تجـارب منزلية

أغطية الحلل والطاسات دايما بتمثل لى مشكلة فى الترتيب داخل أدراج المطبخ وقبل كده كنت بأحطها مع الحلل جوة بعضها

لكن مش دايما الموضوع ده بينفع لأن في حلل أحجامها زى بعضها وأيضا ساعات الغطا بيكون كبير

 

وكان الحل بسيط وهو صفاية الحوض البلاستيك

 

كان عندى واحدة قديمة وكنت على وشك إنى أرميها لما ظهرت الفكرة فى دماغى و إستخدمتها لترتيب أغطية الحلل زى ما إنتو شايفين كده وإتحلت المأساة والكركبة بتاعة الدرج

 

المرة اللى جاية لما تحبوا تغيروا صفاية الحوض بتاعتكم ما ترموش القديمة وإستخدموها فى ترتيب أدراج المطبخ

 

إستخدمتها كمان لترتيب صوانى السرفيس الخفيفة وأى صوانى رفيعة عندكم ممكن تترتب فيها وكمان أغطية البايركس

الحقيقة أنا مش عارفة أترجم الكلمة صحيح .. لكن هو ده أحسن تعبير قدرت أوصل له وهو مضاد لكرمشة الملابس

 

 

يعني لما تكون عندكم ملابس مكرمشة ده يفردها من غير مكواة والدليل….. اهه

 

 

وشوفوا من الضهر كمان

 

 

بصراحة أنا مكنتش مصدقة إنه هيشتغل فعلا لغاية لما شوفت بعيني ومحدش قال لى

تعالوا نشوف هنعمل إيه

 

 

كل اللى هنحتاجة

منعم ملابس – إستخدمت سامبل كانت جاية لى من داونى

ميه عادية من الحنفية

زجاجة بخاخ

 

 

ببساطة نخلط المنعم بالمياة جيدا .. النسبة المثالية هى ١٠:١ لكن مش بالضرورة بالظبط

 

ثم نصبها فى البخاخ

 

بس خلاص نعلق الملابس المكرمشة على شماعة ونرشها بالمحلول ونشدها على تحت كأننا بنعدلها يعني

 

 

 

ونتركها معلقة كده لغاية أما تنشف وهتلاقوها كأنها مكوية تماااام

 

 

الحقيقة ممكن تنفعنا نحن معشر النشاء بالذات فى الإيشاربات لما نيجي نخرج أكتر حاجة بأكرهها هى كوى الملابس وخصوصا إن هنا خدمة المكوجى دى غالية

 

أنا جربتها على تي شيرت من بتاع الأولاد كان مكرمش جدا نتيجة إنها خرجت من المجفف على السبت وقعدت هناك كتير على ما طبقتها والنتيجة طبعا إنها إتكرمشت جدا لكن بالحيلة دى ما أخدتش منى ثوانى وإتفردت

 

إيه رأيكم فى الفكرة دى .. يا ريت تكون عجبتكم .. جربوها وقولوا لنا

العنكبوت … من أغتت الحشرات هنا وأكثرها إنتشارا بأمريكا … عمرى ما شفت أنواع وأحجام وكميات العناكب اللى بأشوفها هنا .. يمكن علشان كده لما حبوا يعملوا فيلم عملوا سبايدر مان … الفيلم ده لو كان فى مصر كان بقا نملة مان لإنتشار النمل فى مصر

 

مع إن العنكبوت مش حشرة مقززة مثلا زى الصرصور بالنسبة لى لكن محدش يقدر يتعايش معاه وأكيد لما بنشوفه بنبقى عايزين نموته ونخلص منه .. ومع دخول الصيف إنتشرت الحشرات ومنها العنكبوت وكان لازم يبقى فيه حل تانى غير المبيدات اللى عمالين نرشها فى البيت دى .. المبيدات دى بتحسسنى إنى بأرش سم فى البيت وخصوصا إن زوجى مؤخرا إشترى مبيد للعناكب قوى جدا ومكتوب عليه للعناكب والعقترب!!!! اللهم إحفظنا فتوقعت إنه فعلا سم فى البيت ومع وجود الأطفال حاجة مش ظريفة خالص إننا نرش البيت بالمنظر ده .. وبالتالى كان لازم يبقى فيه حل طبيعي وجرين

 

وبالبحث والتجربة وجدت هذا الحل البسيط جدا وجربته والحمد لله نفع معايا بنسبة كبيرة قوى

 

تعالوا نشوف هنحتاج إيه

 

