أطباق جانبية وسلطات

خبز الرقاق مشهور جدا بالعالم العربى وبيتعمل منه وصفات وأطباق حلو وحادق متنوعة وأشهرها الفتة في بلاد الشام وصينية الرقاق باللحمة المفرومة في مصر

أنا عمري ما كنت أحب الرقاق لكن سبحان الله فعلا الإنسان بيتغير وذوقه بيتغير … يمكن علشان الصينية دي بتفكرني بمصر وبأهل مصر ورمضان والعيد الكبير … يمكن علشان كده بدأت أحبها فعلا !!!! …..المشكلة عندنا إننا مش دايما بنلافي خبز الرقاق بالمحل الإنترناشيونال أو العربي هنا

بس مش هنخلي حاجة بسيطة زي دي تقف قدامنا إحنا قدها وقدود زي ما بنقول بالمصري … الرقاق عجينته سهلة جدا مش محتاجة كلام كتير ميه ومدقيق وملح وبس … إعجن وإفرد وإخبز وخلاص أسهل خبز ممكن تعملوه

أما بالنسبة لصينية الرقاق المصري فهي عبارة عن طبقات من الرقاق بنطريها الأول بشوربة أو لبن أو خليط معاها زبدة وبعيدن لحمة معصجة وبعيد باقي الطبقات وبينها زبدة وعلى الوش شوية زبدة كمان ونسقيها شوربة وخلاص خلصت

تقدروا تشوفوا الطريقة بالتفصيل ومقادير الخبز من هنــــا وما تنسوش تشتركوا بقناة مغتربة على اليوتيوب .. أتمنى وصفة اليوم تعجبكم

 

المفتول الفلسطيني لو ما تعرفوهوش هو عامل زي الكسكسي شوية في طريقة إعداده يعني هو دقيق ملفوف حوالين برغل في الكسكسي بيكون ملفوف حوالين سيمولينا

المفتول الفلسطيني حباته أكبر من الكسكسي وأعتقد هنا بيسموه الكسكسي الإسرائيلي بس مش متأكده

المفروض بيكون لونه غامق لأن فيه دقيق الحبة الكاملة للقمح أو الدقيق الأسمر

يؤكل حادق وحلو زي الكسكسي ويتعمل في سلطات برضه … طريقة إعداده التقليدية متعبة شوية على الأقل بالنسبة لمبتدئة مثلي لكن أنا إخترعت له طريقة ظريفة ما شفتهاش في مكان من قبل وهي إستخدام مضرب البيض لعمل المفتول

 لو عايزين تعلموه التفاصيل في الفيديو … ويا رب يعجبكم

 

أنا عمري ما سافرت للسودان ولا حتى لأسوان في مصر !!!! لكن الحقيقة أنا تعرفت على ناس من السودان أثناء وجودنا في المملكة العربية السعودية وأنا صغيرة … ومن إحتكاكي بيهم أقدر أقول لكم إنهم شعب طيب جدا جدا وخلوق فعلا والسماحة في وجوههم ربنا يكرمهم ويفك كرب بلادهم يا رب

طبق اليوم هو أشبه بسلطة البابا غنوج لو تعرفوها لكن مختلفة لأن فيها طماطم وأيضا زبدة الفول السوداني اللي بتعطيها طعم متميز

مقاديرها سهلة ومتوفرة وتسمى بسلطة الأسود لأنها معمولة من البانجان الرومي الأسود .. مع بعض الإضافات زي الثوم والليمون والبصل الأخضر وزبدة الفول السوداني … جميلة فعلا وأتمنى تعجبكم

 

ده فيديو قصير عن المقادير وطريقة الإعداد … ما تنسوش تشتركوا في قناة مغتربة وتعملوا لنا لايك

إنشروها لو عجبتكم

• Click to share on Facebook (Opens in new window)
• Click to share on Pinterest (Opens in new window)
• Click to share on Twitter (Opens in new window)
• Click to share on Google+ (Opens in new window)

الأومو رايس هو ببساطة أرز بأي نوع من البروتين ملفوف في بيض مقلي … على الرغم من غرابة الطبق لينا إلا إن طعمه جميل جدا وجديد جدا جدا وأنصحكم تجربوه إذا كنتم بتحبوا تجربوا أكل جديد ومن مطابخ مختلفة حول العالم

المقادير والوصفة في الفيديو

الأوزي الشامي هو أكلة شامية  جميلة جدا جدا تقدم فى الولائم والحفلات والأعراس والمناسبات مثل رمضان وغيره … بتتعمل باللحم لكن وصفتنا اليوم هتكون بالفراخ

الأوزي هو ببساطة أرز مع خضروات ولحم بداخل عجينة رقيقة وجميلة .. الوصفة أخذتها من صديقة لي وبأعملها بعجينة الباف باستري … أتمنى تجربوها سهلة جدا جدا وجميلة حتى إبني الصغير اللي بقى متعب فى أكله أكل منها وعجبته

