مغتربة

السلام عليكم

اليوم جاية ومعايا طريقة جميلة جدا لعمل دجاج شبية بكنتاكي لحد كبير جدا جدا يعني الوصفة دي تقدروا تعملوها بالفرن – طبعا هتكون أقل شوية في القرمشة – أو ممكن تتقلي

الوصفة والطريقة دي تقدروا تستخدموها مع الدجاج اللي بالعضم وبعد ما يتغطى بالخلطة ويقلي لو قلقانين إنه ممكن يكون لسه فيه إحمرار أو ما إستواش من جوه نحطه شوية في الفرن بدون تغطية علشان ما يبقاش طري ويفضل محتفظ بالقرمشة بتاعته

في الوصفة دي بننقع  الدجاج من بالليل لو مستعجلين يبقا سيبوه في التتبيلة فترة مش أقل من ٤ ساعات علشان يبقا طري ولذيذ من جوة ومقرمش من برة .. التتبيلة بتحتاج لبن رائب لكن الحقيقة أنا مش بأشتريه هنا كتير لهذا أنصحكم تحطوا لبن وخل على كل كوب لبن عادي حليب يعني نحط معلقة خل كبيرة

كمية الملح في التتبيلة قد تبدو كبيرة لكن هي مناسبة جدا جدا لكمية الدجاج لأن مش كلها بتتحط في التتبيلة بنآخد معلقة واحدة فقط والباقي بنضيفه على خليط الدقيق

في الوصفة أنا قليت الدجاج للأولاد لكن عملت باقي الكمية لي أنا وزوجي بالفرن .. لتقليل الدهون لكن إستخدمت طريقة شفتها في موقع أجنبي عجبتني جدا لكن غيرت منها شوية لأن الدجاج كان بيبقا باين فيه الدقيق شوية  المهم الطريقة دوخليت طعم الدجاج لذيذ بشكل لا يوصف

الطريقة إننا يعد ما نغطي الدجاج بالدقيق نسيح ٢ معلقة زبدة وحطيتهم مع زيت زيتون وفرشت نصفهم في صينية الفرن – مبطنة بورق زبدة لاااازم علشان الدجاج ما يلزقش – وبعدين وزعت النصف المتبقي على قطع الدجاج من فوق وتدخل الفرن لغاية لما تآخد اللون الجميل الدهبي ونقلبها في نص المدة على الوش التاني علشان تتحمر من فوق وتحت وبالهنا والشفا

أترككم مع الفيديو والوصفة مكتوبة وأتمنى تنال إعجابكم

ألذ وصفة دجاج كنتاكي

2016-02-08 10:18:32

ألذ وصفة لدجاج مقلي ومقرمش مثل كنتكي - وبالإمكان عمله بالفرن بدون قلي

Write a review

Save Recipe

Print

Ingredients

1. ١٠ قطع صدور دجاج صغيرة - تقريبا ١.٧٥ باوند
2. كوب ونصف لبن رائب - بالإمكان عمله بالبيت بإضافة ١ م كبيرة خل لكل كوب لبن حليب
3. ٢ ونصف كوب دقيق أبيض
4. ١\٣ كوب دقيق ذرة
5. زيت للقلي أو
6. ٢ م ك زبدة + ٢ م ك زيت زيتون - للتسوية بالفرن

خليط التوابل

1. ١م ك ملح.
2. ١ م ص فلفل.
3. ١ م ص بابريكا
4. ٢ م ص حبهان طحون
5. ٢ م ص بودرة الثوم

Instructions

1. نخلط التوابل معا ثم نأخذ ١ م ك من الخليط ويضاف على ١ كوب من اللبن الرائب
2. يغسل الدجاج ثم ينقع في خليط اللبن والتوابل فترة الليل
3. يضاف الدقيق إلى دقيق الذرة وباقي التوابل
4. تدريجيا وبإستخدام شوكة نضيف باقي اللبن الرائب إبى خليط الدقيق ونحرك حتى تتكون تكتلات من العجين - قد نحتاج المزيد من اللبن أو الدقيق
5. تغطى قطع الدجاج جيدا بالخليط مع الضغط
6. يقلى في القليل من الزيت أو لو هنعملها بالفرن نسخن الزبدة حتى تسيح بالمايكروويف
7. نضيف لها الزيت وندهن صينية مفروشة بورق الزبدة بنصف مقدار الزبدة والزيت
8. نرص قطع الدجاج ونوزع باقي مقدرا الزبدة والزيت على الدجاج
9. يخبز في فرن ٤٠٠ فهرنهايت حتى يحصل على اللون الذهبي مع مراعاة أن يقلب في منتصف المدة
10. وبالهنا والشفا

