وبدأت ألاحظ إن زوجى مهموم وباله مشغول دائما وتعبان وشايل فعلا جبل هموم الديون
وزى ما أكون فقت لما شفته بالحالة دى كنت فى غفلة من الزمان والمكان
بدأت أفكر فى حلول بينى وبين نفسى ووافقت على الإنتقال للبيت بتاع الراجل اليابانى
تانى حل طرأ على بالى إنى أشتغل وأحاول أنظم وقتى بين البيت والشغل عادى يعنى ما أنا كنت
بأشتغل فى مصر ومجال العمل بتاعى مطلوب جدا فى أمريكا وإن شاء الله ألاقى شغل ولو مبتدأة
وبدأت فعلا أبحث على الإنترنت بس الحل ده حلو لكن بيوجع لى ضميرى علشان الأولاد …
هأسيبهم فى المدرسة لغاية الساعة 6 وإبنى الصغير هأشوف له داى كير كنت سمعت إن فيه
واحدة مسلمة فاتحة داى كير للولاد الصغيرين طيب وابعد عن ولادى كل ده
وأفكار كتير وحواديت فى دماغى ومش عارفة أطلع من فكرة وأدخل فى اللى بعدها
طيب أعمل إيه؟
زوجى كان بيقول لى عايزة تشتغلى إنتى حرة بس لو بتحسبيها ماديا شوفى تكاليف الحضانة وتكاليف ولدين فى المدرسة وحطى عليهم
تكاليف البنزين وتكاليف مثلا لبس وهدوم وصيانة عربية يبقى لازم المرتب يكون بيغطى ده كله وكمان أكتر للتعويض عن وجع الدماغ
ولاقيت كلامه صح فعلا لازم الشغل يغطى ده وزيادة علشان يبقى منه فايدة مادية على الأقل
وبحثت أكتر فى الإنترنت ووقع فى إيدى كتاب لواحد إسمه كيوساكى
Robert Kiyosaki
الراجل ده غير عندى مفاهيم كتيرة جدا كان بيتكلم عن نقطة مهمة وهى إن الواحد مهما أخد فلوس بيدخل فى تكاليف بقى وبيحسن
مستوى معيشته بعربية أو بيت أو أو ويرجع تانى يبقى عايز فلوس أكتر وهكذا
وقلت لنفسى ليه الواحد يدور إنه يزود دخله طيب ما يبص لمصاريفه ويقللها من غير ما أشتغل وأبعد عن أولادى بالعكس وأكون حرة
نفسى ولا بقى مدير آخد منه الإذن علشان إبنى تعبان ولا أنزل مصر أسبوع واحد أتحنس بشوفة أهلى وأرجع على طول علشان الأجازات
وبدأت أدور على طرق لتقليل المصاريف من مشتروات أسبوعية للأكل برة اللبس البنزين وفاتورة الغاز وهكذا
ومن هنا بدأ مشوارى مع التوفير بعد ما بدأت الغربة بالتبذير
أنا للأسف لم أعى جيدا قول رسول الله صلى الله عليه وسلم حينما وصانا أن نخشوشن لأن النعمة لا تدوم ولا فطنت لقول سيدنا عمر رضى
الله عنه حينما قال للرجل أوكلما إشتهيت إشتريت؟
علشان كده عايزة أعرفكم على طرق للتوفير بعضها ينفع لأمريكا وكندا فقط وبعضها ينفع من أى مكان فى العالم
وإتعلمت درس كبير مش ضرورى يكون عندك مشكلة مادية ومش لازم تستنى إن يحصل لك عجز فى موازنة البيت لكن إيه المانع إنك
توفرى فلوس زوجك ليكى ولأولادك ولزوجك
ومن هنا نشأت فكرة المدونة أو بلوج مغتربة هو بلوج يعلمك التوفير سواء فى الغربة أو فى وسط أهلك هو بلوج نتناقش فيه ونتحاور
ونستفيد من تجارب بعض علشان نبقى أمهات أحسن وزوجات أفضل
لقراءة باقى الأجــزاء
الجزء الأول
الجزء الثانى
الجزء الثالث
الجزء الرابع
