الأطباق الرئيسية
مطبخ مغتربة :: فراخ بصوص العسل من المطبخ الآسيوي
من المطبخ الآسيوي أقدم لكم اليوم فراخ بصوص العسل … جميلة جدا فعلا وطرية وما توقعتش إنها هتعجبنا بس الحمد لله مشيت مع ذوقنا وما كانتش مسكرة قوي للدرجة المزعجة لكن كانت فعلا طرية جدا جدا وبتدوووب كده
الفراخ دي سهلة للأيام العصيبة واللي محتاجين فيها الأكل يكون جاهز بسرعة ومع شوية مكرونة أو أرز وسلطة بتكون جميلة فعلا .. ممكن نشويها على الشواية أو نعملها في الفرن مش بتأخد وقت … الفراخ دي بيدخل في تتبيلتها الأصلية نوع من الخمور الآسيوية إسمه الساكي أو الساكيه لكن طبعا ده ممنوع عندنا … وحاولت أدور على بديل ممكن تحطوا خل لكن هيعطيها طعم مختلف شويتين … الفكرة ورا الساكي إنه بيعطيها طراوة وأيضا نكهة … جربت حاجة بقى مش هتصدقوها … إستبدلت الساكي بالشاي!!! واضح إن الشاي ليه فوايد تانية كتيرة غير اننا نشربه .. الشاي بيعطي طراوة لللحوم وأيضا طعم متميز .. جربوه في تتبيل اللحوم المشوية هيعجبكم كتير
:: المقـــــاديـــــر
١.٥ باوند فراخ بالعضم – يفضل الورك
ملح وفلفل حسب الرغبة
ربع كوب شاي – طبعا بدون سكر ولا نعناع يا ريت
ربع كوب صويا صوص
ربع كوب عسل أبيض – عسل نحل يعني
الطريقـــــة
نخلط مقادير التتبيلة مع بعضها جيدا ونتبل بيها الفراخ … نعمل شقوق بسيطة على سطح الفرخ علشان تتشرب التتبيلة كويس … يستحسن نتركها على الأقل ساعة في التتبيل .. ويا ريت لو أكتر
توضع في فرن ٤٠٠ فهرنهايت حوالي ٣٠ دقيقة حتى تمام النضج
وبالهنــــا والشفـــــا
مطبخ مغتربة :: وصفة جديدة الفراخ الفيتنامية
الحقيقة أنا زي ما بأحب أتشارك معاكم نجاحاتي فى كل شيئ … برضه أحب أتشارك معاكم الإخفاقات والكوارث يمكن أنقذ حد من الوقوع في مطب كده واللا كده … الواقع إني كنت شوفت الوصفة دي من فترة وحدثتني نفسي كثيييرا إني أجربها وبالفعل جربتها
الفراخ دي الوصفة بتاعتها لقيتها هنـــــا … وهي وصفة معمولة بصوص السمك .. وبالبحث لقيت إن صوص السمك ده لذيذ جدا ويعتبر من أساسيات المطبخ افيتنامي والتايلاندي .. حاولت ألاقي له وصفة يتعمل بيها لكن ما لقيتش لازم نشتريه من الستور وفعلا إشتريته من كينج سوبرز
هنا شكل صوص التتبيل وهو عبارة عن صويا صوص وصوص السمك وزيت وثوم مفروم وملح وفلفل وسكر أبيض
وهنا بعد ما تبلت الفراخ بالصوص السابق في الحلة
المشكلة في صوص السمك … الصوص ده هو صوص سمك الأنشوجة .. يمكن فيكم اللي بيحب الأكل الفيتنامي أو جرب الصوص ده تعجبه الأكلة لكن الحقيقة إحنا ما عجبتناش نهائي .. يعني فعلا الفراخ طرية جدا زي ما صاحبة الوصفة بتقول لكن تآكلوها من غير ما تشموا ريحتها حسيت إنها فراخ فيها ريحة زفارة جامدة .. كأنكم بتآكلوا فراخ بالسمك
في الوضع الراهن ما عجبتناش لكن مين عارف يمكن تعجبنا بعدين … أنا فيه حاجات كتيرة قوي ما كانتش بتعجبني ودلوقتي بتعجبني … الله أعلم
