تجـارب منزلية

أولادي بيحبوا الكاتشاب جدا جدا  وبيآكلوه مع كل حاجة .. فراخ لحمة بيض بيتزا أى حاجة .. وبالتالي بتزيد بقع الكاتشاب عندي وبتبوظ الهدوم وبالذات لو كانت لونها أبيض

ومن التجربة والبحث وجدت لكم أحسن طريقة نتعامل بيها مع بقع الكاتشاب على الملابس البيضا

 

الخطوة الأولى : نشد التي شيرت على برة – من على جسم الطفل- يعني كأننا بنبعده عن ملابسه الداخلية علشان ما تتبقعش هي كمان ونستخدم معلقة مثلا أو حاجة نشيل بيها الكاتشاب – طبعا ده بفرض إن اللي وقع كمية زي ما بيحصل عندي – ونحاول نشيل أكبر كمية ممكنة من غير ما نوزع الكاتشاب على باقي التي شيرت أو نزود رقعة البقعة
 

 

الخطوة الثانية :: لو إحنا برة البيت نحاول نمسح على قد ما نقدر البقعة بفوطة مبلولة مية ساقعة مش ساخنة لو في البيت نروح على الخطوة اللي بعدها

 

الخطوة الثالثة :: نشيل التي شيرت ونحط بين الوش والضهر بتاعه فوطة أو أى حاجة بس علشان البقعة ما تروحش كمان على ضهر التي شيرت

 

 

الخطوة الرابعة :: نعمل مزيج من جزء من صابون غسيل الأطباق داون العادي خالص الأزرق ده مع جزئين من الهايدروجين بيروكسايد أو ماء الأوكسجين وبإستعمال فرشة صغيرة ندعك المزيج ده فى البقعة

 

 

هتختفي البقعة في لحظات … نشيل الملابس وتتغسل عادي ومش هيكون فيه أي أثر للبقعة
 

الطريقة مأخوذة من المقالة هنــــا  وناس كتير جربتها على مختلف البقع وبتقول عليها سحرية فعلا ولو البقع عندكم عنيدة سيبوا عليها المحلول شويتين بعد ما تدعكوهم بالفرشة

Photo Credit

فى أواخر الأسبوع الماضى كنت فى البلكونة فى حالى وإذا بشئ صغير جدا يجرى أمامى حتى إنى لم ألمحه فقط لمحت ذيل طوييييل … وطبعا لما شفت الديل عرفت ده إيه وإنتضفت من مكانى أصرخ وأوقل لزوجى فار فار وطبعا كان الأخ أخد ديله فى سنانه وقال يا فكيك زى ما بنقول فى مصر

 

 

المهم حاولت أشيل الموضوع من دماغى وأعتبره عيل وغلط واللا كان تايه من أهله وجه عندنا ..وتانى يوم إتكرر نفس المشهد .. قلت لااااااا ده بجد بقى وواخدها فسحة رايح جاى فى البلكونة ومش مراعى أى حد وآخر قلة أدب

 

 

كلمت الإدارة عندنا قالوا لى هيكلموا شرطة مكافحة الفئران وهييجوا يشوفوا إيه حكاية الفار البجح ده اللى ما عندهوش دم .. ولما سألتهم إمتى فوجئت إن الرد كان بعدها بحوالى ٤ أيام لأنهم بييجوا فى يوم محدد فى الأسبوع مش كل يوم

 

 

وبعدين وأنا هأقعد كده ٤ أيام .. وخفت جدا يلف ويدخل من الجراج وساعتها تبقى فعلا مصيبة كبيرة لو دخل وعشش جوة والجراج بتاعنا مليان ما لذ وطاب .. من كراتين وهدوم و و و

 

 

