مطبخ مغتربة :: حمص الشام

في السقعة والبرد الشديد فيه ثوابت في المطبخ المصري لا تتغير بتغير الزمان ولا المكان  والثوابت دي تدلك على البيت المصري الأصيل ههه ومنها حمص الشام

الحقيقة أنا بأحس إن حمص الشام ده وجبة مش مشروب … يعني حاجة كدة محترمة تملى البطن وتشبع وتدفي وفيها الشفا كدة على رأينا في مصر ترم العضم

للأسف أولادي إلى الآن مش بيحبوا حمص الشام ولا أي حمص عامة مع إن هنا سلطة الحمص مشهورة جدا والكل بيحبها كبار وصغار .. لكن أولادي نو عندهم الحمص خط أحمر .. بس ولا بيهمنى برضو بأعمله وبآكله أنا وزوجي لأننا مصريين أصيلين مش زي أولادي مصري مغشوش هههه

سمعت إن الجو اليومين اللي فاتوا كان ساقعة جامد في مصر الله يعينهم .. واقعيا الجو هنا أسقع بكتير لكن الجفاف اللي هنا بيخفف من البوردة شوية .. يعني الرطوبة اللي في مصر أو أي دولة عامة بتزود الإحساس بالبرد وبالحر .. كمان البيوت هنا فيها تدفئة مركزية شغالة في كل أوضة وفي الحمامات والمطبخ إنما البيوت في مصر كنا بنحس إن ممكن الجو برة يكون حلو أو على الأقل معقول إنما جوة البيت ساقع .. أنا كل أما أكلم حد في مصر يكلمني من أعماق البطاطين الحرارية والبطاطين العادية

نرجع لحمص الشام أنا بأحب أعمله بدون شطة وبأقدم التحابيش خارجيا وكل واحد يظبط كبايته على مزاجه من ناحية الملح والشطة والكمون والليمون وكدة .. أنا شخصيا بأحب أزود الشطة جدا ويمكن دة اللي بيديني طاقة رهيبة وحرارة بعد أما أشرب حمص الشام … لذييييذ

أسيبكم بقا مع الوصفة والفيديو وإن شاء الله تعجبكم

حمص الشام أو الحلبسة المصري

2016-02-04 11:56:27

مشروب شتوي بالحمص

Write a review

Save Recipe

Print

Ingredients

1. ١ كوب حمص ناشف
2. ثمرة طماطم متوسطة مقطعة أرباع
3. ١ بصلة متوسطة مقطعة أرباع
4. ٢ فص ثوم
5. ١|٢ كوب عصير طماطم أو ٢ م ك معجون طماطم

عند التقديم

1. ملح - كمون مطحون - شطة - ليمون

Instructions

1. يغسل الحمص جيدا وينقع في ماء يغمره طول الليل أو على الأقل ٤ ساعات مع محاولة تغيير الماء كل فترة
2. يصفى الحمص من ماء النقع ويوضع في قدر عميق على نار عالية ويغمر بالماء حتى الغليان.
3. نشيل الفوم المتراكم على سطح الماء قدر المستطاع ثم نهدي النار ويترك الحمص حوالي ٢٠ دقيقةt.
4. بعد العشرين دقيقة يضاف الثوم والبصل والطماطم ومعجون الطماطم أو صوص الطماطم.
5. يترك على نار متوسطة تقريبا ساعة حتى تمام نضج حبات الحمص.
6. يغرف في أكواب التقديم ويوضع معه الملح والكمون والشطة والليمون وكل فرد يضع من التوابل على حسب رغبته
7. وبالهنا والشفا

مغتربة http://moghtareba.com/