١ كوب عصير ليمون – مش ليمونادة يعني مفيهاش سكر

بخاخ وميه وبس

نقطتين بالعدد أى صابون منظف للأطباق أو اللى بتستخدمه فى الحمامات أو أى منظف

 

 

الفكرة إن العناكب حاسة التذوق عندها فى أقدامها والعنكبوت يكره الحمضيات جدا وبالتالى لما بيلاقى آثار حمضيات زى الليمون بيهرب منها وده اللى إحنا عاوزينه

 

نضع الليمون فى البخاخ ونقطتين المنظف ونكمل البخاخ ماء عادى من الحنفية ونرج كويس

 

 

 

نرشه بقا فى الحديقة لو عندكم … وعلى الأرضيات خارج البيت وداخله

 

 

نرشه على قواعد الشبابيك  .. وأماكن دخول العنكبوت

 

 

عند باب البيت ونرشه أيضا على الحوائط وفى الأركان وبكل مكان .. لأن مفيش منه خطر نهائي وإن شاء الله هتلاحظوا الفرق

 

المحلول ده المفروض نرشه كل أسبوع لمن أنا بأرشه كل ٣ – ٤ أيام لأن عندنا كمان اليومين دول فيه مطر كتير وطبعا لما المطر بينزل بيمسح آثار المحلول من الأرض والحوائط الخارجية

 

وسائل أخرى لطرد العناكب وجدتها على الإنترنت ومن كلام الناس إنها بتنفع لكن ما جربتهاش

 

زيت النعناع **

العنكبوت أيضا يكره النعناع وبالتالى نعمل نفس الخلطة السابقة لكن بدل الليمون نضيف بعض نقاط من زيت النعناع ونرش بيها كالسابق تماما

 

زيت جوز الهند والخل الأبيض **

نعكل خليط من زيت جوز الهند مع الخل الأبيض والماء ونضعهم فى بخاخ ونرش كالسابق بس خللوا بالكم إنه ممكن يبقع لو على السجاجيد فجربوه الأول فى كورنر من السجادة مثلا أو الكنبة علشان تتأكدوا

 

 الحمضيات **

زى ما قلنا وممكن بدل الليمون تستخدموا زيت الليمون أو زيت البرتقال علشان تطفشوا العنكبوت

 

الكراكيب **

الكراكيب حبيبة العناكب لأنها بتوفر مكان هادئ مظلم بارد ليهم يستخبوا فيه .. فنحاول دائما نخفف الكركبة فى البيت ونزعجهم بإننا دائما نشيل وننضف وراء الكنب والترابيزات والأركان والصناديق وخلافه من كراكيب البيت

 

نقفل الشقوق **

أى شقوق عندنا فى الحوائط يا ريت نقفلها أول ما نشوفها بسرعة قبل ما تدخلها أى حشرات وتعشش فيها وتبقى مشكلة كبيرة لينا

 

 

إزرعوا النعناع واللافندر **

العنكبوت ينفر من النعناع ونبات اللافندر .. إزرعوهم فى البيت أو فى الحديقة أو حول البيت لطرد العناكب

 

 

تنضيف البيت بمحاليل برائحة الليمون **

حاولوا تنقوا المحاليل اللى برائحة الليمون زى البليدج اللى برائحة الليمون والمنظفات اللى برائحة الليمون لطرد العنكبوت

 

يا ريت تقولوا لنا بتستخدموا إيه طبيعي لطرد العنكبوت من بيوتكم

Photo Credit

مع إنى مش من الناس اللى بييجي ليهم حساسية بسهولة .. إنما السنة دى فيه هجمة شرسة من حبوب اللقاح التى تسبب حساسية الربيع الرهيبة وبدأت أعانى من الحساسية تقريبا لأول مرة فى حياتى وأعراضها الرشح والكحة وحرقان العينين وحرقان فى الزور وخلافه من الأعراض اللى كل اللى بيعانوا من الحساسية حافظينها

 

وبالبحث على الإنترنت وجدت إن فيه مجموعة من  الحاجات البسيطة اللى ممكن تخفف الأعراض .. طبعا دى مش أدوية ومش روشتة طبية والناس بتختلف فى طبيعتها وفى ردة فعلها للحاجات دى لكن لأنها طبيعية فميش ضرر إن شاء الله من تجربتها .. تعالوا نشوف إيه اللى ممكن يساعدنا فى السيطرة على الحساسية الموسمية

 

 

 

