جو جرين

أولا :: يعني إيه تعطير الخل؟

تعطير الخل يعني نعطي الخل رائحة تغطي على رائحته النفاذة وغير المقبولة

 

ثانيا:: ليه؟

علشان نقدر نستخدمه كمنظف طبيعي في البيت بدون ما يترك رائحة نفاذة

ولو إن رائحة الخل بتطير بعد شوية لكن بعض الناس مش بيتقبلوا رائحته وبيتضايقوا منها جدا جدا

 

ثالثا:: طيب ليه نستخدم الخل في التنظيف؟

لا دي بقى قصة تانية … العالم كله بيتجه للحاجات الطبيعية ونبعد عن الكيماويات في كل شيئ بدءا من الأكل والشرب وإنتهاء بالصابون والشامبو ومساحيق التجميل والكريمات وخلافه .. كل ما قللنا دخول الكيماويات بيتنا كل ما بعدت عننا الأمراض بالذا والعياذ بالله السرطانات

كمان فيه سبب تاني وهي التكلفة .. في أعلب الأحوال بتكون التكلفة زهيدة جدا جدا

 

رابعا :: طب هل فعلا بتنفع؟

البعد عن الكيماويات غنيمة صدقوني حتى لو النتيجة غير مرضية بنسبة ١٠٠٪ أو مقارنة بالكيماويات أكيد بتكون أقل لكن لو نفكر في الأمراض هنلاقي ألف سبب وسبب يخلينا نبعد أو نحاول قدر المستطاع تجنيب أنفسنا وأهل بيتنا هذه الأمراض الشرسة والله يبعد عننا وعنكم كل سوء

لتعطير الخل وضعت في برطمان زجاجي أعواد من القرفة + قرنفل مسمار وأيضا إستخدمت نكهة أو رائحة اللوز معلقة كبيرة ومليت البرطمان خل وكتبت عليه المكونات والتاريخ
وفي الحالة دي نقدر نستخدم أي روائح من اللي موجودة بالسوبر ماركت حتى لو فيها كحول لأننا مش هنآكلها … وأرخص حاجة هي الفانيليا السائلة هتلاقوا العلبة كبيرة وأقل من دولار

 

عملت كمان واحدة بقشر البرتقال والقرنفل ورائحة التوت … ممكن كمان تستخدموا رائحة البرتقال أو ماء الورد لو عندكم وعملت كمان بقشور الليمون والنعناع ووضعت معاها رائحة النعناع

 

لو الروائح دي غير متوفر ممكن تستعملوا زيت النعناع الطبيعي والزيوت الطبيعية زي دول كده من أمازون

للإستخدام:: في بخاخة أضيفوا تلت كوب من الخل المعطر + تلتين كوب من الماء ويرش للتنضيف في المطبخ والحمامات والزجاج وخلافه … ما عدا في تنضيف الجرانيت والرخام الطبيعي

 

أحب أوضح لكم نقطة أخيرة إن الرائحة مش هتروح ١٠٠٪ لكن بنسبة كبيرة جدا جدا وبتعتمد على قوة الرائحة اللي هنضيفها يعني جربوا معلقة وإتنين لغاية لما توصل للرائحة المطلوبة … أيضا لازم نترك المحلول على الأقل أسبوعين قبل الإستخدام وطبعا نصفيه الأول من اللي فيه … كمان إستخدام قشور البرتقال والليمون بيساعد في عملية التنشيف لأن فيهم زيوت طيارة بتساعد في التنضيف

 

أتمنى تكون فكرة النهاردة عجبتكم وقولوا لي لما تطبقوها

 

اليوم جاية ومعايا إختراع فعلا … حاجةمش هتصدقوها – إلا لو كنتم تعرفوها من قبل – أنا ما كنتش مصدقة في الأول لغاية لما جربتها … طريقة أو خلينا نقول سائل بديل عن الجلانس لكن أحلى من الجلانس لأنه طبيعي ١٠٠٪ وفري أيضا مية بالمية

