أول ما بنسمع كلمة قطايف بنتذكر رمضان على طول وجمال رمضان وليالي رمضان ولمة الأهل والأحبة .. وأنا شخصيا لما بأسمع كلمة قطايف بييجي في بالي على طول كباية الشاي مع كام واحدة قطايف كده – ١٠ واللا ١٥- بعد صلاة التراويح يا سلااااام على كده … اللهم بلغنا رمضان يا رب جميعا بخير إن شاء الله
القطايف محببة جدا جدا في بيتي الصغير … بكافة أنواع الحشوات حلو وحادق … بنحبها محشية جبنة رومي أو لحمة مفرومة مع الشوربة في الإفطار ومحشية مكسرات أو مهلبية – قشطة- كحلويات بعد الإفطار مع كوب الشاي
الإنترنت مليانة وصفات أشكال وألوان للقطايف … اللي بالسميد واللي بالدقيق الأسمر وكمان ممكن تلاقوا بيض وحاجات كتيرة .. وأنا جربت وصفات كتيرة كلها حلوة لكن الحقيقة بتحتاج شوية خبرة علشان نعرف نظبط قوام العجينة وإحتمال يكون فيها مكونات مش موجودة بالبيت
المرة دي جيبت لكم وصفة سهلة جدا جدا ولذيذة ونتيجتها مضمونة بإذن الله … أخدتها من واحدة صديقة لي هنا وهي أخدتها من والدتها ومش عارفة بقى والدتها أخدتها من مين 
المهم إنها وصفة أصيلة في بيتهم وهي فعلا وصفة جميلة
المرة دي أنا ما عملتش فيديو لكن إن شاء الله أعمله قريب قبل رمضان وأحطه علشان تبقوا عارفين العجينة بيكون شكلها وقوامها إزاي
نييجي بقى للوصفة
المقادير
١ كوب دقيق أبيض
١ وربع لـ ١ ونصف كوب ماء دافئ أو لبن – أستعمل خليط
١ معلقة صغيرة خميرة فورية
مكسرات للحشو / قشطة/ جبنة أي حشوة تحبوها
شربات سميك – ٢ كوب سكر + ١ كوب ماء وعصير ليمون- لو هتعملوا قطايف حلوة طبعا
الطـــريقــــــة
نضيف الخميرة للبن الدافئ أو الماء ثم نخلط الدقيق جيدا ونتركها تختمر مدة ٢٠ دقيقة فقط
في طاسة على نار متوسطة وعلى حسب الحجم اللي عايزينه- نآخد بالكبشة جزء من الخليط ويوضع بالطاسة – أنا بأستخدم الكوب العياري اللي هو ربع الكوب وبأقلل منه تقريبا معلقة كبيرة علشان يعطيني الحجم اللي في الصورة
ننتظر قليلا وهنلاقي فقاعات تكونت على سطح العجين نتركها حتى تستوي من أسفل ولا نقلبها … ثم ترفع من المقلاة أو الطاسة وتوضع جانبا لتبرد
تحشى بأي حشوة تحبوها وتقلى في زيت غزير ثم تغطس في الشربات وبالهنا والعافية عليكم
هنــا فيديو قصير أتمنى يعجبكم
