أطباق اللحم

كفتة حسن باشا كفتة من المطبخ التركي لذيذة جدا جدا شيك شكلا وموضوعا وسهلة

الكفتة دي ما هي إلا كفتة عادية بس على راسها بطاطس مهروسة كممكن نعملها كورة أو نشكلها بكيس الحلواني

إستخدموا الوصفة المفضلة عندكم للكفتة مش صضروري تلتزموا بالوصفة  هنا

الكفتة دي تنفع جدا للعزومات شكلها شيك وبنفس الوقت مش مكلفة ومش مرهقة أو متعبة يعني مجهودها تقريبا مجهود الكفتة العادية + البطاكطس المهروسة وممكن تتعمل بأكياس البطاطس المهروسة الجاهزة للتقليل من الوقت والمجهود

هنـــا فيديو قصير عن طريقة عملها وتشكليها .. أتمنى تعجبكم

 

 

لكل اللي بيحبوا  طبق المسقعة المصري واللي بيخافوا من كمية الزيت اللي فيها بسبب قلي الباذنجان بأقدم لكم طريقة صحية وظريفة لعمل وتقديم المسقعة على موائدكم وأتمنى تعجبكم

الطريقة دي كان نفسي أدوقها لوالدي رحمه الله لأنه كان بيحب المسقعة جدا ومش بيعدي أسبوع إلا لما يكون واكلها … رحمك الله يا حبيبي … لكن مشكلتها إنها مليانه زيت ولا يتحملها قلبه المريض ولا شرايينه المتعبة

تعتمد الطريقة على عدم قلي الباذنجان وهي بالكاد فيها زيت من عمل اللحمة المفرومة فقط .. وإعتمدت على صوص الطماطم وبدون صوص البشاميل أو بطاطس مع الباذنجان لتقليل النشويات بالوجبة

هنفرغ بالباذنجان بس ملحوظة ما تخلوهوش رفيع قوي علشان يبقى فيه لحم يعني يا ريت كمان تعملوه سميك شوية عن اللي هتشوفوه في الفيديو .. وبنحشيها اللحم المعصج ومع صوص الطماطم وتتحط في الفرن

ولما تكون تقريبا إستوت نطلعها ونرش عليها جبنة موتزاريللا قليلة الدسم ونرجعها الفرن لغاية لما تحمر وشها.. وبالهنا والشفا

جربوها وإن شاء الله تعجبكم

 

من هنــــا فيديو قصير يبين طريقة عمل المسقعة الصحية … ولا تنسونا من الدعاء

 

رول اللحم طبق جميل وفخم وشهي وأهم حاجة سهل جدا… عملته في السلو كوكر لكن طبعا ممكن يتعمل في أي حلة عادي على النار .. يؤكل مع أرز أبيض أو مكرونة وسلطة

المكونات

١ باوند قطعة لحم ستيك – أي نوع ممكن حتى لندن برويل اللي عمرها ما بتستوي بتنفع

٢ فص ثوم

١ معلقة صغيرة توابل إيطالية

ربطة بقدونس أخضر

بصلة صغيرة مقطعة شرائح

٢ معلقة كبيرة زيت زيتون

كوب جبنة موتزاريللا مبشورة

ملح وفلفل

علبة عصير طماطم أو طماطم مبشورة أو علبة صوص المكرونة اللي موجود عندنا بيمشي

نفرد قطعة اللحم وندقها حتى تصبح تقريبا نصف السمك الأصلي لها

نقطع الثوم شرائح رفيعة جدا ونغرزه شوية في قطعة اللحم بالتساوي ثم نرش ملح وفلفل على اللحم

نضع شرائح البصل ثم البقدونس ثم نضع في النهاية الجبنة المبشورة

نلف قطعة اللحم ونعملها رول ونقفلها إما بخيط الدوبارة أو بخلة الأسنان بإحكام على قد ما نقدر

في حلة على النار نسخن زيت الزيتون ثم نحمر قطعة اللحم من جميع الجهات

نضع عليها علبة عصير الطماطم ونتركها تستوي على نار هادئة أو بالسلو كوكر

وتقدم بالهنا والشفا مع الأرز أو المكرونة

مونجوليان بيف هو طبق صيني يقدم فى المحلات هنا عبارة عن شرائح من اللحم المشوح – ستير فراي- مع صوص هويزن وصويا صص وخلافه

