أنشطـة للأطفال
أونلاين :: فري للأطفال على الآي تيونز …. اليوم فقط
سمارت آبس عندهم اليوم فن فرايداي وعارضين أكثر من ٢٠ تطبيق تعليمي للأطفال … هنــــا تلاقوا التطبيقات
بري سكول بالمنزل – الأسبوع الرابع
بدأنا الأسبوع الرابع من البري سكول المنزلي والحمد لله تعالوا نشوف عملنا إيه فى الأسبوع ده
المهارات الجديد هذا الأسبوع: بداية تعلم أسماء الحيوانات بالإنجليزية ومعلومات عنها كل أسبوع هنآخد حيوان واحد
تنمية مهارة الكتابة: عملنا جزء من الخطوط الطولية هنـــــا وقصينا عليها بالمقص
رسمنا الخطوط الطولية وقصينا عليها بالمقص
حسيت إن النتيجة مشجعة وإنتقلت للخطوط الأصعب لكن طلعت صعبة عليه لسه بس أهه حاولنا
أول حيوان بدأنا نتعلمه هو النمر لأنه الحيوان المفضل عنده ولقيت هنـــا معلومات بسيطة للأطفال عنه
وطبعنا أوراق للتلوين للنمر هنـــا وكمان شفناه على اليوتيوب وهو بيصطاد وبيآكل وفيه فديوهات كتيرة بالعربى والإنجليزى على اليوتيوب
بالنسبة للأرقام بنعد الحمد لله دلوقتى لغاية عشرة وبأجيب له كتب من المكتبة للصغار علشان يقدروا يعدوا
لو عايزين تشوفوا الأسابيع السابقة
الأسبوع الأول
الأسبوع الثانى
الأسبوع الثالث
أونلاين :: أبلكيشن للأطفال فري على الآي تيونز … اليوم فقط
سمارت آبس عندهم اليوم فن فرايداي وعارضين أكثر من ٢٠ تطبيق تعليمي للأطفال … هنــــا تلاقوا التطبيقات
بري سكول بالمنزل :: الأسبوع الثالث
لازلنا فى البري سكول المنزلي والأسبوع ده مفيش عندنا مهارات كتيرة جديدة لأننا لسه بنتعلم فى القديم
المهارات الجديدة هذا الأسبوع :هى كالآتى
بداية تعلم رسم الأشخاص بالملامح الرئيسية مثل العينين – الفم الأنف وهكذا
لا زلنا نتعلم الخطوط طبعا
وهنـــا بدأنا نتعلم بإستخدام بورد وألوان شمع للبورد جبتهم من تارجت ٧٠٪ من تخفيضات المدارس
البورد دى ميزتها إن فيها خطوط كمان متقطعة يقدر يرسم عليها بالقلم
مهارة العد
لسه مستمرين فيها مع الإستمرا فى الألوان أيضا
وبس ده كل اللى عملناه … وإنتظرونا الأسبوع المقبل إن شاء الله
لو عايزين تشوفوا الأسابيع السابقة
الأسبوع الأول
الأسبوع الثانى
أطفالنا والحج :: بعض أنشطة الجزء الأول
إستكمالا للجزء الأول من قصة سيدنا إبراهيم للأطفال .. عندى شوية أنشطة ظريفة عملتها مع أولادى أتمنى تلاقوا فيها الفايدة إن شاء الله
طبعا ممكن جدا نبحث فى اليوتيوب على قصص الأنبياء بالكارتون أو الصلصال ونوريهم كمان قصة سيدنا إبراهيم وسيدنا إسماعيل عليهما السلام
أولا اللعب بالعجينة :: نشاط تشكيل أصنام
أنا عارفة إن العنوان يخض حبتين لكن كانت دى متعة بالنسبة لهم عملت العجينة المالحة وكان المفروض إن العجينة دى تنشف لوحدها لكن ما نشفتش إلا لما دخلت الفرن أنصحكم إما بتشكيل قطع صغير منها علشان ما تآخدش وقت على ما تنشف وتجمد أو تشوفوا عجينة تانية … المهم العجينة مكوناتها كالتالى
العجينة المالحة
٤ كوب دقيق – ١ونصف كوب ملح ناعم – ١ ونصف كوب ماء للعجن
