بري سكول فى المنزل

بدأنا الأسبوع الخامس بجو لطيف خريفي معتدل جميل وكانت فرصة هايلة للتعليم والإكتشاف

الحقيقة كلورادوا تتمتع بالمناظر الطبيعية الجميلة بالذات فى فصل الخريف … الشجر ألوانه غاية فى الروعة أصفر وأحمر وبرتقالى وأخضر بدرجات متفاوتة جميلة .. كانت فرصة حلوة لمراجعة الألوان

إتكلمنا عن الخريف يعني إيه وإيه اللى بيحصل في الخريف .. تساقط الأوراق وإستعداد الشجرة لفصل الشتا والتلج طبعا بصورة مبسطة علشان يقدر يفهم الكلام بس هو الحقيقة فهم لأنه كان بيقول لوالده الورق بتاع الشجرة بيقع علشان التلج هييجي

عملنا نشاط حلو لفصل الخريف وهو أسورة من أوراق الشجر

هتحتاجوا سوليتب أى نوع يكون عريض وهنعمل زي سوار أو إسورة بحجم إيد الطفل بس أكبر شوية علشان نعرف نطلعها وندخلها من إيده ونقلبها على ضهرها بحيث إن الجهة اللاصقة تكون للخارج

ورق شجر ألوان وأشكال وده هتلموه وإنتم مشايين مع الطفل تشرحوا له وتكلموه عن الخريف… ونلزق ورق الشجر على الأسورة من بره بألوان جميلة

ودى الإسورة بتاعتى أحلى من الذهب

وبمناسبة الخريف إستخدمنا الأوراق التعليمية دى حلوة للصغار

وإستكمالا لما بدأناه فى معرفة الحيوانات اللغتين العربي والإنجليزى الحيوان الأسبوع ده هو الفيــل

هنــــا فيديو صغير عن الفيل النونو وهم بيلعبوا وبيستحموا بالطين :-/ أتمنى ما يعملش زيهم

ومن هنـــا معلومات عن الفيل الأفريقي وأيضا هنــــا معلومات أكثر

وهنــــا فيديوهات تعليمية كتيرة عن الفيل

وطبعا ما ننساش نطبع صور للفيل للتلوين فيه منها كتير على الإنترنت وده اللى إستخدمناه

لمعرفة باقى الأسابيع إضغط هنــــا

 بدأنا الأسبوع الرابع من البري سكول المنزلي والحمد لله تعالوا نشوف عملنا إيه فى الأسبوع ده

المهارات الجديد هذا الأسبوع: بداية تعلم أسماء الحيوانات بالإنجليزية ومعلومات عنها كل أسبوع هنآخد حيوان واحد

 

تنمية مهارة الكتابة: عملنا جزء من الخطوط الطولية هنـــــا وقصينا عليها بالمقص

 

رسمنا الخطوط الطولية وقصينا عليها بالمقص

حسيت إن النتيجة مشجعة وإنتقلت للخطوط الأصعب لكن طلعت صعبة عليه لسه بس أهه حاولنا

أول حيوان بدأنا نتعلمه هو النمر لأنه الحيوان المفضل عنده ولقيت هنـــا معلومات بسيطة للأطفال عنه

وطبعنا أوراق للتلوين للنمر هنـــا وكمان شفناه على اليوتيوب وهو بيصطاد وبيآكل وفيه فديوهات كتيرة بالعربى والإنجليزى على اليوتيوب

بالنسبة للأرقام بنعد الحمد لله دلوقتى لغاية عشرة وبأجيب له كتب من المكتبة للصغار علشان يقدروا يعدوا

لو عايزين تشوفوا الأسابيع السابقة

الأسبوع الأول

الأسبوع الثانى

الأسبوع الثالث

لازلنا فى البري سكول المنزلي والأسبوع ده مفيش عندنا مهارات كتيرة جديدة لأننا لسه بنتعلم فى القديم

المهارات الجديدة هذا الأسبوع :هى كالآتى

بداية تعلم رسم الأشخاص بالملامح الرئيسية مثل العينين – الفم الأنف وهكذا

لا زلنا نتعلم الخطوط طبعا

وهنـــا بدأنا نتعلم بإستخدام بورد وألوان شمع للبورد جبتهم من تارجت ٧٠٪ من تخفيضات المدارس

البورد دى ميزتها إن فيها خطوط كمان متقطعة يقدر يرسم عليها بالقلم

مهارة العد

لسه مستمرين فيها مع الإستمرا فى الألوان أيضا

وبس ده كل اللى عملناه … وإنتظرونا الأسبوع المقبل إن شاء الله

لو عايزين تشوفوا الأسابيع السابقة

الأسبوع الأول

الأسبوع الثانى

لازلنا فى البري سكول المنزلي والأسبوع ده بدأنا مجموعة من المهارات الجديدة مع القديمة من المرة اللى فاتت

المهارات الجديدة هذا الأسبوع :هى كالآتى

تعلم كتابة الخطوط الطولية

بداية تعلم عد الأياء من ١لـ ٥ فقط

 

نبدأ بتعلم الخطوط الطوليـــة

من هنـــا تقدروا تنزلوا الورقة للخطوط الطولية

 

الألــــــوان

ولازلنا نتعلم الألوان باللغتين العربية والإنجليزية .. وجدت عندى رولو لف للشعر بلاستيك كنت جايباه من زمان من تارجت كله ألوان ولقيتها فرصة حلوة يلعب بيه ونقول الألوان وكمان نتعلم الترتيب من الأصغر للأكبر