دي وصفة له جربتها فوق الرااااائعة فعلا جميلة وأنصحكم بها

::المقـــاديــــر

 Beef Stew ١ باوند لحم مقطع *

حوالي ٣ معالق كبيرة زيت زيتون *

بصلة متوسطة مقطعة شرائح سميكة *

١ معلقة صغيرة ثوم مفروم*

٢/١ كوب صويا صوص *

٢/١ كوب ماء *

٢/١ كوب سكر بني *

٢/١ معلقة صغيرة جنزبيل فريش مبشور  – إستخدمت بودرة *

  أنا عملته بنفسي Hoisin sauce ٢/١ كوب هويزن صوص *

::الطـريقـــة

سهلة جدا جدا جدا … مفيش حطوا كل حاجة على بعضها وخلاص!!! فيه أسهل من كده؟ ما أعتقدش

تقدروا لعد ما تحطوهم على بهض تحفظوها فى كيس بالفريزر .. ولما تكونوا هتعملوها طلعوها قبلها بيوم من الفريزر علشان تفك

أنا طبختها فى السلو كوكر بتاعتي لكن طبعا حطوها فى أى حلة على نار هادية لغاية لما تستوي وخلاص

تقدم مع أرز أبيض وممكن خضار مشكل أو بروكلي وهكذا كل واحد ومزاجه

جميلة جدا جدا .. لو عايزين تجربوا أكلة جديدة وبتحبوا الطعام الصيني أنصحكم تجربوها

 

نييجي بقى لطريقة عمل الهويزن صوص لو مش هتشتروه جاهز

:: المقـاديــــر

٤ معالق كبيرة صويا صوص *

٢ معلقة كبيرة زبدة الفول السوداني *

معلقة كبيرة عسل أسود أو عسل نحل أبيض *

٢ معلقة صغيرة خل أرز – إستخدمت خل أبيض عادي *

١ معلقة صغيرة هوت صوص- أو حسب الرغبة *

فص ثوم مفروم *

فلفل أسود *

إخلطوا المكونات كلها مع بعضها جيدا

ملحوظة :: يفضل إستخدام العسل الأسود

 

الحواوشي المصري من أجمل وأسهل الاطباق فى المطبخ المصري .. سهل وسريع ويتقبله كل أفراد الأسرة صغار وكبار …اليوم هنعمل الطبق ده مع بعض

المقاديــر

١باوند لحم مفروم – ٩٠٪ أو أقل

٤ رغيف عيش بيتا أسمر

بصلة مفرومة متوسطة

فلفل ألوان- أصفر وأخضر واحمر أو اللى موجود

طماطم مقطعة مكعبات – إختياري أنا مش بأحب أضيفها

شطة- إختياري وبالكمية المحببة ليكم

ملح وفلفل وبهارات حسب الرغبة

زيت زيتون لدهن أرغفة العيش

 

الطريقـــة

يسخن الفرن على ٤٠٠ فهرنهايت ونبدأ فى عمل الحواوشي بخلط جميع المكونات للحم ما عدا الزيت والعيش *

نفتح أرغفة العيش أو نقسمها نصفين ونفتح كل نصف وندهنه من الداخل بقليل من الزيت أو السمن لو حبيتوا*

تحشى الأرغفة بخليط اللحم جيدا ثم تلف فى ورق الألمونيوم وتوضع بالفرن حتى تمام السوا*

بعد حوالى ٣٠ دقيقة بيكون اللحم نضج ولو فتحنا الفويل هنلاقى الأرغفة فى الغالب طرية ومش ناشفة*

ممكن طبعا تقدم كده لو بتحبوها كده لكن إحنا بنفضلها ناشفة  وعلشان كده بآخدها فى الجريل الكهربا*

بأعمل لها جريل ٥ دقائق لغاية لما العيش ينشف .. فيه ناس بتفتح الفويل وتسيبها فى الفرن فترة تنشف

