السلام عليكم وأهلا بيكم معايا في رحلاتي الإسبوعية لتحقيق الأهداف
الأسبوع الماضي كان مليئ بالأحداث المهمة في حياتي وهأبقى أكلمكم عنها بالتفصيل بعد شوية
الإسبوع اللي فات كان كله في النقل .. شيئ صعب جدا جدا في الواقع
أول مرة أعزل في أمريكا كان من ٦ سنوات تقريبا بعد ما وصلنا أمريكا وقعدنا في شقة لمدة سنة ونصف نقلنا شقة أخرى .. لو تصدقوني وقتها لميت البيت في ٣ ساعات بالكتير وجبنا أصغر عربية في اليوهول – عربيات الشحن يعني للي ما يعرفهاش- وتم الموضوع في سلام وبسهولة
ومع إني عزلت بعدها يمكن ٣ مرات كمان – غير المرة دي – إلا إن المرة دي كانت متعبة جدا جدا واللي زاد وغطى كمان إن جالي دور برد شديد يوم النقل جعلني فعلا طريحة الفراش لمدة ٣ أيام متتالية مش قادرة أقوم من السرير
أجرنا أكبر عربية من اليو هول ومع ذلك حاجاتنا كتير ومكانتش العربية مكفية!! نقلنا بعض الحاجات في عربياتنا وبمساعدة صديق لينا فضل رايح جاي معانا ربنا يكرمه خلصت المهمة بعد عناء وشقاء
إلا إني مبسوطة من النقل .. على الرغم من إننا نقلنا في شقة مساحتها أقل من نصف المساحة اللي كنا عايشين فيها وهأبقى أشرح لكم بالتفصيل لاحقا إن شاء الله
ودي تورتة بسيطة – مش أنا اللي عاملاها – علشان كان عيد ميلادي … أيوة عندي سنة واحدة بس ههههه
أهداف الأسبوع الماضي: كانت النقل وتم والحمد لله بسلام
أهداف هذا الأسبوع إن شاء الله
شخصية
إستكمال قراءة الكتاب
حلقات الوعد الحق ٤٠-٤١
صلاة القيام ٣ مرات هذا الإسبوع إن شاء الله
الصلاة على وقتها مع المحافظة على السنن
قراءة يوميا بالمصحف الشريف
تمارين رياضية – مرتين على الأقل
العائلة والزوج
الخروج مع زوجي بمفردنا – إذا سمح لنا الجو
صلة الرحم – مكالمة فرد من أفراد الأسرة الكبيرة بمصر
الوصول لقرار نهائي بشأن السفر لمصر في الصيف – سأكتب لكم المزيد إن شاء الله لاحقا
معاودة وإستكمال قصص السيرة النبوية مع أولادي
قراءة في المصحف الشريف مع الأولاد – مرتين على الأقل هذا الأسبوع
البيت
توضيب البيت وفك الكراتين والصناديق
محاولة تحقيق مبدأ البسلطة أو المينيماليزم مبدئيا في هدوم الأولاد
المدونة
الكتابة بشكل يومي
إستكمال مرحلة أخرى من الأوراق التعليمية
أتمنى تكون أهدافي مش مجرد أقول وتبقى أفعال بإذن الله .. يا ترى حد لسه بيحط برضه أهدافه منكم؟ يا ريت تشاركونا
Leave a Reply