مطبخ مغتربة
مطبخ مغتربة :: البسبوسة
البسبوسة .. من أحلى وأشهى الحلويات الشرقية .. والكل بيحبها صغار وكبار
البسبوسة فى بلدى غييييييييير … ليها طعم جميل ومهما حاولنا نقلدها مش بنعرف للأسف فيه سر للحلوانية فى مصر محدش عارف يوصل له .. لكن أهه أدينا بنحاول وفى وسط محاولاتنا ممكن يطلع حاجة كويسة
أنا جربت وصفات كتير للبسبوسة منها اللى باللبن ومنها اللى بالقشطة ومنها اللى بالزبادى .. الحقيقة أكتر واحدة عجبتنى هى اللى بالزبادى وبأستخدم معاه السميد الخشن لأن الناعم مش بيكون طعمه بسبوسة بيبقى على كيك شوية .. ده رأيي والنصيحة دى عرفتها من صديقة لى .. السميد الخشن أفضل من الناعم فى عمل البسبوسة وطبعا دى فى الأول والآخر مسأله أذواق مش أكتر وده شكل السميد اللى أنا بأشتريه من المحل العربى
هنحتاج الآتى
١.٥ كوب سميد خشن
١ كوب سكر أبيض
٤/٣ كوب جوز هند مبشور
١ كوب زبادى سادة – زبادى مش لبن سائل
٢/١ كوب زبدة – بدرجة حرارة الغرفة
٢/١ م كبيرة بيكنج بودر
٢/١ م كبيرة بيكنج صودا
١ ونصف م صغيرة فانيليا
للشربات : ١ كوب ماء + ١ كوب سكر أبيض + ١ م صغيرة عصير ليمون
الطريقــة
سهلة جدا .. نخلط كل المكونات مع بعضها ونعجنها كويس جدا
ثم نفردها فى صينية مستطيلة .. البايركس العادية ونزينها بالمكسرات لو حبينا
وتدخل فرن مسخن مسبقا على ٣٥٠ فهرنهايت لغاية لما تحمر من الوش
فى أثناء ما البسبوسة فى الفرن نعمل الشربات .. ندوب السكر فى المية وأول لما تغلى نضيف عليها الليمون المعصور ونتركها حوالى ١٠ دقائق على النار
وأول ما تخرج البسبوسة من الفرن نصب عليها الشربات وهو ساخن .. لازم الإتنين يكونوا سخنين
نتركها تبرد قليلا ثم تقطع وتقدم بالهنا والشفا
وممكن تزين بالقشطة بس إحنا مش بنحبها بالقشطة كده كفااااية قوى علينا
مطبخ مغتربة :: خبز الطابون الفلسطيني
من أول المشاكل اللى بتواجهنا نحن المغتربين العرب هى الخبز أو العيش وفى سعيي الحثيث لأنى ألاقى طريقة تشبه ولو بقدر بسيط الخبز البلدى فى بلدى مصر وجدت هذه الوصفة الرائعة اللى أخذتها من صديقة فلسطينية غالية على قلبى وهى أم مالك من منتدى لك
قبل كده كنت قدمت لكم خبز البيتا وهو سهل وظريف ويعتبر من أحسن الوصفات للخبز المدور بتاعنا .. ودلوقتى أحب أقدم لكم خبز الطابون الفلسطيني … مما قرأت إن الطابون ده عبارة عن فتحة فى الأرض وفى قعرها ظلط وحجر لزيادة سخونة الفرن وليه غطاء معدنى وكانت السيدات الفلسطينيات بيطبخوا فى هذا الفرن الصوانى والمحمر والمشمر وأيضا هذا الخبز العظيم .. وبالبحث على الإنترنت وجدت لكم هذه الصورة لفرن الطابون الفلسطيني الجميل
وطبعا لأننا ساكنين فى شقق وما نقدرش نحفر فى الأرض ونعمل فرن بنستعيض عن الموضوع ده بإننا نجمع شوية ظلط أو حصى صغير .. أنا إشتريت حصى من اللى بيتحط للزينة فى الفزات وخلافه وغسلته كويس لأنه بيكون مغطى بطبقة من الشمع وبأحطه فى صينية الخبز فى الفرن وأسخنه كويس جدا على أعلى درجة فى الفرن
وده شكل الفرن بتاعى
تعالوا نشوف المقاديـــر
٢ كوب دقيق أبيض متعدد الإستعمال
٢/١ كوب دقيق أسمر