إحنا عملنا نصف المقدار وأعطى لنا كمية لا بأس بها من العجينة
وبدأنا اللت والعجن والتشكيل وحاولت أقول لهم نبعد عن أشكال الإنسان والحيوان يعني علشان ما يكونش فيها شبهة ولو إنها للتعلم والإمتهان .. المهم ما كانش ده عائق والحمد لله والخيال إشتغل كويس
وكل واحد أبدع فى مجاله وعلى حسب سنه وخياله .. وعملنا الأصنام ولوناها لما نشفت بأى ألون موجودة
ودى مجموعة الأشكال اللى عملناها
وهنا عملنا مسرحية صغيرة بالليجو وكأن الناس بتسجد للأصنام وعملنا واحد إيده مقطوعة وجاى يطلب من الأصنام إنها ترجع له إيده تانى .. وكان فيه حرامى واقف بعيد شايفهم وهم بيقدموا القرابين للأصنام
وهنا الراجل بيقدم قرابين جواهر غالية والحرامى واقف مستنى
وهووووب أول ما الناس مشيوا الحرامى جه وسرق القرابين من قدام الأصنام وهى واقفة مش بتعمل حاجة
وبعدين كسرنا الأصنام وقلنا للناس المفروض تعبدوا ربنا مش الأصنام دى لا بتنفع ولا بتضر
وفشفشناها كلها فشافيش وكسرناهم كلهم .. وطبعا برضه ده كان جزء ممتع لأطفال المدمرين والحمد لله
وفيه مجموعة من الأوراق لأطفال البري سكول هأبقى أجمعها وأنزلها مرة واحدة إن شاء الله .. أتمنى تكون الأنشطة عجبتكم وإنتظروا الأجزاء الأخرى
أطفالنـــا والحج :: قصة سيدنا إبراهيم – الجزء الأول
قلنا فى السابق إننا هنحكى قصة سيدنا إبراهيم بشيئ من التفصيل ومع بعض الأنشطة الجديدة للأطفال لتثبيت المعلومة عندهم
القصة أحكيها لأطفالى ١٠-٨-٣ سنوات وطبعا يختلف إستيعاب كل واحد منهم على حسب عمره لكن بإمكانكم التغيير فيها أو فى طريقة الكلام على حسب سن وطريقة كلام أولادكم .. إحكوا القصة بالعربية أو العامية أو حتى الإنجليزية أة أى لغة يفهموها المهم نوصل لهم المعلومة بأى شكل كان
أولا :: بيان مكانة سيدنا إبراهيم فى القرآن الكريم
سيدنا إبراهيم خليل الله :: ما معنى خليل … خليل تعنى صاحب .. وأقصى آمل للإنسان أن يحب الله تعالى فما بالنا بمن أحبه الله كصاحب وصديق فله منزلة عالية عند الله تعالى
سيدنا إبراهيم أبو الأنبياء :: بمعنى كل الأنبياء اللاحقين من سلالة سيدنا إبراهيم عليه السلام
سيدنا إبراهيم حليم أواه منيب :: لا يغضب كثير التسامح مهما فعل به الناس .. فكان الكل يسخر منه وكاد أبوه أن يقتله ويضربه لكنه أبدا لم يعتدى على أحد .. وكان يعبد الله ويدعى له كثيرا كثيرا
مولده عليه السلام : ولد سيدنا إبراهيم عليه السلام فى بابل بين دجلة والفرات بالعراق – وهنا ممكن نطلع خريطة زى دى مثلا نوضح فيها فين بالظبط العراق – وكان كل قومه يعبدون الأصنام ولهم ملك ظالم إسمه النمرود يدعي أنه إله
الغريب بقى إن والده كان بيصنع الأصنام دى وبعدين يعبدها !!! – وهنا هتلاقوا الولاد بيضحكوا ومستغربين – نقوم نزود العيار ونقول فيه حد يعمل الإله بتاعه طيب يبقى إله إزاى!!! هو ينفع إيه الهبل ده .. كان بابه بيشتغل نجار وكلن بيعمل آلهة من الخشب ويبيعها ويعبدها ومصدق إنهم فعلا آلهة … وكلن سيدنا إبراهيم متضايق قوى وعمره ما شعر إن فعلا دى آلهة وإنها ممكن تضر وتنفع .. وكان والده بيآخده معاه للمعبد علشان يصلى لكن عمره ما صلى لصنم وكان وهو صغيريخبط الأصنام وتقع وما تعرفش تعدل نفسها وكان هو بيضحك ويقول فى نفسه لا يمكن دى تكون آلهة دى حتى مش قادرة تعدل نفسها
