المعجنات والمحبوزات

الباتون سالية  … هو أحد المقرمشات المملحة المشهورة جدا جدا في مصر .. لاع لم عندي إذا كان متواجد في باقي الدول العربية أو لا وإسمه إيه هناك بس هو فعلا جميل جدا جدا جدا

يتواجد في المطبخ اليوناني لكن مختلف قليلا إحنا عندنا في مصر بيكون معمول بحبوب الكمون أما في اليونان مشهور أكثر بحبوب الكراوية وحبة البركة

اليوم إن شاء الله هنعمله على الطريقة المصرية … بيتميز بطعم الزبدة أو السمنة الواضح جدا وطعم الكمون الجميل

 :: هنحتاج

٣ كوب دقيق أبيض

١ كوب زبدة ويفضل سمن

٢ معلقة صغيرة ملح

٢ معلقة كبيرة كمون حب

١ معلقة كبيرة خميرة فورية

١معلقة صغيرة سكر أبيض

ربع كوب + ٢ معلقة كبيرة ماء دافئ للعجن

:: الطريقــــــــة

تضاف كل المواد الجافة معا وتخلط جيدا ونضيف لها الماء بالتدريج حتى تتكون عجينة متماسكة صالحة للتشكيل

نمسح إيدينا بقليل من الزيت أو السمن ونآخد كورة صغيرة ونفردها على شكل رول طويل ورفيع

يمكنكم مسح الوجه بالبيض المخفوق لكن أنا عملته كده بدون بيض ويدخل فرن حامي ٤٠٠ فهرنهايت من ١٠-١٢ دقيقة إلى أن يحمر ثم يترك ليبرد ويقدم

وبالهنا والشفا … جربوه سهل جدا ولذيذ واللي فيكم من مصر هيفكركم بأيام حلوة بالذات أعياد الميلاد وإحنا صغيرين

الحقيقة العيش الفينو هنا غريب … يعني أشكال وأنواع وأحجام لكن الفينو أبو شلن أو كان بشلن بقى زماانه بقى بجنية دلوقتي … المهم الفينو بتاع الفرن ده اللي بنلاقيه في كل حته في مصر مش موجود زيه هنا .. وأنا مفتقدة طعمه جدا جدا لأني متربية عليه

وأخيرا وصلت لطريقة سهلة قوي وجميلة … طبعا هنا أنا رشيت عليه سمسم وحبة البركة لكن الأصل في أبو شلن بتاع أيام زمان إنه كان – قرديحي ـ يعني بالعربي مفيش عليه أى حاجة سادة

أنا عملته قبل كده سادة وبالحجم الي كان في مصر بيكون طويل شوية ورفيع لكن المرة دي عملته تقريبا بحجم البانز أو خبز الهوت دوج اللي بنشتريه من هنا

هش وطري ولذيذ جدا جدا … جربوه وإدعوالى

المقادير وطريقة التشكيل موجودة بالفيديو … أتمنى يعجبكم

الخبز ده رائع رائع بمعنى الكلمة لو بيحبوا الزعتر والجبنة .. ما يتشبعش منه فعلا تعلمته من صديقتي الفلسطينية أم مالك جزاها الله خيرا .. مع كوب شاي منعنع على رأيها مفيش أحلى من كده الخبز ده غير المناقيش وفطاير الزعتر والجبنة الفلسطينية المعروفة .. جربوه وإن شاء الله يعجبكم

الخبز ده المفروض يتعمل بالزعتر الأخضر وأي نوع جبنة مفتتة زي الفيتا .. ممكن تعملوا الجبنة بنفسكم مش هتآخد دقائق .. أنا إستخدمت جبنة بيضا كنت جايباها من مصر .. صورتها موجودة تحت جبنة بيضا عادية للفرد والنتيجة كانت جميلة جدا

::المقاديــــر

٣ كوب دقيق أبيض

١ معلقة كبيرة خميرة فورية + ١ معلقة كبيرة سكر أبيض

٢ معلقة كبيرة زعتر ناشف

١ معلقة صغيرة ملح

١ كوب ماء فاتر للعجن

ربع كوب زيت يفضل زيت الزيتون

١ كوب جبنة بيضا

نبدأ إن شاء الله

نضيف المقادير الجافة ونخلطها على بعضها كويس

 ثم نضيف الزيت ونقلب حتى يتشرب بالدقيق ثم نضيف الماء حبة حبة حتى تتكون عجينة ملساء