 

زمان زمان كانوا عند جدتي بينضفوا الزجاج والمرايات بالكحول الأحمر مع ورق الجرائد طريقة طبيعية وأحسن في رأيي المتواضع مليون مرة من الجلانس … عارفين ليه؟ علشان الجلانس وغيره من  مواد التنضيف هي مواد ومركبات كيماوية .. والمركبات الكيماوية من أول أسباب إنتشار مرض السرطان على إختلاف  طريقة التعرض له سواء بالأكل – متمثلا في المبيدات والكيماويات اللي فى الأطعمة والمواد الحافظة وخلافه – أو عن طريق الشم واللمس كمان زي مواد التنضيف والبخاخات ومواد التجميل والشامبو والكريمات وخلافه وللأسف شركات الصابون ومواد التنضيف و و هدفها الأول والرئيسي هو الكسب بدون النظر لمصلحة العميل … لما خلونا نعتد عليهم بنسبة ١٠٠٪ وتناسينا إن جدودنا مكانش عندهم كل ده وكانت الدنيا ماشية يعني مش نهاية العالم … بس واجبنا ندور ونبحث ونشوف البدائل و كل أما نقلل من تعرضنا للمواد دي ونستبدلها بمواد طبيعية ١٠٠٪ أو حتى على الأقل تكون قليلة قي التركيبات الكيماوية كل ما يكون أحسن ويبعدنا عن أمراض السرطان ونقص المناعة والحساسية وغيرها .. أعاذنا الله وإياكم يا رب من كل سوء

 

نرجع تاني لموضوعنــا معلش كنت محتاجة أنفس معاكم إستحملوني

 

من زمان كان نفسي ألاقي وصفة بديلة للجلانس لكن ما يكونش فيها خل لأن الخل – من تجاربي السابقة – بيبقى صعب قوي التخلص من ريحته يعني هو بعد شوية ريحته بتطير ومش بيكون له أثر لكن في ساعتها وأثناء التنضيف بتكون الرائحة قوية جدا ومزعجة .. وإهتديت إلى منتج جامد وفعال وموجود بكل بيت … بالذات عندنا إحنا العرب

 

المنتج الفظيع الخطير اللي هننضف بيه المرايات والزجاج هو الـ….. ـــــشاي .. آه والله الشاي .. يعني لما يكون عندكم صداع واللا عايزين تشربوا كباية شاي إبقوا سيبوا شوية لتنضيف المرايات هههههه

 

لا حقيقي … طيب شوفوا دي بقى علشان التوفير يكمل … لما تشربوا شاي ما ترموش الباكيت جمعوا ٢ باكيت وسخنوا مية وكأنكم بتعملوا كباية شاي جديدة بس من بواقي باكيتات قديمة وبدون سكر طبعا وسيبوها لما تبرد وبعدين حطوا الشاي في بخاخة وخلاص… جربوها هتعجبكم إن شاء الله

طريقة أخري لكن مش ١٠٠٪ فري إنكم تخلطوا كباية كحول مع كوب ماء ومعلقة خل كبيرة وتستخدموه زي الجلانس بالظبط

ما تنسوش تشوفوا باقي منظفاتنا المنزلية هنــــا

 

 

فبريز معطر الأثاث .. إختراع ظريف لتعطير الأثاث والإحساس بالإنتعاش .. لكن كل أصدقاء البيئة بينصحوا بعدم إستخدامه لإحتوائه على مكونات كيميائية .. عادى يعني زي أى كل حاجة فى حياتنا … سواء بقى من باب الحفاظ على البيئة أو من باب التوفير تعالوا أوريكم إزاى ممكن تعملوا فبريز بالبيت

 