:: المقاديــر

٣ كوب أرز بسمتي مطبوخ ومتماسك يعني مش معجن- يستحسن تقليل كمية المية المقترحة قليلا

٣ معالق كبيرة زيت

١ باوند صدور فراخ فيلية

فلفل ألوان أصفر-أحمر-وأخضر

بصلة متوسطة مبشورة

جزر مقطع صغير وممكن كمان نستخدم بسلة

باكيت باف باستري

ملح وفلفل وبهارات

مكسرات محمرة -إختياري

:: الطــريقـــة

في طاسة على النار نضع الزيت ونقلب فيه قطع الدجاج حتى ينشف ماؤه

نضيف البصل مع التقليب ثم الجزر ونوطي النار حتى تستوي قطع الدجاج

نضع الفلفل الملون والبهارات والملح والفلفل ونتركها ٥ دقائق

نضيف الأرز الناضج لخليط الفراخ ونقلب جيدا وممكن نضيف المكسرات فى هذه الخطوة

نفرد مربعات الباف باستري قليلا ثم نجيب طبق غويط ونضع فيه العجينة حتى تغطي الطبق من كل جانب كما بالصورة

نغرف خليط الأرز داخل الباف ونقفل الأطراف جيدا ثم نقلبها ونضعها فى طبق بايركس للفرن

يمسح الوجه بمخفوق البيض( بيضة مضروبة مع معلقتين ماء أو لبن) وفلفل أسود

تدخل فرن ٣٥٠ فهرنهايت حتى تتحمر وتنضج عجينة الباف

تقدم ساااااخنة مع السلطات … وأشهرها سلطة الزبادي

ملحوظة :: يمكن إستبدال عجينة الباف بعجينة السبرينج رولز

وبالهنــــا والشفـــــا

مخدة الباشا طبق من المقبلات لذيذ جدا جدا وأصله ليبي على ما أعتقد … سهل وظريف والحقيقة إحنا أكلناه مع شوربة وخلاص ده كان الغدا بتاعنا كافى جدا جدا وشلطة .. لكن هو يعتبر من المقبلات تعالوا نشوف بيتعمل إزاي

:: هنحتاج الآتي

١٢ قطعة كريب .. لو مفيش عندكم وصفة مفضلة أنا إستخدمت وصفة من هنــــا بس خليتها سائلة أكتر شوية

١/٢ باوند لحمة مفرومة ومعصجة وعليها حوالى كوب بقدونس مقطع

بطاطس مسلوقة أو مقلية مكعبات

بيض وبقسماط للتغطية

الطريقة

نخلط البطاطس المسلوقة مع اللحمة المفرومة المعصجة وممكن نضيف عليهم بيضة ورشة فلفل وملح

بعد ما نعمل الكريب نفرد كل قطعة ونضع فى المنتصف حوالى معلقتين من الخليط السابق

نطبق الكريب على شكل مربع ثم نغمسه فى البيض ثم البقسماط ويقلى في زيت غزير

بس خلاص يقدم بالهنا والشفا

ممكن طبعا ننوع فى الحشو بس دي الحشوة الأصلية على حسب ما فهمت … ممكن نضيف حشوات بالجبن وخلطات البيتزا .. حشوات فراخ يعني كل واحد يخترع المخدة الخاصة بيه وبألف هنا

البصارة .. طبق مصرى شعبى .. بالنسبة لى طول عمرى بأقل عليه طعمية سائلة لأنه بالظبط زى الطعمية بس مسلوقة

البصارة من الأطباق المغذية .. والمليئة بالخضروات و أيضا غير المكلفة فهى وجبة إقتصادية وسهلة ولذيذة

تعالوا نشوف بتتعمل إزاى

 

 

المقادير

١ كوب فول مدشوش

١ بصلة كبيرة مقطعة أو ٢ بصلة متوسطة

٣ فص ثوم مفروم

٢/١ كوب من كل من كزبرة خضراء ز بقدونس أخضر

٤/١ كوب شبت أخضر

٣ أكواب ماء مغلى

ملح وفلفل وكمون

زيت حوالى ٤ معالق كبار

 

 

الطريقة

 

فى وعاء على النار نسخن الزيت ثم نضيف إليه الثوم ونصف البصل المقطع مع التقليب حتى يصفر لونه

نضيف باقى المقادير من فول وخضرة ثم الماء والملح والفلفل والكمون ننتظر حتى يغلى المزيج ثم نوطى النار ونغطى الوعاء حتى تمام النضج وممكن نزود ماء لو شعرنا بالإحتياج لكده

نرفعها من على النار ونتركها تبرد قليلا … ثم فى الفود بروسيسور نضرب المكونات معا إلى أن تصبح فى قوام المهلبية كده

 

 

في طاسة على النار نحمر البصل المتبقي  زى بصل الكشري كده … نغرف الخليط فى أطباق وتزين بالبصل المحمر

يقدم عادة مع خبز البيتا أو الخبز البلدى وبالهنا والشفا