بعد ما حددنا أولوياتنا وقسمناها التقسيم المظبوط أو اللى إحنا شايفينه مظبوط دلوقتى بقى جه الوقت إننا نحول الكلام اللى على الورق لأفعال تساعدنا فى تنظيم وقتنا بشكل جيد وده الجزء الصعب لأن اللى قبل كده كان فقط على الورق دلوقتى محتاجين خطوات عملية للتنفيذ
سر النجاح فى الجزء ده إننا نآخدها خطوة خطوة ونلتزم بالخطوة اللى هنآخدها لغاية لما تبقى عادة وبعدين ننتقل للى بعدها وهكذا لغاية أما نوصل للتنظيم الكامل لليوم
وجود خطة واضحة لليوم وروتين شئ اساسى
من الحاجات اللى بتساعد على إستغلال اليوم والوقت بشكل أفضل هو وجود خطة ليومنا يعني الخطوط العريضة لليوم وإلا بدون الخطوط دى هيضيع اليوم فى لا شيئ وهنلاقى الوقت بيتسرق مننا
الروتين مش شيئ وحش بالعكس إحنا بس اللى إتعلمنا إن الروتين كلمة وحشة لأنه غالبا محصور فى ذاكرتنا بالروتين الحكومى والورق والحاجات اللى مش بنشوفها غير فى بلادنا .. لكن الروتين المقصود بيه التنظيم الجيد للوقت تعالوا نفهم أكتر
كل واحد يقسم يومه على فترات روتينية مثال على ذلك من حياتى اليومية أنا عندى
روتين صباحى مبكر– من الإستيقاظ وحتى التاسعة صباحا تقريبا
روتين صباحى متأخر – من بعد التاسعة وحتى الساعة ١١
روتين لفترة الظهيرة – وده يمتد حتى عودة الأولاد من المدرسة
روتين مسائى – وده طبعا من بعد عودتهم وحتى ميعاد النوم
طبعا مش محتاجة أقول لكم إن ده تقسيمي لفترات يومي على الوجه المناسب لى وأنا بس بأعطيكم مثال مش شكل مثالى لليوم
لو لاحظتم إن دى كلها حاجات تقريبية يعني روتين مرن مش صارم … المقصود بالروتين هنا هو التقسيم والتنظيم قدر المستطاع مش يبقى سيف على رقبتنا لو ما عملناهوش نقعد نلوم نفسنا … لأ بالتأكيد المفروض إن الروتين ده هنعمله علشان يريح أعصابنا وما نبقاش طول اليوم بنجرى وإحنا مش عارفين بنجري ليه واللا رايحين فين
كمان الروتين ده بيطبق عندى من يوم الإثنين صباحا وحتى الجمعة ظهرا بالتحديد باقى الجمعة والسبت والأحد – يعني الويك إند – بتكون ايام مفتوحة للعائلة والمقابلات والفسح والخروج وهكذا
أنصحكم ما نبدأش بعمل روتين لليوم كله ومحاولة الإلتصاق بهذا الروتين كأنه منزل من السماء … لأ خلينا خطوة خطوة … فى البداية نعمل الروتين الصباحى مثلا أو روتين لفترة بعد الظهر يعني إختاروا وقت فى اليوم تحبوا تعملوا فيه مجموعة من المهام بتاعتكم وحاولوا تنفذوه يوم نجاح ويوم فشل وتظبطوه وتعدلوا فيه لغاية لما توصلوا للشكل اللى يرضيكم عن الفترة دى فى اليوم وإلتزموا بيه مش أقل من أسبوعين وبعد كده ننتقل لفترة تانية فى اليوم وننظمها كويس ونعمل لها روتين وهكذا لغاية لما يتم تنظيم اليوم كله بإذن الله
مثال من روتيني فى الصباح الباكر
الصلاة وقراءة القرآن
الكتابة فى البلوج – المواضيع اللى محتاجة تركيز
جميع من فى البيت يستيقظ ونبدأ مشوار الإفطار
ترتيب البيت وعمل التنضيف اليومي المحدد
أطلع حاجات الغدا علشان تتعمل بعدين
[…] بطريقة سليمة واللى إتكلمنا عليها قبل كده هو وجود خطة ومحاولة عمل روتين ليومنا لأن زى ما قلنا إننا لو مشينا بغير هدى أو خطة […]