لما كبر سيدنا إبراهيم فكر كتير فى وجود الله إلى أن هداه الله لعبادته وقال فى نفسه أول واحد لازم أقول له هو أبى وراح لوالده يقول له يا أبت لم تعبد ما لا يسمع ولا يبصر ولا يغني عنك شيئا … ويحاول إقناعه بشتى الطريق وبالأدب ولكن والده كان بيغضب منه ويزعق له وقال له لو ما بطلتش هأرميك بالحجارة لغاية لما تموت .. ولكن سيدنا إبراهيم البار بوالده قال له فى أدب سأستغفر لك ربى …وأعلن سيدنا إبراهيم إنه مش هيعبد الأصنام وإنه برئ من عبادتها
ذهب سيدنا إبراهيم لدعوة قومه ويسألهم ليه بتعبدوا الأصنام وهم يقولوا له وجدنا آباءنا لها عابدين … فقال لهم سيدنا إبراهيم إن آباءهم ضالين – يعني غلطانين جدا – ودول مش الآلهة الحق .. فسخر قومه منه وإستمروا فى عنادهم وتكبرهم وقال لهم سيدنا إبراهيم وتالله لأكيدن أصنامكم يعني هأكسرها بعد ما تمشوا
وفى يوم كان أهل البلد كلهم فى إحتفال فى بلدة تانية وسيدنا إبراهيم لم يذهب معهم لأنه نوى على تحطيم الأصنام وبعد ما أصبحت البلد فاضية ذهب بسرعة للمعبد ومعه فأس كبير وحطم كل الأصنام ما عدا الصنم الكبير – كبير الآلهةـ ووضع سيدنا إبراهيم الفأس على الصنم الكبير وعاد إلى بيته بسرعة .. ولما رجع أهل البلد وجدوا الأصنام محطمة وقالوا مين اللى عمل كده فى الآلهة ـ طيب هى لو آلهة هينفع حد يحطمها ؟ يعني هي مش عارفة حتى تدافع عن نفسها ؟ -وتذكر أهل القرية سيدنا إبراهيم وإنه قال لهم هيكسر الآلهة وقالوا هو ده اللى كسرها وبعتوا له علشان ييجي ..ولما حضر سيدنا إبراهيم سألوه إنت اللى عملت كده فى الآلهة؟ فشاور سيدنا إبراهيم على الصنم الكبير وقال بل فعله كبيرهم هذا … إسألوهم وشوفوا هيردوا عليكم واللا لأ !! فرجع الناس يقولوا صحيح دول مش بيردوا علينا وكبير الآلهة ما عرفش حتى يدافع عن نفسه ولا يدافع عنهم … وكانوا خلاص هيقولوا فعلا دول مش آلهة لكن هنا دخل الشيطان وقال لهم .. لا خللوا بالكم دى الآلهة بتاعتكم ومش لازم تخلوا سيدنا إبراهيم ينتصر عليكم وخلاهم يبتغاظوا وضحك عليهم تانى
إتغاظ الناس أهل القرية وقالوا لازم ننصر الآلهة ونعاقب سيدنا إبراهيم عقاب شديد .. وفكروا فى أبشع وأسوأ عقاب ليه … هو إيييييييه؟ خلوها بقى المرة اللى جاية .. طبعا هيقولوا لكم أيوة عارفين النار .. قولوا لهم آه بس إنتوا فاكرينها زى أى نار .. المرة اللى جاية هنقول لكم النار دى كانت عاملة إزاى
إن شاء الله هأحط لكم الأنشطة الخاصة بهذا الجزء فى بوست آخر
مصدر هذه القصة :كتاب ابن الإسلام – منهج متكامل فى الشريعة للمبتدئين – الجزء الثالث سيرة الرسول وقصص الأنبياء- لفضيلة الشيخ محمد حسين يعقوب