,وإزاى يقدر يدخلهم فى بعض مظبوطين

 

وبعد ما خلص الورقة اللى فيها الخطوط الطولية إتعلمنا القص عليها مش على ورقة منفصلة وكانت فكرة ظريفة وموفرة للورق فى نفس الوقت

 

مهارة العد

ودى بقى لسه بنحاول فيها وبنحد حيوانات مثلا من اللعب ونقوم بعدها أو ليجو أو عربيات أو أى لعب عندهم ونعدها وساعات كمان نقول اللون للتأكيد

وبس الحمد لله على كده دلوقتى بس فيه تقدم والحمد لله .. أتمنى إن يكون فيه تقدم عندكم برضه وخلونا نساعدهم وأى سؤال أنا حاضرة

كنت إتكلمت معاكم الأسبوع اللى فات عن نيتي فى أن أبدأ مع طفلى فى منهج بري سكول من المنزل .. وقبل البدء بالحروف والذى منه وجدت إنى يجب أن أبدا أولا فى تعليمه كيفية مسك القلم وأيضا كيف يكتب خطوط سليمة وبإتجاه واحد

 

 

وعلى هذا توكلنا على الله وهذا ما سنفعله فى الأسبوع الأول

تعليم الخطوط العرضية *

البدء بتعليم الألوان الأساسية *

البدء بتعليمه مهارات القص وإستخدام المقص *

طبعا الموضوع قد يأخذ أكثر من أسبوع على حسب إستجابة الطفل

وبدأنا إستخدام القلم وتتبع الخطوط على الورق .. وإستخدمت وقة للطباعة هنـــــا

 

 

وهنحاول كل يوم نطبع الورقة ونعملها لغاية لما نبقى كويسين فيها ثم ننقل على اللى بعدهــا

 

 

  وهنـــا باين طبعا بداية إستخدام القلم وإن الخطوط غير مستقيمة لكن مع التمرين هتيجي إن شاء الله

 

  وهنــا حاولنا نلون الصورة ولسه بنتعلم نلون بداخل الصورة مش خارجها

 

وده الفاينال برودكت زهق بقى بعدها ومارضيش يكمل التلوين لكن كويس قوى على أول يوم

الألوان

كنت حكيت لكم من قبل على بعض الأنشطة اللى ممكن نعملها للصغار بإستخدام البيض الملون البلاستيك اللى بيتباع وقت الإيستر … والحقيقة كنت شوفت قبل كده نشاط لكن مش فاكرة فين للأسف .. إننا نجيب البيض الملون ونضع بكل بيضة مجموعة من الأشياء اللى لها نفس اللون ويحاول الطفل تمييز الأشياء التى لها نفس اللون وتجميعها فى البيضة الواحدة ونقفل عليها

 

ممكن نستخدم أى شئ مثلا ستيكرز لها نفس اللون … دبابيس الورق المشبك دى طبعا اللى مش بتعورهم …الأساتك الملونة وهكذا فى البداية أنا بدأت بحوالى قطعتين لكل لون علشان ما يتلخبطش وشوية شوية نزود الحاجات اللى هنحطها بكل بيضة … إن شاء الله

 

 

الحقيقة قفل البيض مكانش سهل عليه لكن بالتدريج إتعود واللعبة دى حازت على إعجابه جدا جدا

 

ولما بنخلص البيض بنحطه فى مكانه فى كرتونة بيض قديمة عندنا ونضيفة طبعا

فى البداية مش مهم يعرف كل لون إسمه إيه ,, خلينا بس نركز على مفهوم الحاجات اللى لونها زى بعض مفيش داعى نستعجل وشوية شوية نبدأ بتعليمه اللون وإسمه وأنا إن شاء الله ناوية أعلمه اللون باللغتين يعني مثلا نقول أحمر ريد .. أو أزرق بلو وهكذا

 

 

مهارات القص

إستخدمنا الورقة دى هنـــا طبعناها علشان نتعلم القص … بس الحقيقة كان صعب عليه جدا وساعته أكتر من مرة بس يعني أهه بداية

 

 

يعني إن شاء الله أكون حطيت لكم الخطوط العريضة لأول أسبوع أو أسبوعين خدوا راحنكم وبلاش نضغط عليهم أكتر من اللزون بس أتمنى إن يكون نفعكم

 

ملحوظة أخرى

من الوسائل المهمة واللى أنا بأشوفها مش محتاجة فلوس ومجهودها بسيط هى المكتبات العامة … ممكن تشوفوا إمتى ميعاد قراءة القصص بالمكتبة ونآخدهم هناك هيتعلموا شوية شوية اللغة وأيضا الإحتكاك بالآخرين والأطفال الصغار واللعب معهم .. كمان ممكن نلاقى الكثير والكثير من الكتب اللى هتساعدنا .. أنا جبت كتب بسيطة لتعليم الصغار الألوان المختلفة

 

أيضا قناة بى بى إس التعليمية الأمريكية أو قناة براعم للأطفال اللى بالعربية قنوات تلفزيونية أشوفها هادفة وتعلم الأطفال لو بتوصل لكم يبقى كويس وممكن تساعدنا لأن عليها برامج مثل شارع سمسم وقطار الحكايات وغيرها باللغتين العربية والإنجليزية