نضيف الجبنة ونعجن بالراحة علشان الجبنة ما تتفتتش أكتر – لو إستخدمتوا جبنة زي بتاعتي هتتكون عدنكم عجينة تلتصق باليد ما تقلقوش وما تزودوش دقيق هى شكلها كده بس هتزبط فى الخبيز

نترك العجينة تختمر ساعة ثم نأخذ منها كور بحجم كورة الجولف كده ونفردها على سطح مدهون زيت زيتون

نخبزها فى فرن متوسط الحرارة أو إعملوا زيي سويتها على عين البوتجاز فى طاسة تقريبا دقيقتين لكل وجه

وتقدم بالعافية مع المزيد من الجبنة والزعتر أو غمسوها بزيت الزيتون أو حاف كده من غير غموس مع كباية شاي بالنعناع

جميلة جدا جدا …. وبالهنــــا والشفــــــا

الشوريك هو نوع من أنواع المخبوزات الحلوة مشهور جدا فى مصر موجود بكل المخابز تقريبا .. يؤكل مع كوب شاى أو لبن دافئ .. حلو شتاء وصيفا .. صباحا ومساء يعني بكل الأوقات جميل تعالوا نشوف بيتعمل إزاي

:: المقــــاديـــر

٣ كوب دقيق متعدد الإستعمال

٢/١ كوب زيت ـ إستخدمت زيت ذرة

٢/١ كوب سكر أبيض

١ بيضة

١ معلقة كبيرة خميرة جافة

من نصف لـ ٤/٣ كوب لبن دافئ للعجن

للوجة

خليط بيض – بيضة مع معلقتين لبن أو ماء + رشة فانيليا

سمسم وسكر أبيض

نبدأ بخلط المكونات الجافة معا جيدا السكر والخميرة والدقيق ثم نضيف البيض والزيت ونعجن ثم نضيف اللبن قليلا قليلا حتى نحصل على عجينة لينة ومتماسكة لا تلتصق باليد وبنفس الوقت غير يابسة

نتركها تختمر فى مكان دافئ لمدة ساعة ثم نضربها باليد  – نديها بوكس يعني – ونتركها تختمر ساعة أخرى …ونستمر هكذا ٣ أو ٤ مرات

السر فى نجاحها هو التخمير المستمر

نبدأ بتشكيلها زى الصورة هو ده أكتر شكل مشهور بمصر .. وممكن على شكل ضفيرة أو أى شكل تحبوه

نتركها تختمر نصف ساعة بعد التشكيل

ثم نمسح الوجه بخليط البيض ونرش السمسم والسكر

تدخل فرن مسخن مسبقا على ٣٥٠ درجة فهرنهايت .. وتترك حوالى ٢٠ دقيقة أو أقل على حسب الفرن

إنتبهوا ألا تحترق .. ونتابعها حتى يصبح الوجه بني خفيف

تخرج من الفرن وتترك لتبرد قليلا وبالهنا والشفا

يم يم الفطير المشلتت من أحلى وأجمل ما تشتهر بيه فلاحات مصر .. ودلوقتى بيتباع فى أى محل مخبوزات فى مصر .. بس طبعا لا يعلى على الفطير الفلاحي اللى غرقان بالسمن البلدي ههه … اليوم إن شاء الله فى محاولة ساذجة بنحاول نعمل شبهه … بس ما تخافوش بيطلع حلو بس إنتو كتروا السمن والزبدة ولا تسألنى عن الكوليسترول

الفطير ده ممكن نآكله كده مع الجبن الأبيض والعسل الأسود والعسل الأبيض وممكن نحشيه من جوه جبن رومى أو لحم مفروم أو سجق وخلافه ويبقى فطير محشى .. اليوم هأقدم لكم الفطير المشلتت السادة يعني مش المحشي

بسم الله نبدأ … هنحتاج الآتى

٤ كوب دقيق متعدد الإستعمالات *

٢ كوب ماء عادى من الحنفية- قد يزيد أو ينقص قليلا*

تقريبا ١ كوب زبدة سايحة*

رشة ملح*

::الطريــــــقة

نخلط الدقيق والملح جيدا معا ثم نضيف أول كوب ماء ونعجن جيدا ثم نضيف الكوب الآخر شوية شوية ونستمر بالعجن فترة طويلة حتى تتكون عجينة ملساء طرية تقدروا تشدوها باليد بدون أن تتقطع زى اللى فى الصورة كده

