مطبخ مغتربة

الفول والفلافل أو الطعمية والكشرى من أشهر الأكلات المصرية رواجا ويأكلهم الغنى قبل الفقير فى مصر

 

ومهما روحنا واللا بعدنا لازم ولابد من الفول والفلافل … وأكيد كل عربى بيحب الفول والفلافل

 

النهاردة هأقدم لكم طبق فلافل مصرى يفتح النفس ويشعركم بأوطانكم

 

 

 

المقـــادير

 

١كوب فول مدشوش – بأشتري الكيس من المحل العربى

 

نصف حزمة بقدونس مقطع أو تقريبا ١ كوب

 

نصف حزمة كزبرة خضرا أو ١ كوب برضه مقطع

 

١٠ فصوص ثوم

 

١ بصلة كبيرة

 

١ معلقة صغيرة كزبرة ناشفة

 

١ معلقة صغيرة بيكربونات الصوديوم

 

ملح حسب الرغبة

 

بيضة عند القلى

 

الطريـــــقــة

 

ننقع الفول فى ماء بالليل مع محاولة تغيير الماء عليه كلما أمكن ونصفيه فى الصباح

 

نغسل البقدونس والكزبرة ونتركهم ليجفوا جيدا

 

ثم فى الفود بروسيسور بتاعك نطحن الفول أولا مع البصل والثوم

 

ثم نضيف الخضرة ونطحنهم جيدا مرتين أو تلاتة حتى يكون الخليط النهائى ناعما

 

 

نضيف معلقة الكزبرة الناشفة والبيكينج بودر

 

نقسم الخليط ويعبأ بالأكياس وفى الفريزر

 

عند الإستخدام نترك الكيس يفك ثم نضيف له الملح وبيضه

 

يقلى فى زيت غزير ويقدم بالهنا والشفا

 

 

وطبعا مفيش أحلى منه مع تشكيلة من الفول والمخللات والعيش البيتا

 

السمن يباع هنـا فى المحلات العربية والهندية لكن غالى جدا جدا

 

 

عندنـا هنا مثلا علبة البقرة الحلوب الصغيرة تباع بحوالى ١٩ دولار

 

 

 

 

النهاردة هأوريكم إزاى ممكن تعلموا السمنة من الزبدة .. طبعا أغلبكم

 

 

 

بتعرفوا تعملوها والحمد لله .. لكن للى ما عندهمش خبرة ممكن يستفيدوا برضه

 

 

هنحتاج فقط إلى

 

 

زبدة صفرا خالية من الملح – إشتريت الباكيت بتاع كوسكو

 

 

حلة وبوتاجاز بس مش أكتر

 

 

السمن هو ببساطة زبدة متشال منها السائل وعلشان كده بنحتاج نسخن الزبدة

 

 

على الهادى فترة طويلة حوالى ٥ ساعات حتى نحصل على السمن الصافى

 

 

 

وهنـــا الخطوات

 

 

 

فى الأول نحط الزبدة فى الحلة – ومعها رشة ملح خفيفة – على نار بين متوسطة وهادئة حتى تسيح الزبدة تماما

 

 

 

 

ثم تهدئ النار عليها جدا جدا على آخر درجة تقريبا هنلاحظ إن السمنة بدأ لونها يكون أصفر من المنتصف

 

 

ونلاحظ أيضا تكون ريم على الوجة .. نزيل الريم بالمعلقة فى طبق خارجى

 

 

الريم ده ممكن نعمل بيه بيض مثلا أو نطبخ بيه .. أنا مش بأرميه

 

 

ونستمر بهذه الطريقة حوالى ٤ ساعات إضافية وده شكل السمن بعد كل ساعة بنلاقيه

 

 

بيصفر أكثر فأكثر ويصفى لونه وبنقدر نشوف قاع الحلة من جوة بعد شوية

 

 

 

 

هنلاحظ وجود مواد صلبة فى القاع متكونة من اللبن والسوائل اللى كانت فى الزبدة

 

 

ودى اللى إحنا بنسميها فى مصر المرتة بنآخدها ونغمسها زى الجبنة طعمها رااائع

 

 

لكن بأعتبرها أقصر طريق لتصلب الشرايين والعياذ بالله ربنا يحمينا جميعا

 

 

نترك السمن ليهدأ ثم يصفى ويصب فى برطمانات نظيفة ومحكمة الغلق

 

 

 

 