لازم نحاول نطفشه بأى شكل ما يدخلش البلكونة أو الجراج .. أول تفكير جالنا إننا نرش ديتول اللى هو الباين سول .. طبعا ولا الهوا .. ما عملش حاجة … رشينا بعدها مبيد حشرى حوالين البلكونة برضه مفيش فايدة .. يجرى ويطلع لنا لسانه ويعدى عادى من البلكونة

 

 

قلت ما بدهاش بقى وقعدت أدور على طرق تطفيش الفئران ولقيت طرق وحاجات كتير لكن جربت واحدة منهم وتقريبا كده فلحت معايا وما دخلش خالص عندنا لكن الحقيقة كنت بأشوفه برة بعيد … مش مهم لغاية لما ييجوا الناس ويحطوا له المصايد

 

 

أنا كنت عايزة طريقة سهلة وآمنة وغير مكلفة وكمان مفيهاش سم علشان الأطفال .. ووجدت إنى ممكن أستخدم الأمونيـــا

 

 

 

يعنى مكونة من نيتروجين وهيدروجين NH3 تركيب الأمونيا الكيمياءي هو

ولها رائحة نفاذة وكريهة فعلا وبالنسبة للفئران رائحتها تشبة رائحة فضلات الحيوانات اللى ممكن تفترس الفئران وبالتالى فهى بتخاف من الرائحة وتهرب منها

الوصفة كانت إننا نضع سائل الأمونيا فى غطاء الزجاجات مثلا ونتركها فى المكان اللى بتخل منه الفئران .. لكن إحنا رشينا حول البلكونة السائل ده وفضلت كل يوم أرش منه لغاية لما جم الناس بتع مكافحة الحشرات دول

والحمد لله ما قدرش يدخل تانى البلكونة زى ما قلت لكم بس كنت بأشوفه بيجري بره بعيد فى الجنينة وده كان كويس بالنسبة لى فى المرحلة الحالية

 

 

طرق أخرى قرأت عنها ولكن لم أجربها شخصيا

 

زيت النعناع*

الفئران بتكره رائحة النعناع علشان كده فيه ناس بتقول حطوا قطرات من زيت النعناع على قطنة وضعوها فى المكان اللى بتدخل منه الفئران أو الأحسن تزرعوا نعناع فى الاماكن اللى ممكن يدخل منها النعناع وأهه تطفشوا الفئران وبنفس الوقت تشربوا شاى بالنعناع

 

إستلفوا قطة الجيران مش هزار *

القطط فيها غريزة إصطياد الفئران حتى ولو مش هتآكلها بس خللوا بالكم مش كل القطط بيحبوا يصطادوا الفئران … ولو عندكم قطة لكنها مش بتحب تصطاد الفئران حطوا البوكس بتاع فضلات القطة فى المكان اللى بيظهر فيه الفأر هيشم رائحة الفضلات ويهرب على طول

Bounce fabric softener sheets إستخدموا *

غريبة مش كده!!! المفروض إن ريحتها حلوة وناعمة وتنفع قوى عش  للفئران لكن ناس كتير قالت إن باونص شيتس بتاعة الملابس رائحتها غير مستساغة بالنسبة للفئران وبيجروا منها

 

زيت القرنفل *

أيضا يقال إن زيت القرنفل بيطفشهم وبالتالى نبلل قطعة قطن بقطرات من الزيت ونضعها فى المكان اللى فيه الفئران بتدخل

 

وأولا وأخيرا طبعا النضافة النضافة النضافة *

الفئران بتييجي لأنها بتدور على الأكل وبالتالى فتافيت وبواقى الأكل بيئة بتقول أهلا وسهلا للفئران .. تعالوا إتفضلوا معانا .. وأيضا إحرضوا على إنكم تسدوا الشقوق والفتحان اللى ممكن يدخل منها الفأر … باسكيت الزبالة يكون محكم الغلق وبعيد قدر المستطاع عن المنزل ويا ريت لو تحطوا بجواره القطن المبلول بالزيوت العطرية اللى قلنا عليها زيادة فى تطفيشهم

 

