تجـارب منزلية
إصنع(ـى) بنفسك :: مساعد الشطف لغسالة الأطباق
المرة اللى فاتت إتكلمنا عن طريقة عمل صابون لغسالة الأطباق بسهولة ويسر وكنت قلت لكم إن الصابون ده يعمل بكفاءة عالية مع مساعد الشطف الخصوصى بتاعه .. لو إستخدمتوا الصابون بدون مساعد الشطف هتطلع الأطباق نظيفة لكن مش بتلمع يعني زي ما يكون عليها طبقة فيلم كده بيضا مش مشطوفة كويس بالذات للناس اللى عايشين فى مناطق الماء فيها عبسر تعالوا نشوف إزاى نعمل مكعبات مساعد الشطف
هنحتاج مكونات سهلة وموجودة بكل بيت
١ كوب خل أبيض
٢/١ معلقة صغيرة صابون سائل للأطباق أى نوع
١ معلقة كبيرة عصير ليمون – غير محلى طبعا
وبس … نخلط المكونات معا جيدا ولو إحتاجتم شوية مية صغيرة علشان ندوب الخليط معا ممكن لكن أنا لم أحتاج الصراحة
وبعدين نصبهم فى قالب التلج ونضعهم بالفريزر لغاية لما يجمدوا كويس
نفكهم من القالب ونحفظهم بكيس فى الفريزر لحين الإستخدام
للإستخدام : يوضع قال فى قاع الغسالة قبل بدء دورة الغسيل
أنا بأحط قالب وبأحط كمان نصف كوب خل فى طبق عميق بالرف العلوى من الغسالة أو ممكن أحط قال فى طبق عميق بالرف العلوى فى الغسالة وهو بيسيح مع الحرارة وتنزل عليه المية وقت الشطف ويتوزع على كل الغسالة .. يعني دي زيادة من عندى لزيادة التعقيم واللمعان
أتمنى تكون فكرة اليوم عجبتكم ولو طبقتوها قولوا لى عملت معاكم إيه
إصنع(ـى) بنفسك :: صابون غسالة الأطباق
السنـة دى أنا قررت أحاول أعمل منتجات النظافة فى البيت على قد ما أقدر وقبل كده شفتوا طريقة عمل مسحوق غسيل الملابس والحقيقة شغال معايا كويس جدا وبرضه جربت كتير فى منعم الأقمشة لغاية لما وصلت لنتيجة هايلة .. دلوقتى فكرت قى مسحوق غسالة الأطباق وده ليه طرق كتير على الإنترنت بس بعد التجارب وجدت إن دى أحسن طريقة لأن مهم عندى جدا إن المنتجات اللى نعملها فى البيت تكون غير مكلفة – فعالة – وسهلة يعني مش متعبة فى عمايلها .. بالنسبة لمسحوق الأطباق سهل وغير مكلف وأيضا فعال بالذات مع مساعد الشطف اللى برضه بأعمله فى البيت وهأبقى أقول لكم عليه فى بوست آخر … دلوقتى نييجي بقا للصابون
هنحتاج الآتى
٢/١ كوب ووشينج صودا … أو إعملوه بنفسكم هنــــا
٢/١ كوب بوراكس
٤/١ كوب ملح خشن أو كوشر
٤/١ كوب سيتريك أسيد أو ٢ باكيت من كوول إيد ليمون بدون سكر طبعا
الطريقــــة
نخلط جيدا جميع المكونات معا ونضعها فى علبة محكمة الغلق
الهدف من إستخدام الملح الخشن هو إنه بيعمل على فرك الأوساخ من الأطباق
البوراكس طبعا منظف طبيعي وبيزيل البقع أما السيتريك أسيد أو الكوول إيد بيعمل على تيسير الماء العسر
للإستخدام فقط ١ معلقة صغيرة لكل حمل من الأطباق
الحمد لله كانت التجربة ناجحة جدا والأطباق كانت نظيفة … التكلفة تقريبا ٢.٤٥ دولار للـ ٢٤ غسلة
تجارب منزلية :: طريقة سهلة جدا لتقشير كيلو ثوم فى ٥ دقائق
تعملوا إيه لو وجدتم أنفسكم مع كمية من الثوم زى اللى فى الصورة دى!!! بالنسبة لى مريت بمراحل الإنكار وعدم التصديق ثم التكيف وتقبل الواقع والإستسلام للحقيقة المؤلمة ثم فى النهاية بحثت عن حلول إيجابية للموقف المتأزم
الحقيقة تقشير كمية كبيرة من التوم أمر صعب وخصوصا إن الثوم بيترك رائحة فى الإيد ومش هننتهى إلا بعد ساعات من تقشير كمية كبيرة
طيب إيه اللى خلانى أتورط فى كمية كتيرة بالشكل ده … ده بقا موضوع تانى مش وقته لأنه ممكن يسبب مشاكل عوائلية ههه
وبعد البحث والتمحيص والتفحيص وسؤال العم جوجل وجدت لكم الحل الأكيد ومكنتش مصدقة نهائيا إلا لما جربت بعيني ومحدش قال لى .. وده الدليل قبل وبعد
الطريقة وجدتها هنــــــــا سهلة جدا جدا جربوها وقولى لى نفعت معاكم واللا لأ