أولا فى العديد من الوصفات على الإنترنت وأشهرها هو إستخدام منعم الملابس مع الماء والبيكنج صودا .. لكن المشكلة الرئيسية اللى أنا بأشوفها فى الوصفة دى إن لو الأثاث عندكن لونه غامق بكل تأكيد البيكنج صودا هتسيب أثر أبيض على الأثاث وعلى هذا  إنتقلنا للوصفة دى سهلة جدا جدا وطبيعية ١٠٠٪ كمان

 

هنحتاج : زجاجة سبراي فارغة

٢/١ كوب خل أبيض

٢٠ نقطة من أى زيت عطرى طبيعي تفضلوه – إستخدمت الياسمين

 

نضع الخل والزيت بالزجاجة ثم نملأها بالماء ونرجها جيدا ونستخدمها زى فبريز بالظبط

بعض الناس لقيتهم بيستخدموا الوصفة دى كمان كمعطر للجو وأحيانا يزيدوا عليها الكحول بتاع الصيدلية

 

بس خلاص وإستمتعوا بفبريز على مزاجكم ومن مطبخكم كمان

 

ملحوظاتى الشخصية : الحقيقة نسبة الخل أعتقد إنها عالية لأنى لما كنت بأرش منه كانت بتظهر رائحة خل مؤقتة وبتختفى .. الخل طبعا ظريف للتطهير .. قللت نسبة الخل للنصف وزودت الزيت العطرى وكان أحسن .. وبعدين جربت المزيج مرة أخرى بدون حل نهائى وكانت النتيجة برضه حلوة .. يعني بأفكر أستمر عليه من غير الخل نهائى مش مهم تطهير دلوقتى يعني نبقى نطهر بشئ آخر

يا ريت لو جربتوه تقولوا مين عجبكم أكتر

الحقيقة أنا مش عارفة أترجم الكلمة صحيح .. لكن هو ده أحسن تعبير قدرت أوصل له وهو مضاد لكرمشة الملابس

 

 

يعني لما تكون عندكم ملابس مكرمشة ده يفردها من غير مكواة والدليل….. اهه

 

 

وشوفوا من الضهر كمان

 

 

بصراحة أنا مكنتش مصدقة إنه هيشتغل فعلا لغاية لما شوفت بعيني ومحدش قال لى

تعالوا نشوف هنعمل إيه

 

 

كل اللى هنحتاجة

منعم ملابس – إستخدمت سامبل كانت جاية لى من داونى

ميه عادية من الحنفية

زجاجة بخاخ

 

 

ببساطة نخلط المنعم بالمياة جيدا .. النسبة المثالية هى ١٠:١ لكن مش بالضرورة بالظبط

 

ثم نصبها فى البخاخ

 

بس خلاص نعلق الملابس المكرمشة على شماعة ونرشها بالمحلول ونشدها على تحت كأننا بنعدلها يعني

 

 

 

ونتركها معلقة كده لغاية أما تنشف وهتلاقوها كأنها مكوية تماااام

 

 

الحقيقة ممكن تنفعنا نحن معشر النشاء بالذات فى الإيشاربات لما نيجي نخرج أكتر حاجة بأكرهها هى كوى الملابس وخصوصا إن هنا خدمة المكوجى دى غالية

 

أنا جربتها على تي شيرت من بتاع الأولاد كان مكرمش جدا نتيجة إنها خرجت من المجفف على السبت وقعدت هناك كتير على ما طبقتها والنتيجة طبعا إنها إتكرمشت جدا لكن بالحيلة دى ما أخدتش منى ثوانى وإتفردت

 

إيه رأيكم فى الفكرة دى .. يا ريت تكون عجبتكم .. جربوها وقولوا لنا

العنكبوت … من أغتت الحشرات هنا وأكثرها إنتشارا بأمريكا … عمرى ما شفت أنواع وأحجام وكميات العناكب اللى بأشوفها هنا .. يمكن علشان كده لما حبوا يعملوا فيلم عملوا سبايدر مان … الفيلم ده لو كان فى مصر كان بقا نملة مان لإنتشار النمل فى مصر