طبعا انا اشكرك جداً على النصائح القيمة والمفيده
محض صدفة وجدت البلوج تبعك
اتمنى ان تستمري
وان لديك بعض الوقت ان تكتبي ما يجب فعله على القادم الجديد لامريكا
لان سفري بعد 8 ايام فقط
شكراً جزيلاً
أولا شكرا على كلماتك المشجعة وأتمنى أن تكون زائر دائم للبلوج لأنه بدون تعليقاتكم وكلامكم أشعر كأننى أكلم نفسى ههههه
رحلة موفقة وسعيدة بإذن الله
ثانيا : أتمنى لك كل التوفيق والسداد ونصيحتى الثمينة لك أن تحاول الإستفادة من غربتك فى كل شئ
أعلم أن فراق الأهل والأحبة صعب صعب … لكن إذا كلن ده قدر ومكتوب لنا فعلينا الإستفادة منه أقصى إستفادة .. ماديا وعلميا ونفسيا وإن شاء الله أحاول أكتب لكم عن السفر قريبا قبل ما تسافر
بلوج جميلة جدا ومفيدة جدً. زوجيي العزيز عمال يقولي اتعلمي اتعلمي! بس الشيء الأكيد اني هادخل على البلوج دا قبل ما اعمل شوبينج علشان اوفر انا كمان. بعد ما كان شعاري قرش زيادة تدفعيه ولا سنتي زيادة تمشيه هاعكسه.
هههههههه أول مرة أسمع المثل العظيم ده خخخخ فيه أوقات بيكون المثل ده صحيح ١٠٠٪ لما تكون طالع عينك من الصبح وعايزة تخلصى وفيه أوقات بتلاقى أبو ١٠٠ ممكن تشترية ب خمسة ساعتها ضميرك هيوجعك ..بس أنا مش بأقولك لك تمشى أنا بأقول لك بس إطبعى الكوبونات وإنتى فى مكانك … آآآه بس هتضطرى تمشى للبرينتر هههههه
السلام عليكم
يعطيك العافية على البلوج
خطوة ممتازة وتفيد كل المحتارين
انا من ثلاث ايام وانا ادور بالنت على مغتربة بامريكا تفيدني كنت حابه اسالك عندك مانع استفسر منك عن بعض الامور
وعليكم السلام ورحمة الله وبركاته
أختى العزيزة أم محمود .. سعيدة بالتعرف عليكي وأى سؤال أنا تحت أمرك لو عارفة أجاوبك بإذن الله ولو مش عارفة أسأل لك وأرد عليكي إن شاء الله
اهلا فيكي
السلام عليكم
وجدت مدونتك وانا ابحث بالنت عن اي احد مغترب في امريكا يساعدني ويجاوبني على بعض تساؤلاتي
لان زوجي يشتغل في شركة امريكية في فرجينيا بالضبط في ارلنغتون
وهو سافر على اساس انه بس يقعد ثلاث اسابيع لكن ما شاء الله مدير الشركة اعجب بشغله وخبره بانه محتاجه اكثر هناك تقريبا سنه
طبعا زوجي مش عارف ياخذ قرار لانه ما بيعرف طبيعة الحياه هناك مع العائله خصوصا انه عندي ثلاث اطفال ومحتاجين مدارس كمان ما اعرف مدى قدرتي على ارتداء النقاب وايضا ممارسة العبادات بشكل سهل هناك
ارجو اني ما اكون اطلت عليكي بالاسئلة
ولك دعوات في الغيب
مع خالص تقديري
أولا أهلا بيكم فى أمريكا
وربنا يفتح عليكم بالقرار السليم وأوصيكي وأذكرك بصلاة الإستخارة وربنا يعمل لكم اللى فيه الخير يا رب وينور بصيرتكم