فينامين سي *

فيتامين سي فيه أنتى هيستامين – المادة المسببة للحساسية – أنتى أوكسيدانت – مضاد للأكسدة – وكمان آنت توكسين يعني مضاد للسمية فى الجسم . سبحان الله عليه فعلا  ناس كتير من اللى إستخدموا فيتامين سي نجحوا فى السيطرة وبطريقة طبيعية على الحساسية .. هنــــا فى دكتوريور سيلف ويب سايت..  تقدروا تقروا مجموعة كبيرة من تجارب الناس فى الموضوع ده

لقيت على الإنترنت إن في الحالات الشديدة يمكن أخذ ١٠٠٠ ملجرام ٥ مرات يوميا  من ٤ لـ ٥ أيام ثم نقللها لـ ١٠٠٠ ملليجرام ٣ مرات لمدة ٣ أسابيع ثم نقللها لـ ١٠٠٠ مرة واحدة يوميا لمدة شهرين

 

 

 

 

شاى الكاموميـل *

Hay allergy الكاموميل له خصائص فى تثبيط الحساسية بالذات حساسية القش أو الـ

بعض المتخصصين فى العلاج بالأعشاب بينصحوا حتى إنكم تخلطوا الكاموميل مع قطرات زيت الليمون على منديل والإستنشاق أعراض حساسية القش من الظهور

 

 

 

 

العسل العسل :: بس مش اى عسل

العسـل الخـام الأورجانيك  غالى شوية لكن مش أغلى من أدوية الحساسية .. العسل الخام بالذات الأورجانيك ناس كتير جدا بتشكر فيه وفى فوائده بالذات فى موضوع الحساسية ده والجرعة تراوحت بين معلقة صغيرة يوميا لمعلقة كبيرة .. كمان ملحوظة العسل لازم يكون لوكال يعني محلى وفيه ناس بتقول كمان مش أبعد من ٢٠ ميل ليه بقا علشان النحل بيآخد معاه حبوب اللفاح فى العسل بتاعه وحبوب اللقاح دى بنآخدها إحنا مع العسل ويبدأ جسمنا فى تكوين مضادات ليها وبالتالى لازم تكون لوكال يعني من منطقتكم علشان تقدروا تكونوا مناعة لحبوب اللقاح المنتشرة فى منطقتكم

وفيه ناس كتير بتشكر فى المشروب ده

raw organic apple cider vinegar ١ معلقة كبيرة خل عصير التفاح الخام الأورجانيك

١ معلقة كبيرة عسل محلى

ماء دافئ

نضع المكونات مع بعضها ونقلب ويمكنكم إضافة عصير الليمون لمزيد من الفائدة .. ينصح بتناوله مرتين يوميا

 

 

 

Neti Pot غسول الجيوب الأنفية

الدكاترة فى الشرق والغرب بينصحوا بغسول المحلول الملحى .. وده عبارة عن  ميه ويستحسن معقمة مع ملح بدون اليود أو ممكن نشترى له الملح المخصوص بتاعه من أى صيدلية ونقف على الحوض مع إمالة الرأس وننزل المية دى فى فتحة من فتحتى الأنف ونسمح لها إنها تخرج من الفتحة الأخرى حاملة معاها كل الأوساخ اللى بتسد الجيوب الأنفية

 

 

 

 

التوابـــل

أنا كنت فاكرة إن التوابل تزيد من الحساسية وإلتهابات الجيوب وخلافه لكن اللى قريته عكس كده تماما …الكركم مفيد جدا جدا جدا من أهم أنواع التوابل .. يبقى ده الوقت من السنة اللى لازم نقلب فيه للمطبخ الهندى .. أيضا البصل, الثم , الجنزبيل, القرفة, الهورس راديش , الهوت ماسترد, الفلفل الحار وخلافه نكثر منه فى الأطعمه بتاعتنا

 

, بودرة المسطردة , الجنزبيل البودرة Cayan pepper فيه تجربة لسيدة  عملت ميكس من بودرة الثوم , بودرة البصل, الكركم , القرفة, الكايان ببر

وحطيتهم على بعض وبقيت تآخد معلقة كبيرة على كوب ماء وتشربهم وقالت إنه جاب معاها نتيجة من أول مرة

 

 

 

 

النعنـــــاع

النعناع يساعد على تفتيح المسالك الهوائية لأنه بيعمل على إرتخائها .. ومفيش أحلى من شرب الشاى أبو نعناع ويا ريت وإحنا بنشربه نشم البخار اللى طالع من الكباية أو الأحسن إننا نعمل حمام بخار بالنعناع ونستنشق بخار النعناع ونضع فوطة على الرأس لتركيز البخار

 

 

 

