مشروبات

السلام عليكم

في هذا الشتاء القارس – والله يهون علينا جميعا وعلى إخواتنا السوريين وكل بلادنا يا رب- لا بد وحتما من التفكير في بعض الأكلات اللي بتدفينا وتعطينا النشاط والحيوية ومنها طبعا شوربة العدس الأصفر وكمان من المشروبات المنتشرة بالوطن العربي في فصل الشتاء هو السحلب الجميل .. واليوم هنشوف مع بعض كيفية تحضير السحلب المنزلي

الحقيقة السحلب متوفر هنا بودرة بأغلب المحلات العربية لكن مشكلتي معاه إن طعمه بيكون فيه نكهة قوية لماء الزهر أو ماء الورد وأنا مش بأحب النكهة دي تكون قوية كدة علشان كدة دورت ودعبست إني أعمله بالبيت وكانت النتيجة جميلة جدا وطعمه حلو وعلى مزاجنا لأن كمان الجاهز بيكون السكر فيه كتير حبتين ومع إننا بنحب كل السكريات لكن برضو الجاهز بيكون تقيل شوية في السكر بتاعه

طبعا من المميزات عمله بالبيت إنكم بتتحكموا في كل حاجة فيه .. النكهات .. والكثافة والسكر بتاعه وهكذا .. الوصفة دي هتعمل سحل متوسط الكثافة وبرضو متوسط في السكر .. وإذا عايزين سكر أكثر تقدروا تزودوا السكر على مزاجكم وإذا عايزينه سميك أكتر تقدروا تزودوا من البودرة لكل كوب أو من الأول تزيدوا النشا وهكذا وطبعا لو بتحبوا طعمه بماء الزهر حطوا ماء الزهر مع اللبن وإنتم بتعملوه يعني ممكن كمان تعملوا كل كباية بنكهة وكثافة وسكر مختلف عن الباقيين وعلى حسب كل فرد ومزاجه

أتمنى تجربوه وأسمع تعليقاتكم .. ويا رب يعجبكم .. جربوه بكمية صغيرة الأول لغاية لما تظبطوا الطعم على رغبتكم وبالهنا والشفا

For the recipe in English … CLICK HERE

مشروب السحلب المنزلي

2016-01-31 02:14:52

بودرة السحلب صناعة منزلية ... ألذ وأطعم

Write a review

Save Recipe

Print

Ingredients

1. ١ ك لبن بودرة
2. ١ ك سكر بودرة *
3. ١ كوب جوز هند غير محلى **
4. ١ كوب أرز - يفضل المصري
5. ٤ م ك نشا ***
6. ١\٢ م ص فانيليا بودرة
7. ١ م ك مستكة

إختياري

1. ١\٢ ك سمسم محمص
2. ٢ م ص قرفة مطحونة

عند التقديم

1. مكسرات وزبيب

Instructions

1. نقوم بطحن الارز حتى يصبح بودرة ناعمة جدا قدر المستطاع
2. نضيف كل المقادير على بعضها الأرز المطحون - اللبن البودرة - الفانيليا - السكر - جوز الهند - المستكة بعد طحنها أيضا والقرفة والنشا
3. نخلط المقادير جيدا وتحفظ بعلبة محكمة الغلق

عند الإستخدام

1. لعمل كوب واحد نضيف ٣ م كبيرة من الخليط مع ١ كوب لبن على نار متوسطة ونستمر بالتقليب حتى يتماسك الخليط ويصبح سميك
2. يصب في كوب التقديم ويزين بالمكسرات
3. وبالهنا والشفا

Notes

1. * يمكن زيادة السكر على حسب الرغبة
2. ** جوز الهند ممكن يكون إختياري لو مش بيعجبكم ما تضيفوهوش
3. *** هذا الخليط لعمل سحلب متوسط الكثافة إذا أردتموه كثيف أكتر نزيد من النشا أو نزيد من عدد الملاعق لكل كوب مع الأخذ في الإعتبار إن السكر كميته هتزيد بالخليط
4. بالإمكان إضافة ماء الورد أو ماء الزهر إذا بتحبوه لإعطاء المزيد من النكهة

مغتربة http://moghtareba.com/

السلام عليكم

اليوم جايبة لكم مشروب خفيف وصحي وهو شاي اللومي الأسود

الشاي ده إحنا ما نعرفهوش في مصر لكن يعرفوه أهل الخليج .. طعمه كأنه ليموناتة لكن أنا عملته ساخن للظروف الجوية اللي بنمر بيها اليومين دول .. تحبوا تشوفوا

درجات الحرارة الأسبوع اللي فات وصلت عندنا -١٧ مئوية لأن نزل تلج بالهبل زي ما بنقول في مصر ولغاية دلوقتي مش راضي يسيح بالكامل ومتكوم على الأرض

المشكلة فعلا اللي بأعاني منها في التلج هي السواقة .. العربيات بتتزحلق كأنكم سايقين على زيت مخيفة جدا والصراحة العربية إتزحلقت قبل كدة مني مرتين وكانت رعب

البرد ده بيشوقنا للشوربات والمشاريب والنهاردة حبيت أقدم لكم مشروب ينفع شتوي وينفع صيفي على حسب إنت هتقدموه إزاي .. هو مر شوية لكن بيدفي وأسمع إنه حلو جدا للي بيعاني من مشاكل في الهضم .. وطبعا مليان فيتامين سي وبينفع في حالات البرد والأنفلونزا المنتشرة والله الحافظ

أتمنى تكون وصفة اليوم عجبتكم وإن شاء الله تجربوها وتعجبكم .. وبالهنا

شاي اللومي

2015-12-24 13:54:49

مشروب جميل منعش في الصيف ولذيذ ويدفي في الشتاء

Write a review

Save Recipe

Print

Ingredients

1. ٣ حبات لومي عماني
2. ١\٤ ك سكر - أو حسب الرغبة
3. ١ ونصف ك ماء
4. قليل من الزعفران - إختياري

Instructions

1. نشق حبات الليمون بسكين - أو نكسره ونستخدم قلب الليمون**
2. في براد نضع اللومي مع الماء والسكر والزعفران ونتركه حتى يغلي
3. نهدي النار ونتركه على الهادي لمدة ١٠ دقائق
4. نرفعه من على النار ونصفيه
5. يقدم ساخنا أو بارد
6. وبالهنا والشفا

Notes

1. **بعض الناس يفضل إستخدام قلب الليمون فقط بدون القشرة لأن القشرة أحيانا تسبب مرارة غير مرغوبة بالمشروب

مغتربة http://moghtareba.com/

السوبيا المصرية … مشروب طعمه حلو وهو مشروب مشهور جدا في شهر رمضان المبارك يباع في كل شارع وعند كل ناصية

ممكن نشتري من عند العطار أو من السوبر ماركت المشروب على خيئة بودرة و نضيف له اللبن مع التقليب لكن في الكثير من الأحيان يكون االسكر كتير جدا جدا في المشروب ولو زودنا لبن بيفقد نكهة جوز الهند المميزة له

اليوم إن شاء الله هنعمل مشروب السوبيا بالبيت وعلى مزاجنا طريقة مضمونة وإن شاء الله تعجبكم

هنـــــا فيديو قصير عن طريقة تحضير السوبيا المصرية بالبيت على قناة مغتربة باليوتيوب أتمنى ينال إعجابكم