المطبخ العالمي

من وصفات تحدى ال٦*٦

مكرونة بصوص الألفريدو سهلة وسريعة وإقتصادية جدا ومحببة للكل .. طبعا ممكن تشتروا الصوص جاخز لكن لمزيد من الإقتصادية إعملوا الصوص بنفسكم تعالوا أوريكم نعمله إزاى

هنحتاج الآتى

٣ أكواب صدور دجاج مقطع وغير مطهى – الطبق ده ممكن نستخدم فيه دجاج مطهى لكن بأحس إنه أفضل يكون مش مطهى *

٢ فص ثوم مهروس *

٢ معلقة كبيرة دقيق أبيض *

٢ كوب سائل – كوب لبن وكوب شوربة أو ٢ لبن أو لبن وماء أى شئ من إختياركم  *

ملح وفلفل *

١ باكيت مكرونة مسلوقة *

زبدة أو زيت اللى تحبوه *

الطــــريقــــة

فى طاسة على النار نسخن الزبدة ثم نضيف الثوم المهروس تقليبتين فقط بلاش نسيبه لغاية لما يحمر ثم نضيف قطع الفراخ ونقلبها لغاية لما تبيض ثم نضيف معلقتين الدقيق ونستمر بالتقليب

بعد كدة نضيف الشوربة واللبن ونقلبهم مع الفراخ كويس ثم الملح والفلفل وتترك على نار هادئة حوالى نصف ساعة

بصوا على الصوص لو حسيتوا إنه تقيل بالنسبة لكم أضيفوا المزيد من السائل ولو كان خفيف يبقى ندوب معلقة دقيق فى قليل من الماء بكوب ثم نضيفه على مزيج الدجاج ونقلب

يقدم مع المكرونة المسلوقة

وبالهنا والشفا

الوجبات الإقتصادية هى عادة مفهومها وجبات لا تحتوى على البروتين الحيوانى بالبلدى الفراخ واللحمة .. لكن هل تعرفوا إننا ممكن نعمل وجبات إقتصادية فيها لحمة وفراخ … دخلت مؤخرا فى تحدى مع صديقة لى إزاى ممكن أسرة بحالها تآكل ربع فرخة فقط فى اليوم!!!! هل ده ممكن؟ ومع بعض التحايل واللعب بالمكونات توصلت لمجموعة من الوصفات أستطيع بها إن أسرتى تآكل ربع فرخة باليوم … حاجة ما تتصدقش مش كده .. أنا برضه ما صدقتش بس علشان تعرفوا أنا أسرتى مكونة من 5 أفراد أب وأم و٣ أطفال ذكور ١٠و ٧ و ٣ سنوات من متوسطى الشهية  … طبعا الحال هيختلف معاكم على حسب أعمار أولادكم وطبيعتهم فى أكلهم

 

الوصفات دى ممكن نلجأ ليها لما نكون مثلا آخر الشهر أو عايزين نقرص شوية أو بنقلل من أكل البروتين الحيوانى … كمان لو إحنا فى مأزق مادى يعني لازم نحط فى بالنا إننا لازم نقلل شوية من إستهلاك اللحوم .. على فكرة الإنسان فى يومه مش محتاج بروتين بالكمية اللى إحنا متعودين عليها فى بلادنا يعني يا دوب قطعة صغير كفاية …مش ضرور خروف مشوي كل يوم

 

 

فى البداية أنا إشتريت عدد ٦ صدور فراخ على ما أفتكر كانت بـ ١٥ دولار من كوسكو والهدف كان إنى أعمل ٦ وجبات مختلفة ومشبعة لحد كبير لعائلتى من الفراخ دى بواقع ربع فرخة لكل يوم لو أخدنا المتوسط

 

النهاردة هأقول لكم على التوضيبات المبدئية وبعدين هأبقى أنزل لكم الوصفات واحدة واحدة

 

 

الأول طبعا نآخد الفراخ ونغسلها كويس بالطريقة المعتادة*

نآخد كل ربع وننضفه من الدهون ونشيل الجلد *

نفصل العضم عن اللحم مش نخلى الصدر لأ نقطع كده من عند الجزء السميك بتاع الصدر بحيث العضم يكون عليه لحم *

هننتهى بـ ٦ صدور فراخ بدون عضم و٦ هياكل الصدر وعليها لحم *

ده شكل العضم لما شيلنا الجزء السميك بتاع الصدر أتمنى يكون واضح قصدى *

وده هيكون شكل الصدور وهى بدون العضم *

نآخد صدرين دجاج ونقطعهم لـ ٦ شرائح فيلية رفيعة *

ونآخد صدرين تانيين ونقطعهم مكعبات متوسطة *

وصدر آخر لوحده نقطعه مكعبات أيضا لوصفة أخرى*

صدر واحد نقطعه شرائح رفيعة *

نضعهم فى أكياس ونكتب على كل كيس فيه إيه ونضعهم بالفريزر *

العضم يسلق جيدا طبعا بالبهارات المعتادة والبصل وبعدين لما يبرد نفصص اللحم اللى فيه هيطلع من ٤ لـ ٥ أكواب لحم دجاج مطهى