بعض النصائح للمساعدة فى التقليل من الإحساس بالحساسية الموسمية

 

غسيل الشعر والوجه بإستمرا وبالذات بعد الخروج خارج المنزل والعودة لأن حبوب اللقاح تلتصق بالشعر والزيون من بشرتنا

 

السيراميك أو الخشب فى البيت أفضل بكتير من السجاجيد فلو بالإمكان نشيل السجاجيد أو تنضيفها بشكل مستمر

 

شرب الكثير من السوائل لأنه بساعد على تخفيف الإفرازات وتحسنها بشكل ملحوظ

 

تجفيف الملابس فى المجفف وبلاش ننشر الغسيل اليومين دول

 

لو عندكم قطة أو كلب أو حيوان أليف إحرصوا على نضافته اليومية والإستحمام

 

 

 

 

 

بعض الأطعمة المساعدة

البروبايوتيك .. فى الزبادى ويباع حتى على شكل أقراص لأنه يحسن جهاز المناعة بالجسم

الإكثار من تناول الخضروات الطازجة والفواكة لأنها مليئة بالفيتامينات والفايبرز وأيضا مضادات الأكسدة

 

الإكثار من تناول الأطعمة التى تحتوى على أوميجا ٣ مثل سمك السالمون

 

تقليل السكر والبيض ومنتجات الألبان – ما عدا الزبادة علشان البروبايوتيك- ولبن الماعز

 

التقليل من إستخدام الحبوب بالذات الحبوب الغنية بالجلوتين

 

التقليل من البطاطس وما يشابهها

 

التقليل من الأطعمة الجاهزة أو البروسيسد فود والأطعمة المقلية فى زيت غزير

 

 

 

وأتمنى لكم جميعا الصحة والعافية … دمتم سالمين

 

 مصادر الصور : هنـــا, هنـــا,هنـــــا

النهاردة عندى فكرة بقالها كتير بتدور فى دماغى وهى إزاى أعمل كيتشين وايبس .. مش عارفة أترجمها إزاى بس هى المناديل المبللة لتنضيف المطبخ والتعقيم

 

 

المناديل دي رئيسية عندى لأنى بأستخدمها فى تنضيف حاجات كتير جدا وسريعة يعني للتنضيف السريع .. أوفات كتير بتخلص ومش بألحق يكون عندى منها ستوك أو مثلا مفيش عروض كويسة أو أو … يعني أنا عادة بأشتريها من كوسكو لما يكون عندهم عرض عليها وبالذات ماركة كيركلاند لأنها فعلا حلوة

 

هنحتاج الآتى

 

مناديل مطبخ ورقية .. ماركة تكون كويسة مش بتتقطع بسهولة أقترح باونتى

٢ معلقة كبيرة من أى صابون متعدد الإستعمال بتحبوه – أنا إستخدمت الباين سول لأنى بأحب ريحته اللى تشبه الديتول المعروف عندنا

للتعقيم – زيادة فى التعقيم لكن ممكن من غيره Tee tree essential oil ١٠ – ١٢ نقطة من زيت

١ كوب ماء عادى من الحنفية

علبة فاضية قديمة كان فيها وايبس قديمة عندكم أو أى علبة لحفظ الوايبس

 

الحقيقة العلبة اللى عندى كانت صغيرة قوى فإستخدمت رول كان فاضل فيه حوالى الربع وإضطريت إنى أقسمه بالسكينة من المنتصف علشان يدخل فى العلبة لكن لو عندكم علبة أكبر مش هتحتاجوا الخطوة دى .. يعني على حسب حجم العلبة اللى عندكم

 

بعد ما قسمنا الرول .. نسحب الإسطوانة الكرتون من المنتصف وبعدين نشد طرف آخر ورقة فى الرول من جوة ونطلعها على برة علشان دى هتبقى أول وايب عندنا .. أتمنى الصورة تكون مفهومة

 

نخلط خليط الوايبس مع بعضه ثم نسكبه على المناديل حتى تتشرب

ملحوظة مهمة جدا جدا : يا ريت تسكبوا المقدار واحدة واحدة لأنى طبعا دلقت المقدار كله وأساسا أنا عاملة جزء صغير لأن العلبة صغيرة فالدنيا إتبهدلت والوايبس بقيت مبلولة بشكل جامد وإتقطعت وإضطريت أعيد الكرة .. يعني نحط حبة بحة ولو تبقى من المقدار شئ مفيش مشكلة نعينه فى زجاجة أو فى بخاخة وممكن نستخدمه منظف .. يعني بالراحة علشان الورق ما يتقطعش

