أكلات المناسبات والأعياد

قمر الدين … طبعا عارفينه واللا إيه؟ على العموم اللي ما يعرفش قمر الدين هو عجينة مشمش مركزة ومحلاه مشهورة بشهر رمضان المبارك بنعمل منها مشروب قمر الدين اللذيذ وأيضا بنعمل منها مهلبية قمر الدين الجميلة

قمر الدين يمكن يكون مش متوفر لينا في الغربة أو يكون محل الإنترناشيونال بعيد عليكم … أو يمكن تحبوا تجربوا تعملوه بنفسكم … على العموم لو محتاجين وصفة ما تدوروش أنا هأعطيكم الوصفة السهلة لعمل قمر الدين

بصراحة وأنا صغيرة كنت بأستمتع بأكله كده حاف من غير عصير ولا مهلبية .. كنا بنآكله زي الحلويات

انا عملته من المشمش المجفف لكن بإمكانكم تعملواه من المشمش الطازج ولكن بدون إضافة ماء لأن هو هينزل ميه لوحده

السكر إعملوه حسب مذاقكم ويا ريت لو تعملوه بزيادة شوية ميه عن ما أنا عملته علشان يسهل فرده في الصينية

 من هنــــا تشوفوا فيديو قصير عن طريقة تحضيره من قناة مغتربة باليوتيوب وأتمنى منكم تشتركوا وتعملوا لنا لايك

الكعـــابر التونسية حلى حلو وسهل وسريع لذيذ ومش بيآخد وقت وشكله فعلا شيك وحلو

مش محتاج أكثر من ربع ساعة ويكون جاهز … المقادير والطريقة بالفيديو

الملبن من أجمل حلويات المولد .. عندنا فى مصر نوع إسمه الملبن الحبل وده بيكون ملبن أبيض وفيه عين جمل – جوز- ونوع تانى بيكون ملبن أحمر وفيه بندق أو سادة خالص

الملبن الحبل ده علشان يتعمل محتاج عين الجمل يتلضم فى حبل ويتغطس الحبل عدة مرات فى خليط الملبن لغاية لما يتكون على الحبل ملبن سميك وفي نصه عين الجمل … طبعا دي حاجة صعب نعملها فى البيت … علشان كده عملته مربعات وخلاص يعني ملبن بعين الجمل بس مقطع مربعات.. طعمه جميل برضه ومش هتفرق معانا الأشكال الهندسية قوي يعني

ويوجد أيضا الملبن الملون بنكهات مختلفة .. لكن أشهر واحد هو الملبن الأحمر بنكهة فراولةعلى ما أتذكر وكان بيكون فيه ساعات بندق

تعالوا نشوف بيتعمل إزاي

::المقــــاديـــر

٣ كوب سكر

٢ونصف كوب ماء

٥ ملاعق جيلاتين بودرة

٥ ملاعق نشــــا

قطرات من ماء الورد

فانيليا + مكسرات إختيارية

للملبن الألوان :: ألوان صناعية للطعام ومكسبات طعم

::الطــريقـــــــة

يذاب الجيلاتين في نصف كوب ماء والنشا فى كوب ماء ثم نضيفهم معا إلى باقى المقادير- عدا الفانيليا وماء الورد أو أى نكهات وألوان أخرى-  على نار متوسطة حتى الغليان

عند الغليان نضيف ماء الورد والفانيليا ونطفئ النار ونترك الخليط يبرد حوالى ١٠ دقائق

نحضر قالب بايركس ٩*٩ تقريبا ونخلط معلقة كبيرة نشا + معلقة كبيرة سكر بودرة ونرش بيهم القالب ثم يصب الخليط فوقهم ونضيف المكسرات المرغوب فيها

يترك حوالى ساعة حتى يهدأ تماما ثم يدخل الثلاجة على الأقل ٤ ساعات أو خلال الليل

بإستخدام سكين حاد – يمكن غمس طرفه فى نشا وسكر بودرة- نقطع الملبن مربعات صغيرة أو حسب الرغبة

