مساكين هم من لا يحبون الكزبرة 
… فعلا الكزبرة الخضراء رااائعة بكل المقاييس ليها عطر رائع وجميل يحسسك إن الدنيا ربيع والجو بديع
ده غير إن له العديد والعديد من الفوائد الصحية ومنها إنه
مضاد للأكسدة , مضاد للإكتئاب والقلق , يحسن المزاج , يحسن النوم , يقلل من معدلات السكر فى الدم ويساعد مرضى السكر , زيت الكزبرة مضاد للفطريات بالفم , مضاد للبكتريا , قد يساعد فى حالات إنسداد الشرايين , .. وغيرها الكثير من الأمراض إسألوا عنها العم جوجل
أنا أعرف ناس بتحط ورق الكزبرة الخضراء بين أسنانها لتعطير الفم … فعلا رائع ورائحته جميلة جدا جدا وأنا مهووسة بالكزبرة الخضراء
واليوم لإشباع هوسي بالكزبرة هأقدم لكم طبقين مقبلات أو من الأطباق الجانبية السهلة جدا جدا بإستخدام الكزبرة الخضراء
أول طبق هو : سلطة الطماطم بالكزبرة
هنحتاج الآتى
٢-٣ حبات طماطم جامدة مش طرية
فصين توم مفرومين
١ معلقة كبيرة زيت زيتون
١ معلقة صغيرة عصير ليمون
كبشة كزبرة مقطعة صغير
ملح على حسب الذوق
رشة كمون – إختياري
فقط إخلطوا المكونات مع بعضها جيدا ونسيبها نصف ساعة حتى تتبل الطماطم جيدا وتآخد ريحة الكزبرة … وإستمتعوا بأسهل وأحلى سلطة
يا سلام عليها مع العيش المحمص روعة فعلا .. من نعم الله علينا الكزبرة دى
ثانيا :: سلطة البطاطس بالكزبرة الخضراء والأعشاب
هنحتاج الآتى
٣-٤ حبات بطاطس متوسطة – مغسولة ومقطعة مكعبات
١ معلقة صغيرة توم مفري
٢ معلقة كبيرة زيت زيتون
١ معلقة صغيرة روز مارى ناشف
١ معلقة صغيرة ريحان ناشف
١ معلقة صغيرة زعتر ناشف
رشة ملح
كبشة كزبرة مقطعة
نسخن الفرن على درجة حرارة ٣٥٠ فهرنهايت وفى هذه الأثناء نخلط المكونات مع بعض جيدا ما عدا الكزبرة ثم نضعها فى الفرن حتى تستوى البطاطس جيدا ممكن نضيف للصينية ٢/١ كوب ماء حتى لا تحترق البطاطس
عند الإنتهاء نتركها تبرد قليلا ثم نضيف عليها الكزبرة ونخلط جيدا
وتقدم بالهنا والشفا
ودلوقتى مع نصيحة بسيطة لحفظ الكزبرة
لو إشتريتوا كزبرة كتير وعايزين تحفظوها ممكن تحفظوها فى مكعبات الفريزر وتحطوا معلقة كبيرة من الكزبرة المقطعة فى كل مكعب ونضيف عليها ماء أو ممكن عصير ليمون ونحفظها بالفريزر وتستخدم وقت اللزوم بس مش فى السلطات يعني تنفع فى الطبخ أو الشوربات وخلافه