بس ممكن تتعرضى لنظرات إستفسار وتعجب من الكبار أو أسئلة فكونى مستعدة بكلمات بسيطة تشعرى من أمامك أن هذا إختيارك أنت وليس غصب من والدك أو زوجك ده بيفرق معاهم كتير هنا مجتمع بيقف فى صف المرأة ويشعر ان الحجاب والنقاب ده مفروض علينا من أزواجنا فدايما فهميهم إن ده إختيارك وبرغبتك وبكامل حريتك .. ممكن تتعرضى لنظرات وتساؤلات من الصغار وده طبيعى جدا جدا … نظراتهم البريئة وكلامهم المضحط يعنى لسه من كام يوم فيه بنت صغيرة أمام مدرسة ولادى فضلت تبص لى وسألت معلمتها هو ده راجل واللا ست هههههه طبعا أنا ضحكت كثيرا ومشيت من أمامها حتى أرفع الحرج عن المعلمة .. لكن ممكن لو كان بجوارى أحد أطفالى كان يتضايق مثلا .. فلازم تعرفيهم لما يسألوك أصحابك فى المدرسة مامتك عاملة ليه كده يقول لهم إيه بشكل بسيط يفهمه الصغار .. وحاولى تخلى أولادك يكونوا فخورين بإسلامهم .. عارفة إنه صعب لكن أرجع وأقول لك جهاد وده أجره مش بسيط يا رب يرزقنا الأجر ولا يحرمنا منه يا رب .. فيه ناس بتقلع الحجاب نتيجة ضغط أولادها عليها يعني الأولاد مثلا متضايقين من شكل والدتهم وبيحرجوا أمام زملاءهم فى المدرسة .. خللى بالك من النقطة دى ..
الحياة هنا بالنسبة للرجال بتكون سهلة جدا جدا يعني كل شئ متوافر مفيش زحمة .. تجديد الرخصة عمل الأوراق الرسمية كله سهل والمعاملة والحمد لله كويسة جدا لأن كله بالقانون يعنى مفيش حد يقدر يغلس عليكم لمجرد إنكم مسلمين مثلا أو عرب هو فيه ناس ممكن تكون جواها ضغينة لكن مش هتقدر تضايقكم على المستوى الرسمى يعنى بالعربى مفيش موظف هيوقف لكم أوراقكم لمجرد إنه بيكره المسلمين … ومتحطيش الموضوع ده فى دماغك من أساسه وتعاملوا مع الناس عادى
بالنسبة للمدارس التعليم هنا فى مدارس الحكومة مجانى وكويس والحمد لله طبعا الأولاد بيتعرضوا لثقافات تانية وكلام وهنا ييجي دورنا دااائما فى التصحيح والتوجيه والإرشاد وتذكيرهم بأننا مختلفون ولكن مش لوحدنا فكل الناس هنا مختلفون بأمريكا وده مش عيب …التربية هنا جهاد وربنا يعطينا الأجر يا رب
إرتداء النقاب هنا سهل لأن كل واحد بيعمل اللى هو عايزه اللى بيقلع يقلع واللى يلبس يلبس
العبادات إعملى اللى إنتى عايزاه محدش هيقول لك حاجة .. خرجتى مع أولادك وزوجك فى حديقة أو فى الجبال وعايزة تصلى إفرشى سجادتك على الأرض وصلى بس حطى حاجز خلفك مثلا باب العربية .. عايزة تصلى وإنتى قاعدة براحتك … تسبحى تقرأى قرآن براحتك .. عايزة تعلمى ندوة مثلا تدعى فيها الناس للإسلام برضه براحتك إعملى الندوة وشوفى إذا كان بمنطقتك محتاجة ترخيص أو إذن بحاجة .. عايزة تجمعى سيدات مسلمات فى بيتك مثلا صباحا لحفظ القرآن تقدرى مفيش مشكلة مش هتلاقى البوليس عندك بيقول لك تجمع والكلام الفاضى ده لأ .. روحى الجامع تعرفى على سيدات هناك وهتلاقى حلقات علم فى المسجد إعملى نشاطات فى المسجد لربط الصغار مثلا بالمسجد أو نشاطات للسيدات مفيش أحلى من صحبة القرآن والمسجد ربنا يرزقك الصحبة الصالحة يا رب
أى سؤال قولى ما يهمكيش أنا هأسأل لك كمان صديقة لى منتقبة للتأكد من كلامى لكن اللى أعرفه هنا إعمل ما تشائين طالما مفيش تعدى على القانون ولا على الآخرين