٢ معلقة كبيرة خميرة جافة
١ معلقة كبيرة سكر
ماء دافئ للعجن – حتى الحصول على عجينة تلتصق باليد … عجينتي أخدت كوب ونصف
الطريقــة
أولا : نخلط الكونات الجافـة معـا جيدا ثم نضيف الماء الدافئ بالتدريج ونعجن حتى نحصل على عجينة لينة وتلتصق باليد كما هو موضح بالصور ثم نتركها فى مكان دافئ حتى ترتفع وتزيد فى الحجم تقريبا ساعة
نرش سطح نظيف بالدقيق الأسمر ونطلع العجينة ونقسمها ٣ كور كبيرة
نفرد كل كورة على سطح مرشوش بالدقيق الأسمر ونضغط عليها بأطراف الأصابع علشان نعمل الشكل اللى قدامنا ده
وإحنا بنفرد العجين نجهز الفرن ونفتحه على أعلى درجة ونحط فيه صينية الخبز بتاعتنا والظلط فيها علشان يسخن قبل ما نبدأ الخبز
بعد ما نتأكد إن الصينية سخنت جامد وجهزت نبدأ بوضع الأرغفة فى الفرن ونتركه حوالى دقيقتين إلى أن يحمر ومفيش داعى نقلبه على الوجه الآخر
ممكن نغمس بيه أى شئ فى الوجود وقريب جدا من البلدى المصرى
وهنا ساندوتش محشى جبنة يم يم إتفضلوا معانا
شكل الرغيف كله
يا ريت يكون عجبكم … جربوه مش هتندموا أبدا إن شاء الله
شكرا أم مالك وجزاك الله خيرا
مطبخ مغتربة :: تعالوا نعمل البسطرمة
البوست ده للناس اللى بتحب البسطرمة ومغرمة بيها زيي كده الحقيقة كل أفراد أسرتى الصغيرة والكبيرة – ما عدى والدى – بيموتوا فى البسطرمة على الرغم من رائحة الحلبة بها لكن طعمها لا يقاوم .. البسطرمة فى مصر راائعة لأن اللحمة هناك جميلة وناعمة طبعا أنا بأتكلم عن الأنواع الحلوة الغالية .. وهنا برضه بألاقى بسطرمة لكن الحقيقة ساعات بأحس إنها بلاستيك شوية مش عارفة ليه يمكن ده بيرجع لنوعية اللحم المستخدم .. وأكيد غالية وبعدين فيها مشكلة بأحس إن فيها صبغة وأعتقد إن فيها صبغة لإعطاء اللحم لون أحمر زاهى وموضوعالصبغة ده بيقلقنى .. أنا عارفة إن كل شئ فيه صبغة لكن بأحس إنها زيادة شوية .. المهم يعني قررت خوض التجربة .. وجربت قبل كده كذا مرة بوصفات متعددة وفشلت فشل ذريع معايا .. المرة دى توكلت على الله وأخدت الوصفة من خالتى بمصر ومع بعض التعديلات البسيطة اللى تلائم البيئة هنا طلعت جميلة .. وفيه صديقة لى جربت وصفتى لكن بولاية أخرى وقالت لى طلعت رائعة والحمد لله .. ندخل فى المفيــد
المقــــادير
٢ باوند – تقريبا ١ كيلو – نوع لحم يكون ناعم وأحمر يعني نشيل الدهن من عليه وننضفه كويس *
وطلعت نص نص مش وحشة Chuck roast أنا إستخدمت قطعيه هنا إسمها
أعتقد هتكون أحسن Eye Round المرة اللى جاية هأستخدم قطعية الـ
٢/١ كوب ملح كوشر – ملح خشن يعني *
١ ثمرة فلفل رومى أحمر – لإضفاء لون طبيعي وطراوة فى التغليفة بتاعت اللحمة *
٢ معلقة صغيرة ملح عادى *
من ٣ – ٤ راس ثوم تقريبا حوالى ٢٥ فص ثوم *
٢/١ كوب بابريكـا بودرة *
٢/١ كوب حلبة مطحونة *
فى محاولاتى السابقة كنت بأشترى الحلبة من المحل العربى وأطحنها والمرة دى إشتريت حلبة من العطار فى مصر إسمها حلبة للبسطرمة هى مش مخصوص ولا حاجة هى أعتقد محمصة ومطحونة يعنى مش إفتكاسة يعني
الطريقـــة
فى الأول نغسل قطعة اللحم جيدا وننشفها بورق المطيخ كويس ونعمل فيها شقوق غير نافذة مجرد شقوق سطحية مختلفة
