مطبخ مغتربة
مطبخ مغتربة :: الشوريك المصري
الشوريك هو نوع من أنواع المخبوزات الحلوة مشهور جدا فى مصر موجود بكل المخابز تقريبا .. يؤكل مع كوب شاى أو لبن دافئ .. حلو شتاء وصيفا .. صباحا ومساء يعني بكل الأوقات جميل تعالوا نشوف بيتعمل إزاي
:: المقــــاديـــر
٣ كوب دقيق متعدد الإستعمال
٢/١ كوب زيت ـ إستخدمت زيت ذرة
٢/١ كوب سكر أبيض
١ بيضة
١ معلقة كبيرة خميرة جافة
من نصف لـ ٤/٣ كوب لبن دافئ للعجن
للوجة
خليط بيض – بيضة مع معلقتين لبن أو ماء + رشة فانيليا
سمسم وسكر أبيض
نبدأ بخلط المكونات الجافة معا جيدا السكر والخميرة والدقيق ثم نضيف البيض والزيت ونعجن ثم نضيف اللبن قليلا قليلا حتى نحصل على عجينة لينة ومتماسكة لا تلتصق باليد وبنفس الوقت غير يابسة
نتركها تختمر فى مكان دافئ لمدة ساعة ثم نضربها باليد – نديها بوكس يعني – ونتركها تختمر ساعة أخرى …ونستمر هكذا ٣ أو ٤ مرات
السر فى نجاحها هو التخمير المستمر
نبدأ بتشكيلها زى الصورة هو ده أكتر شكل مشهور بمصر .. وممكن على شكل ضفيرة أو أى شكل تحبوه
نتركها تختمر نصف ساعة بعد التشكيل
ثم نمسح الوجه بخليط البيض ونرش السمسم والسكر
تدخل فرن مسخن مسبقا على ٣٥٠ درجة فهرنهايت .. وتترك حوالى ٢٠ دقيقة أو أقل على حسب الفرن
إنتبهوا ألا تحترق .. ونتابعها حتى يصبح الوجه بني خفيف
تخرج من الفرن وتترك لتبرد قليلا وبالهنا والشفا
مطبخ مغتربة :: العاشـوراء
العاشورا أو العاشوراء طبق موجود في كل بلدان العالم العربى وموجود بتركيا أيضا … يقال إن العاشورا أصلها من أيام سيدنا نوح لما رسيت السفينة وكانوا عايزين يآكلوا حاجة مكانش معاهم غير حبوب … حطوها مع اللبن وبقيت العاشورا .. لكن اللى نعرفها فى مصر بتتعمل بالقمح الحبة الكاملة ومفيهاش أى حبوب أخرى وتزين بالمكسرات والزبيب وعادة بنعملها فى ١٠ محرم من السنة العربية لما بنصوم يوم عاشوراء .. وهى على العموم تتعمل بأى وقت من السنة حلوة ولذيذة ومغذية
::هنحتاج
١ كوب قمح من بتاع البليلة ده … تلاقوه هنـــا شكلة من أمازون
٥ أكواب ماء
٤ ونصف كوب لبن حليب سائل
نصف كوب سكر أبيض – أو حسب الرغبة
٦معالق نشا مذابة فى نصف كوب من اللبن البارد
فانيليا/ماء ورد حسب الرغبة
للتزيين :: مكسرات وزبيب
:: الطريـقة
يغسل كوب القمح جيدا للتخلص من أى شوائب
نضع الكوب فى حلة وعليه أكواب الماء على نار عالية حتى الغليان ثم نهدى النار عليه ونسيبه حتى تمام النضج – حوالى ٤٥ دقيقة لغاية لما يكون شكله زى الصورة كده
نضيف اللبن والسكر ونقلب حتى يذوب السكر تماما ثم نضيف الفانيليا أو ماء الورد
نضيف النشا المذاب فى اللبن للحلة ونقلب حوالى ١٠-١٥ دقيقة كمان حتى يتخن
يترك ليهدأ ويغرف فى أطباق ويزين بالمكسرات المختلفة والزبيب حسب الرغبة
وبالهنا والشفا
مطبخ مغتربة :: الملبن من وصفات حلويات المولد
الملبن من أجمل حلويات المولد .. عندنا فى مصر نوع إسمه الملبن الحبل وده بيكون ملبن أبيض وفيه عين جمل – جوز- ونوع تانى بيكون ملبن أحمر وفيه بندق أو سادة خالص