فى طبق عميق نقسم العجينة لـ ٦ كور وندهن الطبق بالزيت ونمسح على الكور بالزيت ونضعها فى الطبق لترتاح … أنا بأحب أغمر الكور فى زيت زيتون علشان العجينة لا تفقد مرونتها … طبعا الزيت ده مش بيترمي

نترك العجينة ترتاح حوالى ١٥ دقيقة وفى نفس الوقت نسخن الفرن على أعلى درجة ممكنة .. عندي عملته على ٥٥٠ فهرنهايت

على سطح مرشوش بالزبدة أو السمن السايح نفرد أول كورة رقيق جدا جدا لدرجة إنكم ممكن تشوفوا سطح الترابيزة من خلالها .. ثم نمسحها جيدا وبسخاء بالزبدة السايحة

نطبق العجينة بأى شكل – فى الغالب مستديرة – ونمشح بالزبدة السطح وإحنا بنطبقها ثم نتركها جانبا ونبدأ فى فرد الكورة الثانية

نفرد الكرة الثانية كما فعلنا مع الأولى بالظبط وندهنها بالزبدة ثم نضع اللى فردناها مسبقا فى النص والناحية المقفولة لأسفل وندهن زبدة ونطبق الثانية على الأولى مع رش زبدة بشكل مستمر

نفرد الكرة الثالثة بنفس الطريقة ونضع الإتنين اللى قبلها جواها ونطبق ونرش الزبدة  … ثم نضعها فى صينية الخبز وندخلها فرن حامي تقريبا ١٥ دقيقة .. ونقلبها فى النص على الناحية التانية .. نقتح الشواية عليها من فوق علشان تتحمر لو عايزين .. نطلعها من الفرن ونضع عليها حتة زبدة صغنوووونة .. معلش لزوم الكوليسترول ونغطيها كويس علشان ما تنشفش من فوق

العجينة السابقة تعمل لنا ٢ فطيرة كل واحدة تتكون من ٣ كور عجين

ملاحظين طبعا الطبقات من جوة الفطيرة … رووووعة وجميلة فعلا

ممكن نرشها بالسكر البودرة .. وفى مصر ممكن بيحشوها كسترد أو على الوجه بالمكسرات

أو تؤكل سادة بالعسل والجبنة ويا سلام لو عندكم مش تبقى جميلة … وبالهنا والشفا

 

اليوم أقدم لكم طبق جديد من أطباق الـ ٦*٦

طبق اليوم هو بيتزا الفاهيــا

طبعا ممكن تشتروا قواعد البيتزا الجاهزة أو أى وصفة تحبوها ومتعودين عليها ودى طريقتي البسيطة

 

للعجينة

٢ ونصف كوب دقيق أبيض متعدد الإستعمال – وممكن تخلطوه بدقيق أسمر

١ معلقة كبيرة خميرة فورية

١ معلقة كبيرة زيت زيتون

١ معلقة صغيرة ملح

١ معلقة صغيرة سكر

١ كوب ماء دافئ للعجن

١ معلقة كبيرة بهارات إيطالية – إختياري

لتغطية البيتزا

١ كوب فراخ مسلوقة ومقطعة

١ بصلة مقطعة شرائح

فلفل ألوان مقطع شرائح

بهارات وملح وفلفل

زيت زيتون أو أى نوع

جبنة موتزاريللا أو شيدر مبشورة

صوص الطماطم أو معجون الطماطم

 

الطريقــة

فى طاسة على النار نضع الزيت وندبل فيه البصل ثم نضع شرائح الفلفل الملون وقطع الدجاج وتقليبتين ونضيف البهارات والنلح والفلفل

لعمل العجينة نخلط المكونات الجافة مع بعض جيدا ثم الماء واحدة واحدة ونعجن حتى تتشكل عجينة ملساء لا تلتصق باليد

نفرد العجينة على سطح نظيف مرشوش بقليل من الدقيق ونضع عليها صوص الطماطم وتدخل فرن مسخن مسبقا على ٣٥٠ فهرنهايت

تخرج من الفرن ونضع عليها خليط الفاهيتا ـ الدجاج والفلفل والبصل – ثم الجبنة وتدخل الفرن حتى تمام النضج

 

ملحوظة مهمة :: أنا لما عملتها أضفت الجبنة ثم خليط الفاهيتا .. كانت هتبقى كويسة لو كنا أكلناها فى نفس الوقت لكن أنا تركتها فترة واللى حصل إن الدجاج نشف وبالتالى فأحسن حل من وجهة نظرى المتواضعة إنكم تضيفوا الجبنة فوق الدجاج علشان ما ينشفش

وبالهنا والشفا