ولو نفعت ما تنسوش تدعوالى والمرة الجاية لما زوجى يدخل على شايل ٢ طن توم مش هأزعل ولا أتضايق وهأقابله بإبتسامة ;-)لأنى هأكون عارفة هأقشره إزاى بسهولة ويسر
إصنعـ(ـى) بنفسك :: منعم الأقمشة تالت مرة :) وإنتم بخير
خلاااااااص عارفة إنكم زهقتم من تجاربى فى موضوع منعم الملابس ده بس أوعدكم دى آآخر مرة خلاص الحمد لله وصلت للتركيبة اللى أنا عايزاها وإعتمدتها ومش هأغيرها بإذن الله وهأرحمكم من الموضوع ده وشكرا على متابعتكم لى فى محاولتى الأولـــى ثم المحاولة الثـــانية وكل إختراع وإنتم بخير
النتيجة النهائية هى الآتى : إنى مش محتاجة غير الخل والرائحة فقط .. الخل موجود والحمد لله والرائحة ممكن إما بإستخدام الزيوت العطرية أو بإستخدام الحبيبات بتاعة داونى أو بيوركس أو أى ماركة عندك أو تفضليها أو عليها كو…بو…نــــــات … تعالوا نشوف هنعمل إيه
هنحتاج
٥ أكواب من الخل الأبيض العادى
١ ١/٢ كوب ماء مغلى أو ساخن جدا
من ١/٢ لـ ١ كوب من حبيبات بيوركس أو داونى – على حسب رغبتكم فى قوة الرائحة
اللى هنعمله
ندوب الحبيبات كويس فى الماء المغلى ثم نضيف لها الخل ونمزجهم مع بعض كويس جدا
نصبهم فى زجاجة ونستخدمها مع الشطفة الأخيرة للغسيل فى دورة الغسيل بالكمية المناسبة ليكم أنا بحط تقريبا نصف كوب
بسييييطة خالص 
واللى مش بيحب الرائحة أو عنده حساسية ببساطة يستخدم فقط الخل ربع كوب أو أقل مع كل غسلة .. مفيش أرخص من كده
إصنعـ(ـى) بنفسك :: منعم الأقمشة – كلاكيت تانى مرة
فى محاولاتى المستميتة للحصول على منعم الأقمشة اللى يناسبنى ويحقق رغبتى إن الملابس تكون ريحتها حلوة لفترة بعد الغسيل ولأنى لم أجد ما أريده فى اللى موجود بالستورز قررت إنى أحاول أعمل منعم الأقمشة بنفسى وفعلا توصلت للطريقة الأولى واللى كانت مرضية من ناحية تنعيم الملابس لكن بقست مشكلة الرائحة بمجرد ما الملابس تتطبق وتتشال فى الدواليت خلاص الريحة الحلوة بتروح.. دورت تانى ولقيت طريقة أخرى برضه غير مكلفة وقلت لازم أجربها وأقول لكم يمكن يكون فيه حد منكم لسه محتار زيي كده … ودى الطريقة التانية
هنحتاج الآتى
١ كوب من البيكنج صودا
٦ أكواب خل أبيض
من ٤/١ إلى ٢/١ كوب من بيوريكس كريستال أو داونى أنستوبابل الحبوب دى
هنعمل إيه بقى … أولا
ندوب الكريستالات فى ١ كوب ماء ساخن من الحنفية ونتركه على جنب
ثم نضع البيكنج صودا فى وعاء وننزل عليهم بالراحة بالخل لأنه هيفور جامد زى ما إنتو شايفين كده – ممكن تخلوا الأولاد يعملوه هيتبسطوا جدا
نحاول ندوب كل البيكنج صودا فى الخل بس كده كده هيتبقى جزء فى الوعاء بتاعكم عادى مش مشكلة نزلوه كله وصبوه فوق الخليط بتاع الكريستالات
وبس خلاص … بقى عندنا منعم أقمشة جميل ومش غالى
هنحتاج كل مرة نستخدمه إننا نرجه علشان المزيج بيفصل بعد شوية
ليه بنستخدم البيكنج صودا ؟ سؤال مهم
البيكنج صودا منعم برضه وكمان بتعادل حموضة الخل فى ماء الشطف كمان البيكنج صودا بتعمل كحائل ضد بواقى الصابون والمركبات المعدنية اللى ممكن تتبقى فى الغسيل وتساعد على إنه يكون ناشف ومش طرى وناعم وعلشان كده بتعتبر من المنعمات للأقمشة والملابس
إنطباعاتى الشخصية :: الرائحة لا بأس بها وأعتقد فى المرة القادمة هأزيد كمية الكريستالات لغاية لما أحصل على النتيجة اللى تريحني
بالنسبة للبيكنج صودا أحيانا … وأقول أحيانا لما بنغسل غسيل غامق اللون لاحظت إنها ساعات بتعلق فى الملابس ومش بتدوب وبالتالى بألاقى بودرة قليلة بيضا على الملابس الغامقة بعد الغسيل .. طبعا ممكن يكون العيب منى وأنا اللى ما حطيتش المنعم كويس عند ماء الشطف أو أكون إستعجلت وما تركتش الملابس تتشطف كويس
بس فى الآخر هى تجربة تستحق التطبيق أتمنى تطبقوها وتقولوا لى إنطباعكم إيه
تجارب منزليــة – إصنع(ـى ) بنفسك : منظف الستانلستيل