الله يخليكي انا غلبتك معي
بس من الممكن انهم يدرسو في مدارس الحكومة ؟يعني مش صعب عليهم لانه الدراسة باللغة الانجليزية زي ما سمعت
لانه عندنا بالاردن تأسيس الاولاد باللغة الانجليزية مش قوي كثير يعني ما وصل لدرجة انهم يقدرو يتحادثو فيها مع احد
وبالنسبة للشقة وغلاء الاكل والمعيشة ممكن نلاقي صعوبة
كثرت انا عليكي الاسئلة سامحيني
بس كنت حابه اعرف كم الدخل الي نحتاجه علشان نعيش هناك حياة كريمة
لانه المرتب الاول كان مؤقت وزوجي حيوقع عقد جديد معاهم وهو مش عارف كم يطلبهم مرتب
الله يسر امرك ويرزقك من حيث لا تحتسبي
تحياتي
بصى يا ستي بالنسبة للمدارس آه يقدروا يدرسوا إنتى أولادك بأى صف؟ فى الأول هيلاقوا صعوبة بس هم هنا متفهمين جدا جدا إبنى السنة اللى فاتت كان فى الصف الثالث الإبتدائى وكانت معاهم طفلة لسه جاية من دولة فى آسيا مش فاكرة إسمها وما تعرفس ولا كلمة إنجليزى .. هم هنا ليهم أسلوبهم والأطفال ما شاء الله بيلقطوا بسرعة جدافى الأول بس هيكون صعب شهر فى التانى هتلاقيهم بربنط زى ما بنقول فى مصر .. أنا عادة مش بأتكلم مع أولادى إنجليزي بالبيت إبنى التانى دخل المدرسة وهو لا يعرف كلمة واحدة إنجليزي قعد فى النصف الأول من العام الدراسى صامت تماما فى الفصل والمدرسة بتاعته بيتقول لى طبيعي وأنا متأكدة إنه بيسمه ويخزن وهيتكلم على النص التانى وفعلا كلامها كان سليم ١٠٠ ٪ والولد من ساعتها فاتح فى الكلام ومش بيسكت فمتقلقيش خالص عليهم وهنا المدرسين طيوبين وحبوبين أغلبهم يعني … ممكن تدخلى أولادك المدرسة الإسلامية بالولاية لكن فى الغالب بتكون مصاريفها غالية وعلى حسب الميتوى .. الحقيقة تجربتى مع المدارس الإسلامية مش حلوة فهو على حسب الولاية .. فيه ولايات المدرسة الإسلامية فيها حلوة وقوية وفيه ولايات لأ فدى محتاجة سؤال وفيه ناس تقول لا يمكن أدخل ولادى مدرسة مش إسلامية مش أوبشن أساسا عندهم .. محتاجة نصيحة لوجه الله من حد يكون جرب المدرسة الإسلامية فى ولايتكم وعلى حسب مكانها برضه ممكن تكون بعيدة جدا عليكم
أما بالنسبة للمدارس خشى على الموقع ده http://www.schooldigger.com/go/VA/schoolrank.aspx
.. الترتيب اللى عندك فى اللينك للمدارس الإبتدائية بس ممكن تغيري من فوق على اليمين الأوبشن وتختارى الإعدادى والثانوى لو ولادك بالمراحل دى
ده فيه ترتيب المدارس الحكومية الأمريكية بولاية فرجينيا الترتيب بيكون على أساس نتيجة الإمتحان بتاع الولاية هتلاقى مكتوب إسم المدرسة وجنبه المنطقى التعليمية .. طبعا إحنا العرب بنحب ندخل ولادنا أحسن مدارس أكيد
هتشوفى الأول المنطقة بتاعة المدرسة فين وبعدين دورى على إيجار داخل حدود المنطقة دى علشان تضمنى إن الأولاد يدخلوا المدرسة اللى عاجباكى دى .. عادة المدارس الحلوة بيكون إيجارها عالى