وأخيرا أتمنى لكم جميعا حياة خالية من القوارض بكل أنواعها .. ربنا يبعد عننا وعنكم الشر

photo credit

إستخدام الكوبونات من أهم وأسهل الوسائل للتوفير بالذات فى أمريكا وأحيانا كندا .. وإستخدام الكوبونات أصبح من الأمور الشائعة جدا جدا من وقت الإنهيار الإقتصادى لأن بيوت كتير إتأثرت وناس كتير فقدت وظيفتها وأيضا ناس كتير تم تخفيض مرتباتها بشكل أو بآخر

 

لكن إستخدام الكوبونات بالذات فى الأول ممكن يغمرنا بشكل لا يوصف وممكن يصبح عادة أو إدمان ونلاقى نفسنا بندفع أكتر مش أقل!!! نتيجة لبعض الأخطاء اللى بنقع فيها غصب عننا.. هأقول لكم على بعض الأخطاء اللى إرتكبتها وبعضها لازلت بأقع فيها علشان أحذركم وأتمنى إنكم ما تقعوش فيها إنتو كمان

 

أولا :: الجرى وراء كل وأى عرض

وده خطأ شااائع لدرجة لا توصف وإلى الآن لسه بأقع فيه .. إيه الفايدة من إنى أشترى سيريال بارن بالزبيب لمجرد إنه بـ ٦٠ سنت مثلا مع إن مفيش حد عندى بيآكل منه أو حتى بيحبه ومفيش عندى خطة مثلا إنه أهديه لشخص أو أتبرع بيه .. لأ ده هيبقى مصيره الزبالة حتى ولو بـ ٥ سنت .. الحل يبقى لما تشوفوا ديل حلو إسألوا نفسكم الأول هل يا ترى ده من الحاجات اللى إحنا بنستخدمها فى بيتنا؟ طيب لو لأ هل هو حلو لصديق أو صديقة بتحب المنتج ده؟ طيب لو لأ هل عندى حد ممكن أتبرع بالمنتج ده ليه قريبا واللا لا.. لا الإجابات كلها لأ يبقى نغمض عينينا عن الديل ده ونعرف إنه مش لينا

 

ثانيا ::ما نبقاش منظمين الكوبونات كويس

لما نروح نشترى وبالذات لو معانا أولاد صغيرين ما نبقاش منظمين الكوبونات كويس ونقف قدام الكاشير وننسى ونتلخبط ونضيع علينا الديلز .. وما نبقاش مصحصحين .. يعني فى أوقات كتير لما بيكون فيه عرض فى تارجت بنآخد عليه الخمسة دولار جيفت كارد مش بيطلع فى ماكينة الكاشير وحصلت لى أكتر من مرة وأنسى وأمشى وخلاص كده ضاع على الجيفت كارد مين بقا يروح تانى لخدمة العملاء ويوريهم الريسيت يعني هتبقى شغلانة .. فلازم نآخد بالنا كويس وننظم الكوبونات بالذات فى المحلات اللى إحنا عارفينها كويس مثلا فى تارجت بأكون عارفة البقالة هنا والصيدلية هنا وأدوات التنضيف هنا والشامبوهات هنا فبأحط كل مجموعة كوبونات مع بعض بحيث إنى أدخل مثلا منطقة البقالة وأنا عارفة هأمشى إزاى الأول عرض السيريال وبعدها مثلا هألاقى المكرونة يبقى أرتب الكوبونات على هذا الأساس وقبل ما أروح الكاشير أقف على جنب وأشوف الكوبونات والمنتجات اللى معايا وأراجعها كويس وأعرف إذا كنت هآخد مثلا جيفت كارد أو آرآر لو فى ولجرينز وكده

 

