إستعدادات رمضانية

وصلنا لليوم الـ ١٢ ومش فاضل كتير كل سنة وإنتم طيبين

اليوم هيكون حلويات بس بسيطة يعني النهاردة هنشوف أي حلويات بنحبها في البيت ونعملها ونحطها بالفريزر يا إما نشويها ونحطها بالفريزر .. ويستحسن تكون مثلا بسكوتات سهلة وخلافه

اليوم إن شاء الله خطتي إني أعمل سينامون رولز وبسكويت جوز الهند وأضعهم بالفريزر وإن شاء الله بالمتابعة أحط لكم الطريقة

وأشوفكم على خير المرة القادمة بإذن الله

النهاردة إن شاء الله هيكون يومنا بسيط

هنعمل ستوك من وجبة شكلها فخم لكن هي أبسط من البساطة وطعمها ليذيذ جدا جدا وإسمها ستيك الرجل الفقير أو بالإنجليزي

Poor man’s steak

هي في الحقيقة مش لحم ستيك لكن هي لحم مفروم الوجبة دي إخترعوها الأمريكان وقت الجريت ديبريشان مش عارفة أترجمها إزاي بالعربي

لكن هو الوقت في القرن الماضي لما كل حاجة وقعت في أمريكا ومكانش فيه وظائف والحالة كانت معدمة جدا جدا وبما إننا بنحاول نوفر ليه لأ نجربها وهم أحسن مننا في إيه يعني الوجبة دي ليها وصفات كتيرة دوروا على العم جوجل تلاقوها

أو….. إنتظروني في المتابعة مع الوصفة الجديدة … سلام مؤقتا

ميعادنا دلوقتي مع متابعة اليوم التاسع لخطتنا لإستقبال الشهر الكريم بسهولة ويسر إن شاء الله

اليوم وضبت المطبخ هو الحقيقة مكانش مكركب قوي فالحمد لله الخطوة دي ما أخدتش وقت … وبالنسبة للشربات عملته ويقبع في التلاجة دلوقتي لحين الإستخدام إن شاء الله وبناء على طلبات البعض عملت فيديو قصير بالمقادير بتاعة الشربات وإن شاء الله يظبط معاكم

 

االفيديو هنــا  أتمى يكون واضح وينفعكم

وصلنا لليوم العاشر وفاضل لنا تقريبا ٥ أيام في الإستعدادات .. أتمنى تكونوا لسه متابعين معانا

النهاردة جه اليوم اللي هنستغل فيه الفراخ اللي شلناها من عمل ستوك الشوربة أو أي بواقي فراخ عندك

هنعمل مع بعض اليوم كفتة الدجاج … أنا بأحب أعملها بإضافة بشاميل لقطع الدجاج وبعدين بأقليها بالبيض والبقسماط .. الطريقة دي بتعجب ناس كتير ومرو صديق لنا عجبته جدا جدا وقال لي طعمها زي المخ البانية اللي كان بيآكله في مصر بيقول لي جبتي المخ منين قلت له مخ مين ههههههه

هنعمل برضه حاجة تانية وهي فطائر أي نوع وأي شكل وبأي عجينة تحبوها … إعملوا الفطائر وتستوي وتوضع بالفريزر .. فطائر لحمة أو دجاج أو جبنة أو بسطرمة اللي تحبوه بتنفع في الإفطار وكمان في السحور … إن شاء الله هأستخدم عجينة العشر دقائق لأنها عجينتي المعتمدة في الفطائر وهأبقى أحط لكم الطريقة بإذن الله

وأشوفكم بالمتابعة …. سلام

اليوم الثامن كان الواجب فيه هو تحضير الفراخ البانية والبسبوسة لو تفتكروا

للأسف أنا كنت محضرة فيديو عن تتبيل الفراخ البانية لكن لقيت إني ظاهرة في الطبق الزجاجي اللي كنت بأعمل فيه !!!! مش هأقدر أحطه بقى آخر توهان والله أنا .. المهم التتبيلة مش صعبة بس المفضلة عندي

بصل- ملح وفلفل وشوية خل ومسطردة وبأقلبهم على الفراخ وبأعينها كده في كيس بالفريزر

قبل الطبخ بيوم بأطلعها تفك بالتلاجة وبعدين أحمرها عادي بتبقى جميل وطريقة جدا ومقرمشة من برة

بالنسبة للبسبوسة زي ما قلت لكم حطيت المكونات الجافة من وصفتي المعتمدة في كيس وكتبت عليها المفروض أضيف لها إيه وخلاص .. أنا عملت كيس واحد فقط لأني هأقعد أسبوع واحد تقريبا أو ١٠ أيام وبعدها هنتوكل على الله على مصر علشان كده كمياتي مش كبيرة في التخزين

أتمنى تكونوا لسه متابعين معايا وأشوفكم في الأيام القادمة إن شاء الله