مثلا لو بصيتي فى الجدول هتلاقى المدرسة رقم 24
Jamestown Elementary إسمها كان
تضغطى عليها هيعطيلك العنوان تروحى على أى ويب سايت بتاع إيجارات عقارات مثلا فيه واحد إسمه
Hotpads.com
تحطى العنوان وتعملى بحث هيجيب لك اللى عنده فى الإيجار وممكن تقللى البحث بإنك تقولى مش عايزة أقل من كذا غرفة نوم وكذا حمام أو السعر لا يزيد عن كذا وهتلاقى برضه فى الأوبشن حاجة إسمها
schools
إضغطى عليها هتنزل لك قاشمة إختارى مثلا الإبتدائى فيظهر لك المدارس الإبتدائى ولما تقفى عليها بالماوس هيعمل لك هايلايت على المنطقة اللى تبع المدرسة دى ولما تيجي تأجى إسألى هل المكان هنا تبع المدرسة الفلانية يعني كلميهم وإسأليهم بالتليفون للتأكد … آه حاجة كمان لازم تتأكدى إن باص المدرسة بيآخد الأولاد لأن عندنا مثلا هنا فى الولاية – كلورادو اللى أنا فيها – لو البيت فى محيط ١ ميل من المدرسة يبقى الطفل مالهوش باص يعني إنتى اللى تودية وتجيبيه من المدرسة فلازم تكونى مستعدة للموضوع ده برضه .. وتقدرى تدخلى على المنطقة التعليمية علشان تعرفى القوانين
بصى الموقع ده
http://www.apsva.us/Page/1
بتاع المنطقة التعليمية بتاع آرلنجتون .. ده اللينك بتاع الخريطة يعنى تحطى العنوان يطلع لك المدرسة
http://gis.arlingtonva.us/gallery/map.html?webmap=65b4c05498c94424bc8f5afd352245e6
وهنـا هتلاقى لينك على الباص وهتلاقى أجوبة لحاجات كتير بخصوص موضوع التوصيل ده
http://www.apsva.us/transportation
أنا بأعتقد إن من الحاجات المهمة جدا هو موضوع المدرسة ده لأن المدرسة الكويسة بيكون المدرسين مهتمين بدرجات الطلاب .. الأهالى مهتمين بالدراسة ودرجات الولاد وكذلك المدرسة مهتمة بترتيبها بين المدارس وبالتالى المدرسة بيقل فيها الكلام اللى بالى بالك … ولو إنه مش شرط بس أعتقد العيال بتكون أكثر إلتزاما وعلى الأقل المدرسين بيشدوا عليهم علشان مستوى المدرسة
فيه عندنا مدارس إسمها ماجنيت سكولز ودى بتكون للنابغين فقط وعلشان يدخلوها لازم يجتازوا عدة إختبارات … بس حبيت أوضح لك النقطة دى علشان لو لقيتي مدرسة حلوة وقالوا لك إنها ماجنيت تبقي عارفة هى إيه الماجنيت دي
كمان بدي اسألك عن المواد اللي بيدرسوها
مناسبة لديننا وثقافتنا وعاداتنا
وانتي باي ولاية
اعذريني عالاطالة
لا تعتذري يا بنتى … بتعتذرى على إيه بس
الواحد دايما فى الأول بيكون مش عارف حاجة وربنا بيسخر له اللى بيساعدوه .. ربنا بس يكتب لنا الأجر .. بصى هأرد عليكي بالليل لأنى هأنزل أجيب الأولاد من المدرسة دلوقتى وبعدين عندنا واجب وحفظ وخلافه … وكمان علشان أدور لك على روابط للولاية عندكم … سامحيني لكن إن شاء الله أرجع لك بالمفيد
