إصنــع(ـى) بنفسـك

لو عائلتكم كبيرة وفيها أطفال كتير ما شاء الله يبقى البوست ده أكيد هيوفر عليكم كتير

أنا عندى ولله الحمد ٣ أولاد وكل يوم على الأقل أغسل دورة ملابس واحدة وساعات أكتر

ملابس مدرسة وبيت ونوم وملايات و و و ده غير فوط المطبخ وخلافه حقيقي موضوع متعب

وميزانية مسحوق الغسيل على الأقل ١٠ دولار فى الشهر ده غير منعم الملابس وغيره من المستلزمات

النهاردة بمجهود يعتبر متوسط هنشوف إزاى ممكن نعمل مسحوق غسيل سهل وغير مكلف

 

أتوقع يكفيني من ٩ لـ ١٢ شهر لأن إستهلاكنا عالى حتى لأسرة من ٥ أفراد

الحقيقة فى الأول أنا كنت كتير خايفة أجربه وخايفة على الهدوم بس غير التكلفة مؤخرا بدأت ألاحظ

بقع غريبة على الملابس كأنها بقع زيت وغيرت صابون الغسيل كذا مرة ومفيش فايدة من آن لآخر

بألاحظ موضوع البقع ده مش عارفة من إيه .. إستخدمت تايد – آرمز آند هامر بتاع كوسكو وغيره

برضه بألاقى البقع بتظهر .. بعد إستخدامى للمسحوق المنزلى ما لاحظتش البقع دى .. أنا غسلت بيه

بقالى أسبوعين يعنى مش أقل من ٢٠ غسله وغسلت ألوان وأبيض وألوان غامقة والحمد لله النتيجة

مرضية بالنسبة لى جدا جدا … جربوه بكمية صغيرة فى الأول وشوفوا النتيجة وإحكموا إذا كان ينفعكم

وعاجبكم واللا لأ…… بلاش تعملوا الكمية الكبيرة مرة واحدة .. ودلوقتى نيجي للمطلوب

 

هنحـتــاج

١ بوكس من بوراكس تلاقوه بولمارت وتارجت ٧٦ أونص = ٥.٨٥ دولار

علبة صغيرة بكينج صودا – ١٦ أونص = ٥٥ سنت

٣ صابونات أى نوع – هنا إستخدمت ٢ أولاى وواحدة آيفورى = فى المتوسط

وبدون كوبونات ١$/ صابونة = ٣ دولار

١ بوكس صودا الغسيل دى صورتهـا ماركة آرمز آند هامر هتلاقوها بولمارت = ٥ دولار تقريبا

٢ علبة من أوكسى كلين من علب الدولار ستور العلبة ١ باوند و ٣ أونص إشتريت الكلر سيف = ٢ دولار

من ١ – ٢ علبة من بيوركس معطر الملابس الحبيبات  العلبة ٢٨ أونص = ٧ دولار

 

يبقى كده الإجمــالى أقل من ٢٥ دولار لو إستخدمتوا علبة واحدة من معطر الملابس

 

لو فيه حد عندكم عنده حساسية من صابون الغسيل إستخدموا صابون إسمه فيلز نـابثــا ناس كتير من اللى عندهم حساسية بيقولوا عليه كويس وما سببش ليهم أى مضايقات كمان  ممكن تستغنوا عن معطر الملابس لو بيضايقكم

 

أولا نقطع الصابون قطع كل أما الصابون يكون مش كريمي يعني نسبة الكريم فيه مش عالية بيكون أسهل فى التقطيع … الحقيقة صابونة الآيفورى اللى كانت عندى كان بقالها فترة على الحوض الصغير ومحدش بيستخدمها لأن الكل بيستسهل الصابون السائل فكانت ناشفة  وجافة وتقطيعها كان سهل جدا جدا

وبعدين بإستخدام الفود بروسيسور بتاعك هنبشر قطع الصابون ولتسهيل العملية هنحط معاهم البيكينج صودا أثناء البشر

 

ممكن طبعا تبشروا الصابون بإستخدام المبشرة اليدوية العادية لو خايفين على الفود بروسيسور

 

 

مرتين تلاتة زززززز  زززززز لغاية لما يتفرم كويس

 

خللى بالكم لو بتستخدموا الفود بروسيسور ممكن يعمل غبار صابون شوية ليه ريحة صابون جامدة

 

علشان لو عندكم حساسية يبقى خللى بالكم وإنتم بتفتحوا الفود بروسيسور

 

أنا جيبت ٢ كيس من أكياس تارجت وبدأت أضع المكونات حبة بحبة وأخلطهم على بعض تدريجيا كده

 

لغاية أما خلصتهم كلهم وهنا الباتش كله زى ما إنتم شايفين

 

 

كان عندى علبة كرتون قديمة من أوكسى بتاع كوسكو عبيتهم فيه

 