ثالثا :: ننسى نبعت الريبيت اللى بالبريد

الموضوع ده للأسف حصل لى أكتر من مرة قبل كده .. الميل إن ريبيت بتعملوا الشركات بالذات على المنتجات الجديدة علشان الناس تجربه وفى الغالب بيرجع لنا تمن المنتج كله من غير الضرايب طبعا .. الفكرة إنه بيكون ليه شروط يعني لازم الشراء يكون فى فترة محددة واننا نبعت الريبيت برضه ليه فترة محددة .. أحيانا كتير أشترى المنتج وأجهز الريبيت وطبعا أنسى أبعته وأكتشف بعد ما الوقت يعدي ودي حاجة بتضايق جدا جدا علشان كده لما نشترى حاجة بالريبيت لازم نفكر نفسنا بأى طريقة إننا نبعت الريبيت… مثلا نعمل حاجة على الموبايل أو نكتب فى مكان واضح بالبيت أو نخلى حد تانى مصحصح أكتر مننا يبعت لنا إيميل يعني نحاول بأى طريقة وخلاص

 

 

 

رابعا :: الشوبينج فى ١٠ ستورز علشان نآخد كل الديلز الحلوة

طبعا مشكلة كبيرة لأن اللى بنوفره باليمين بيروح بنزين بالشمال ده غير ضياع الوقت والمجهود يعني نحاول نشوف إيه الستورز اللى قريبة مننا واللى إحنا متعودين نعمل فيها الشوبينج وخلاص .. ولو عندنا مشوار جنب أى ستور تانى نبقى نبص على الديلز اللى عنده .. يعنى مثلا  عندكم مشوار عند دكتور قريب من تارجت وإنتم عادة مش بتروحوا تارجت يبقى أبص على الديلز بتاعة الأسبوع ده يمكن ألاقى حاجة فري أو ديل ينفعنى أعدى بالمرة عليه وأجيبه لكن مش أروح مخصوص وهو مثلا بعيد عنى ١٠ – ١٥ ميل

 

خامسـا :: الهوس بالكوبونات

إستخدام الكوبونات ما يعنيش على الإطلاق الهوس بيها …. لكن المشكلة تكمن لما يتحول إستخدامها إلى هوس بيها … أنا عارفة إن موضوع إستخدام الكوبونات ممكن يتحول فعلا لإدمان بمنتهى السهولة لأنى مريت بالمراحل دي  .. يعني بلاش الموضوع يتعدى حدوده كل شئ بالعقل يكون كويس

 

سادســـا :: الإيميل والفيسبوك أكونت

أرجوووكم أرجوكم وكمان أرجوكم تعملوا إيميل منفصل وأيضا فيسبوك منفصل لإستخدامات الكوبونات والإشتراك فى العروض والسامبلز وخلافه صدقونى هتشكرونى على النصيحة دى بعدين لأن هييجي لكم كمية لا بأس بها من العروض والإعلانات إنتم فى غنى عنها .. على الأقل علشان تعرفوا تشوفوا الإيميلات المهمة براحتكم

 

طيب سؤال إيه الكوبونات اللى نطبعها ونستخدمها

 

لما يكون فيه كوبون وأقول لكم إنه عالى القيمة يبقى مش بيتكرر كتير إطبعوه وخلوه عندكم وقت اللزوم*

 

 

لما يكون فيه ديل فعلا على حاجة فري أنا بأشوف إنه من غير المعقول إننا ما نآخدهاش طيب ليه ما نآخدها طالما إحنا كده كده فى الستور يبقى نطبع الكوبون ونستخدمه أكيد

 

 

آخر الشهر بصوا على الكوبونات لأنها بتاعة كوبونز دوت كوم وريد بلم أونلاين وكمان كوبون نيتوورك لأن الكوبونات بتتغير أول كل شهر .. بصوا عليها وشوفوا لو فيه كوبون ممكن تستفيدوا منه لاحقا يكون على شئ بتستخدموه فى البيت كتير

 