بس حبيت أشارككم التجربة وعلشان اللي ما يعرفش فيكم صوص السمك زيي كده يبقى أخد فكرة هو هيكون عامل إزاي ويتوقع ريحته شكلها إيه وبرضه بالهنا والشفا
مطبخ مغتربة :: فتة شاورما الفراخ
فتة شاورما الفراخ طبق لذيذ جدا جدا ويحبه الصغار والكبار … وعجب الكثير فعلا .. سهل وسريع إتعلمته من صديقتي بيرو ولكن أنا غيرت فيه شوية بس رائع رائع فعلا ومش ممكن يطلع وحش مفيهوش إفتكاسات
:: هنحتاج
١ باوند فراخ صدور مخلية مقطعة شرائح رفيعة – أو حسب عدد الأفراد
١ كوب خل أبيض- أو ما يكفي لتغطية الفراخ
١ بصلة متوسطة مقطعة شرائح
ملح وفلفل حسب الرغبة
فلفل ألوان مقطع مكعبات
٢-٣ كوب أرز بسمتي مطهي – المفروض يكون لونه أصفر لكن أنا عملت أرز عادي أبيض علشان أولادي
٣ رغيف خبز لبناني أو بيتا
٣ فص ثوم مفروم
٢ معلقة كبيرة زبدة أو زيت زيتون
للتومية:: هنستخدم ١ كوب زبادي سادة + ١ معلقة كبيرة مايونيز + ملح وفلفل + فص ثوم مفروم
أنا ما إستخدمتش مايونيز يعني عملتها بالزبادي فقط
الطــريقــــــة
نضيف حلقات البصل لشرائح الفراخ ونتبلها بالملح والفلفل ونغطيها بالخل في طبق عميق وتوضع فى التلاجة من الليل
نآخد قطع الفراخ ونشوحها بدون زيت أو سمن حتى تنزل كل المية وتنشف ثم نضيف قطع الفلفل عليها – بيرو أضافت طماطم أيضا لكن أنا حبيت أعملها بدون طماطم
نقلب تقليبتين ونطفي النار ونبدأ بتجهيز الخبز
يقطع الخبز مربعات ويخلط مع الزبدة والثوم ويوضع بالفرن أو في طاسة على النار حتى يقرمش
نجهز التومية بخلط مكوناتها معا ثم نبدأ بتجهيز الطبق للتقديم
يغرف الخبز – ونشيل شوية لتجميل الوجه – ثم نضع عليه الأرز ثم قطع الفراخ والفلفل
نضع باقي الخبز على الوجه ويزين بخليط الزبادي أو التومية
وزووووم على رأي بيرو
أتمنى يكون الطبق عجبكم وبالهنا العافية
مطبخ مغتربة :: الأوزي الشامي بالدجاج
الأوزي الشامي هو أكلة شامية جميلة جدا جدا تقدم فى الولائم والحفلات والأعراس والمناسبات مثل رمضان وغيره … بتتعمل باللحم لكن وصفتنا اليوم هتكون بالفراخ
الأوزي هو ببساطة أرز مع خضروات ولحم بداخل عجينة رقيقة وجميلة .. الوصفة أخذتها من صديقة لي وبأعملها بعجينة الباف باستري … أتمنى تجربوها سهلة جدا جدا وجميلة حتى إبني الصغير اللي بقى متعب فى أكله أكل منها وعجبته
:: المقاديــر
٣ كوب أرز بسمتي مطبوخ ومتماسك يعني مش معجن- يستحسن تقليل كمية المية المقترحة قليلا
٣ معالق كبيرة زيت
١ باوند صدور فراخ فيلية
فلفل ألوان أصفر-أحمر-وأخضر
بصلة متوسطة مبشورة
جزر مقطع صغير وممكن كمان نستخدم بسلة
باكيت باف باستري
ملح وفلفل وبهارات
مكسرات محمرة -إختياري
:: الطــريقـــة
في طاسة على النار نضع الزيت ونقلب فيه قطع الدجاج حتى ينشف ماؤه
نضيف البصل مع التقليب ثم الجزر ونوطي النار حتى تستوي قطع الدجاج
نضع الفلفل الملون والبهارات والملح والفلفل ونتركها ٥ دقائق
نضيف الأرز الناضج لخليط الفراخ ونقلب جيدا وممكن نضيف المكسرات فى هذه الخطوة
نفرد مربعات الباف باستري قليلا ثم نجيب طبق غويط ونضع فيه العجينة حتى تغطي الطبق من كل جانب كما بالصورة