الملبن الحبل ده علشان يتعمل محتاج عين الجمل يتلضم فى حبل ويتغطس الحبل عدة مرات فى خليط الملبن لغاية لما يتكون على الحبل ملبن سميك وفي نصه عين الجمل … طبعا دي حاجة صعب نعملها فى البيت … علشان كده عملته مربعات وخلاص يعني ملبن بعين الجمل بس مقطع مربعات.. طعمه جميل برضه ومش هتفرق معانا الأشكال الهندسية قوي يعني
ويوجد أيضا الملبن الملون بنكهات مختلفة .. لكن أشهر واحد هو الملبن الأحمر بنكهة فراولةعلى ما أتذكر وكان بيكون فيه ساعات بندق
تعالوا نشوف بيتعمل إزاي
::المقــــاديـــر
٣ كوب سكر
٢ونصف كوب ماء
٥ ملاعق جيلاتين بودرة
٥ ملاعق نشــــا
قطرات من ماء الورد
فانيليا + مكسرات إختيارية
للملبن الألوان :: ألوان صناعية للطعام ومكسبات طعم
::الطــريقـــــــة
يذاب الجيلاتين في نصف كوب ماء والنشا فى كوب ماء ثم نضيفهم معا إلى باقى المقادير- عدا الفانيليا وماء الورد أو أى نكهات وألوان أخرى- على نار متوسطة حتى الغليان
عند الغليان نضيف ماء الورد والفانيليا ونطفئ النار ونترك الخليط يبرد حوالى ١٠ دقائق
نحضر قالب بايركس ٩*٩ تقريبا ونخلط معلقة كبيرة نشا + معلقة كبيرة سكر بودرة ونرش بيهم القالب ثم يصب الخليط فوقهم ونضيف المكسرات المرغوب فيها
يترك حوالى ساعة حتى يهدأ تماما ثم يدخل الثلاجة على الأقل ٤ ساعات أو خلال الليل
بإستخدام سكين حاد – يمكن غمس طرفه فى نشا وسكر بودرة- نقطع الملبن مربعات صغيرة أو حسب الرغبة
يقدم سادة أو يغطى من كل الجوانب بالسكر البودرة
لعمل الملبن الألوان نضيف الألوان والنكهة – نبدأ بثمن معلقة من النكهة- ونتركه يبرد ثم نتذوق الخليط وإذا أردنا زيادة النكهة .. نزيدها أقل من ثمن معلقة فى المرة على حسب شدة النكهة حتى لا تزيد مننا النكهة عن اللزوم زيصبح الطعم لاذع
يدخل الثلاجة أيضا لمدة لا تقل عن ٤ ساعات – أنا تركته يوم كامل تقريبا
نخرج القوالب ونغمسها من كل جانب بالسكر العادي- ودي خطوة إختيارية .. فقط حبيت أعملها لأولادي لإعطاء شكل أجمل
يقطع مكعبات ويغطى بالسكر من كل الجوانب ويترك لينشف يوم أو إتنين حتى يتماسك جيدا
يحفظ بعلبة محكمة الغلق ويقدم بالهنا والشفا
::ملحوظات عامة
أولادي عجبهم من غير السكر .. يعني هو طبعا اللى بالسكر عجبهم برضه بس بيقولوا من غير السكر أحلى
الحلويات دي ممكن نعملها بطريقة صحية أكثر بإستخدام العصير الطبيعي لإضفاء اللون والنكهة
مطبخ مغتربة :: السمسمية من حلاوة المولد
كل عام وأنتم بخير … المولد النبوي الشريف على الأبواب أعاده الله علينا جميعا وعلى أوطاننا بخير
الحقيقة في بلدي الحبيبة مصر … وعند حلول شهر ربيع الأول تزدان مآذن المساجد بالأنوار والدروس والخطب التي تحث على تتبع خطاه عليه الصلاة والسلام والتأسي بأخلاقه الكريمة … علاوة على الأمسيات الدينية فى إذاعة القرآن الكريم
ومن بين مظاهر الإحتفال بالمولد النبوي الشريف شراء حلوى المولد … مش عارفة الحلويات دي موجودة بمصر فقط واللا فى العالم العربي كله .. من أشهرها الملبن الحبل .. والملبن السادة والسمسمية والفولية والحمصية وخلافه من أصناف الحلويات اللذيذة
