اللحمة تعوم فى ميتها فممكن نحطها على شبكة وتحتها صينية مثلا لإستقبال المية بتاعت اللحمة – طبعا درجة حرارة الغرفة اللى فيها اللحمة نحاول إنها ما تعديش ٢٥ درجة مئوية أو ٧٧ فهرنهايت .. لومش هينفع ممكن تتركوا اللحمة فى التلاجة ٣ أيام وتشيلوا المية كل شوية
بعد كده هتلاقوا اللحمة بقيت رفيعة ومبططة حبتين ولونها هيكون أغمق أكيد .. نشطفها كويس جدا من الملح بالماء البارد وننشفها كويس ونغطيها بأى قماشة مخرمة ونعلقها بإستخدام أى دوبارة فى الهواء لمدة ٣ أيام ولازم يكون المكان جيد التهوية
نخلط مكونات التغطية بتاعتها فى الفود بروسيسور بتاعنا .. الثوم والملح الناعم والبابريكا والفلفل الرومى والحلبة وهنحتاج شوية مية صغيرين لغاية لما نعمل عجينة نقدر نفردها على اللحمة
نلبس جوانتى علشان اللون والرائحة ونبدأ بتغطية اللحمة من كل جانب كويس جدا جدا ونتركها معلقة فىالهواء لمدة شهر كامل .. بالنسبة لى علشان أنا ساكنة فى منطقة شديدة الجفاف القشرة كانت ناشفة وكراستى إنما لو إنتم فى منطقة فيها رطوبة شوية هتلاقوها أطرى بكتير
وده شكلها بعد شهر من التعليق
وهنا مستعدين للتقطيع
بعد ما قطعناها … جميلة ومملحة
إحنا فى مصر بنآكلها كده أو مع البيض بتبقى لذيذة جدا
ملحوظات على الوصفة
الوصفة الأصلية بنسيب اللحمة ٣ أيام فقط وبعدين بتكون جاهزة!!! مش عارفة أنا ما حسيتش إن طعمها مناسب مع إن صديقتي اللى جربتها تركتها ٣ أيام فقط واكلوها بالهنا والشفا بعد كده على طول
ممكن تدخلوا هنا على اليوتيوب تشوفوا الوصفة من الشيف أسامة – مش هى اللى إتبعتها لكن نفعتنى جدا لما جيت أشوف الشيف اللى معاه وهو بيحط إزاى الطبقة ويغطى اللحمة كويس لأن لازم نبلل الأيدي شوية وإحنا بنحط الطبقة دى
يا ريت لو عجبتكم تجربوها وتقولوا لى عملتوا إيه
مطبخ مغتربة :: أسهل طريقة لعمل قالب الجبنة فى البيت
الجبنة الجبنة الجبنة … بقيت حديث المدينة مؤخرا بعد أن فجرت إحدى صديقاتى قنبلة فى وجوهنا جميعا بأحد المنتديات وقالت إنها واثقة ١٠٠٪ إن جبن الشيدر الشارب لازم ولا بد أن تكون منفحته من الخنزير .. صافية طبعا كلنا بهتنا يعني أهه الواحد غلب فى موضوع الجبنة وبقينا نآكل أى جبنة وخلاص ونحاول نشتريها من المحل العربى وطبعا أسعاااره ناااار .. وساعات الواحد بيتحرى الدقة وساعات مش بيلاقى بديل وفى رحلة بحثى على العم جوجل وقع فى إيدي لينك على اليوتيوب لشخص لبنانى جزاه الله عنا خيرا بيعمل جبنة بيضا فى منتهى السهولة والروعة وهنــــا اللينك بتاع الفيديو بتاعه … أنا بقى معقدة من غلى اللبن على النار هنا لأنه دااااائما بيشيط منى علشان كده فكرت أعمله فى السلو كوكر أو الكروك بوت .. لو عندك تعالى أقول لك هنعمل إيه ولو مش عندك ممكن جدا يتعمل على الغاز عادى جدا بس عينكم عليه علشان ما يتحرقش زيي وتنسوه من تنطيط الأولاد حواليكم