يقدم سادة أو يغطى من كل الجوانب بالسكر البودرة

لعمل الملبن الألوان نضيف الألوان والنكهة – نبدأ بثمن معلقة من النكهة- ونتركه يبرد ثم نتذوق الخليط وإذا أردنا زيادة النكهة .. نزيدها أقل من ثمن معلقة فى المرة على حسب شدة النكهة حتى لا تزيد مننا النكهة عن اللزوم زيصبح الطعم لاذع

يدخل الثلاجة أيضا لمدة لا تقل عن ٤ ساعات – أنا تركته يوم كامل تقريبا

نخرج القوالب ونغمسها من كل جانب بالسكر العادي- ودي خطوة إختيارية .. فقط حبيت أعملها لأولادي لإعطاء شكل أجمل

يقطع مكعبات ويغطى بالسكر من كل الجوانب ويترك لينشف يوم أو إتنين حتى يتماسك جيدا

يحفظ بعلبة محكمة الغلق ويقدم بالهنا والشفا

::ملحوظات عامة

أولادي عجبهم من غير السكر .. يعني هو طبعا اللى بالسكر عجبهم برضه بس بيقولوا من غير السكر أحلى

الحلويات دي ممكن نعملها بطريقة صحية أكثر بإستخدام العصير الطبيعي لإضفاء اللون والنكهة

كل عام وأنتم بخير … المولد النبوي الشريف على الأبواب أعاده الله علينا جميعا وعلى أوطاننا بخير

الحقيقة في بلدي الحبيبة مصر … وعند حلول شهر ربيع الأول تزدان مآذن المساجد بالأنوار والدروس والخطب التي تحث على تتبع خطاه عليه الصلاة والسلام والتأسي بأخلاقه الكريمة … علاوة على الأمسيات الدينية فى إذاعة القرآن الكريم

ومن بين مظاهر الإحتفال بالمولد النبوي الشريف شراء حلوى المولد … مش عارفة الحلويات دي موجودة بمصر فقط واللا فى العالم العربي كله .. من أشهرها الملبن الحبل .. والملبن السادة والسمسمية والفولية والحمصية وخلافه من أصناف الحلويات اللذيذة

ولإضفاء بعض مظاهر الإحتفال على بيتنا .. والتي منها قص الحكايات والقصص عن سيرته العطرة عليه الصلاة والسلام … بدأنا نعمل حلويات المولد وأولها وأحبها لقلبي وقلب الكثيرين هي السمسمية أو حلاة والسمسم

الحلاوة دي بتتعمل بالسمسم والفول السوداني .. ودلوقتى بتتعمل بكافة أنواع المكسرات .. يعني بقى فيه لوزية وبندقية .. وكاجويه برضه ههههه .. الأساس واحد وبنحطه على أى نوع مكسرات نحبها .. تعالوا نعمل الأساس

:: هنحتـــاج الآتي

١ وربع كوب سكر أبيض

ربع كوب ماء عادي من الحنفية

٢ معلقة كبيرة كورن سيرب

١ معلقة صغيرة ليمون

ماء ورد حسب الرغبة ورشة فانيليا

نرفع أول ٣ مقاديرا على النار وعند الذوبان نضيف الليمون وماء الورد والفانيليا

نتركها على النار ٥ دقائق أو أكثر حتى يتكون عندنا سائل كثيف زى الصورة اللى فوق كده

لكل نصف كوب سمسم محمص أضفت معلقتين كبار من خليط السكر المعقود .. يعني نضيف الخليط حتى يلتصق السمسم مع بعضه زى الصورة

بمساعدة ورق الخبز أو ورق الزبدة نشكل السمسم على هيئة قالب مستطيل ونتركه حوالي ربع ساعة لغاية لما ينشف

يقطع بسكين حاد إلى مستطيلات أو قطع صغيرة

يحفظ في علبة محكمة الغلق .. ويقدم بالهنا والشفا

أيضا بنفس الطريقة عملتها بالكاجو الغير محمص … بس الطعم كان هيبقى أحلى لو كنت حمصته قليلا

ملحوظة :: لو تركنا خليط السكر هيتجمد وينشف .. علشان كده يستحسن نحطه فى حمام ماء ساخن فترة العمل على المكسرات علشان يحتفظ بالسيولة بتاعته