مطبخ مغتربة
مطبخ مغتربة :: سلطة الزبادى بالخيار
طبق اليــوم هو سلطة بسيطة .. إنما أنا إتعلمتها من سيدة سورية الله يمسيها ويصبحها بالخير ويفك كرب أهل سوريا كلهم .. السلطة دى بتحوز على إعجاب الجماهير بلا مبالغة ومش قادرى أعرف إيه اللى فعلا بيميزها عن باقى سلطات الزبادى اللى فى العالم … لكن أهه بقى يمكن النفس … دى بتعتبر الطريقة الوحيدة بالنسبة لى اللى بأقدر آكل بيها الزبادى .. تعالوا نشوف السرررر الخطيييرررر
المكونات
١ ونصف كوب زبادى سادة – يوجورت
٤/١ كوب ماء من الصنبور
١ خيارة كبيرة مقشرة ومقطعة مكعبات
فص ثوم مدقوق ناعم
ملح وفلفل وشوية نعناع ناشف تقريبا معلقة صغيرة واللى يحب يزود براحته
الطريقــة
فى وعاء عميق نخلط الزبادى مع الماء والملح والفلفل .. يضاف الماء تدريجيا حتى يصل للقوام المناسب
أنا مش بأحب السلطة دى تكون تقيلة علشان كده ده المقدار المناسب لعائلتى كمان مش بأستعمل الجريك يوجورت
بأستخدم زبادى عادى .. بس فيه ناس تحبها تقيلة إنتم والمفضل عندكم
نتذوق الخليط للتأكد من الملح والفلفل ثم نضيف الثوم المفروم ونخلط ثم الخيار
والنعناع الناشف ونقلب حتى يمتزجزا مع بعض جيدا
وبس خلاص نقدمها بالهنا والشفا مع المشويات ومع ورق العنب والمحاشى وأيضا مع صينية المسقعة
يا سلااام ولا أحلى من كده
أنا قدمتها مع بعض المشويات والبطاطس مسلوقة ومحمرة خفيف وبالهنا والشفا
مطبخ مغتربة – صينية القرع العسلي بالبشاميل
المقـــاديــر
٧ أكواب قرع عسلى قطع يعنى تقريبا – ثمرة متوسطة*
٢ كوب سكر أبيض – أو حسب رغبتكم فى السكر *
رشة قرفـة ورشة فانيليا*
زبيب ومكسرات حسب الرغبة للحشو*
البشـاميل
٤ معالق كبيرة دقيق *
٤ ملاعق زبدة *
١ كوب لبن حليب *
الطـريقـة
فى حلة على نار متوسطة نضع قطع القرع مع السكر و القرفة والفانيليا هنلاقى قطع القرع بدأت تستوى ونزلت عصير فى الحلة
نصفى القطع ونحتفظ بالعصير لأن ده اللى هنعمل بيه البشاميل *
لعمل البشاميل
فى حلة على النار نسيح الزبدة ونضيف لها الدقيق ونقلب لغاية لما الدقيق يصفر *
نستمر فى التقليب ونضيف العصير تقريبا هيطلع لنا كبايتين ونضيف كباية اللبن ونقلب حتى يتخن المزيج*
ندوق البشاميل للتأكد من حلاوته وإنه مظبوط ولا يحتاج للمزيد من السكر *
فى الصينية أو الطاجن نضع طبقة بشاميل خفيفة فى القاع ثم نضع نصف كمية القرع *
ملحوظة فيه ناس بتحب تهرس القرع قبل ما تحطه لكن إحنا هنا بنحبه قطع
نضع طبقة من المكسرات ثم فوقها الكمية المتبقية من مكعبات القرع ثم البشاميل على الوجه *
يدخل فرن مسخن مسبقا على ٣٥٠ فهرنهايت لمدة ٣٠ دقيقة أو حتى يحمر الوجه *
ويقدم بالهنا والشفا
مطبخ مغتربـة : الكشك المصرى
الكشك طبق يختلف تحضيره من مكان لآخر بوطننا العربى .. ومصر فيها عدة طرق لتحضير الكشك
بتختلف بحسب الموقع الجغرافى ودى أسهل طريقة للكشك وأيضا هى طريقة من طرق جدتى الله يرحمها