وإعملوا منها أحلى وأشهى الحلويات العربية وبالهنا والشفا

أول عقبة واجهتنى فى الغربة هى العيش البلدى العيش البلدى عندنا فى مصر يباع فى كل مدينة وفى

 

كل شارع وطعمه رائع …هنا موجود بديل عنه البيتا … خبز البيتا طعمه حلو وشبة البلدى لكن مش

 

 

البلدى بتاعنا دورت كتير الحقيقة على طريقة عمل الخبز البلدى المصرى لكن كل مرة مش بيطلع زى

 

اللى بيتباع عندنا فى أفراننا فى مصر .. بس وصلت لطريقة يعني شبهه شوية أحب أوريهالكم يمكن

 

تكونوا نفسكم تعرفوها لو عملتوا بحث هتلاقوا مئات الطرق وأنا جربت كتير ودى الخلاصة

 

 

 

هنحتاج الآتى

٢ ونص كوب من الدقيق الأسمر – ٢ للعجين ونصف للفرد

٢ كوب من الدقيق متعدد الإستعمالات

٢ونص معلقة صغيرة خميرة جافة

٤/١ كوب مــاء دافئ للخميرة

٢ معلقة صغيرة سكر

٢ معلقة كبيرة زيت- يفضل زيت الزيتون

٣ معلقة كبيرة لبن بودرة

١ معلقة صغيرة ملح

١ ٢/١ كوب ماء دافئ للعجن

الطريقـــة

فى البداية يجب إختبار الخميرة بإذابة السكر مع الخميرة فى ٤/١ الكوب من الماء الدافئ وننتظر

١٠ دقائق حتى تفور الخميرة

فى وعاء عميق نضيف الدقيق مع الملح واللبن البودرة ومعلقتين الزيت ونقلبهم ثم نعمل حفرة فى

المنتصف ونضيف كوب الخميرة

نضيف الماء الدافئ بالتدريج ونعجن بالعجان أو بواسطة اليد إلى أن تتكون عندنا عجينة غير يابسة

وأيضا مش ملزقة زى ما هو باين فى الصور

نرش العجينة بقليل من سبراى الزيت أو ندهنها دهن خفيف بأى نوع زيت وتغطى بكيس بلاستيك

من بتاع أى ستور زى ولمارت ونتركها حوالى ساعة لتتضاعف فى الحجم

بعد حوالى ساعة تكون تضاعفت … نخرجها من الوعاء ونعجنها باليد على الكاونتر ونعمل منها

إسطوانة

 

نقطع الإسطوانة حوالى ١٢ قطعى أو على حسب حجم الرغيف اللى بتحبوه

 

نضع القطع على الطاولة أو الكاونتر ونغطيها بالكيس البلاستيكي

 

 

عادة يجب الإنتظار حوالى نصف ساعة أخرى لترتاح العجينة لكن فى الغالب أنا مش بيكون

عندى وقت

أبدأ فى فرد العجين برش الكاونتر بقليل من الدقيق الأسمر وآخد أول قطعة عجين وأبدأ بفردها

نضع طبق ونحط عليه مناديل المطبخ الورقية وبعد ما نفرد أول رغيف نضعه على المنديل

ونغطيه بمنديل آخر

فى هذه الأثناء نفتح الفرن ونضع بداخله الصينية اللى هنخبز عليها علشان تسخن جيدا ونفتح

الفرن على أعلى درجة

نكمل فرد العجين حتى يسخن الفن ونضع بين كل رغيفين منديل من مناديل المطبخ الورقيه

عند الإنتهاء من الفرد تقريبا يعلن الفرن إستعداده للخبز ويصفر

نجيب طبق آخر نضعه فوق الطبق اللى حطينا فيه الأرغفة المفرودة وهوووب نقلبهم

فيبقى عندنا أول رغيف على الوش وآخر رغيف تحت .. بنعمل كده علشان كل الأرغفة تكون

أخدت تقريبا نفس الوقت فى التخمير

نفتح الفرن بحرص ونخرج صينية الخبز وبمنتهى الحرص نضع فيها الأرغفة

حوالى ٣ دقائق أو أقل تبدأ الأرغفة فى الإنتفاخ الجميل ورائحة الخبز تملأ البيت مممممممم

 

 

فيه ناس بتقلب الأرغفة على الظهر وناس بتفتح الشواية أنا مش بأعمل ده ولا ده أنا أنتظر بعد

إنتفاخ الرغيف من نصف دقيقة لدقيقة تقريبا وأطلعه وخلاص

وبالهنا والشفا على فلوبكم