سؤال تانى بيجيلي كتير ما بتزهقيش ؟ من موضوع الكوبونات وبتتعبى

أكيد كل فترة بيجي لى حالة زهق .. ملل … تعب سموها زى ما تسموها وخصوصا إننا السيدات مودى شويتين .. يعنى مزاجنا بيتغير كتير .. وساعات بأقرر إنى أروح أعمل شوبينج من غير تخطيط .. للتنفيس عن النفس مش أكتر .. لكن بأندم بعدها لأنى دايما بألاقى كوبونات على الحاجات اللى إشتريتها وأقول يا ريتني كنت .. بس خلاص أهه بتكون كل فترة كده مرة وبتعدى يعني حصل خير مش هنشنق نفسنا علشان ١٠ واللا حتى ١٠٠ دولار مش كده واللا إيه

 

وأخيرا أتمنى لكم توفير سعيد وكوبونات وديلز متميزة وإن شاء الله ما تقعوش فى الغلطات بتاعتى .. يا ريت لو وقعتوا فى أى خطأ تانى تقولوا لنا عليه لتجنبه .. ويبقى كتر خيركم

التوفير فى فاتورة الكهرباء

 

 

كل شهر تيجى لنا فاتورة كهربا وغاز تعكنن علينا بالذات فى الشتاء… الجو بارد وصقيع والتدفئة شغالة ليل ونهار وفى بعض المناطق مننا بيكون العكس هو الصحيح والتبريد شغال ليل مع نهار وبالذات هنا التدفئة مركزية يعنى فى البيت كله مش بس مجرد تكييف فى بعض الغرف..تكلفة التدفئة عالية وتسحب مبلغ كبير ده غير بقى البوتاجاز واللمبات وباقى الأجهزة المستهلكة للكهرباء …..دى شوية الحاجات اللى عملتها محاولة منى لتقليل الفاتورة وأتمنى تفيدكم

 

 

 

أولا : الأولاد … الأولاد … وكمان الأولاد لازم يتعلموا لما يخرجوا من غرفة يقفلوا النور ولما يقوموا من قدام التليفزيون يتقفل واللعب زى الوى والإكس بوكس والبلاي ستيشن وخلافه تتقفل السى دى بلاير يتقفل وأهم منهم الكمبيوتر لازم يتقفل بيسحب كهرباء عالية جدا جدا لازم يتعودوا إن التوفير مش أوبشن مش حاجة إختيارية ومنها التوفير فى الكهرباء والمياة قولوا لهم ربنا بيزعل مننا لو أسرفنا والشيطان بيكون مبسوط

 

 

ثانيا: كونوا – الأب والأم – المثل الأعلى ما تخرجيش من مكان وتسيبى الأنوار مفتوحة والأجهزة شغالة بدون حاجة لذلك ما فيش نور يكون مفتوح إلا النور بتاع المكان اللى قاعدين فيه وبس

 

 

ثالثا: إستبدلوا كل اللمبات فى البيت باللمبات الموفرة للطاقة بتفرق كتييييييييير قوى فى الإستهلاك وهتلاحظوا فرق جامد فى الفاتورة

 

 

رابعا: لو عايشين فى المناطق الباردة فى الشتاء زى عندنا إخبزى وشغلى الفرن على الطبيخ والصوانى بالليل لما تكون الحرارة فى أقل معدلاتها فى اليوم ولو عايشة فى المناطق الحارة برضه إشتغلى بالليل لما تكون درجة الحرارة أحسن علشان ما تزوديش من سخونة البيت

 

 

خامسا: دوروا على المناطق اللى بيجيلك منها سرسوب الهوا الساقع مثلا من الشبابيك أو فيه شرخ فى زجاج أو من تحت عقب الباب وحاولى تلاقى حلول مش بأقول لك تغيرى النوافذ بتاعة البيت بأخرى معزولة عزل جيد لأن ده مكلف جدا لكن ممكن لو حاجة فيها شرخ تصلحيها مثلا لو البيت قديم والعزل فيه مش كويس والباب بيسرب هوا من تحت ممكن نحط قدامه زى بطانية ونسد بيها مكان دخول الهوا يعنى أهه حل برضه بيقلل دخول الهوا الساقع