بصى هم هنا مش بيدرسوا دين نهائى للأولاد يعني أي كلام فى الدين هيكون بين العيال وبعضها يعني أنا إبنى جالى فى يوم متنرفز بيقول لى أصحابه بيقولوا له إن جيساس – اللى هو سيدنا عيسى عليه السلام – هو اللى عملنا … أستغفر الله العظيم طبعا هو ده معتقدهم بس هو قعد يقول لهم لأ وهم مش مصدقين .. قلت له خلاص يا حبيبي هم فاهمين كده دلوقتى إن شاء الله لما يكبروا يفهموا إن ربنا واحد وشرحت له المعتقد بتاعهم بس علشان يبقى فاهم من غير ما أشتم فيهم ولا أقول عليهم كلمة وحشة بهدوووء كده علشان الدنيا تمشى .. أنا فى الأول كنت بأتنرفز وبأشخط وبعدين إتعلمت الصبر والحمد لله والهدوء
فيه مدارس بتحتفل بالهالويين والكريسماس والفالنتاين والكلام ده .. طبعا لازم نفهم ولادنا إن ده مش أعيادنا و و و وبرضه أرجع أقول لك الهدووء ومرات خليه يآكل مع أصحابه فى الإحتفال .. مش هتقدرى تحرميه بالذات من الحلويات لكن فهميه بالراحة إحنا مش بنعمل كذا وكذا ومش بنلبس الهالويين .. وماما ممكن تجيب لك لبس تنكرى إلبسه وإلعب بيه فى أى وقت تانى من السنة
على فكرة فيه ناس هنا مسلمين وأيضا المسيحين المتشددين بيعملوا لولادهم هوم سكول يعني بيعلموهم من البيت أو الأونلاين سكول يعنى التعليم عن طريق الإنترنت بس الإمتحان بيكون فى المدرسة التابع لها السكن حفاظا على الأولاد من الإختلاط بغيرهم
الموضوع ده أنا فكرت فيه كتير لكن مشكلتى إن أولادى ولاد مش بنات محتاجين الخروج والتنطيط واللعب العنيف والإختلاط بالمجتمع وتعلم الدفاع عن النفس ومواجهة المواقف .. ما ينفعش أقعدهم فى البيت جنبى
بالنسبة للدخل الشهرى
الويب سايت ده
http://www.cnpp.usda.gov/USDAFoodCost-Home.htm
فيه تكلفة الأكل فى الشهر على حسب السن وعدد أفراد الاسرة وطريقة المعيشة
بصى المنتدى ده فيه أسئلة وأجوبة ومواضيع كلها خاصة بفرجينيا
http://www.city-data.com/forum/virginia/
آه كمان نقطة أحب أوضحها لك وهى التأمين الصحى هل هو تبع الشغل ليكم كلكم واللا إيه النظام؟ لأن أنظمة التأمين هنا تلف دماغك من كترها وتنوعها والتأمين الصحى هنا غالى
يعني مثلا إحنا بندفع تأمين ٤٠٠ دولار للولاد كل شهر وأنا حوالى ٥٤٠ كل ٣ شهور ده غير إنك بتدفعى جزء من التحاليل والأشعات لو فيه
شوفى الويب سايت ده بيتكلم عن تكاليف المعيشة هناك
http://www.areavibes.com/arlington-va/cost-of-living/
ده اللى قدرت أجمعه دلوقتى لو لقيت حاجة تانية هأبعت لك إن شاء الله
مشكووورة الله يجزيك الف خير
مش مشكلة انا بانتظار ردك خذي راحتك انا عارفة المسؤليات على كل ام
احنا عندنا في الاردن ليل والصبح ان شاء الله
اشيك كل ساعة واشوف ردودك اذا قدرتي تردي
الله يسهل امرك ويخليلك ولادك وجوزك ويكونوا قرة عين الك
اهلا فيكي
مشكوورة عالمعلومات
الوافية
كونتيلي صورة ممتازة عن الوضع هناك
وربنا يجيب الي فيه خير
الحمد لله حاولت أجاوي قدر المستطاع ولو فيه أسئلة تانية إبعتى لى على طول وربنا يبصركم بالخير إن شاء الله