نغرف خليط الأرز داخل الباف ونقفل الأطراف جيدا ثم نقلبها ونضعها فى طبق بايركس للفرن
يمسح الوجه بمخفوق البيض( بيضة مضروبة مع معلقتين ماء أو لبن) وفلفل أسود
تدخل فرن ٣٥٠ فهرنهايت حتى تتحمر وتنضج عجينة الباف
تقدم ساااااخنة مع السلطات … وأشهرها سلطة الزبادي
ملحوظة :: يمكن إستبدال عجينة الباف بعجينة السبرينج رولز
وبالهنــــا والشفـــــا
مطبخ مغتربة :: مانجوليان بيف
مونجوليان بيف هو طبق صيني يقدم فى المحلات هنا عبارة عن شرائح من اللحم المشوح – ستير فراي- مع صوص هويزن وصويا صص وخلافه
دي وصفة له جربتها فوق الرااااائعة فعلا جميلة وأنصحكم بها
::المقـــاديــــر
Beef Stew ١ باوند لحم مقطع *
حوالي ٣ معالق كبيرة زيت زيتون *
بصلة متوسطة مقطعة شرائح سميكة *
١ معلقة صغيرة ثوم مفروم*
٢/١ كوب صويا صوص *
٢/١ كوب ماء *
٢/١ كوب سكر بني *
٢/١ معلقة صغيرة جنزبيل فريش مبشور – إستخدمت بودرة *
أنا عملته بنفسي Hoisin sauce ٢/١ كوب هويزن صوص *
::الطـريقـــة
سهلة جدا جدا جدا … مفيش حطوا كل حاجة على بعضها وخلاص!!! فيه أسهل من كده؟ ما أعتقدش
تقدروا لعد ما تحطوهم على بهض تحفظوها فى كيس بالفريزر .. ولما تكونوا هتعملوها طلعوها قبلها بيوم من الفريزر علشان تفك
أنا طبختها فى السلو كوكر بتاعتي لكن طبعا حطوها فى أى حلة على نار هادية لغاية لما تستوي وخلاص
تقدم مع أرز أبيض وممكن خضار مشكل أو بروكلي وهكذا كل واحد ومزاجه
جميلة جدا جدا .. لو عايزين تجربوا أكلة جديدة وبتحبوا الطعام الصيني أنصحكم تجربوها
نييجي بقى لطريقة عمل الهويزن صوص لو مش هتشتروه جاهز
:: المقـاديــــر
٤ معالق كبيرة صويا صوص *
٢ معلقة كبيرة زبدة الفول السوداني *
معلقة كبيرة عسل أسود أو عسل نحل أبيض *
٢ معلقة صغيرة خل أرز – إستخدمت خل أبيض عادي *
١ معلقة صغيرة هوت صوص- أو حسب الرغبة *
فص ثوم مفروم *
فلفل أسود *
إخلطوا المكونات كلها مع بعضها جيدا
ملحوظة :: يفضل إستخدام العسل الأسود
مطبخ مغتربة :: صينية الكوسة بالشبت – وصفة حماتى
طبق اليوم هو طبق لذيذ جدا جدا .. ووصفة راااائعة لأى حد بيعمل رجيم وهيموووت ويآكل محشى .ز لأنه نفس الطعم لكن من غير الرز وده طبعا بيقلل كتير فى السعرات الحرارية أو أى حد بيحاول يقلل النشويات .. فعلا جميلة أنصحكم بيها
.. تعالوا نشوف نعمل إيه
:محتاجين
١-٢ باوند كوسة مقشرة ومقطعة
حوالى ربع كوب شبت أخضر مقطع
١ بصلة مقطعة أو مفرومة
٢/١ باوند لحم مفروم معصج
طماطم مقطعة + حوالى معلقتين كبار معجون طماطم أو علبة صوص طماطم
زيت زيتون
فص ثوم مفروم
ملح وفلفل حسب الرغبة
: الطريقـــة
فى زيت الزيتون نقلب البصل مع التوم قليلا
نضيف الكوسة والملح والفلفل مع التقليب لمدة ٥-١٠ دقائق
نضيف اللحم المعصج والطماطم ونتركها على النار حتى تغلي
نصب الخليط فى صيني الفرن ونغطيها بالفويل وتوضع فى فرن على درجة ٣٥٠ فهرنهايت لمدة ٣٠ دقيقة حتى قرب السوا