الكشك المصرى البسيط
المقـــاديــر
١ كوب دقيق
١ كوب زبادى سادة – يوجورت يعنى
٢/١ كوب لبن حليب
٥ أكواب مرقة – شورية . بإمكانك إستخدام ماء وماجى لو بتحبوهـا
ملح وفلفل حسب الذوق
رشة قرفة
بصلة كبيرة مقطعة – زيت لتحمير البصلة
طريقـــة التحضيــــر
يخلط الدقيق مع الزبادى والحليب جيدا ويتركوا لمدة ساعتين
نغلى الشوربة جيدا ونظبط الملح والفلفل ونضيف لها رشة قرفة ثم يضاف لها الخليط السابق مع التحريك سريعا
ونستمر فى التقليب حتى يغلظ القوام .. هيكون مثل المهلبية كده أو البودنج
نحمر البصلة فى الزيت ونآخذ جزء منها قبل أن تصبح بنية ونخلطه مع الخليط السابق
نكمل تحمير باقى البصلة حتى تصبح بنية اللون …. يغرف الخليط فى أطباق ويزين بالبصل المحمر
يؤكل دافئ أو بارد مع الخبز البلدى
وبالهنا والشفا
مطبخ مغتربـة : الفتة المصرية
طبقنا اليوم هو طبق مشهور وكلنا عارفينه بالذات فى العيد الكبيروفى عقيقة المولود
أنا عمرى ما حبيت آكل الفتة لأنى كنت مش بأحب العيش وهو مبلول بالشوربة وعليه الرز
الحقيقة جربت الطريقة دى وعجبتنى جدا وكان طعمها فوق الممتاز تعالوا نشوف الفتة بطريقتي الجديدة
الفتـــة المصـــريـــــة
المقاديــر – طبعا تختلف حسب عدد الأفراد
٢ كوب أرز أبيض – يفضل المصرى ويطبخ حسب العبوة
من ٢ – ٣ باوند لحمة
٥ رغيف بيتا أسمر – أو إعملوهم بنفسكم هنــــا
٤ فص ثوم – سمن للتحمير
٢ معلقة كبيرة خل أبيض
مقادير الصوص
٢ فص ثوم مفروم
١ معلقة سمن كبيرة
١ علبة عصير طماطم مع معلقتين صلصة طماطم
ملح وفلفل
الطريقــــة
أولا نطبخ الأرز حسب اللى مكتوب على العلبة وفى نفس الوقت نسوى اللحمة
اللحمة نسلقها أو ممكن نسويها بالفرن لو أسهل ليكم
٢- فى طاسة أو حلة على النار نقطع الخبز قطع ونحمره بالسمن حتى ينشف ثم نهدئ النار
٣- نضيف الثوم المفرى فى منتصف الخبز ونحمره على نار هادئة
حتى يشقر لونه ثم نضيف ملعقتين كبار خل ونقلب مع الخبز
٤ – بالنسبة للصلصة نحمر الثوم فى السمن ثم نضيف الصلصة وملح وفلفل ونتركها تتسبك
للتقديم
قبل الأكل مباشرة نغرف الخبز فى صينية ثم عليه الأرز ثم ترص قطع اللحم ويزين بالصوص
عادة أنا لا أسقى الخبز بالشوربة حتى يظل مقرمشا … أقدم الصلصة والسورية جانبا لمن يرغب فى المزيد بطبقه
وبالهنا والشفــــا
مطبخ مغتربة : سلطة الكسكسى بالخضروات
اليــوم هنعمل طبق خفيف وصحى ومليان خضروات ينفع طبق جانبى أو سلطة
المقــادير
٢ كوب كسكسى مطبوخ – بالماء والملح فقط
١/٢ كوب بصل أحمر مقطع مكعبات
١ كوب طماطم صغيرة مقطعة
كمية من أى نوع تفضلية من الخضار المسلوق – بروكلى/ فاصوليا خضراء / أسباراجس / كوسة
١/٤ كوب من جبن الفيتا المفتت
١/٤ كوب من الزيتون الأسود مقطع
عصير ليمونة – ملح – فلفل – نعناع ناشف أو أخضر- زيت زيتون
الطريقــــة