مغتربة http://moghtareba.com/

السلام عليكم

في هذا الشتاء القارس – والله يهون علينا جميعا وعلى إخواتنا السوريين وكل بلادنا يا رب- لا بد وحتما من التفكير في بعض الأكلات اللي بتدفينا وتعطينا النشاط والحيوية ومنها طبعا شوربة العدس الأصفر وكمان من المشروبات المنتشرة بالوطن العربي في فصل الشتاء هو السحلب الجميل .. واليوم هنشوف مع بعض كيفية تحضير السحلب المنزلي

الحقيقة السحلب متوفر هنا بودرة بأغلب المحلات العربية لكن مشكلتي معاه إن طعمه بيكون فيه نكهة قوية لماء الزهر أو ماء الورد وأنا مش بأحب النكهة دي تكون قوية كدة علشان كدة دورت ودعبست إني أعمله بالبيت وكانت النتيجة جميلة جدا وطعمه حلو وعلى مزاجنا لأن كمان الجاهز بيكون السكر فيه كتير حبتين ومع إننا بنحب كل السكريات لكن برضو الجاهز بيكون تقيل شوية في السكر بتاعه

طبعا من المميزات عمله بالبيت إنكم بتتحكموا في كل حاجة فيه .. النكهات .. والكثافة والسكر بتاعه وهكذا .. الوصفة دي هتعمل سحل متوسط الكثافة وبرضو متوسط في السكر .. وإذا عايزين سكر أكثر تقدروا تزودوا السكر على مزاجكم وإذا عايزينه سميك أكتر تقدروا تزودوا من البودرة لكل كوب أو من الأول تزيدوا النشا وهكذا وطبعا لو بتحبوا طعمه بماء الزهر حطوا ماء الزهر مع اللبن وإنتم بتعملوه يعني ممكن كمان تعملوا كل كباية بنكهة وكثافة وسكر مختلف عن الباقيين وعلى حسب كل فرد ومزاجه

أتمنى تجربوه وأسمع تعليقاتكم .. ويا رب يعجبكم .. جربوه بكمية صغيرة الأول لغاية لما تظبطوا الطعم على رغبتكم وبالهنا والشفا

For the recipe in English … CLICK HERE

مشروب السحلب المنزلي

2016-01-31 02:14:52

بودرة السحلب صناعة منزلية ... ألذ وأطعم

Write a review

Save Recipe

Print

Ingredients

1. ١ ك لبن بودرة
2. ١ ك سكر بودرة *
3. ١ كوب جوز هند غير محلى **
4. ١ كوب أرز - يفضل المصري
5. ٤ م ك نشا ***
6. ١\٢ م ص فانيليا بودرة
7. ١ م ك مستكة

إختياري

1. ١\٢ ك سمسم محمص
2. ٢ م ص قرفة مطحونة

عند التقديم

1. مكسرات وزبيب

Instructions

1. نقوم بطحن الارز حتى يصبح بودرة ناعمة جدا قدر المستطاع
2. نضيف كل المقادير على بعضها الأرز المطحون - اللبن البودرة - الفانيليا - السكر - جوز الهند - المستكة بعد طحنها أيضا والقرفة والنشا
3. نخلط المقادير جيدا وتحفظ بعلبة محكمة الغلق

عند الإستخدام

1. لعمل كوب واحد نضيف ٣ م كبيرة من الخليط مع ١ كوب لبن على نار متوسطة ونستمر بالتقليب حتى يتماسك الخليط ويصبح سميك
2. يصب في كوب التقديم ويزين بالمكسرات
3. وبالهنا والشفا

Notes

1. * يمكن زيادة السكر على حسب الرغبة
2. ** جوز الهند ممكن يكون إختياري لو مش بيعجبكم ما تضيفوهوش
3. *** هذا الخليط لعمل سحلب متوسط الكثافة إذا أردتموه كثيف أكتر نزيد من النشا أو نزيد من عدد الملاعق لكل كوب مع الأخذ في الإعتبار إن السكر كميته هتزيد بالخليط
4. بالإمكان إضافة ماء الورد أو ماء الزهر إذا بتحبوه لإعطاء المزيد من النكهة

مغتربة http://moghtareba.com/