 

 

سادسا : الغرف اللى مش مستخدمة مفيش داعى ندفيها واللا إيه؟ يعنى عندك غرفة واللا إتنين مش مستخدمين إقفلوا الهوايات فيهم خالص هيوفر لنا جزء كويس من الطاقة بس خللوا بالكم ما تقفلوش جزء كبير من البيت علشان فيه فنيين مش بينصحوا بكده وبيقولوا ده بيخلى الهيتر يشتغل أكتر بس من تجربتى أنا قفلت تقريبا 1/3 البيت والفاتورة قلت كتير

 

 

سابعا : حاولوا تلاقوا درجة حرارة معقولة للبيت وتراعوا فيها وجود الصغار أو لو عندكم بيبى يعنى مش ضرورى تعملوها غابة إستوائية زمان أول ما جينا هنا ما كناش متعودين على البرد وكان الثرموستات بنعمله على 80 فهرنهايت علشان نحس بالدفئ دلوقتى لو عملنا كده هنولع كلنا

 

 

ثامنا: لما تكونوا مش فى البيت فى الشتا قللوا درجة الثرموستات خالص ( ملحوظة ممنوع عندنا نقفل الثرموستات علشان أنابيب المياة ما تتجمدش وتطق) ولما نكون فى الصيف نقفله خالص مش مشكلة يعنى لو دخلنا من برة وكان البيت حر مش هيكون زى برة كمان فيه ناس بتقول لو إنتى فى منطقة حااارة ورطبة لما بيقفلوا التكييف لمدة طويلة مثلا مسافرين شهرين واللا حاجة بيرجعوا يلاقوا الخشب عليه عفن!!! طبعا أنا ما جربتش الموضوع ده لأن الجو عندنا جاااااااااااااف جدا فى الصيف وفى الشتاء

 

 

تاسعا : دائما تتأكدوا إن شفاط الهواء فى الحمامات والمطبخ مقفولة …. كتير مننا بيسيب الشفاط فى الحمام بعد ما يآخد دش مفتوح لساعات بالذات لو حمام بيدخله الأولاد فقط والشفاط بيسحب كهربا كتير

 

 

عاشرا : شيلوا كل الشواحن من الفيشة لما تكون مش مستخدمة مثل شواحن الموبايلات واللابتوب … الشاحن اللى فى الفيشة بيسجب كهرباء حتى لو الجهاز بتاعه مش واصل عليه

 

النقطة الحادية عشر : كمان حاجة مهمة إهتموا بتغيير فلتر الهوا لأن فلتر الهواء المسدود بيؤثر على دورة الهوا فى البيت ويخليه يستهلك كهربا أكثر من 4 ل 6 أسابيع بيقولوا لازم يتغير

الثانية عشر : لو بيتكم بيدخله شمس إفتحوا الستاير وخللوا الشمس تدخل من كل مكان ممكن …. هتدفى البيت ببلاش تدفئة طبيعية

 

 

لعزل الحرارة فى الصيف والبرودة فى الشتاء Thermal النقطة الثالثة عشر : إستخدموا ستائر

 

 

النقطة الرابعة عشر : فيه ناس بتنصح بتقليل الحرارة جدا يعنى بالليل نخليها فى حدود ٦٥ فهرنهايت أو أقل كمان والكل يتغطى بالبطانية الكهربائية بصراحة أنا قلقانة من حكاية البطانية الحرارية دى بالذات مع الأولاد مش مرتاحة ليها وما أعرفش نظام الأمان فيها إيه .. لكنه حل ممكن تجربوه

ده كل اللى أقدر أقدمه دلوقتى من نصائح .. يا ريت لو عندكم نصيحة أو تجربة مفيدة تفيدونـــا وجزاكم الله خيرا