ولإضفاء بعض مظاهر الإحتفال على بيتنا .. والتي منها قص الحكايات والقصص عن سيرته العطرة عليه الصلاة والسلام … بدأنا نعمل حلويات المولد وأولها وأحبها لقلبي وقلب الكثيرين هي السمسمية أو حلاة والسمسم
الحلاوة دي بتتعمل بالسمسم والفول السوداني .. ودلوقتى بتتعمل بكافة أنواع المكسرات .. يعني بقى فيه لوزية وبندقية .. وكاجويه برضه ههههه .. الأساس واحد وبنحطه على أى نوع مكسرات نحبها .. تعالوا نعمل الأساس
:: هنحتـــاج الآتي
١ وربع كوب سكر أبيض
ربع كوب ماء عادي من الحنفية
٢ معلقة كبيرة كورن سيرب
١ معلقة صغيرة ليمون
ماء ورد حسب الرغبة ورشة فانيليا
نرفع أول ٣ مقاديرا على النار وعند الذوبان نضيف الليمون وماء الورد والفانيليا
نتركها على النار ٥ دقائق أو أكثر حتى يتكون عندنا سائل كثيف زى الصورة اللى فوق كده
لكل نصف كوب سمسم محمص أضفت معلقتين كبار من خليط السكر المعقود .. يعني نضيف الخليط حتى يلتصق السمسم مع بعضه زى الصورة
بمساعدة ورق الخبز أو ورق الزبدة نشكل السمسم على هيئة قالب مستطيل ونتركه حوالي ربع ساعة لغاية لما ينشف
يقطع بسكين حاد إلى مستطيلات أو قطع صغيرة
يحفظ في علبة محكمة الغلق .. ويقدم بالهنا والشفا
أيضا بنفس الطريقة عملتها بالكاجو الغير محمص … بس الطعم كان هيبقى أحلى لو كنت حمصته قليلا
ملحوظة :: لو تركنا خليط السكر هيتجمد وينشف .. علشان كده يستحسن نحطه فى حمام ماء ساخن فترة العمل على المكسرات علشان يحتفظ بالسيولة بتاعته
مطبخ مغتربة :: مخدة الباشا من المطبخ الليبي
مخدة الباشا طبق من المقبلات لذيذ جدا جدا وأصله ليبي على ما أعتقد … سهل وظريف والحقيقة إحنا أكلناه مع شوربة وخلاص ده كان الغدا بتاعنا كافى جدا جدا وشلطة .. لكن هو يعتبر من المقبلات تعالوا نشوف بيتعمل إزاي
:: هنحتاج الآتي
١٢ قطعة كريب .. لو مفيش عندكم وصفة مفضلة أنا إستخدمت وصفة من هنــــا بس خليتها سائلة أكتر شوية
١/٢ باوند لحمة مفرومة ومعصجة وعليها حوالى كوب بقدونس مقطع
بطاطس مسلوقة أو مقلية مكعبات
بيض وبقسماط للتغطية
الطريقة
نخلط البطاطس المسلوقة مع اللحمة المفرومة المعصجة وممكن نضيف عليهم بيضة ورشة فلفل وملح
بعد ما نعمل الكريب نفرد كل قطعة ونضع فى المنتصف حوالى معلقتين من الخليط السابق
نطبق الكريب على شكل مربع ثم نغمسه فى البيض ثم البقسماط ويقلى في زيت غزير
بس خلاص يقدم بالهنا والشفا
ممكن طبعا ننوع فى الحشو بس دي الحشوة الأصلية على حسب ما فهمت … ممكن نضيف حشوات بالجبن وخلطات البيتزا .. حشوات فراخ يعني كل واحد يخترع المخدة الخاصة بيه وبألف هنا
مطبخ مغتربة :: المنيو الأسبوعي ٣٠ -٥ يناير ٢٠١٤
منيـو الغذاء الأسبوعـي إن شاء الله هيكون كالآتى
الإثنين: سمك بالصينية ومقلي + أرز أبيض
الثلاثاء :كوسة بالشبت + أرز أبيض وكفتة
الأربعاء : ملوخية + بامية باللحم + أرز بالشعيرية
الخميس : بواقى من الأيام السابقة
الجمعـة : بواقي من السابق
السبت : كشري مصري بالشطة + مهلبية يم يم
الأحد : كشري