 

للإستخدام : ضعوا فقط ٢ معلقة كبيرة لكل دورة غسيل …. وبس خلاص

 

بقى عندنا صابون يكفينا سنة تقريبا وبـ ٢٥ دولار فقط … إيه رأيكم؟

Detangler النهاردة هنعرف إزاى نعمل مزيل تشابك الشعر أو الـ

مزيل التشابك هو ببساطة جدا بلسم الشعر مخفف ومحطوط فى زجاجة سبراى بس كده

طبعــا دى سهلة جدا وإقتصادية جدا جدا لأن مزيل التشابك غالى

 

وبقطرات بسيطة من الكوندشنير المفضل لديك تقدروا تعملوا

زجاجة كبيرة وممكن كمان ببلاش لو إستخدمتوا السامبلز

 

زى ما قلت لكم ممكن تستخدموا السامبلز اللى بتيجي لنا عن طريق البريد

 

المطلــوب

 

١-٢ معلقة كبيرة من الكوندشنير – بيعتمد على كثافة الشعر – أنا إستخدمت معلقة واحدة

 

زجاجة سبراى – إشتريت واحدة بدولار من تارجــت من عند المكان بتاع الترافيل كيت ١٢ أونص

 

حنفية بتنزل ميه وبس

 

نحط البلسم فى الزجاجة ونملأها بالماء عادى خالص من الحنفية – يفضل ساخن لسهولة الإمتزاج – ونرج الزجاجة جيدا

 

حتى تمتزج المكونــات وبس خلاص مفيش أسهل من كده

 

الحقيقة ما عنديش بنات لكن بأستخدمها كتير لما ولادى شعرهم يطول وعايز يتحلق ومكسلين نحلق

 

بيقوموا الصبح من النوم شعرهم هايش ومنكوش زى الأستــاذ هنــــــا

رجيت الزجاجــة قبل الإستعمــال ورشيت منها على شعره ومشطت له شعــره وبس

سيبته لغاية لما نشف وبقى شكله جميل وخرجنــا سوا وهنا شكله بعد

 

لمــا الواحد بيفكر قد إيه هو صرف فلوس على المنتج ده زمان وقد إيه عمله فى البيت

 

لا بيآخد وقت ولا فلوس ولا حتى مجهود !!!! فعلا سهل جدا جدا

 

أتمنى تجربوه وتقولوا لى رأيكم بالذات اللى عندهم بنانيت قطاقيط

أحب إستخدام منعم الملابس مثل داونى وغيره فى الغسيل بالذات مع الفوط لكن

عندى مشكلة كبيرة وهى إنى بأحب الرائحة تكون عالية وتظهر فى الأقمشة والملابس لكن

مهما عملت برضه مفيش فايدة الرائحة بتكون موجودة قبل جفاف الملابس لكن بمجرد ما تجف

بتنتهى الرائحة لكن تبقى طبعا النعومة فى الملابس لكن الداونى الكبير يصل سعره ل ١٠ دولار

١٠ دولار بس علشان التنعيم!!!! ففكرت بعقليتي المدبرة إنى أدور على طريقة أعمل بيها منعم الملابس بنفسى

فى البيت وإهتديت لهذة الطريقة بعد البحث على الإنترنت وهأقول لكم على المميزات والعيوب حاااااالا

أولا : المكونــــات

٦ أكواب من الماء المغلى

٢ كوب بلسم الشعر ( كونديشنر) ماركة سويف أى رائحة تفضلوها

١/٢ ١ كوب من الخل الأبيض العادى

البلسم اللى إستخدمته كان باللافندر

فى وعاء نخلط الخل بالماء المغلى ثم نضيف البلسم هنلاقيه فى الأول مكلكع شوية

نستمر فى التقليب حتى نحصل على خليط متجانس كما بالصورة

بس خلاص نحطه بقى فى أى وعاء مناسب أنا حطيته مكان داونى القديم

ويستخدم مثل منعم الملابس عادى جدا

دلوقتى بقى بالنسبة للإيجابيات والسلبيات

حسيت إنه نفس تأثير داونى جربته على أكثر من دورة غسيل وفى الأول جربته على

دورة من الفوط بالنسبة للتنعيم فهو هايل فعلا بينعم الملابس لكن بالنسبة للرائحة للأسف

مالوش أى تأثير حتى إنى ضاعفت الكمية اللى بأحطها مع الغسيل وبرضه مفيش رائحة فيه

أعتقد حاليا هو بديل أرخص من الداونى بالنسبة لى لأنى كده كده ما كنتش بأحصل على

الرائحة اللى أنا عايزاها من الداونى فهأستمر عليه لحين إشعار آخر

يا ريت تجربوه وتقولوا لى عملتوا إيه؟؟؟

 

الطريقة وجدتها هنــــا فى اليوتيوب