هنحتـــاج
٣ معالق كبيرة خل لكل لتر حليب – تقريبا ٤ أكواب لبن حليب – ولازم اللبن يكون كامل الدسم *
ملح على حسب الذوق *
لو هنعمله فى السلو كوكر
نحط اللبن فى السلو كوكر ونظبطها على أقل درجة ونترك الحليب يسخن لغاية أما يقرب يغلى تقريبا أخد معايا ساعتين ونصف علشان أغلى ٣ لتر لبن
نضيف الخل دفعـة واحدة وما نشيلش الكهرباء بتاعة الحلة دلوقتى لسة شويـة
بعد ما هنضيف الخل هنلاقى اللبن بيتخثر وبدأ يتجمع ويعمل كتل من الجبنة
ننتظر حوالى ٥ دقائق تقريبا حتى يفصل اللبن تماما ويكون عندنا ماء رائق نوعا ما
نجيب علبة أو طبق بايركس وندهنه على خفيف بزيت الزيتون ونصفى الجبنة تماما من الماء إما بشاشة أو فقط بالضغط عليها
نرش على الجبنة الملح ونقلبها كويس ونضعها فى البايركس وفى التلاجة لمدة ساعتين ويبقى عندنـا قالب جبنة جميل وبيتي
شكرا إيهــاب على الطريقــة … عايزة أقول لكم إنه كمان عمل جبن الكاسات بنفس الفيديو بس أنا ما جربتهاش
لو مفيش سلو كوكر يبقى هتعملوه على النار عادى خالص زى ما عمله إيهــاب بالظبط
ملحوظــات مهمـــــة
١- لا بد من إستعمال لبن كامل الدسم أرجوووكم محدش يحاول بلبن قليل الدسم
٢- تمليح الجبنة يكون بعد ما نصفيها محدش يحاول يملح اللبن ثم يضيف الخل لسبب ما مش بيفصل كويس
٣- ممكن إستبدال الخل بليمون المفروض يعطى نفس النتيجة لكن أنا ما جربتهوش بالليمون
مطبخ مغتربة : طريقة عمل الفلافل المصرية
الفول والفلافل أو الطعمية والكشرى من أشهر الأكلات المصرية رواجا ويأكلهم الغنى قبل الفقير فى مصر
ومهما روحنا واللا بعدنا لازم ولابد من الفول والفلافل … وأكيد كل عربى بيحب الفول والفلافل
النهاردة هأقدم لكم طبق فلافل مصرى يفتح النفس ويشعركم بأوطانكم
المقـــادير
١كوب فول مدشوش – بأشتري الكيس من المحل العربى
نصف حزمة بقدونس مقطع أو تقريبا ١ كوب
نصف حزمة كزبرة خضرا أو ١ كوب برضه مقطع
١٠ فصوص ثوم
١ بصلة كبيرة
١ معلقة صغيرة كزبرة ناشفة
١ معلقة صغيرة بيكربونات الصوديوم
ملح حسب الرغبة
بيضة عند القلى
الطريـــــقــة
ننقع الفول فى ماء بالليل مع محاولة تغيير الماء عليه كلما أمكن ونصفيه فى الصباح
نغسل البقدونس والكزبرة ونتركهم ليجفوا جيدا
ثم فى الفود بروسيسور بتاعك نطحن الفول أولا مع البصل والثوم
ثم نضيف الخضرة ونطحنهم جيدا مرتين أو تلاتة حتى يكون الخليط النهائى ناعما
نضيف معلقة الكزبرة الناشفة والبيكينج بودر
نقسم الخليط ويعبأ بالأكياس وفى الفريزر
عند الإستخدام نترك الكيس يفك ثم نضيف له الملح وبيضه
يقلى فى زيت غزير ويقدم بالهنا والشفا
وطبعا مفيش أحلى منه مع تشكيلة من الفول والمخللات والعيش البيتا