بعد تحضير الكسكسى إخلطيه مع باقى الخضروات تباعا
نضيف باقى المكونات والملح والفلفل والليمون وزيت الزيتون ونخلط برفق
تترك فى الثلاجة لمدة ساعة
تغرف وتقدم باردة وبالهنا والشفـــــا
مطبخ مغتربة : طريقة عمل كحك العروسة أو الكعك بالعجمية
الكحك لا يخلو بيت مصرى منه بالذات فى الأعياد والمناسبات السعيدة
مسلم أو مسيحي .. كبير وصغير كلنا بنحب الكحك وبالذات المحشى عجمية
البعض يقول إن أصل الكحك من أيام الدولة الفاكية التى إشتهرت بالحلويات
والآخر يقول إن أصله فرعونى وهناك نقوش على جدران المعابد لنقش الكحك
الكحك المصرى مختلف عن الكحك المنتشر فى باقى دول المنطقة وهو كحك
السمولينا أو المعمول بالتمر .. الكحك المصري بيكون محشى حشوات مختلفة
منها العجمية والمكسرات أو الملبن وممكن سادة بالسكر فقط
تشتهر عندنا فى مصر عادة إن أهل العروسة لازم يكونوا جايبين لبنتهم كحك كتير
ده غير الحلويات والبتيفور والبسكويت وخلافه .. للتقديم للضيوف
تعالوا نعمل الكحك ونخلى ولادنا يشتركوا معانا فى عمله
المقــاديـــر
٣ كوب دقيق متعدد الإستخدام
١ وربع كوب سمن جامد – هنا طريقة عمل السمن
١/٢ معلقة صغيرة قرفة
١/٣ كوب لبن دافئ
١ معلقة كبيرة خميرة جافة
١ معلقة كبيرة سكر
٢ معلقة كبيرة سمسم غير محمص
لعمل العجمية نحتاج إلى
٢ معلقة كبيرة دقيق
٣ معلقة كبيرة سمن
١ معلقة سمسم
١ كوب عسل أبيض
١ كوب عين جمل – جوز- وده إختياري
الطريقـــة
أولا: نقدح السمن على النار – نقدح السمن يعنى نخليه يسيح ويكون ساااخن جدا – بس إنتبهوا
حتى لا يتحرق
فى وعاء يتحمل الحرارة نضع الدقيق والقرفة ونخلطهم جيدا ونعمل حفرة فى المنتصف نضع بها السمسم
ثم نصب السمن الساخن حبة بحبة على السمسم -حرارة السمن هتحمص السمسم
نقلب بواسطة معلقة خشبية الخليط – فى البداية هيكون الخليط مائع قليلا لكن مع التقليب هيمسك
نترك الخليط ليهدأ قليلا حوالى ١٠ دقائق ثم نعجنه باليد حتى نتأكد إن الدقيق تشرب السمن جيدا
فى هذه الأثناء ندوب الخميرة فى اللبن الدافئ مع ملعقة السكر وبعد ما تفور نضيفها للخليط
نعجن باليد جيدا حتى يتكون عندنا عجين متماسك نتركه يرتاح ساعة
فى الوقت ده هنعمل العجمية
نضع السمن أو الزبدة على النار مع معلقتين الدقيق ونقلي جامد كأننا هنعمل بشاميل
مع الحرص إنها ما تكلكعش
نقلب حتى يتحول اللون إلى العاجى ثم نبعد الحلة عن النار ونضيف السمسم والعسل
ونقلب ونرجعه على نار هادئة
ونتركه على النار حتى يتخن القوام ثم نضيف المكسرات
إتركوا الخليط يبرد ثم يكور إلى كور صغيرة بحجم البندقة
عند الإنتهاء نآخد قطعة من العجين ونضع فى منتصفها قطعة عجمية ونقفلها جيدا
بإمكانكم تركها كده أو لو عندكم منقاش أو أداة المعمول الخشبية – يمكن شراؤها من
المحلات العربى – إنقشوا على الوجه
توضع فى فرن ساخن ٣٥٠ فهرنهايت لمدة ربع ساعة وممكن نفتح عليها الشواية لتحمير الوجه