إصنــع(ـى) بنفسـك

 

أنا إنكسفت وتراجعت كتير إنى أحط البوست ده .. لكن لأنى عارفة إنها مشكلة فى كل البيوت تقريبا .. ولأنى مبسوطة من النتيجة اللى وصلت لها قلت لازم أتشارك معاكم النجاح المذهل والمبهر فى تنضيف المخدات … طبعا إحنا فى بلدنا المخدات بتكون تقريبا قطن وبنعملها مخصوص عند المنجد لكن المخدات اللى أنا بأتكلم عنها مش المخدات القطن .. المخدات الجاهزة اللى بنشتريها ومكتوب عليها إنها ممكن تتغسل فى الغسالة .. لأن هنا كل المخدات كده

 

 

المخدات دى بعد فترة ونتيجة للعرق طبعا وإحنا نايمين ومن دهون الرأس والبشرة بتعمل بقع صفرا فيها ومع مرور الوقت بتكون شكلها مقرف طبعا كتير حاولت إنى أغسلها لكن مش بتطلع منها البقع دى طبعا لأنى بأغسلها مرة فى السنة وساعات أساسا أنساها والمدة تطول .. وبيكون الحل طبعا إنى أرميها وأشترى غيرها

 

ولأنى بأكره رمى الحاجات بالذات لما يكون لسه فيها عمر .. كان لازم يكون فيه حل تانى غير إنى أستسهل وأرمى .. وبعد مباحثات وتجارب وصلنا لنتيجة مذهلة والحمد لله .. ولكل المعذبين فى الأرض من المخدات أحب أقدم لكم الطريقة دى فى تبييض المخدات ونخليها ترجع أنضف من الأول كمان

 

أنا صورت المخدات فى البانيو علشان نقارن اللون صح .. لأن لون البانيو أبيض ناصع .. تعالوا نشوف الصورة  قبل . طبعا منظرها يعني ….. مش ولا بد

 

 

 

 

السبب الرئيسي ورا إصفرار المخدات هو العرق .. جسمنا بيعرق بالليل علشان يظبط حرارته ونبقى مرتاحين .. يعني مش ضرورى الدنيا تبقى حر لأ دماغنا بتعرق لتظبيط حرارة الجسم وطبعا مع الدهون اللى بتفرزها بشرتنا .. العرق ده بيتخلل القماش بتاع المخدات حتى لو حاطين عليها غطاء ولما بينشف بيصفر وبيبقع المخدات ومن هنا بتبدأ المشكلة

 

 

مع الإستخدام اليومي للمخدات طبعا ومع إنى بأحاول أغسلها وطبعا زى ما قلت لكم ممكن تعدى السنة والمخدات مش بأغسلها لكن أنا بأحاول دايما أحطها فى الشمس ودى عادة مصرية وأعتقد عربية أصيلة وهى تشميس الفرش لعلمكم بقا العادة دى صحية جدا جدا بس أنا بأشمس الفرش داخليا مش بأطلعه بره فى البلكونة وإلا إدارة الكوميونيتي ممكن تطردنا برة .. المهم لما بيزيد الإصفرار والبقع عن حدها بأرمى المخدات وأشترى غيرها زي ما قلت لكم .. تعالوا بقا نشوف ممكن ننضفها إزاى

 

هننقع المخدات فى الآتى

١ كوب مسحوق غسيل .. إستخدمت مسحوقى المتميز

١ كوب مسحوق غسالة الأطباق .. برضه إستخدمت مسحوقى المنزلى

١ كوب كلوروكس .. ومش محتاجين أقول لكم إنى إستخدمت كلوركس منزلى

١/٢ كوب  مسحوق بوراكس .. ده بقا اللى ما كانش منزلى

ميه سخنة مولعة مولعة مولعة .. على قد ما تقدروا

 

نحاول نخلى المحلول اللى هننقع فيه المخدات ما يكونش مخفف يعني نقلل كمية المية المستخدمة .. أنا نقعتهم فى الغسالة نفسها الحقيقة

 

شغلت الغسالة على أقصر برنامج وأعلى درجة حرارة ومليت جزء صغير ما سيبتهاش تملى مية للآخر وكمان سخنت ميه فى براد الشاى ودلقتها جوة الغسالة

 

 

 

وبعدين بدأت بوضع المكونات الباقية كلها وقلبتهم على بعض بمعلقة خشبية لغاية لما تأكدت إن المساحيق ذابت وبعدين حطيت المخدات وغطستها كويس فى المية وفتحت تانى زرار الغسالة علشان تكمل ملى مية سخنة .. وقبت المخدات كويس علشان المحلول يوصل لكل حتة فيها وتركتها منقوعة فى الغسالة لمدة ساعتين

 

 

 

وبعدين نشغل الغسالة عادى ونتركها تكمل الدورة بتاعة الغسيل والشطف والذى منه … وبعد كده نحطها فى المجفف ونتركها لدورة التجفيف المعتادة

 

 

 

طبعا النتيجة فاقت الخيال الحقيقة ما صدقتش إن البقع طلعت ومنظر المخدات جميل وأبيض وفريش كأنها فعلا جديدة … حلو قوى قوى

 

 

أتمنى تكون تجربتنا النهاردة عجبتكم وممكن تساعدكم فى حل مشكلة المخدات الصفرا

ملحوظة : طبعا لازم تتأكدوا إن المخدات بتاعتكم يمكن غسلها فى الغسالة .. وإلا …. عليكم العوض

على العموم ما تخافوش أغلب المخدات هنا ممكن تتحط فى الغسالة مفيش مشكلة لكن برضوا إقرأو الليبل بتاعها كويس

إنشروها لو عجبتكم

• Click to share on Facebook (Opens in new window)
• Click to share on Pinterest (Opens in new window)
• Click to share on Twitter (Opens in new window)
• Click to share on Google+ (Opens in new window)