 

بس خلاص نحطه بقا فى العلبة بتاعتنا ونطلع طرف الورقة اللى شديناها من جوة علشان تجر وراها باقى الورق

 

نحفظه ونستخدمه فى أى تنظيف سريع ولو نشف مننا ممكن نعمل الخليط تانى ونبلل المناديل مرة آخرى

 

أتمنى تكون فكرة النهاردة عجبتكم ولو فيه أى سؤال ما تترددوش تبعتوا لى

إيه مش مصدقين لا ممكن فعلا نعمل الكلوركس أو حاجة شبهه يعني

طيب ليه نعمله ما هو موجود ومش غالى يعنى

الحقيقة دى مسألة شخصية .. أنا شخصيا بأكره الكلوركس .. ريحته بتخنقنى .. وبأخاف منه جدا على الهدوم

دى عقدة عندى من أيام الطفولة لأن الست اللى بتساعد والدتى فى البيت بتموووت فى الكلوركس ويوم التنضيف العالمى فى البيت بترش كلوركس فى كل مكان صحرا إن كان أو بستان وبالتالى ممكن جدا كان ييجي على الهدوم وعلى أى حاجة ويبوظها .. حاولنا نخلصها من العادة دى لكن هى خلاص أدمنت مش بتحس إن الحاجة نضيفة إلا لما تكون مليانة كلوركس ومن هنا نشأت عقدتى الأزلية فى موضوع الكلوركس ده

ده بالإضافة إلى أخطار الكلوركس وبالذات لو عندك أطفال صغيرين أو حيوانات أليفة … وده مش من عندى ده مكتوب على العلبة بتاعة الكلوركس والوايبس وكل حاجة فيها كلوركس .. وفى محاولة منى علشان أكون صديقة للبيئة قررت إنى أعمل الكلوركس فى البيت .. أهيه تجربة

فيه وصفات كتير لعمل الكلوركس أو المبيض فى الإنترنت لكن فيه منها وصفات خطيرة حبتين لأنكم بتخلطوا مكونات مش المفروض إنها تتخلط مع بعض نتيجة التفاعل الكيميائى بتاعها يعنى مش نخلص من الكلوركس ندخل فى مفاعل نووى لا قدر الله

وبعد البحث والتنقيب وسؤال الأستاذ جوجل لقينا الوصفة المثالية والطبيعية بنسبة كبيرة .. وهى طريقة نستخدم فيها الهايدروجين بيروكسايد أو ماء الأكسجين

H2O2 ماء الأكسجين هو ببساطـة مكون من ماء + أكسجين

يعني من الآخر مكوناته طبيعية ومفيش منها خطورة .. بس أحب أنبهكم إن ماء الأكسجين يجب أن يحفظ فى مكان بارد ومظلم بعد ما نفتح الزجاجة

ماء الأكسجين بعد فترة يتأكسد ويرجع تانى ماء وغاز الأكسجين

لو زجاجة ماء الأكسجين عندكم بقالها سنة واللا إتنين أو تاريخ الصلاحية إنتهى مش هتجيب مفعول

لو عايزين تعرفوا ماء الأكسجين اللى عندكم لسه شغال واللا لأ إسكبوا بعض منه فى أى بلاعة .. حوض .. بانيو وخلافه المفروض تسمعوا صوت هسسس كده مش عارفة أوصفلكم الصوت إزاى المهم صوت كده  يعني طالع من البلاعة

بعد درس الكيمياء ده – برضه ما كنتش بأحب الكيمياء- تعالوا نشوف هنعمل الكلوركس إزاى

كل اللى هنحتاجه

١٢ كوب ماء من الحنفية يعني مية عادية **

٤/١ كوب عصير ليمون – من غير سكر يعنى مش ليمونادة **

١ كوب ماء أكسجين **

إخلطوا المكونات معا جيدا

وإستخدموه فى الغسيل أو ممكن نحطه فى بخاخة ويستخدم كمنظف عام فى المنزل

لما تيجوا تستخدموه فى الغسيل الأبيض نضيف ٢ كوب للغسلة الواحدة

أنا عملت نصف الكمية تقريبا .. يستحسن إننا نعمل كميات صغيرة يعنى النص وكل أما نحتاج نعمل علشان ماء الأكسجين ما يبوظش من الركنة إلا لو كنتم بتستخدموه زي واحدة صاحبتنا وناقص ترشوه على الأكل وخلافه

أتمنى تكون فكرة اليوم عجبتكم وتطبقوهــا وقولوا لى عملتوا إيه