ونرش عليها الملح الخشن كويس ونغطيها بالملح نحشى الشقوق اللى عملناها كويس بالملح الخشن ثم نضع عليها شئ تقيل .. ممكن حلة فيها مية مثلا أى وزن تقيل يضغط عليها كويس ونتركها لمدة ٢٤ ساعة علشان تنزل ميتها ونحاول نعمل تصريف المية كل شوية يعني ما نخليش اللحمة تعوم فى ميتها فممكن نحطها على شبكة وتحتها صينية مثلا لإستقبال المية بتاعت اللحمة – طبعا درجة حرارة الغرفة اللى فيها اللحمة نحاول إنها ما تعديش ٢٥ درجة مئوية أو ٧٧ فهرنهايت .. لومش هينفع ممكن تتركوا اللحمة فى التلاجة ٣ أيام وتشيلوا المية كل شوية
بعد كده هتلاقوا اللحمة بقيت رفيعة ومبططة حبتين ولونها هيكون أغمق أكيد .. نشطفها كويس جدا من الملح بالماء البارد وننشفها كويس ونغطيها بأى قماشة مخرمة ونعلقها بإستخدام أى دوبارة فى الهواء لمدة ٣ أيام ولازم يكون المكان جيد التهوية
نخلط مكونات التغطية بتاعتها فى الفود بروسيسور بتاعنا .. الثوم والملح الناعم والبابريكا والفلفل الرومى والحلبة وهنحتاج شوية مية صغيرين لغاية لما نعمل عجينة نقدر نفردها على اللحمة
نلبس جوانتى علشان اللون والرائحة ونبدأ بتغطية اللحمة من كل جانب كويس جدا جدا ونتركها معلقة فىالهواء لمدة شهر كامل .. بالنسبة لى علشان أنا ساكنة فى منطقة شديدة الجفاف القشرة كانت ناشفة وكراستى إنما لو إنتم فى منطقة فيها رطوبة شوية هتلاقوها أطرى بكتير
وده شكلها بعد شهر من التعليق
وهنا مستعدين للتقطيع
بعد ما قطعناها … جميلة ومملحة
إحنا فى مصر بنآكلها كده أو مع البيض بتبقى لذيذة جدا
ملحوظات على الوصفة
الوصفة الأصلية بنسيب اللحمة ٣ أيام فقط وبعدين بتكون جاهزة!!! مش عارفة أنا ما حسيتش إن طعمها مناسب مع إن صديقتي اللى جربتها تركتها ٣ أيام فقط واكلوها بالهنا والشفا بعد كده على طول
ممكن تدخلوا هنا على اليوتيوب تشوفوا الوصفة من الشيف أسامة – مش هى اللى إتبعتها لكن نفعتنى جدا لما جيت أشوف الشيف اللى معاه وهو بيحط إزاى الطبقة ويغطى اللحمة كويس لأن لازم نبلل الأيدي شوية وإحنا بنحط الطبقة دى
يا ريت لو عجبتكم تجربوها وتقولوا لى عملتوا إيه
مطبخ مغتربة :: فراخ كورنيش بالسماق
السمــــاق … بصراحة مش مشهور فى مصر خالص وأنا فقط أتذكر والدتى وخى تضع السماق مع السبانخ .. كا بيعطيها طعم مزز وحلو ولما جيت هنا إشتريت السماق من باب العادة مش أكتر … وفضل قابع فى أدراج المطبخ لغاية لما جاءت الفكرة والفرصة وعمات بيه تتبيلة للفراخ المشوية وأيضا خضار مشوى تعالوا نشوف عمت إيه بالسماق
مقادير التتبيلة ـ التتبيلة هنا لعدد ٢ فرخة صغيرة كورنيش
كوب زبادى
ملح وفلفل
بصلتين كبار مفرومين
٣ ملاعق سماق
خل وفصين ثوم مهروسين
٢ معلقة كبيرة بهارات
شوية شطة
معلقة كبيرة بابريكا
٣ ملاعق كبار زيت – أى نوع أنا إستخدمت زيت زيتون
روز مارى
نخلط مقادير التتبيلة وتتبل بيها الفراخ والخضار(طماطم – فلفل أخضر وأحمر وفلفل شطة – جزر – بصل ) ونسيبها شوية متبلة ساعة على أقل تقدير
ونحطها على الشواية … وخلاص
وإستمتعوا بأحلى طبق فراخ مشوى
وصورة كمان … وبالهنا والشفا