السلام عليكم
في هذا الشتاء القارس – والله يهون علينا جميعا وعلى إخواتنا السوريين وكل بلادنا يا رب- لا بد وحتما من التفكير في بعض الأكلات اللي بتدفينا وتعطينا النشاط والحيوية ومنها طبعا شوربة العدس الأصفر وكمان من المشروبات المنتشرة بالوطن العربي في فصل الشتاء هو السحلب الجميل .. واليوم هنشوف مع بعض كيفية تحضير السحلب المنزلي
الحقيقة السحلب متوفر هنا بودرة بأغلب المحلات العربية لكن مشكلتي معاه إن طعمه بيكون فيه نكهة قوية لماء الزهر أو ماء الورد وأنا مش بأحب النكهة دي تكون قوية كدة علشان كدة دورت ودعبست إني أعمله بالبيت وكانت النتيجة جميلة جدا وطعمه حلو وعلى مزاجنا لأن كمان الجاهز بيكون السكر فيه كتير حبتين ومع إننا بنحب كل السكريات لكن برضو الجاهز بيكون تقيل شوية في السكر بتاعه
طبعا من المميزات عمله بالبيت إنكم بتتحكموا في كل حاجة فيه .. النكهات .. والكثافة والسكر بتاعه وهكذا .. الوصفة دي هتعمل سحل متوسط الكثافة وبرضو متوسط في السكر .. وإذا عايزين سكر أكثر تقدروا تزودوا السكر على مزاجكم وإذا عايزينه سميك أكتر تقدروا تزودوا من البودرة لكل كوب أو من الأول تزيدوا النشا وهكذا وطبعا لو بتحبوا طعمه بماء الزهر حطوا ماء الزهر مع اللبن وإنتم بتعملوه يعني ممكن كمان تعملوا كل كباية بنكهة وكثافة وسكر مختلف عن الباقيين وعلى حسب كل فرد ومزاجه
أتمنى تجربوه وأسمع تعليقاتكم .. ويا رب يعجبكم .. جربوه بكمية صغيرة الأول لغاية لما تظبطوا الطعم على رغبتكم وبالهنا والشفا
For the recipe in English … CLICK HERE
مشروب السحلب المنزلي
2016-01-31 02:14:52
بودرة السحلب صناعة منزلية ... ألذ وأطعم
Ingredients
- ١ ك لبن بودرة
- ١ ك سكر بودرة *
- ١ كوب جوز هند غير محلى **
- ١ كوب أرز - يفضل المصري
- ٤ م ك نشا ***
- ١\٢ م ص فانيليا بودرة
- ١ م ك مستكة
إختياري
- ١\٢ ك سمسم محمص
- ٢ م ص قرفة مطحونة
عند التقديم
- مكسرات وزبيب
Instructions
- نقوم بطحن الارز حتى يصبح بودرة ناعمة جدا قدر المستطاع
- نضيف كل المقادير على بعضها الأرز المطحون - اللبن البودرة - الفانيليا - السكر - جوز الهند - المستكة بعد طحنها أيضا والقرفة والنشا
- نخلط المقادير جيدا وتحفظ بعلبة محكمة الغلق
عند الإستخدام
- لعمل كوب واحد نضيف ٣ م كبيرة من الخليط مع ١ كوب لبن على نار متوسطة ونستمر بالتقليب حتى يتماسك الخليط ويصبح سميك
- يصب في كوب التقديم ويزين بالمكسرات
- وبالهنا والشفا
Notes
- * يمكن زيادة السكر على حسب الرغبة
- ** جوز الهند ممكن يكون إختياري لو مش بيعجبكم ما تضيفوهوش
- *** هذا الخليط لعمل سحلب متوسط الكثافة إذا أردتموه كثيف أكتر نزيد من النشا أو نزيد من عدد الملاعق لكل كوب مع الأخذ في الإعتبار إن السكر كميته هتزيد بالخليط
- بالإمكان إضافة ماء الورد أو ماء الزهر إذا بتحبوه لإعطاء المزيد من النكهة
مغتربة http://moghtareba.com/
هي دي الوصفة المنتشرة وهي كمان اللي بيتعمل بيها كل انواع السحلب التجاري اللي ف السوق بلا استثناء
بس الحقيقة ان اصل السحلب اللي كان موجود زمان بيعتمد علي وجود بودرة نبات السحلب او الثعلبية ولان النبات ده غالي فا استبدلوه بالرز والنشا والفانيليا
هو موجود في تركيا وفي العراق مرة جبته من مصر من عطار في بورسعيد،كان اسمه سحلب تركي وبتحطيله انت الجوز هند والفانيليا وسكر البودرة بس الطعم والقيمه الغذئية وهم طبعا
حاولي تجربيه هايعجبك
السلام عليكم فضفضة .. فينك من زمان ؟ يا رب تكوني بخير
ده أكيد مش هألاقيه هنا هأحاول لما أنزل مصر أدور عليه بس خايفة حد يخمني فيه :)) ويديني أي حاجة والسلام
طيب لو لقيته أحطه بدل معيار الرز؟ وهل أحط نشا برضو واللا هو كفاية؟
وعليكم السلام ورحمة الله وبركاته
الحمد لله انا كويسه ومتبعاكي علي طول
بصي هو وحده بيبقي مش تقيل اوي زي اللي عليه نشا، فانا كنت بازود عليه معيار النشا (علي حسب ماتحبي السمك بتاعه معلقتين كبار علي كوباية بيبقي كويس ) والمكسرات وجوز الهند،بس حقيقي فارق جدا عن اللي بالرز العادي ده
الخوف فعلا ان تتخمي فيه
لو تعرفي حد عراقي او تركي مكن يجيبوهلك من هناك اضمن من مصر
جزاك الله خيرا على الرد … لما أشوف كدة أعتقد واحدة من صاحباتي هنا تعرف ناس من العراق