حكايتى فى الغربة ـ الجزء الأول
علشان تعرفوا حكاية البلوج لازم أحكى لكم حكايتى فى الغربة من الأول
أنا مغتربة بأمريكا من مارس٢٠٠٧ طبعا لما جيت هنا ما كنتش طايقة حد ولا حاجة ويوم السفر كنت
متماسكة جدا على الرغم من بكاء الجميع عند توديعى بالمطار لكن بمجرد ما إن إرتفعت الطائرة بكيت
كتير قوى أنا كنت مسافرة لوحدى مع أطفالى ( حسن ٤ سنوات وعبدالرحمن سنة ونصف) وكانت رحلة
طويلة ومتعبة ووصلت هنا بالليل ومع إن زوجى كان محضر الطعام وورد وهدايا والذى منه إلا إنى
كنت ضااااربة البوووز المتين مع إن القرارا أخدناه مع بعض هو بيشتغل فى شركة أمريكية لها مقر فى
مصر ومرة زارهم مدير من الفرع الأمريكى فى فرع مصر وأعجب بزوجى وقرر نقله لفرع أمريكا
بالفرع الرئيسى بأمريكا وإستخرنا الله ومشينا فى الموضوع وهو سبقنا هنا ب ٣ أشهر وبعدين إحنا
حصلناه المهم فضل زوجى غلبان معايا يا عينى ويحاول يراضينى ومرة نتخانق وأعيط ومرات يطبطب
على ومش عارف يعمل إيه لأننا واخدين قرار مش هينفع هو يكون فى مكان وإحنا فى مكان لازم كلنا
نبقى مع بعض وكنت حاسة إنى هأموت ومش ممكن أقدر أعيش فى البلد دى مفيش حد شبهى طبعا إنتو
أكيد فاهمين وحاسين باللى أنا بأقوله معظمنا شعر بالإكتئاب مفيش ناس بيتكلموا زيينا مفيش حد شكلنا
وكنت كل أما أتضايق أنزل أشترى حاجات وأبعزق فلوس على أى حاجة وخلاص لبس جزم شنط حاجات
للمطبخ أجهزة أكل … كل حاجة وأى حاجة وزوجى لقانى بأرتاح كده فسابنى وقال المهم إنى أكون مبسوطة
طبعا أول سنة نزلت مصر وما كنتش أقدر ما أنزلش نزلت فى صيف٢٠٠٨ وتجهيزات وهدايا والذى منه
ومصاريف على الآخر فى مصر وإنتو عارفين التذاكر غالية لوحدها تقريباالسفر لمصر أخد مننا
حوالى ٨٠٠٠ دولار والسنة اللى بعدها فى صيف ٢٠٠٩ برضه نزلنا مصر وصرفنا حوالى ٩٠٠٠ دولار
كان معانا منهم ٤٠٠٠ والباقى بقى عملنا فيه إيييييييييييييييييييييه؟ تـــابعونـــى فى الجزء الثانى
لقراءة باقى الأجــزاء
الجزء الأول
الجزء الثانى
الجزء الثالث
الجزء الرابع
الجزء الخامس
مرحبـــــــــا
.gif)
بسم الله الرحمن الرحيم
حياكم الله و بياكم وجعل الجنة مثواى ومثواكم إن شاء الله
أحييكم بتحايا العرب جميعا
السلام عليكم ورحمة الله وبركاته وأهلا وسهلا بكم ومرحبا ومراحب وكيف الحال وأهلين وإيش لونكم ويا هلا بالغوالى
بيقولوا العرب مش بيساعدوا بعض فى الغربة؟!!!! بيقولوا عليهم مش بيحبوا بعض … بيقولوا بيكرهوا بعض ومش بيحبوا الخير لبعض
مدونتى مدونة مغتربة بتقول لأ ده كلام لاكته الألسنة فصدقته العقول
أنا هنا علشان أثبت لكم إن ده كله ” كـــلام فى الهـــوا” وإننا العرب … جدعان قوى وقلبنا أبيض وبنحب بعض وبنحب كل الناس وبنحب نساعد غيرنا ونساعد بعض
إحنا زيينا زى كل الناس وكل الشعوب فينا الحلو والوحش .. وإذا كان فينا واحد واللا عشرة واللا مية واحد وحشين واللا إنحرفوا عن الطريق السليم واللا طبعهم وحش فينا مليوووون واحد كويسين وبيحبوا يساعدوا
مدونة مغتربة هتثبت لكم إن الكويتى بيساعد السودانى والسودانى بيساعد الفلسطينى والفلسطينى بيساعد السعودى والسعودى للإمارارتى والإماراتى للأردنى والمصرى و العراقى والقطرى والعمانى و الليبى واللبنانى والتونسى والجزائرى و و و
كلنا حاجة واحدة كلنا لنا هم واحد وقضية واحدة وحلم واحد و… شعب واحد
صحيح أنا لسه عمر غربتى مش كتير … لكن إتعلمت كتير وعرفت كتير
أنا هنا علشان أفيدكم بتجاربى وأستفيد منكم ومن تجاربكم… علشان نتحاور ونتشارك فى همومنا وقضايانا وحالنا فى كل مكان