نقسم لحم الفراخ المطهى ده لجزئين ٣ أكواب أو ٤ فى كيس و كوب فى كيس وعلى الفريزر برضه *

وطبعا هيطلع لنا مرقة دجاج رووعة ومركزة … نحفظها بالفريزر نستخدمها لعمل شوربة أو ملوخية مثلا وهكذا

 

الأكلات هتكون كالآتى : هأبقى أضيف اللينكات للوصفات واحدة واحدة

 

١- مكرونة ألفريدو

٢- شاورما الدجاج السريعة

٣- كسرول الدجاج بالمكرونة

٤- كسكسى بالفراخ والخضروات

Sweet and sour chicken ٥- فراخ بالصوص الحامض والمسكر

٦- بيتزا الفاهيتا

 

أتمنى يكون عجبكم التحدى بتاعنا ويا ريت لو عندكم وصفات تقولوا لنا عليها

الجبنة الجبنة الجبنة … بقيت حديث المدينة مؤخرا بعد أن فجرت إحدى صديقاتى قنبلة فى وجوهنا جميعا بأحد المنتديات وقالت إنها واثقة ١٠٠٪ إن جبن الشيدر الشارب لازم ولا بد أن تكون منفحته من الخنزير .. صافية طبعا كلنا بهتنا يعني أهه الواحد غلب فى موضوع الجبنة وبقينا نآكل أى جبنة وخلاص ونحاول نشتريها من المحل العربى وطبعا أسعاااره ناااار .. وساعات الواحد بيتحرى الدقة وساعات مش بيلاقى بديل وفى رحلة بحثى على العم جوجل وقع فى إيدي لينك على اليوتيوب لشخص لبنانى جزاه الله عنا خيرا بيعمل جبنة بيضا فى منتهى السهولة والروعة وهنــــا اللينك بتاع الفيديو بتاعه … أنا بقى معقدة من غلى اللبن على النار هنا لأنه دااااائما بيشيط منى علشان كده فكرت أعمله فى السلو كوكر أو الكروك بوت .. لو عندك تعالى أقول لك هنعمل إيه ولو مش عندك ممكن جدا يتعمل على الغاز عادى جدا بس عينكم عليه علشان ما يتحرقش زيي وتنسوه من تنطيط الأولاد حواليكم

هنحتـــاج

٣ معالق كبيرة خل لكل لتر حليب – تقريبا ٤ أكواب لبن حليب – ولازم اللبن يكون كامل الدسم *

ملح على حسب الذوق *

لو هنعمله فى السلو كوكر

نحط اللبن فى السلو كوكر ونظبطها على أقل درجة ونترك الحليب يسخن لغاية أما يقرب يغلى تقريبا أخد معايا ساعتين ونصف علشان أغلى ٣ لتر لبن

نضيف الخل دفعـة واحدة وما نشيلش الكهرباء بتاعة الحلة دلوقتى لسة شويـة

بعد ما هنضيف الخل هنلاقى اللبن بيتخثر وبدأ يتجمع ويعمل كتل من الجبنة

ننتظر حوالى ٥ دقائق تقريبا حتى يفصل اللبن تماما ويكون عندنا ماء رائق نوعا ما

نجيب علبة أو طبق بايركس وندهنه على خفيف بزيت الزيتون ونصفى الجبنة تماما من الماء إما بشاشة أو فقط بالضغط عليها

نرش على الجبنة الملح ونقلبها كويس ونضعها فى البايركس وفى التلاجة لمدة ساعتين ويبقى عندنـا قالب جبنة جميل وبيتي

 

شكرا إيهــاب على الطريقــة … عايزة أقول لكم إنه كمان عمل جبن الكاسات بنفس الفيديو بس أنا ما جربتهاش

لو مفيش سلو كوكر يبقى هتعملوه على النار عادى خالص زى ما عمله إيهــاب بالظبط

ملحوظــات مهمـــــة

١- لا بد من إستعمال لبن كامل الدسم أرجوووكم محدش يحاول بلبن قليل الدسم

٢- تمليح الجبنة يكون بعد ما نصفيها محدش يحاول يملح اللبن ثم يضيف الخل لسبب ما مش بيفصل كويس

٣- ممكن إستبدال الخل بليمون المفروض يعطى نفس النتيجة لكن أنا ما جربتهوش بالليمون