جو جرين
إصنع(ـى) بنفسك :: مساعد الشطف لغسالة الأطباق
المرة اللى فاتت إتكلمنا عن طريقة عمل صابون لغسالة الأطباق بسهولة ويسر وكنت قلت لكم إن الصابون ده يعمل بكفاءة عالية مع مساعد الشطف الخصوصى بتاعه .. لو إستخدمتوا الصابون بدون مساعد الشطف هتطلع الأطباق نظيفة لكن مش بتلمع يعني زي ما يكون عليها طبقة فيلم كده بيضا مش مشطوفة كويس بالذات للناس اللى عايشين فى مناطق الماء فيها عبسر تعالوا نشوف إزاى نعمل مكعبات مساعد الشطف
هنحتاج مكونات سهلة وموجودة بكل بيت
١ كوب خل أبيض
٢/١ معلقة صغيرة صابون سائل للأطباق أى نوع
١ معلقة كبيرة عصير ليمون – غير محلى طبعا
وبس … نخلط المكونات معا جيدا ولو إحتاجتم شوية مية صغيرة علشان ندوب الخليط معا ممكن لكن أنا لم أحتاج الصراحة
وبعدين نصبهم فى قالب التلج ونضعهم بالفريزر لغاية لما يجمدوا كويس
نفكهم من القالب ونحفظهم بكيس فى الفريزر لحين الإستخدام
للإستخدام : يوضع قال فى قاع الغسالة قبل بدء دورة الغسيل
أنا بأحط قالب وبأحط كمان نصف كوب خل فى طبق عميق بالرف العلوى من الغسالة أو ممكن أحط قال فى طبق عميق بالرف العلوى فى الغسالة وهو بيسيح مع الحرارة وتنزل عليه المية وقت الشطف ويتوزع على كل الغسالة .. يعني دي زيادة من عندى لزيادة التعقيم واللمعان
أتمنى تكون فكرة اليوم عجبتكم ولو طبقتوها قولوا لى عملت معاكم إيه
إصنع(ـى) بنفسك :: صابون غسالة الأطباق
السنـة دى أنا قررت أحاول أعمل منتجات النظافة فى البيت على قد ما أقدر وقبل كده شفتوا طريقة عمل مسحوق غسيل الملابس والحقيقة شغال معايا كويس جدا وبرضه جربت كتير فى منعم الأقمشة لغاية لما وصلت لنتيجة هايلة .. دلوقتى فكرت قى مسحوق غسالة الأطباق وده ليه طرق كتير على الإنترنت بس بعد التجارب وجدت إن دى أحسن طريقة لأن مهم عندى جدا إن المنتجات اللى نعملها فى البيت تكون غير مكلفة – فعالة – وسهلة يعني مش متعبة فى عمايلها .. بالنسبة لمسحوق الأطباق سهل وغير مكلف وأيضا فعال بالذات مع مساعد الشطف اللى برضه بأعمله فى البيت وهأبقى أقول لكم عليه فى بوست آخر … دلوقتى نييجي بقا للصابون
هنحتاج الآتى
٢/١ كوب ووشينج صودا … أو إعملوه بنفسكم هنــــا
٢/١ كوب بوراكس
٤/١ كوب ملح خشن أو كوشر
٤/١ كوب سيتريك أسيد أو ٢ باكيت من كوول إيد ليمون بدون سكر طبعا
الطريقــــة
نخلط جيدا جميع المكونات معا ونضعها فى علبة محكمة الغلق
الهدف من إستخدام الملح الخشن هو إنه بيعمل على فرك الأوساخ من الأطباق
البوراكس طبعا منظف طبيعي وبيزيل البقع أما السيتريك أسيد أو الكوول إيد بيعمل على تيسير الماء العسر
للإستخدام فقط ١ معلقة صغيرة لكل حمل من الأطباق
الحمد لله كانت التجربة ناجحة جدا والأطباق كانت نظيفة … التكلفة تقريبا ٢.٤٥ دولار للـ ٢٤ غسلة
إصنـع(ـى) بنفسك :: صودا الغسيل أو الووشينج صودا
الووشينج صودا إستخدمناها قبل كده لما عملنا مسحوق الغسيل المنزلى بتاعنا .. للأسف مش بسهولة بتلاقوها
أنا وجدتها عند ولمارت وموجودة بامازون أونلاين .. لكن لو صعب عليكم تشتروها هى ممكن تتعمل فى البيت بسهولة جدا جدا
الحقيقة الوشينج صودا نقدر نعمله بسهولة من البيكينج صودا !!! الفرق بينهم هو الميه وثانى أكسيد الكربون فقط
بعيدا عن الدخول فى معادلات الكيمياء والتركيب الكيميائى لكل منتج – الحقيقة أنا ما كنتش من المغرمين بمادة الكيمياء بامدرسة – ببساطة شديدة عند تسخين البيكينج صودا نقدر نحصل على الووشينج صودا .. بس كده … أيوة بس كده
تقدروا تقوموا بعملية التسخين على البوتاجاز أو بالفرن .. أنا عملته فى الفرن علشان أسهل .. خللوا بالكم فى أثناء عملية التسخين ينطلق غاز ثانى أكسيد الكربون
فيا ريت محدش يجيب ٥٠ باوند بيكينج صودا ويحاول يعملهم مرة واحدة .. لأن ده خطير يا إما تفتحوا الشبابيك كلها
تعالوا نشوف عملت إيه .. أخدت علبة بيكينج صودا صغيرة ١٦ أونص
*
نسخن الفرن لـ ٤٠٠ فهرنهايت أو ٢٠٠ سلزيوس *
نفرد البيكنج صودا فى صينية فرن طبقة رفيعة *
نحط الصينية بالفرن لمده نصف ساعة مع التقليب كل شوية – أنا وضعتها ساعة للتأكد *
لو زودنا الوقت مش هيحصل لها حاجة يعنى مفيش ضرر من كده *
إزاى نعرف إن البيكنج صودا تحول إلى ووشينج صودا؟
فيه فرق فى الشكل بسيط لكن هتلاحظوه لو دققتوا البيكنج صودا بتكون بودرة وتميل للإلتصاق ببعضها وبتكون كتل كده إنما الووشينج صودا بتكون حبيبات وغير ملتصقة ببعضها ولونها باهت شوية أو مائل للإصفرار كريمي فاتح كده غير البيكنج صودا اللى بتكون ناصعة البياض
نحفظها فى برطمان أو علبة محكمة الغلق