 

مع إن العنكبوت مش حشرة مقززة مثلا زى الصرصور بالنسبة لى لكن محدش يقدر يتعايش معاه وأكيد لما بنشوفه بنبقى عايزين نموته ونخلص منه .. ومع دخول الصيف إنتشرت الحشرات ومنها العنكبوت وكان لازم يبقى فيه حل تانى غير المبيدات اللى عمالين نرشها فى البيت دى .. المبيدات دى بتحسسنى إنى بأرش سم فى البيت وخصوصا إن زوجى مؤخرا إشترى مبيد للعناكب قوى جدا ومكتوب عليه للعناكب والعقترب!!!! اللهم إحفظنا فتوقعت إنه فعلا سم فى البيت ومع وجود الأطفال حاجة مش ظريفة خالص إننا نرش البيت بالمنظر ده .. وبالتالى كان لازم يبقى فيه حل طبيعي وجرين

 

وبالبحث والتجربة وجدت هذا الحل البسيط جدا وجربته والحمد لله نفع معايا بنسبة كبيرة قوى

 

تعالوا نشوف هنحتاج إيه

 

١ كوب عصير ليمون – مش ليمونادة يعني مفيهاش سكر

بخاخ وميه وبس

نقطتين بالعدد أى صابون منظف للأطباق أو اللى بتستخدمه فى الحمامات أو أى منظف

 

 

الفكرة إن العناكب حاسة التذوق عندها فى أقدامها والعنكبوت يكره الحمضيات جدا وبالتالى لما بيلاقى آثار حمضيات زى الليمون بيهرب منها وده اللى إحنا عاوزينه

 

نضع الليمون فى البخاخ ونقطتين المنظف ونكمل البخاخ ماء عادى من الحنفية ونرج كويس

 

 

 

نرشه بقا فى الحديقة لو عندكم … وعلى الأرضيات خارج البيت وداخله

 

 

نرشه على قواعد الشبابيك  .. وأماكن دخول العنكبوت

 

 

عند باب البيت ونرشه أيضا على الحوائط وفى الأركان وبكل مكان .. لأن مفيش منه خطر نهائي وإن شاء الله هتلاحظوا الفرق

 

المحلول ده المفروض نرشه كل أسبوع لمن أنا بأرشه كل ٣ – ٤ أيام لأن عندنا كمان اليومين دول فيه مطر كتير وطبعا لما المطر بينزل بيمسح آثار المحلول من الأرض والحوائط الخارجية

 

وسائل أخرى لطرد العناكب وجدتها على الإنترنت ومن كلام الناس إنها بتنفع لكن ما جربتهاش

 

زيت النعناع **

العنكبوت أيضا يكره النعناع وبالتالى نعمل نفس الخلطة السابقة لكن بدل الليمون نضيف بعض نقاط من زيت النعناع ونرش بيها كالسابق تماما

 

زيت جوز الهند والخل الأبيض **

نعكل خليط من زيت جوز الهند مع الخل الأبيض والماء ونضعهم فى بخاخ ونرش كالسابق بس خللوا بالكم إنه ممكن يبقع لو على السجاجيد فجربوه الأول فى كورنر من السجادة مثلا أو الكنبة علشان تتأكدوا

 

 الحمضيات **

زى ما قلنا وممكن بدل الليمون تستخدموا زيت الليمون أو زيت البرتقال علشان تطفشوا العنكبوت

 

الكراكيب **

الكراكيب حبيبة العناكب لأنها بتوفر مكان هادئ مظلم بارد ليهم يستخبوا فيه .. فنحاول دائما نخفف الكركبة فى البيت ونزعجهم بإننا دائما نشيل وننضف وراء الكنب والترابيزات والأركان والصناديق وخلافه من كراكيب البيت

 

