مغتربة

طبعا كانت صدمة لى ولزوجى !!!  تانى يقل المرتب وإحنا أصلا بالعافية ماسكين نفسنا

المهم زوجى كلم المدير بتاعه وقال له إنه هيسافر عند قريب لنا فى كاليفورنيا ويشتغل من هناك وفى نفس الوقت هيدور على شغل من هناك على أساس إن سوق العمل أنشط فى كاليفورنيا مش زى هناوكنا فعلا هنسافر كلنا نقعد عند ابن خالته على أساس إنه هيوفر علينا الإيجار لغاية لما زوجى يلاقى عمل هناك لكن المدير بتاعه هاج وماج وإجتمع مع باقى المديرين وكلهم قرروا رفض الإقتراح بتاع زوجى وإنهم ما يقدروش يستغنوا عنه ( الحمد لله) وقالوا له ما تخافش إنت فى آخر الناس اللى ممكن نمشيهم وإنهم لو هو مشى يبقى يعرف إن تانى يوم الشركة هتكون بتقفل

وفى محاولة منهم لتعويضنا … عندهم إتنين من المديرين الكبارواحد يابانى وواحد أمريكى اليابانى قاعد بعائلته فى فرع اليابان وليه هنا بيت والأمريكى قاعد فى فرع بولاية فلوريدا وليه برضه هنا بيت قالوا هيشوفوا مين يقدر يستغنى عن بيته فيهم ويدوا لنا البيت بتاعه نسكن فيه وفعلا تم الإتفاق إننا ننقل بيت المدير اليابانى الكلام ده كان فى رمضان اللى فات على أساس إننا ما ندفعش فلوس كتير وهيشيل من علينا حمل كبير

لقراءة باقى الأجــزاء

الجزء الأول

الجزء الثانى

الجزء الثالث

الجزء الرابع

الجزء الخامس

فى شهر يناير 2010 وهبنى الله نطفة صغيرة … وعرفت إنى حامل

طبعا كانت مفاجأة غير محسوبة وغير متوقعة وغير مخطط لها نهاااااائيا وخصوصا إن زوجى عامل لى وللأولاد تأمين صحى منفرد مش تبع الشركة عنده لأن عنده فى شركته لو إشتركنا هيكون غالى جدا والتأمين بتاعى لا يغطى الحمل والولادة وعلشان أغير العقد وأخليه يتضمن الحمل والولادة لازم ما أكونش حامل ومفيش شركة تانية هترضى تآخدنى لأنها إسمها

pre existing condition

أحب أنوه إن الموضوع ده إتلغى من أول السنة دى على ما أعتقد

وبقى القانون يلزم شركات التأمين الصحى إنها تآخد أى حد عنده

pre existing conditionالـ

المهم مفيش تأمين رضى يقبلنى غير التأمين بتاع زوجى تبع شركته وطبعا
تكلفته عالية وفى الظروف اللى كنا فيها ودفعنا فعلا فى متابعة الحمل وفى الولادة مبلغ محترم حوالى 10 آلاف دولار

بعد كده عرفت إننا كان ممكن ندفع 10 دولار ويمكن أقل
CHP Pluلأن ولاية كلورادو فيها برنامج إسمه

وده برنامج صحى ممتاز لمحدودى الدخل لكن لازم تكون معاكى الجنسية الأمريكية أو تكونى فى حالة خطيرة لا قدر الله مرض خطير يعنى أو تكونى حامل فى الحالة دى بيغطى كل التكاليف وعلى حسب الدخل وعدد أفراد الأسرة بتكون المساهمة الشهرية بتاعتك لكن للأسف مكانش فيه حد يعرف الموضوع ده ودورنا على حل ما لاقيناش فى الوقت ده المهم قدر الله وما شاء فعل

وطبعا زادت الديون مع تزايد المصاريف مصاريف بقى للبيبى الجديد لبس وسرير وترافيل سيستم و و و وحاجات كتيرة

المهم ولدت الحمد لله فى سبتمبر 2010 وفضلت الدنيا ماشية بينا شوية ألم إيديى فى المصاريف وشويتين أبعزق وطبعا ما عرفناش ننزل مصر من 2009 ومع الأحداث على المستوى الشخصى والعائلى وعلى الصعيد السياسى فى مصر كان نفسى أنزل مصر لكن طبعا كانت المديونية كبيرة وما كانش ينفع بأى حال من الأحوال إننا ننزل مصر

إلى أن جاء صيف 2011 وإذا بالشركة تقرر عقد إجتماع طارئ بالموظفين ويقولوا إن الحال صعب وبما معناه اللى يعرف يلاقى شغل تانى يروح واللى هيفضل قاعد هيتخفض مرتبة 25% تانيين من أول شهر أغسطس وحسيت بالـ……. واللا أقول لكم خليها المرة اللى جاية بإذن الله سلام مؤقتا

لقراءة باقى الأجــزاء

الجزء الأول

الجزء الثانى

الجزء الثالث

الجزء الرابع

الجزء الخامس

زوجى كان بيآخد مرتب كل شهر + حوافز وإضافات كل 3 شهور
آخر السنة بيكون فيه تقييم وعلاوة وبيكون فيه زى مكافأة فى آخر السنة+
وطبعا أنا كنت ولله الحمد بأشطب عليه
المهم نرجع نكمل الحكاية … كان فاضل لنا 5000 دولار تمام أخدناهم منين ؟
باقى الفلوس أخدناها من الكريدت كارد
أيييييييييييييييوة
كان عندنا كريدت كارد من غير فوائد لغاية صيف 2010 فزوجى قال خلاص مضمون إن شاء الله
لما نرجع نسدد المبلغ عادى وبدون فوائد وحطيت فى بطنى بطيخة صيفى زى ما بنقول
وبعزقت فى مصر وما كانش بيهمنى … وكله على الكريديت كارد
وطبعا كانت غلطة العمر وحطوا تحتها مليوووووووون خط
وده أول درس الكريدت كارد سلاح ذو حدين وفخ اللى يقع فيها زينا يبقى عليه العوض
لما رجعنا من مصر على شهر 8 سنة 2009 بدأ الإنهيار الإقتصادى
وشركة جوزى قالت خلاص مفيش حوافز كل 3 شهور قلنا ماشى مش مشكلة
لكن فضلت أنا بنفس طريقتى ونفس المصاريف
إلى أن إنتهت سنة 2009 ومع بداية 2010 الشركة قررت تخفيض المرتبات كلها الربع تخيلوا 25% يعنى ربع المرتب طاااااار مبلغ كبير ده غير إن الحوافز إتشالت ومفيش بونس ولا علاوة سنوية ولا أى حاجة خالص خالص هم ال 75% من المرتب وخلاص على كده
ومشوا ناس كتير جدا من الشركة بس الحمد لله زوجى ما كانش منهم وكانوا متمسكين بيه
وبعدين إيه اللى حصل يا ترى؟
تـــــابعــــونــــى

لقراءة باقى الأجــزاء

الجزء الأول

الجزء الثانى

الجزء الثالث

الجزء الرابع

الجزء الخامس