أولا آسفة على عنوان الموضوع لكن حقيقي لازم أفضفض وأشوف رأيكم يمكن العيب في وأنا مش شايفة وأرجو إنكم توضحوا لي وتردوني للصواب
من فترة مش بالقليلة وأنا ملاحظة الفشخرة في أغلب الناس .. واللي ما يعرفش منكم إيه هي الفشخرة يعني التباهي بالحاجات اللي عندكم على خلق الله التانيين سواء بقى هم يقدروا يشتروا اللي معاكم أو لا
يمكن أنا اللي معقدة نفسيا وسيكوباتية حبتين؟ مش عارفة الصراحة بس بأسمع حاجات غريبة وهأديكم أمثلة
العيال ولاد إخواتي وأولاد العائلة في مصر حطوا لي شرط .. أي هدوم أشتريها أو أحذية ليهم تبقى ماركة نايك أو أديداس والبنات لازم البرفانات تكون من فكتوريا سيكريت !! ومش أي مكان تاني .. طيب دول مقدور عليهم يعني كبيرهم ٥٠ دولار مثلا لو حذاء رياضي من نايك مع التخفيضات والذي منه
ناس بتتكلم عادي جدا إنهم مش عارفة جابوا شنطة إيه وماركة إيه بـ ٣٠٠ دولار!!! طبعا كان هيغمي علي من الرقم ما إنتو عارفين خلاص بطلت الكلام ده من زماااان
الأدهى بقى واللي فعلا مش مصدقاه واحدة صاحبتي .. صديقاتها وأهلها بالإمارات يطلبوا منها شنط ماركة إسمها لوي فوتون الشنطة الواحدة عنده بتبدأ بألف دولار!!! وفيه يوصل ٣٠٠٠ وأكتررر يا خبرررررر!!! وأسألها ليه آل إيه هي في الإمارات أغلى من كده بكتير … طيب ليه يشتروها من أساسه .. السبب عجيب قوي علشان مرات أخوها واللا بنت عمها بتشتريها وهم بيتمنظروا على بعض
هاااه فهمتوني؟
كلنا بنحب الماركات والحاجات الشيك أنا مش بأمثل عليكم إني زاهدة في الدنيا .. لا طبعا أنا بأحب برضه أشتري الحاجات الحلوة والماركات .. بس مش كده يا جماعة
كمان اللي فعلا ينرفز إن ممكن اللي بيعمل كده يكون بيمر بضائقة مالية يعني مش مثلا عندهم الفلوس أكوام .. لا ممكن يكون بيمر فعلا بظروف في العمل وبرضه مصممين على كده .. طيب ده معناه إيه؟
الحمد لله أنا ما جربتش يبقى عندي ملايين قبل كده ولا أعتقد أبدا إني حتى لو معايا ملايين إني هأشتري ساعة واللا نضارة شمس ب ٦٠٠ واللا ٧٠٠ دولار واللا الشنطة أم ٢٠٠٠ دولار دي
هل الواحد لو معاه فلوس وبيؤدي حق دينه في الزكاة والصدقات يبقى طبيعي إنه يشتري شنطة بـ ٢٠٠٠ دولار؟!! أعتقد أيوة من حقه في حالة واحدة بس .. لو مفيش حد محتاج الألفين دولار دول بمعنى
لو مفيش حد بيآكل من الزبالة يا إما هيموت من الجوع هو وأولاده
لو مفيش حد بدون مأوى
لو مفيش حد بدون وطن
لو مفيش حد مش لاقي شربة مية نضيفة … لو لو لو
الصور كتير كتير والمآسي أكتر حوالينا وأنا جيبت لكم أخف الصور علشان ما تقولوش إني بأسمم لكم عيشتكم واللا عايزاكم تزهدوا في الدنيا ولو إنها في الحقيقة ما تساويش
مش عايزاكم تفتكروا إن أنا بأعمل نفسي ملاك .. لا أبدا أنا كمان زيكم ساعات بأنسى .. وأنغمس في الدنيا
لكن بالله عليكم .. قبل ما تشتروا شنطة بألف دولار واللا حتى ٥٠٠ فكروا تاني وتالت واللا لو حد قال لكم إشتروا لي الشنطة دي علشان بنت خالتي جابت واحدة مش عارف إيه وماركة إيه .. فكروهم إن فيه ناس في الدنيا دي تعبانة قوي ومحتاجة الفلوس دي مش لمجرد شنطة .. لأ محتاجين الفلوس لمجرد … البقــــــاء حية
,.om Mohamed says
Assalamo alikom dear
i have a long answer for you
but i will be sending it to you in an email shortly
can you please read it there…and just let me know if you did
and your opinion ,kindly.
salam
Amira says
وأنا بإنتظار الإيميل إن شاء الله
arwa says
والله فعلا موضوع الفاخرة ده حاجة صعبة فعلا وتنتشر بين الناس حتى هنا كل ما مقعد مع حد معظم الكلام فاخرة ولا انا اللى متعددة مش عارفة بس انا يشترى حاجات عادية سعرها عادى لظروف المادية وحتى لو كانت كويسة ظروفها ما بتردش ماركات يعنى بصراحة فى ناس محتاجة فقيرة ممكن نصدق بالجلوس دى أفضل لو عندنا زيادة وتسلم يومئذ عن النعيم فأنا كنت قراء عن شاب يتيم وعيد نفسى الف جنية كل شهر علشان نصفهم علاج وصفهم عيشة ياريت نفكر فى الناس دى جزاك الله خيرا على التذكير
sabah says
السلام عليكم كلامك صح مئة في المئة .تصدقوا ثم تصدقوا الدنيا متاع زائل
Amira says
جزاكم الله خيرا على تعليقاتكم والإيميلات اللي وصلتني وأحب هنا أنشر إيميل لقارئة للمدونة مختلفة معانا في الرأي .. ما رضيتش تسيب تعليق علشان ما تجرحش مشاعري وأحب أقول لها ولكل الناس إني معاكم وبيكم بأتعلم إن الإختلاف في الرأي من رحمة ربنا بينا وإن المفروض ما يبقاش عندي ضغينة ولا ضيق لأي حد بيختلف معايا في الرأي في أي شيئ .. رأيي صواب يحتمل الخطأ ورأي غيري خطأ يحتمل الصواب
Amira says
يوة نسيت أحط الإيميل .. أهه بعد إذن القارئة
السلام عليكم ورحمة الله وبركاته
قرأت موضوعك بعنوان الفشخرة الكدابة وهنا إسمحي لي لم يعجبني كلامك وأختلف معاك فما الضير من أن أشتري ما أحب طالما معي المبلغ المطلوب وطالما أتصدق وأدفع الزكاة وأقوم بما علي من واجبات تجاه ربي ولا أضيق على زوجي طالما هو شيئ يسعدني إقتناؤه فلم لا؟ كما إن موضوع الغالي والرخيص يختلف من فرد لآخر فمثلا إذا كان هناك شيئ ب ١٠٠ دولار يمكن واحدة تشوفها غالية والأخرى يكون رخيص بالنسبة لإمكانياتهم المادية .أستشعر أنها فقط عقدة نفسية لأنك مريتي بظروف صعبة في الغربة ماديا
لم أحب ترك تعليق على الموضوع حتى لا أسبب لك الحرج وحتى لا تشعري بالضيق من إختلافي معك في الرأي أمام قراء مدونتك الآخرين
لك مني كل الود