نقفل الشقوق **

أى شقوق عندنا فى الحوائط يا ريت نقفلها أول ما نشوفها بسرعة قبل ما تدخلها أى حشرات وتعشش فيها وتبقى مشكلة كبيرة لينا

 

 

إزرعوا النعناع واللافندر **

العنكبوت ينفر من النعناع ونبات اللافندر .. إزرعوهم فى البيت أو فى الحديقة أو حول البيت لطرد العناكب

 

 

تنضيف البيت بمحاليل برائحة الليمون **

حاولوا تنقوا المحاليل اللى برائحة الليمون زى البليدج اللى برائحة الليمون والمنظفات اللى برائحة الليمون لطرد العنكبوت

 

يا ريت تقولوا لنا بتستخدموا إيه طبيعي لطرد العنكبوت من بيوتكم

Photo Credit

النهاردة عندى فكرة بقالها كتير بتدور فى دماغى وهى إزاى أعمل كيتشين وايبس .. مش عارفة أترجمها إزاى بس هى المناديل المبللة لتنضيف المطبخ والتعقيم

 

 

المناديل دي رئيسية عندى لأنى بأستخدمها فى تنضيف حاجات كتير جدا وسريعة يعني للتنضيف السريع .. أوفات كتير بتخلص ومش بألحق يكون عندى منها ستوك أو مثلا مفيش عروض كويسة أو أو … يعني أنا عادة بأشتريها من كوسكو لما يكون عندهم عرض عليها وبالذات ماركة كيركلاند لأنها فعلا حلوة

 

هنحتاج الآتى

 

مناديل مطبخ ورقية .. ماركة تكون كويسة مش بتتقطع بسهولة أقترح باونتى

٢ معلقة كبيرة من أى صابون متعدد الإستعمال بتحبوه – أنا إستخدمت الباين سول لأنى بأحب ريحته اللى تشبه الديتول المعروف عندنا

للتعقيم – زيادة فى التعقيم لكن ممكن من غيره Tee tree essential oil ١٠ – ١٢ نقطة من زيت

١ كوب ماء عادى من الحنفية

علبة فاضية قديمة كان فيها وايبس قديمة عندكم أو أى علبة لحفظ الوايبس

 

الحقيقة العلبة اللى عندى كانت صغيرة قوى فإستخدمت رول كان فاضل فيه حوالى الربع وإضطريت إنى أقسمه بالسكينة من المنتصف علشان يدخل فى العلبة لكن لو عندكم علبة أكبر مش هتحتاجوا الخطوة دى .. يعني على حسب حجم العلبة اللى عندكم

 

بعد ما قسمنا الرول .. نسحب الإسطوانة الكرتون من المنتصف وبعدين نشد طرف آخر ورقة فى الرول من جوة ونطلعها على برة علشان دى هتبقى أول وايب عندنا .. أتمنى الصورة تكون مفهومة

 

نخلط خليط الوايبس مع بعضه ثم نسكبه على المناديل حتى تتشرب

ملحوظة مهمة جدا جدا : يا ريت تسكبوا المقدار واحدة واحدة لأنى طبعا دلقت المقدار كله وأساسا أنا عاملة جزء صغير لأن العلبة صغيرة فالدنيا إتبهدلت والوايبس بقيت مبلولة بشكل جامد وإتقطعت وإضطريت أعيد الكرة .. يعني نحط حبة بحة ولو تبقى من المقدار شئ مفيش مشكلة نعينه فى زجاجة أو فى بخاخة وممكن نستخدمه منظف .. يعني بالراحة علشان الورق ما يتقطعش

 

بس خلاص نحطه بقا فى العلبة بتاعتنا ونطلع طرف الورقة اللى شديناها من جوة علشان تجر وراها باقى الورق

 

نحفظه ونستخدمه فى أى تنظيف سريع ولو نشف مننا ممكن نعمل الخليط تانى ونبلل المناديل مرة آخرى

 