المهم شوفوا اللى يريحكوا  بتكون لذيذة وجميلة

تقدم مع السلطات وأكيد سلطة الحمص وبالهنا والشفا

كفتة الرز من الأكلات المصرية الشهيرة جدا والمحببة جدا لقلوب الصغار والكبار  ممكن نآكلها ناشفة يعني بدون صلصة أو بالصلصة

 

 

عادة يتم تشكيلها على هيئة أصابع .. بس أنا المرة دى شكلتها على هيئة كور صغيرة وفى أى الحالات طعمها حلو جدا

تعالوا نشوف نعملها إزاى

 

نصف كيلو أو ١ باوند تقريبا لحمة مفرومة

١ كوب أرز مصرى حبة قصيرة اللى هو الكال روز

١ بصلة كبيرة

٥ فصوص ثوم

١ كوب بقدونس أخضر مقطع

١ كوب شبت أخضر مقطع

ملح وفلفل أسود

 

الحقيقة ناس كتير بتفضل إننا ننقع الرز فى مية سخنة حوالى نصف ساعة قبل ما نطحنه لكن أنا لقيت إنه من الأسهل طحن الأرز أولا على الناشف فى المطحنة بتاعة القهوة والتوابل جيدا لغاية لما يبقى بودرة

 

ثم فى الكبة أو الفودبروسيسور نضيف اللحمة مع الأرز وباقى المكونات ونخلطهم مع بعض جيدا .. نفرمهم مرتين وعلى دفعات علشان كل المكونات تمتزج مع بعضها جيدا ويبقى شكلهم كده

 

 

 

نشكل الكفتة أصابع أو كور زى ما قلت لكم سابقا وتقلى فى زيت غزير ساخن

نعمل لها صلصة بسيطة بالبصل والطماطم وتوضع بها أصابع الكفنة وتآخد غلوة على النار

 

تقدم مع الأرز بالشعيرية

 

 

وده شكلها من جوة طرية وجميلة

 

وبالهنا والشفا

الكبدة الإسكندرانى واحدة من أهم الأكلات الشرقية والمصرية وخصوصا فى عيد الأضحى المبارك

 

دائما كنا نعملها على الإفطار فى اليوم ده وطبعا زى ما إنتو عارفين الفطار أساس بيكون متأخر جدا

 

أول يوم الـعيـد لأن كل النـاس بتدبـح الأضــاحى وبيكون يوم كله تعب ومشقـة ولـذة وثواب بإذن الله

 

النهاردة هـأقدم لكم وصـفة لـذيذة من وصفات حماتى الله يطول لى فى عمــرها بالصحـة يا رب وهـى الكبدة الإسكندرانى بالصوص

 

 

المقــاديـــــر

٢ باوند كبدة بقرى أو خروف اللى بتحبوه- أنا عملت بقرى

بصلة كبيرة مفرومة – أو ٢ متوسطين

١ معلقة كبيرة كمون

فصين ثوم مفرومين

١ فلفل أخضر رومى مقطع مكعبات أو ممكن فلفل حار إستخدمت فلفل الأناهايم الحااار

زيت إستخدمت حوالى ١/٤ كوب 

كما يمكن إضافة الشطة الحارة حسب الرغبة

 

الطريقــة

أولا تغسل الكبدة تحت الماء البارد وتقطع شرائح رفيعة – ملحوظة هناك من يفضل تقطيع الكبدة وهى مجمدة بس أنا مش بأحب أجمدها بالفريزر بأشتريها وأعملها على طول سمعت إن فائدتها بتروح والله أعلم

 

 

فى طاســة تشوح البصلة فى الزيت تمام على نار عالية حتى تصفر ثم نضيف الفلفل الأخضــر تقليبتين ثم نضيف الكبدة

 

نقلب الكبدة لمدة دقيقتين ثم نوطى النار ونضيف الكمون والثوم والملح والفلفل والشطة الحارة

 

نضيف لها من ١/٤ لـ ١/٢ كوب ماء وتترك لتغلى ونغطيها حتى تمام النضج

 

 

تقدم سااااااخنة أو ساندوتشات يا سلاااام

 

 

 

أنا قدمتها مع السلطة الخضرا والعيش البيتــا

 

 

 

 

وبالهنــا والشفــــا