أتمنى تكون فكرة النهاردة عجبتكم ولو فيه أى سؤال ما تترددوش تبعتوا لى

شاوت كلر كاتشر للى ما يعرفهوش هى مجموعة من قطع القماش الرقيقة توضع مع الغسيل علشان ما يبهتش وبالتالى نقدر نغسل ألوان مخلوطة مع بعضها فنوفر فى الكهرباء والمية وخلافه .. لكن الحقيقة إن الكلر كاتشر سعره عالى / القطعة ومش بنلاقى عليه كوبونات بسهولة .. بس هو الحقيقة حلو فعلا

بالنسبة لى مش مشكلتى إنى أقدر أملأ الغسالة بغسبل من نوعية واحدة من الألوان لأن إحنا الغسيل عندنا كتير جدا لكن المشكلة فعلا اللى بتضايقنى هو إنى مش بآخد بالى كتير وأشترى تيشيرتات مثلا بكم للأولاد يكون التيشيرت كحلى غامق والكم أبيض ومع إنها من محلات غالية إلا إنها بتبهت ومع تكرار الغسيل تلاقة الكم بقا لونه أقرب للرمادى للأسف لأنى طبعا بأحطه فى دورة كلها غسيل لونه غامق لأن التيشيرت كله بيكون لونه غامق

وجاء الكلر كاتشر إنقاذ للموقف اللى أنا فيه لكن مش بأحب أشتريه إلا بالكوبونات ومن هنــا جاءت الفكرة .. ومع البحث والتنقيب إليكم الطريقة والنتيجة

اولا هنحتاج الآتى

١ كوب ماء ساخن

١ معلقة كبيرة صودا الغسيل أو الووشينج صودا

قماش أبيض

بالنسبة للقماش أنا شفت ناس بتقول ينفع أى قماش لونه أبيض فوط قديمة مثلا أو خلافه لكن اللى جربوا الوصفة جربوها بإستخدام قماش من الفيلت الأبيض

إشتريته من ولمارت من المنطقة بتاعة الكرافت ما لقيتهوش غير هناك felt الـــ

يباع على هيئة قطه كل قطعة بـ ٢٥ سنت على ما افتكر

أنا قطعت كل قطعة من الفيلت لأربع قطع متساوية

ندوب معلقة الووشينج صودا فى كوب الماء الساخن وننتظر حتى تذوب تماما ثم نضع القطع بها حتى تتشرب كل المحلول

ونتركها تجف كده

وعلشان تكون التجربة شديدة إشتريت فوطة جديدة من ولمارت لونها بنفسجى – موف- غامق بس هى فى الصورة لونها كحلى مش عارفة ليه وغسل معاها فوطة بيضا والإتنين معا فى الغسالة على مااااء ساااااخن

وكانت النتيجة بعد دورة الغسيل مباشرة…… إحكموا بنفسكم

وهنــــا شكل القطعة اللى أنا إستخدمتها بعد الغسيل وجنبها قطعة جديدة علشان نشوف الفرق

القطعة المستخدمة على يمينكم طبعا باينة لأن بها نقط كده ملونة غامق

ملحوظات هـــامـــة

أولا لا يجب بأى حال من الأحوال غسيل ألوان غامقة جدا بالشكل ده مع لون أبيض وبالذات فى ماء ساخن جدا… أنا بس كنت بأعمل كده للتجربة

ثانيا : مكتوب على علبة الكلر كاتشر يستحسن لو غسلنا غامق قوى مع أبيض إننا نضع أكثر من قطعة  وبالذات لو الحمل كبير يعنى دورة كبيرة

أعتقد النتيجة مرضية جدا جدا على الأقل بالنسبة لى أنا مش بأغسل أبدا بماء ساخن جدا أنا أغسل فى الدورة الباردة أو الدافئة فقط لكن الساخنة جدا بتبوظ لى الأقمشة

أتمنى إن تكون فكرة النهاردة عجبتكم ويا ريت تجربوها وتقولوا لى